របៀបដើម្បីទទួលវិវរណៈ និងការបំផុសគំនិត សម្រាប់ជីវិតផ្ទាល់ខ្លួនរបស់អ្នក

ដោយអែលឌើរ រីឆាដ ជី ស្កត

នៃកូរ៉ុមនៃពួកសាវកដប់ពីរនាក់

ហេតុអ្វីក៏ព្រះអម្ចាស់ចង់ឲ្យយើងអធិស្ឋានដល់ទ្រង់ ហើយសុំ ? ដោយសារនោះជារបៀបដែលវិវរណៈត្រូវបានទទួល ។

នរណាដែលឈរនៅវេទិកានេះ ដើម្បីផ្ដល់សារលិខិត ទទួលបានកម្លាំង និងការគាំទ្រមកពីសមាជិកទាំងអស់ទូទាំងពិភពលោក ។ ខ្ញុំមានអំណរគុណណាស់ចំពោះការគាំទ្រដូចគ្នានេះ មកពីភរិយារបស់ខ្ញុំនៅឯម្ខាងទៀតនៃវាំងនន ។ អរគុណ ចានីន ។

ព្រះវិញ្ញាណបរិសុទ្ធ ទំនាក់ទំនងព័ត៌មានសំខាន់ដែលយើងត្រូវការ ដើម្បីដឹកនាំយើងនៅក្នុងដំណើរជីវិតរមែងស្លាប់ ។ នៅពេលព័ត៌មានច្បាស់ ហើយសំខាន់ វាសមនឹងដាក់ចំណងជើងវិវរណៈ ។

ឧទាហរណ៍មួយអំពីវិវរណៈ នឹងជាការដឹកនាំ ដែលប្រធាន ស្ពែនស៊ើរ ដបុលយូ ឃឹមបឹល បានទទួលបន្ទាប់ពីការទូលអង្វរជាយូរ និងជាបន្តបន្ទាប់ទៅកាន់ព្រះអម្ចាស់របស់គាត់ ស្ដីអំពីការផ្ដល់បព្វជិតភាពទៅដល់បុរសសក្ដិសមទាំងអស់ក្នុងសាសនាចក្រ ដែលពេលនោះវាមានសម្រាប់ តែពួកគេមួយចំនួនប៉ុណ្ណោះនោះ ។

ឧទារហណ៍មួយទៀតអំពីវិវរណៈ គឺជាការណែនាំនេះ ដែលផ្ដល់ទៅដល់ប្រធានយ៉ូសែប អេហ្វ ស៊្មីធ ថា៖ « ខ្ញុំជឿថា យើងបានដើរទៅមុខ ហើយយើងនៅក្នុងវត្តមានរបស់សារទូតសួគ៌ា និងតួអង្គពីសួគ៌ា ។ យើងពុំបំបែកចេញពីពួកទ្រង់ឡើយ ។ … យើងមានទំនាក់ទំនងជិតស្និតនឹងសាច់ញាតិ, ជីដូនជីតារបស់យើង…ដែលបានលាចាកទៅមុនយើងក្នុងពិភពវិញ្ញាណ ។ យើងពុំអាចបំភ្លេចពួកគាត់បានឡើយ យើងពុំឈប់ស្រឡាញ់គាត់ឡើយ យើងតែងតែនឹកចាំពួកគេក្នុងដួងចិត្តយើង ហេតុដូច្នេះ យើងជាប់ទាក់ទង និងរួបរួមជាមួយពួកគាត់ដោយចំណងដែលយើងពុំអាចផ្ដាច់បាន… ។ បើនេះជាករណីជាមួយយើង នៅក្នុងជីវិតរមែងស្លាប់ ដែលហ៊ុំព័ទ្ធទៅដោយភាពទន់ខ្សោយក្នុងជីវិតរបស់យើង… តើវាកាន់តែប្រាប់ច្បាស់យ៉ាងណាទៅទៀត… ដើម្បីជឿថា អ្នកទាំងឡាយដែលស្មោះត្រង់, ដែលបានស្លាប់ទៅ … អាចមើលឃើញយើងកាន់តែច្បាស់ ជាងយើងអាចមើលឃើញពួកគាត់, ថាពួកគាត់បានដឹងច្បាស់ជាងពួកយើង ។… យើងរស់នៅក្នុងវត្តមានរបស់ពួកគាត់ ពួកគាត់មើលឃើញយើង ពួកគាត់បារម្ភអំពីសុខុមាលភាពរបស់យើង ពួកគាត់ស្រឡាញ់យើងក្នុងពេលនេះ ជាងពេលណាៗ ។ ត្បិតឥឡូវនេះ ពួកគាត់មើលឃើញគ្រោះថ្នាក់ដែលល្បួងយើង… ក្ដីស្រឡាញ់របស់គាត់ចំពោះយើង និងបំណងប្រាថ្នារបស់គាត់ចំពោះសុខុមាលភាពយើង គឺច្បាស់ជាខ្លាំងជាងដែលយើងដឹងដោយខ្លួនយើងទៅទៀត» ។ ¹

