ឥឡូវនេះជាពេលវេលាដើម្បីក្រោកឡើង ហើយបញ្ចាំងពន្លឺ !

ដោយ អេលែន អេស ដាល់ថុន

ប្រធានយុវនារីទូទៅ

ក្នុងនាមជាបុត្រីនៃព្រះ អ្នកកើតមកដើម្បីដឹកនាំ។

តាមបង្អួចការិយាល័យយុវនារីរបស់ខ្ញុំ ខ្ញុំអាចមើលឃើញទេសភាពដ៏ស្រស់ស្អាតនៃព្រះវិហារបរិសុទ្ធ សលត៍ ឡេក ។ រាល់ថ្ងៃ ខ្ញុំមើលរូបទេវតាមរ៉ូណៃ ឈរនៅលើកំពូលព្រះវិហារបរិសុទ្ធ ជានិមិត្តសញ្ញាដ៏ចែងចាំង មិនត្រឹមតែពីសេចក្ដីជំនឿរបស់លោកប៉ុណ្ណោះទេ តែរបស់យើងផងដែរ ។ ខ្ញុំស្រឡាញ់មរ៉ូណៃ ព្រោះនៅក្នុងសង្គមដ៏ទុច្ចរិតមួយ លោកបានបន្តមានភាពបរិសុទ្ធ និងសេចក្តីពិត ។ លោកជាវីរបុរសរបស់ខ្ញុំ ។ លោកឈរតែឯង ។ ពុំដឹងយ៉ាងម៉េចទេ ខ្ញុំមានអារម្មណ៍ថា លោកឈរនៅលើកំពូលព្រះវិហារបរិសុទ្ធសព្វថ្ងៃនេះ គឺកំពុងបក់ដៃហៅយើងឲ្យមានក្ដីក្លាហាន, ឲ្យចងចាំថាយើងជានរណា, និងឲ្យមានភាពសក្ដិសមនឹងចូលក្នុងព្រះវិហារបរិសុទ្ធ---ដើម្បី « ក្រោកឡើង ហើយបញ្ចាំងពន្លឺចេញទៅ »¹ ដើម្បីឈរឲ្យខ្ពស់ជាងសម្លេងរបស់លោកិយ, និងដើម្បីធ្វើដូចជាអ្វីដែលអេសាយបានព្យាករណ៍ថា « ចូរយើងឡើងទៅឯភ្នំនៃព្រះយេហូវ៉ា »²---គឺជាព្រះវិហារបរិសុទ្ធ ។

អ្នកដែលជួបជុំគ្នាថ្ងៃនេះគឺជាបុត្រីដ៏ជម្រើសនៃព្រះអម្ចាស់ ។ គ្មានក្រុមដ៏មានឥទ្ធិពលជាងនេះទៀត ដែលកំពុងឈរតំណាងឲ្យសេចក្ដីពិត និងសុចរិតភាព នៅក្នុងពិភពលោក ជាងយុវនារី និងស្ត្រីនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយឡើយ ។ ខ្ញុំឃើញពីភាពថ្លៃថ្នូររបស់អ្នក ហើយស្គាល់ពីអត្តសញ្ញាណ និងវាសនាដ៏ទេវភាពរបស់អ្នក ។ អ្នកបានទទួលកិត្តិយសសម្រាប់ខ្លួនឯងនៅក្នុងជីវិតមុនផែនដី ។ ត្រកូលអ្នកនាំមកជាមួយនូវសេចក្ដីសញ្ញា និងការសន្យានានា ។ អ្នកបានទទួលកេរមរតកនៃលក្ខណៈខាងវិញ្ញាណរបស់ពួកលោកអយ្យកោដ៏ស្មោះត្រង់គឺ អ័ប្រាហាំ, អ៊ីសាក, និងយ៉ាកុប ។ មានម្ដងនោះ ព្យាការីម្នាក់របស់ព្រះបានចាត់ទុកអ្នករាល់គ្នាដែលបានប្រជុំគ្នានៅទីនេះថាជា « ក្ដីសង្ឃឹមដ៏ចែងចាំងមួយ »³ របស់អនាគត ។ ហើយខ្ញុំយល់ស្រប ! ក្នុងពិភពលោកដ៏ពោរពេញដោយឧបសគ្គ ពន្លឺរបស់អ្នកជះចែងចាំង ។ ពិតណាស់ មាន « ថ្ងៃទាំងឡាយដែលយើងមិនដែលភ្លេច » ។⁴មានថ្ងៃទាំងឡាយរបស់អ្នក ហើយឥឡូវនេះជាពេលសម្រាប់យុវនារីគ្រប់ទីកន្លែង ដើម្បី « ក្រោកឡើង ហើយបញ្ចាំងពន្លឺចេញទៅ ប្រយោជន៍ឲ្យពន្លឺរបស់អ្នកអាចបានទៅជាបមាណីយដល់សាសន៍នានា » ។⁵

