۱ یقیناً، خُداوند یُوں فرماتا ہے، مَیں اُن کی تمام فاضل اِملاک کو صِیُّون میں میری کلِیسیا کے اُسقُف کے ہاتھ میں دینے کا تقاضا کرتا ہُوں،

۲ میرے گھر کی تعمیر کے لیے، اور صِیُّون اور کہانت کی بُنیاد ڈالنے کے لیے، اور میری کلِیسیا کی صدارت کے قرض کے لیے۔

۳ اور یہ میرے لوگوں کی دہ یکی کا شُروع ہو گا۔

۴ اور اُس کے بعد، وہ جو اِس طرح دہ یکی ادا کر چُکے ہیں اپنے تمام سالانہ نفع کا دسَواں حِصّہ ادا کریں گے؛ اور میری پاک کہانت کے لیے، یہ اُن کے واسطے ہمیشہ کے لیے مُستقل قانون ہو گا، خُداوند فرماتا ہے۔

۵ مَیں تُم سے سچّ کہتا ہُوں، اَیسا ہو گا کہ وہ سب جو صِیُّون کی سرزمِین میں جمع ہوں گے اپنی فاضل اِملاک کی دہ یکی ادا کریں گے، اور ِاِس قانون پر عمل کریں گے، ورنہ وہ تُمھارے درمیان میں بسنے کے اہل نہ پائے جائیں گے۔

۶ اور مَیں تُم سے کہتا ہُوں، اِس کو پاک مانو، اور اِس قانون سے صِیُّون کی سر زمِین کو مُقَدَّس ٹھہراؤ، تاکہ میری شَرِیعتیں اور میرے فیصلے اِس پر قائم کیے جا سکیں، اِس طرح یہ سب سے زیادہ مُقَدَّس ہو، دیکھو، اگر میرے لوگ اِس قانون پر عمل نہیں کرتے، دیکھو، مَیں تُم سے سچّ کہتا ہُوں، یہ تُمھارے واسطے صِیُّون کی سرزمِین نہ ہوگی۔

۷ اور یہ صِیُّون کی تمام میخوں کے لیے نمونہ ہو گا۔ اَیسا ہی ہو۔ آمین۔