ទំនាក់ទំនងអាចត្រូវបានពង្រឹង តាមរយៈមនុស្សដែលយើងស្គាល់ និងស្រឡាញ់នៅ ឯម្ខាងទៀតនៃវាំងនន ។ នោះត្រូវធ្វើឡើងតាមរយៈការខិតខំតាំងចិត្តរបស់យើង ដើម្បីបន្ដធ្វើអ្វីដែលត្រូវ ។ យើងអាចត្រូវបានពង្រឹងទំនាក់ទំនងរបស់យើងជាមួយនឹងមនុស្សជាទីស្រឡាញ់របស់យើងដែលបានលាចាកលោក ដោយការទទួលស្គាល់នូវការបែកគ្នានេះ ជាការបណ្ដោះអាសន្ន ហើយសេចក្ដីសញ្ញាដែលបានធ្វើនៅក្នុងព្រះវិហារបរិសុទ្ធ គឺអស់កល្បជានិច្ច ។ នៅពេលគោរពដោយខ្ជាប់ខ្ជួន នោះពួកគាត់អះអាងនូវការសម្រេចនៃការសន្យាដ៏អស់កល្បជានិច្ច ដែលមាននៅក្នុងសេចក្ដីសញ្ញា ។

ករណីដ៏ច្បាស់លាស់បំផុតអំពីវិវរណៈ នៅក្នុងជីវិតផ្ទាល់ខ្លួនរបស់ខ្ញុំ បានកើតមាន នៅពេលខ្ញុំបានបំផុសគំនិតយ៉ាងខ្លាំង ពីព្រះវិញ្ញាណដើម្បីសុំ ចេនីន វ៉តឃិន ផ្សាភ្ជាប់នឹងខ្ញុំនៅក្នុងព្រះវិហារបរិសុទ្ធ ។

មេរៀនដ៏អស្ចារ្យមួយដែលយើងម្នាក់ៗត្រូវរៀន គឺត្រូវសុំ ។ ហេតុអ្វីក៏ព្រះអម្ចាស់ចង់ឲ្យយើងអធិស្ឋានដល់ទ្រង់ ហើយសុំ ? ដោយសារនោះជារបៀបដែលវិវរណៈត្រូវបានទទួល ។

នៅពេលខ្ញុំជួបប្រទះនឹងរឿងពិបាកបំផុត នេះគឺជារបៀបដែលខ្ញុំព្យាយាមយល់នូវអ្វីត្រូវធ្វើ ។ ខ្ញុំតមអាហារ ។ ខ្ញុំអធិស្ឋានដើម្បីស្វែងរក និងយល់បទគម្ពីរ ដែលនឹងជាជំនួយ ។ ដំណើរការនោះ គឺកើតឡើងដដែលៗ ។ ខ្ញុំចាប់ផ្ដើមអានវគ្គគម្ពីរ ខ្ញុំពិចារណាអត្ថន័យខគម្ពីរ ហើយអធិស្ឋានសុំការបំផុសគំនិត ។ បន្ទាប់មកខ្ញុំពិចារណា ហើយអធិស្ឋានឲ្យដឹង បើសិនជាខ្ញុំបានយល់អ្វីទាំងអស់ដែលព្រះអម្ចាស់ចង់ឲ្យខ្ញុំធ្វើ ។ ជាញឹកញាប់ ចំណាប់អារម្មណ៍ជាច្រើនបានចូលមកជាមួយការយល់ដឹងកាន់តែច្រើនអំពីគោលលទ្ធិ ។ ខ្ញុំបានឃើញថា គំរូល្អ គឺរៀនចេញពីព្រះគម្ពីរ ។