« បទដ្ឋានមួយគឺជាបន្ទាត់វាស់មួយ ដែលមនុស្សម្នាក់ប្រើសម្រាប់កំណត់ពីភាពត្រឹមត្រូវ និងភាពឥតខ្ចោះ » ។⁶ យើងត្រូវធ្វើជាបទដ្ឋាននៃភាពបរិសុទ្ធ ដើម្បីពិភពលោកឃើញយើង ! កូនសៀវភៅដើម្បីកម្លាំងនៃយុវវ័យដែលបានកែថ្មី មិនត្រឹមតែមានបទដ្ឋានទាំងឡាយដើម្បីរស់នៅដោយត្រឹមត្រូវប៉ុណ្ណោះទេ តែមាននូវពរជ័យដែលបានសន្យាផងដែរ បើសិនអ្នកធ្វើតាមនោះ ។ ពាក្យដែលមានក្នុងកូនសៀវភៅដ៏សំខាន់នេះ គឺជាបទដ្ឋានសម្រាប់ពិភពលោក ហើយការរស់នៅតាមបទដ្ឋានទាំងនេះនឹងជួយអ្នកឲ្យដឹងនូវអ្វីដែលត្រូវធ្វើ ដើម្បីក្លាយកាន់តែដូចព្រះយេស៊ូវគ្រីស្ទ និងមានភាពរីករាយនៅក្នុងពិភពលោកដែលកាន់តែងងឹត និងទុច្ចរិតនេះ ។ ការរស់នៅតាមដទដ្ឋាននៅក្នុងកូនសៀវភៅនេះ នឹងជួយអ្នកមានភាពសក្ដិសមសម្រាប់ភាពជាដៃគូនៃព្រះវិញ្ញាណបរិសុទ្ធ ។ ហើយនៅក្នុងពិភពលោកដែលអ្នកកំពុងរស់នៅនេះ អ្នកនឹងត្រូវការភាពជាដៃគូនោះ ក្នុងការធ្វើការសម្រេចចិត្តសំខាន់ៗ ដែលនឹងកំណត់ភាពជោគជ័យ និងសុភមង្គលភាគច្រើនបំផុតក្នុងពេលអនាគតរបស់អ្នក ។ ការរស់នៅតាមបទដ្ឋានទាំងនេះ នឹងជួយអ្នកគ្រប់គ្នាឲ្យមានភាពសក្ដិសម ដើម្បីចូលទៅកាន់ព្រះវិហារបរិសុទ្ធរបស់ព្រះអម្ចាស់ ហើយនៅទីនោះ អ្នកទទួលពរជ័យ និងអំណាចដែលរង់ចាំអ្នក កាលដែលអ្នកធ្វើ និងរក្សាសេចក្ដីសញ្ញាដ៏ពិសិដ្ឋ ។⁷

