۱ مَیں تُجھ سے سچّ سچّ کہتا ہُوں، میرے خادِم فریڈرک جی وِلیمز: اُس کی آواز سُن جو فرماتا ہے، خُداوند اپنے خد ا کے کلام، اور اُس بُلاہٹ کو سُن جِس سے تُو بُلایا گیا ہے، یعنی میری کلِیسیا میں اعلیٰ کاہن، اور میرے خادِم جوزف سمِتھ جُونیئر کے لیے مُشِیر ہونے کے لیے؛

۲ جِسے مَیں نے بادِشاہی کی کُنجیاں دی ہیں، جو ہمیشہ اعلیٰ کہانت کی صدارت کی ملکیت ہیں :

۳ پَس، مَیں اُسے قَبُول کرتا ہُوں اور اُسے برکت دُوں گا، اور تُجھے بھی، جِس قدر تُو مشورت میں اِیمان دار و دیانت دار ہو گا، اُس عہدے پر جِس میں مَیں نے تُجھے مُقرّر کِیا ہے، ہمیشہ دُعا میں، باآوازِ بُلند اور دِل میں، دُنیا کے سامنے اور پوشِیدگی میں، اور اپنی خدمت میں بھی اِنجِیل کی مُنادی کر، زِندوں کی سرزمِین میں، اور اپنے بھائیوں کے درمیان میں۔

۴ اور یہ فرائض نبھا کر تُو اپنے ہم عصروں کے ساتھ سب سے بڑی بھلائی کرے گا، اور اُس کے جلال کو بڑھائے گا جو تیرا خُداوند ہے۔

۵ پَس، اِیمان دار بن؛ اُس عہدے پر قائم رہ جِس میں مَیں نے تُجھے مُقرّر کِیا ہے؛ کم زوروں کی دست گیری کر، اور اُن ہاتھوں کو اُٹھا جو ڈِھیلے ہیں، اور ناتواں گھٹنوں کو توانا کر۔

۶ اور اگر تُو آخِر تک اِیمان دار رہے، تُو دائمی زِندگی کا تاج پائے گا اور اُن مکانوں میں اَبَدی زِندگی جو مَیں نے اپنے باپ کے گھر میں تیار کیے ہیں۔

۷ دیکھ، اور نظر کر، یہ الفا اور اومیگا، یعنی یِسُوع مسِیح کا کلام ہے۔ آمین۔