មានច្បាប់មួយចំនួន ដែលបង្កើនវិវរណៈ ។ ទីមួយ ការងាតមានអារម្មណ៍ខឹង ឬឈឺចាប់ ឬរឹងរូស នឹងបណ្ដេញព្រះវិញ្ញាណបរិសុទ្ធ ។ អារម្មណ៍ទាំងនោះ ត្រូវតែលុបបំបាត់ ឬឱកាសរបស់យើងដើម្បីទទួលវិវរណៈមានតិចតួច ។

គោលការណ៍មួយទៀត គឺត្រូវប្រយ័ត្នចំពោះការលេងសើច ។ ការសើចហោរកញ្ជ្រៀវ នឹងប្រមាថដល់ព្រះវិញ្ញាណ ។ ការនិយាយសប្បាយដែលល្អ ជួយឲ្យមានវិវរណៈ ឯសើចហោរកញ្រ្ជៀវគ្មានព្រះវិញ្ញាណទេ ។ ការលេងសើច គឺជាការបិទច្រកសម្រាប់សម្ពាធជីវិត ។

សត្រូវមួយទៀតចំពោះវិវរណៈ កើតមកពីការបំភ្លើស ឬការហ៊ោកញ្ជ្រៀវចំពោះអ្វីដែលបានថ្លែង ។ ការនិយាយស្ងាត់ស្ងៀមដោយប្រុងប្រយ័ត្ន នឹងបង្កើនអំណាចដើម្បីទទួលវិវរណៈ ។

ផ្ទុយទៅវិញ ទំនាក់ទំនងខាងវិញ្ញាណ អាចត្រូវបានពង្រីក តាមរយៈការមានសុខភាពល្អ ។ ការហាត់ប្រាណ, ការគេងឲ្យបានគ្រប់គ្រាន់ និងទម្លាប់បរិភោគល្អ បង្កើនសមត្ថភាពរបស់យើង ដើម្បីទទួល និងយល់វិវរណៈ ។ យើងនឹងរស់នៅសម្រាប់ជីវិតដែលបានប្រទានដល់យើងបានយូរអង្វែង ។ ទោះជាយ៉ាងណា យើងអាចបង្កើតទាំងគុណភាពនៃការបម្រើ និងសុខុមាលភាពផ្ទាល់ខ្លួនយើង តាមរយៈការធ្វើការជ្រើសរើសដោយប្រុងប្រយ័ត្ន និងត្រឹមត្រូវ ។

វាសំខាន់ណាស់ ដែលសកម្មភាពប្រចាំថ្ងៃរបស់យើង ពុំរំខានយើងមិនឲ្យស្ដាប់ព្រះវិញ្ញាណ ។

វិវរណៈត្រូវបានផ្ដល់ឲ្យនៅក្នុងសុបិនដែរ ពេលមានអន្តរភាពដែលស្ទើរតែពុំអាចកត់សម្គាល់ក្នុងចន្លោះពេលគេង និងពេលដឹងខ្លួន ។ បើអ្នកព្យាយាមកត់ត្រាភ្លាមៗ អ្នកអាចកត់ត្រាយ៉ាងលម្អិតអស្ចារ្យ ប៉ុន្តែបើមិនដូច្នោះទេ វានឹងរលប់បាត់វិញភ្លាម ។ ទំនាក់ទំនងដ៏បំផុស គំនិតនៅពេលយប់ ជាទូទៅមានជាមួយនឹងអារម្មណ៍ដ៏ពិសិដ្ឋមួយ សម្រាប់បទពិសោធន៍ទាំងមូលក្នុងសុបិន ។ ព្រះអម្ចាស់ប្រើបុគ្គលម្នាក់ៗ ដែលយើងបានគោរពយ៉ាងខ្លាំង ដើម្បីបង្រៀនការពិតដល់យើងនៅក្នុងសុបិន ដោយសារយើងទុកចិត្តពួកគាត់ ហើយនឹងស្ដាប់តាមការទូន្មានរបស់ពួកគាត់ ។ គឺជាព្រះអម្ចាស់ដែលបង្រៀនតាមរយៈព្រះវិញ្ញាណបរិសុទ្ធ ។ ទោះជាយ៉ាងណាក៏ដោយ ទ្រង់អាចនៅក្នុងសុបិន ដើម្បីធ្វើឲ្យវាងាយស្រួលយល់ និងប៉ះនឹងដួងចិត្តយើង ដោយ ការបង្រៀនយើងតាមរយៈមនុស្សម្នាក់ដែលយើងស្រឡាញ់ និងគោរព ។