កាលពីកូនស្រីរបស់យើង អេមី នៅតូច នាងចូលចិត្តមើលគ្រប់សកម្មភាពរបស់ខ្ញុំ ពេលខ្ញុំរៀបចំខ្លួនទៅព្រះវិហារ ។ បន្ទាប់ពីបានសង្កេតពីទម្លាប់ខ្ញុំ នាងសិតសក់នាង ហើយស្លៀកពាក់ បន្ទាប់មក នាងតែងសុំខ្ញុំឲ្យលាបក្រែមលាបមុខភ្លឺរលោង ។ ក្រែមភ្លឺរលោងដែលនាងហៅនោះ គឺជាក្រែមខាប់ ដែលខ្ញុំប្រើដើម្បីការពារកុំឲ្យមានស្នាមជ្រួញ ។ ដោយនាងសុំ នោះខ្ញុំដាក់វាលើថ្ពាល់ និងលើបបូរមាត់ អេមី បន្ទាប់មកនាងញញឹម ហើយនិយាយថា « ឥឡូវ យើងរៀបចំរួចហើយ ! » អ្វីដែល អេមី មិនបានដឹង គឺថា នាងមានភាពភ្លឺរលោងរួចហើយ ។ មុខរបស់នាងភ្លឺព្រោះនាងបរិសុទ្ធយ៉ាងខ្លាំង និងគ្មានកំហុស ហើយល្អ ។ នាងមានព្រះវិញ្ញាណជាមួយនាង ហើយវាបានបង្ហាញចេញមក ។

ខ្ញុំប្រាថ្នាថា យុវនារីគ្រប់រូបដែលជួបជុំគ្នានារាត្រីនេះ ដឹង ហើយយល់ពីភាពស្រស់ស្អាតរបស់អ្នក---គឺ « ពន្លឺចែងចាំង » របស់អ្នក---ថាវាមិនមែនដោយសារម្ស៉ៅ, ក្រែមស្អិត, ឬសម្លៀកបំពាក់ និងម៉ូតសក់ទាន់សម័យបំផុតនោះទេ ។ វានៅក្នុងភាពបរិសុទ្ធផ្ទាល់ខ្លួនអ្នក ។ ពេលអ្នករស់នៅតាមបទដ្ឋាន ហើយសក្ដិសមសម្រាប់ភាពជាដៃគូដ៏ខ្ជាប់ខ្ជួននៃព្រះវិញ្ញាណបរិសុទ្ធ នោះអ្នកអាចជះឥទ្ធិពលដ៏មានអានុភាពដល់ពិភពលោក ។ គំរូអ្នក គឺពន្លឺក្នុងភ្នែកអ្នក នឹងជះឥទ្ធិពលដល់អ្នកដទៃទៀត ដែលឃើញ « ពន្លឺចែងចាំង » របស់អ្នក ហើយពួកគេនឹងចង់ក្លាយដូចអ្នកដែរ ។ តើអ្នកបានពន្លឺនេះមកពីណា ? ព្រះអម្ចាស់ជាពន្លឺ « ហើយព្រះវិញ្ញាណបំភ្លឺគ្រប់មនុស្សពាសពេញលោកិយ ដែលប្រុងស្ដាប់តាមសម្លេងនៃព្រះវិញ្ញាណ » ។⁸ ពន្លឺដ៏ទេវភាពមួយចូលមកក្នុងភ្នែក និងទឹកមុខរបស់យើង ពេលយើងខិតជិតព្រះបិតាសួគ៌របស់យើង និងព្រះរាជបុត្រាទ្រង់គឺព្រះយេស៊ូវគ្រីស្ទ ។ នោះជារបៀបដែលយើងទទួល « ពន្លឺចែងចាំង » ! ក្រៅពីនោះ ដូចដែលអ្នកទាំងអស់គ្នាអាចឃើញហើយថា « ក្រែមរលោង » នោះមិនសូវជាមានប្រសិទ្ធភាពចំពោះស្នាមជ្រួញរបស់ខ្ញុំនោះទេ !

