۱ سچّ خُداوند تُم سے یُوں فرماتا ہے، میرے خادِم جوزف سمِتھ جُونئیر، اور میرے خادِم سِڈنی رِگڈن، اور میرے خادِم حائرم سمِتھ، اور تُمھارے مُشِیران جو ابھی ہیں اور اِس کے بعد مُقرّر کیے جائیں گے۔

۲ اور تُمھیں بھی، میرے خادِم ایڈورڈ پارٹریج، اور اُس کے مُشِیران؛

۳ اور میرے وفادار خادِموں کے لیے بھی جو صِیُّون میں کلِیسیا کی اعلیٰ مجلِس کے ہیں، پَس وہ یہی کہلائے گی، اور میری کلِیسیائے یِسُوع مسِیح برائے مُقَدَّسین آخِری ایّام کے بُزرگوں اور لوگوں سے جو پُوری دُنیا میں بِکھرے ہُوئے ہیں؛

۴ پَس آخِری دِنوں میں میری کلِیسیا اَیسے کہلائے گی، یعنی کلِیسیائے یِسُوع مسِیح برائے مُقَدَّسین آخِری ایّام۔

۵ مَیں تُم سب سے سچّ کہتا ہُوں: اُٹھو اور مُنوّر ہو جاؤ، کہ تیرا نُور قَوموں کے لیے عَلم ہو؛

۶ اور کہ صِیُّون کی سرزمِین پر، اور اُس کی میخوں پر ایک ساتھ اِکٹھا ہونا دفاع کے لیے ہو، اور طُوفان سے، اور قہر سے پناہ کے لیے ہو جب وہ بغیر ملاوٹ کے پُوری زمِین پر نازِل کِیا جائے گا۔

۷ فار ویسٹ شہر میرے لیے پاک اور مُتبرک سرزمِین ہو؛ اور وہ مُقَدَّس ترین کہلائے گا، پَس وہ زمِین جِس پر تُو کھڑا ہے، پاک ہے۔

۸ پَس، مَیں تُمھیں حُکم دیتا ہُوں کہ میرے لیے گھر تعمیر کرو، میرے مُقَدَّسین کے اِکٹھے ہونے کے لیے، تاکہ وہ میری عِبادت کریں۔

۹ اور اِن آنے والی گرمیوں میں اِس کام کا شُروع، اور بُنیاد اور کارِ مُقَدَّم ہو۔

۱۰ اور آنے والی چار جولائی کو آغاز کِیا جائے، اور اُس وقت سے لے کر میرے لوگ جاں فِشانی سے میرے نام پر گھر کی تعمیر کے لیے مُشقّت کریں؛

۱۱ اور اِس دِن سے شُروع کر کے ایک برس میں وہ پھِر سے میرے گھر کی بُنیاد کی تعمیر کرنا شُروع کریں۔

۱۲ یوں وہ اُسی وقت سے جاں فِشانی سے مُشقّت کریں جب تک یہ ختم نہ ہو جائے، کونے کے سِرے کے پتھر سے لے کر چھت تک، جب تک کوئی اَیسی چِیز نہ رہ جائے جو تکمیل تک نہ پُہنچی ہو۔

۱۳ مَیں تُم سے سچّ کہتا ہُوں، میرا خادِم جوزف، نہ ہی میرا خادِم سِڈنی، نہ ہی میرا خادِم حائرم میرے نام کے لیے گھر تعمیر کرنے کے لیے مزید کوئی قرض لیں؛

۱۴ بلکہ میرے نام کے لیے گھر کی تعمیر اِس نمونے کے مُطابق ہو جو مَیں اُن کو دِکھاؤں گا۔

۱۵ اور اگر میرے لوگ اُسے اِس نمونے کے مُطابق تعمیر نہیں کرتے جو مَیں اُن کی صدارت کو دِکھاؤں گا، مَیں اُسے اُن کے ہاتھوں قَبُول نہ کرُوں گا۔

۱۶ اَلبتہ اگر میرے لوگ اُسے اِس نمونے کے مُطابق تعمیر کرتے ہیں جو مَیں اُن کی صدارت کو دِکھاؤں گا، یعنی کہ جوزف اور اُس کے مُشِیروں کو، پھِر مَیں اُسے اپنے لوگوں کے ہاتھوں قَبُول کرُوں گا۔

۱۷ اور پھِر، مَیں تُم سے سچّ کہتا ہُوں، یہ میری مرضی ہے کہ میرے مُقَدَّسین کے اِکٹھے ہونے کے سبب سے فارویسٹ شہر کی تیزی سے تعمیر ہو۔

۱۸ اور دُوسری جگہیں بھی اِرد گِرد کے علاقوں میں میخوں کے طور پر مُقرّر کی جائیں، جَیسے وہ وقتاً فوقتاً میرے خادِم جوزف سمِتھ پر ظاہر کی جائیں گی۔

۱۹ پَس دیکھو، مَیں اُس کے ساتھ ہُوں گا، اور اُسے اپنے لوگوں کے سامنے مُقَدَّس ٹھہراؤں گا؛ یعنی اِس کو مَیں نے بادِشاہی اور خدمت کی کُنجیاں دی ہیں۔ اَیسا ہی ہو۔ آمین۔