នៅពេលវាជាគោលបំណងរបស់ព្រះអម្ចាស់ ទ្រង់អាចរំឭកអ្វីៗមកក្នុងការចងចាំរបស់យើង ។ គំនិតនេះ មិនគួរធ្វើឲ្យការតាំងចិត្តរបស់យើងទន់ខ្សោយ ក្នុងការកត់ត្រាអារម្មណ៍នៃព្រះវិញ្ញាណទេ ។ ការកត់ត្រាអំពីការបំផុសគំនិតដោយយកចិត្តទុកដាក់នោះ បង្ហាញដល់ព្រះថា ទំនាក់ទំនងរបស់ទ្រង់ គឺពិសិដ្ឋចំពោះយើង ។ ការកត់ត្រានឹងពង្រីកសមត្ថភាពរបស់យើង ដើម្បីនឹកចាំវិវរណៈផងដែរ ។ ការកត់ត្រាអំពីការដឹកនាំមកពីព្រះវិញ្ញាណដូច្នេះ គួរតែត្រូវបានការពារកុំឲ្យបាត់ ឬរំខានមកពីអ្នកដទៃ ។

គម្ពីរបានផ្ដល់នូវការបញ្ជាក់ដ៏ក្បោះក្បាយ អំពីរបៀបដែលសេចក្ដីពិត, បានរស់នៅដោយខ្ជាប់ខ្ជួន, បើកទ្វារទៅកាន់ការបំផុសគំនិត ដើម្បីដឹងនូវអ្វីត្រូវធ្វើ និងកន្លែងដែលត្រូវការ ដើម្បីឲ្យសមត្ថភាពមួយបានពង្រីកឡើងដោយអំណាចដ៏ទេវភាព ។ បទគម្ពីរបានពិពណ៌នាអំពីរបៀបដែលសមត្ថភាពដទៃទៀត យកឈ្នះភាពលំបាក, ការសង្ស័យ, និងឧបសគ្គដែលមើល ទៅពិបាកយកឈ្នះ ត្រូវបានពង្រឹងដោយព្រះអម្ចាស់នៅក្នុងគ្រាដែលត្រូវការ ។ នៅពេលអ្នកពិចារណាឧទាហរណ៍ទាំងនេះ នោះនឹងមានការបញ្ជាក់ដ៏ស្ងប់ស្ងាត់មួយ តាមរយៈព្រះវិញ្ញាណបរិសុទ្ធថា បទពិសោធន៍របស់ពួកគេគឺជាការពិត ។ អ្នកនឹងដឹងថាជំនួយស្រដៀងគ្នានោះ មានសម្រាប់អ្នកដូចគ្នា ។

ខ្ញុំបានមើលឃើញបុគ្គលជាច្រើន ជួបប្រទះឧបសគ្គ ហើយដឹងថាត្រូវធ្វើអ្វី ពេលវាហួសពីបទពិសោធន៍ផ្ទាល់ខ្លួនរបស់ពួកគេ ដោយសារពួកគេបានទុកចិត្តលើព្រះអម្ចាស់ ហើយដឹងថា ទ្រង់នឹងដឹកនាំពួកគាត់ ទៅរកដំណោះស្រាយដែលត្រូវការជាបន្ទាន់នោះ ។

