۱ دیکھ، اولیور، مَیں تُجھ سے کہتا ہُوں، تُجھے یہ عطا کِیا جائے گا کہ کلِیسیا تیری سُنے گی، مُکاشفوں اور حُکموں کے بارے میں جو مَیں نے دیے ہیں، جو کُچھ بھی تُو مددگار کے وسِیلے سے اُنھیں سِکھائے گا۔

۲ لیکن دیکھ، مَیں تُجھ سے سچّ سچّ کہتا ہُوں، اِس کلِیسیا میں کوئی اور اَحکام اور مُکاشفے پانے کے لیے مُقرّر نہیں کِیا جائے گا، سِوا میرے خادِم جوزف سمِتھ جُونیئر کے، کیوں کہ وہ اُنھیں مُوسیٰ کی مانِند پاتا ہے۔

۳ اور تُجھے، حتیٰ کہ ہارُون کی طرح، اُن چِیزوں کا فرماں بردار ہونا ہے جو مَیں اُسے دُوں گا، کہ قُدرت اور اِختیار کے ساتھ اِیمان داری سے کلِیسیا کے لیے اَحکام اور مُکاشفوں کا اِعلان کر۔

۴ اور اگر کسی وقت مددگار تُجھے کلِیسیا کے لیے حُکماً وعظ کرنے یا تعلیم دینے کی ہدایت کرے، تُو اَیسا ہی کرنا۔

۵ لیکن تُو اُسے حُکم کے طور پر نہ لِکھے گا، بلکہ حِکمت کے طور پر؛

۶ اور تُو اُسے حُکم نہ دے گا جو تیرا سربراہ ہے، اور کلِیسیا کا سربراہ ہے؛

۷ پَس مَیں نے اُسے بھیدوں کی، اور مُکاشفوں کی جو سربمُہر کیے گئے ہیں، کُنجیاں دی ہیں، جب تک مَیں اُس کی جگہ اُن کے لیے کسی اور کو مُقرّر نہ کرُوں۔

۸ اور اب، دیکھ، مَیں تُجھ سے کہتا ہُوں کہ تُو لامنوں کے پاس جائے گا اور اُن میں میری اِنجِیل کی مُنادی کرے گا؛ اور جتنا زیادہ وہ تیری تعلیمات کو قَبُول کریں، تو تُو اُن کے درمیان میں میری کلِیسیا قائم کرنا؛ اور تُو مُکاشفے پائے گا، لیکن اُن کو حُکم کے طور پر نہ لِکھنا۔

۹ اور اب، دیکھ، مَیں تُجھ سے کہتا ہُوں کہ یہ ظاہر نہیں کِیا گیا، اور کوئی شخص نہیں جانتا کہ صِیُّون کا شہر کہاں تعمیر ہو گا، لیکن یہ بعد میں بتایا جائے گا۔ دیکھ، مَیں تُجھ سے کہتا ہُوں کہ وہ لامنوں کے ساتھ سرحدوں پر ہو گا۔

۱۰ تُو اِجلاس کے ختم ہونے تک اِس جگہ سے نہ جانا؛ اور میرا خادِم جوزف مجلِس کی رائے سے اُس پر صدارت کے لیے مُقرّر کِیا جائے گا، اور جو وہ تُجھے کہے، تُو اِعلان کرے گا۔

۱۱ اور پھِر، تُو اپنے بھائی حائرم پیج کے پاس جانا، خلوت میں بات چیت کرنا اور اُسے سمجھانا کہ وہ چِیزیں جو اُس نے پتھر پر سے لِکھیں ہیں مُجھ سے نہیں ہیں اور کہ شیطان نے اُسے دھوکا دیا ہے؛

۱۲ پَس، دیکھ، یہ چِیزیں اُس کے لیے مُقرّر نہیں کی گئی ہیں، نہ کوئی چِیز اِس کی کسی کلِیسیا پر کلِیسیائی عہُود کے خِلاف مُقرّر کی جائے گی۔

۱۳ پَس سب باتیں قرینے کے ساتھ عمل میں آئیں، اور کلِیسیا کی مشترکہ رضامندی کے ساتھ، اِیمان کی دُعا کے ساتھ۔

۱۴ اور تُو، لامنوں کے پاس سفر پر جانے سے پہلے، اِن سب باتوں کا، کلِیسیا کے عہُود کے مُطابق، تصفیہ کرنے میں مدد کرنا۔

۱۵ اور تیری روانگی کے وقت سے لے کر تیری آمد کے وقت تک تُجھے یہ عطا کِیا جائے گا کہ تُجھے کیا کرنا ہے۔

۱۶ اور تُجھے ہمہ وقت، شادمانی کے راگ سے میری اِنجِیل کی مُنادی کرتے ہُوئے، اپنا مُنہ کھولنا ضرور ہے۔ آمین۔