ព្រះអម្ចាស់បានប្រកាសថា ៖ « ហើយអ្នករាល់គ្នាត្រូវបានទទួលការបង្រៀនមកពីស្ថានលើ ។ ចូរញែកខ្លួនចេញជាបរិសុទ្ធចុះ ហើយអ្នករាល់គ្នានឹងត្រូវបានទទួលអំណោយទានដោយព្រះចេស្ដា ប្រយោជន៍ឲ្យអ្នករាល់គ្នាអាចបង្រៀន ដូចជាយើងបានមានបន្ទូលមក» ។ ² ពាក្យថា ញែកខ្លួនចេញជាបរិសុទ្ធ អាចនឹងធ្វើមានចម្ងល់ ។ ប្រធាន ហារ៉ូល ប៊ី លី បានពន្យល់ម្ដងនោះថា «អ្នកអាចជំនួសពាក្យទាំងនោះ ដោយឃ្លា ‹រក្សាបទបញ្ញត្តិរបស់យើង› » ។ សូមអានតាមរបៀបដែលបានទូន្មាន មើលទៅច្បាស់ជាង ។ ³

មនុស្សម្នាក់ ត្រូវតែស្អាតស្អំខាងសតិអារម្មណ៍ និងរូបកាយ ដើម្បីព្រះអម្ចាស់ អាចបំផុសគំនិត ។ អ្នកដែលប្រតិបត្តិតាមបទបញ្ញត្តិរបស់ទ្រង់ គឺព្រះអម្ចាស់ទុកចិត្ត ហើយបុគ្គលនោះអាចទទួលការបំផុសគំនិតរបស់ទ្រង់ ដើម្បីដឹងនូវអ្វីត្រូវធ្វើ និងព្រះចេស្ដាដ៏ទេវភាពដើម្បីធ្វើវា តាមត្រូវការ ។

ដើម្បីឲ្យភាពខាងវិញ្ញាណបានរីកចម្រើនកាន់តែរឹងមាំ និងកាន់តែមានវត្តមាន វាត្រូវតែបណ្ដុះនៅក្នុងបរិដ្ឋានសុចរិត ។ ការវាយឬក, ការឆ្មើងឆ្មៃ, និងអំនួត គឺដូចជាថ្មរឹងដែលនឹងពុំអាចផ្ដល់ផលខាងវិញ្ញាណបានទេ ។

ភាពរាបសារ គឺជាដីដ៏មានជីជាតិ ដែលជីវភាពខាងវិញ្ញាណដុះលូតលាស់ និងផ្ដល់ផលនៃការបំផុសគំនិត ដើម្បីដឹងនូវអ្វីដែលត្រូវធ្វើ ។ វាបើកច្រកទៅកាន់អំណាចដ៏ទេវភាព ដើម្បីសម្រេចនូវអ្វីដែលត្រូវធ្វើ ។ បុគ្គលម្នាក់ដែលបានជម្រុញចិត្ត ដោយបំណងប្រាថ្នាមួយដើម្បីមានការសរសើរ ឬការទទួលស្គាល់ នឹងពុំសមទទួលបានការបង្រៀនពីព្រះវិញ្ញាណទេ ។ បុគ្គលម្នាក់ដែលអួតអាង ឬដែលទុកឲ្យអារម្មណ៍គាត់មានឥទ្ធិពលលើការសម្រេចចិត្តរបស់គាត់ នឹងពុំត្រូវបានដឹកនាំដោយព្រះវិញ្ញាណប្រកបដោយអានុភាពឡើយ ។

នៅពេលយើងកំពុងដើរតួជាឧបករណ៍ជំនួសឲ្យអ្នកដទៃ យើងកាន់តែងាយបានបំផុសគំនិត ជាងពេលយើងគិតតែពីខ្លួនយើង ។ ក្នុងដំណើរការនៃការជួយដល់អ្នកដទៃ ព្រះអម្ចាស់អាចបន្ថែមការដឹកនាំសម្រាប់ជាប្រយោជន៍របស់យើងផ្ទាល់ ។

ព្រះវរបិតាសួគ៌យើង ពុំទុកយើងនៅលើផែនដី ដើម្បីឲ្យបរាជ័យទេ ប៉ុន្តែដើម្បីទទួលជោគជ័យដ៏រុងរឿង ។ វាហាក់ដូចជាផ្ទុយ ប៉ុន្តែនោះជាមូលហេតុដែលការស្គាល់ចម្លើយចំពោះការអធិស្ឋាន ពេលខ្លះអាចជាការលំបាកមួយ ។ ពេលខ្លះ យើងពុំឈ្លាសវៃ បានព្យាយាមដើម្បីប្រឈមមុខនឹងជីវិត ដោយការពឹងផ្អែកលើបទពិសោធន៍ និងសមត្ថភាពផ្ទាល់ខ្លួន ។ យើងនឹងឈ្លាសវៃជាង បើយើងស្វែងរកតាមរយៈការអធិស្ឋាន និងការបំផុសគំនិតពីព្រះ ដើម្បីដឹងនូវអ្វីដែលត្រូវធ្វើ ។ ការគោរពប្រតិបត្តិរបស់យើង ធានាថា នៅពេលណាត្រូវការ នោះយើងអាចសក្ដិសមចំពោះអំណាចដ៏ទេវភាព ដើម្បីសម្រេចនូវគោលបំណងដ៏បំផុសគំនិតមួយ ។

ដូចជាយើងរាល់គ្នាជាច្រើនដែរ អូលីវើរ ពុំបានស្គាល់ភស្ដុតាងនៃចម្លើយចំពោះការអធិស្ឋានដែលបានផ្ដល់ឲ្យពីព្រះអម្ចាស់ដល់គាត់រួចហើយនោះទេ ។ ដើម្បីបើកភ្នែករបស់គាត់ និងយើង វិវរណៈនេះត្រូវបានផ្ដល់ឲ្យតាមរយៈព្យាការីយ៉ូសែប ស្ម៊ីធថា៖

« អ្នកមានពរហើយ ចំពោះអ្វីដែលអ្នកបានធ្វើ ព្រោះអ្នកបានសូមពីយើង ហើយមើលចុះដរាបណាអ្នកសូមជាញឹកញាប់ នោះអ្នកបានទទួលការបង្គាប់ពីព្រះវិញ្ញាណរបស់យើង បើសិនជាពុំនោះសោតទេ អ្នកនឹងពុំបានមកដល់ទីដែលអ្នកនៅពេលនេះឡើយ ។

« មើលចុះ អ្នកដឹងហើយថា អ្នកបានសុំពីយើង ហើយយើងបានបំភ្លឺគំនិតរបស់អ្នក ហើយឥឡូវនេះ យើងប្រាប់អ្នកនូវការណ៍ទាំងឡាយនេះ ដើម្បីឲ្យអ្នកបានដឹងថា អ្នកត្រូវបានបំភ្លឺដោយព្រះវិញ្ញាណនៃសេចក្ដីពិត» ។ ⁴

បើអ្នកមានអារម្មណ៍ថាព្រះអម្ចាស់ពុំឆ្លើយការអធិស្ឋានរបស់អ្នក ចូរពិចារណាបទគម្ពីរទាំងនេះ -- រួចរកមើលភស្ដុតាងដោយប្រុងប្រយ័ត្ននៅក្នុងជីវិតអ្នកផ្ទាល់ អំពីចម្លើយ ដែលទ្រង់បានឆ្លើយចំពោះអ្នករួចហើយនោះ ។

មានការចង្អុលបង្ហាញពីរដែលថា អារម្មណ៍ ឬការបំផុសគំនិតកើតមកពីព្រះ គឺវាបង្កើតភាពសុខសាន្ដនៅក្នុងដួងចិត្តអ្នក និងអារម្មណ៍កក់ក្ដៅស្ងប់ស្ងាត់ ។ នៅពេលអ្នកធ្វើតាមគោលការណ៍ដែលខ្ញុំបានពិភាក្សា នោះអ្នកនឹងត្រូវបានរៀបចំឲ្យស្គាល់វិវរណៈនៅពេលសំខាន់ក្នុងជីវិតរបស់អ្នក ។

កាលណាអ្នកកាន់តែធ្វើតាមការដឹកនាំដ៏ទេវភាព នោះអ្នកនឹងមានសុភមង្គលកាន់តែខ្លាំងនៅទីនេះ និងអស់ទាំងភាពអស់កល្បជានិច្ច --ហើយជាងនេះទៅទៀត អ្នកនឹងកាន់តែរីកចម្រើន ហើយកាន់តែមានសមត្ថភាពដើម្បីបម្រើ ។ ខ្ញុំពុំយល់ពេញលេញថា វាកើតឡើងយ៉ាងម៉េចទេ ប៉ុន្តែការដឹកនាំនៅក្នុងជីវិតអ្នកពុំដកហូតសិទ្ធិជ្រើសរើសរបស់អ្នកទេ ។ អ្នកអាចធ្វើការសម្រេចចិត្ត ដែលអ្នកជ្រើសរើសធ្វើ ។ ប៉ុន្តែចាំថា ឥរិយាបទធ្វើរឿងត្រឹមត្រូវ នាំសេចក្ដីសុខសាន្ដ និងសុភមង្គលមកក្នុងចិត្ត ។

បើការជ្រើសរើសអ្នកខុស មានផ្លូវមួយត្រឡប់មកវិញ តាមរយៈការប្រែចិត្ត ។ នៅពេលបំពេញតាមលក្ខខណ្ឌរបស់វា នោះដង្វាយធួននៃព្រះយេស៊ូវគ្រីស្ទ ព្រះអង្គសង្គ្រោះរបស់យើង ផ្ដល់នូវការដោះលែងពីតម្រូវការនៃយុត្តិធម៌ ចំពោះកំហុសដែលបានធ្វើ ។ វាសាមញ្ញ ហើយស្រស់ស្អាត ពុំអាចប្រៀបផ្ទឹមបាន ។ នៅពេលអ្នកបន្ដរស់នៅដោយសុចរិត នោះអ្នកនឹងបានបំផុសគំនិតជានិច្ច ដើម្បីស្គាល់នូវអ្វីដើម្បីធ្វើ ។ ពេលខ្លះ ដើម្បីរកឃើញថាត្រូវធ្វើអ្វី អាចតម្រូវឲ្យមានការខិតខំយ៉ាងខ្លាំង ហើយអ្នកត្រូវទុកចិត្ត ។ ប៉ុន្តែអ្នកនឹងត្រូវបានបំផុសគំនិត ដើម្បីដឹងនូវអ្វីដែលត្រូវធ្វើ នៅពេលអ្នកជួបប្រទះនឹងស្ថានភាព ដើម្បីមានការដឹកនាំដ៏ទេវភាពដូច្នេះក្នុងជីវិតរបស់អ្នក ដូចជា ការគោរពប្រតិបត្តិចំពោះបទបញ្ញត្តិរបស់ព្រះអម្ចាស់, ទុកចិត្តទៅលើផែនការនៃសុភមង្គលដ៏ទេវភាពរបស់ទ្រង់ និងការចៀសវាងពីអ្វីៗដែលផ្ទុយនឹងផែនការ ។

ការទំនាក់ទំនងជាមួយព្រះវរបិតាសួគ៌យើង គឺពុំមែនជារឿងឥតសំខាន់នោះទេ ។ វាគឺជា ឯកសិទ្ធិដ៏ពិសិដ្ឋ ។ វាផ្អែកទៅលើគោលការណ៍ដែលពុំផ្លាស់ប្ដូរដ៏អស់កល្បជានិច្ច ។ យើងទទួលជំនួយពីព្រះវរបិតាសួគ៌របស់យើង ឆ្លើយតបនឹងជំនឿ, ការប្រតិបត្តិ, និងការប្រើសិទ្ធិ ជ្រើសរើសត្រឹមត្រូវរបស់យើង ។

សូមឲ្យព្រះអម្ចាស់បំផុសគំនិតអ្នកឲ្យយល់ និងប្រើគោលការណ៍ដែលដឹកនាំទៅរកវិវរណៈផ្ទាល់ខ្លួន និងការបំផុសគំនិត នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។