ការហៅឲ្យ « ក្រោកឡើង ហើយបញ្ចាំងពន្លឺទៅ » ជាការហៅមួយដល់អ្នកគ្រប់គ្នា ដើម្បីដឹកនាំពិភពលោក ក្នុងរបៀបមួយដ៏អស្ចារ្យ---ដើម្បីលើកទង់ឥស្សរភាព---ដើម្បីដឹកនាំជំនាន់នេះ ក្នុងគុណធម៌, បរិសុទ្ធភាព, និងមានភាពសក្ដិសមដើម្បីចូលព្រះវិហារបរិសុទ្ធ ។ បើអ្នកមានបំណងដើម្បីធ្វើឲ្យមានការផ្លាស់ប្ដូរក្នុងពិភពលោកនេះ អ្នកត្រូវតែផ្ទុយពីពិភពលោក ។ ខ្ញុំសូមបន្លឺតាមពាក្យរបស់ប្រធាន យ៉ូសែប អេហ្វ. ស្ម៊ីធ ដែលបាននិយាយដល់ពួកស្ត្រីក្នុងជំនាន់លោកថា ៖ « វាមិនមែនដើម្បីឲ្យអ្នកត្រូវដឹកនាំដោយ [ យុវនារី ] នៃលោកិយនេះទេ តែអ្នកត្រូវដឹកនាំ ... [ យុវនារី ] នៃលោកិយនេះវិញ នៅក្នុងអ្វីគ្រប់យ៉ាងដែល ... ធ្វើឲ្យកូនចៅនៃមនុស្សបានបរិសុទ្ធ » ។⁹ ពាក្យទាំងនេះនៅតែពិតដល់សព្វថ្ងៃនេះ ។ ក្នុងនាមជាបុត្រីនៃព្រះ អ្នកកើតមកដើម្បីដឹកនាំ ។

ក្នុងពិភពលោកដែលយើងរស់នៅនេះ សមត្ថភាពក្នុងការដឹកនាំរបស់អ្នកនឹងតម្រូវឲ្យមានការណែនាំ និងភាពជាដៃគូយ៉ាងខ្ជាប់ខ្ជួននៃព្រះវិញ្ញាណបរិសុទ្ធ ដែលនឹងប្រាប់អ្នកនូវ « គ្រប់អ្វីទាំងអស់ដែលអ្នកត្រូវធ្វើ »¹⁰ ពេលដែលអ្នកស្គាល់ និងពឹងលើការណែនាំ និងការបំផុសរបស់ទ្រង់ ។ ហើយដោយព្រះវិញ្ញាណបរិសុទ្ធពុំគង់នៅក្នុងព្រះវិហារដែលឥតបរិសុទ្ធ នោះយើងម្នាក់ៗនឹងត្រូវគិតពីទម្លាប់ និងដួងចិត្តរបស់យើង ។ យើងទាំងអស់គ្នាត្រូវផ្លាស់ប្ដូរ---គឺប្រែចិត្ត ។ ដូចដែលបិតារបស់ស្ដេចឡាម៉ូណៃបានមានបន្ទូលក្នុងព្រះគម្ពីរមរមនថា « ទូលបង្គំនឹងបោះបង់ចោលអស់ទាំងអំពើបាបរបស់ទូលបង្គំ ដើម្បីឲ្យបានស្គាល់ទ្រង់ » ។¹¹ តើយើង គឺអ្នក និងខ្ញុំមានឆន្ទៈដើម្បីធ្វើដូចគ្នានោះដែរឬទេ ?

យុវវ័យមួយក្រុមនៅ ឃ្វីន ក្រិច, រដ្ឋអារីស្សូណា បានប្ដេជ្ញាដើម្បី « ក្រោកឡើង ហើយបញ្ចាំងពន្លឺចេញទៅ » និងដើម្បីដឹកនាំយុវវ័យក្នុងសហគមន៍របស់គេ រស់នៅតាមបទដ្ឋានក្នុងកូនសៀវភៅ ដើម្បីកម្លាំងនៃយុវជន ។ ពួកគេម្នាក់ៗសរសេរនៅក្នុងសៀវភៅកំណត់ហេតុ ពីអ្វីដែលពួកគេមានអារម្មណ៍ថា មិនបានធ្វើឲ្យគេរីកចម្រើន ឬអ្វីដែលពួកគេចង់ផ្លាស់ប្ដូរក្នុងជីវិតគេ បន្ទាប់មកពួកគេបានជីករណ្ដៅមួយ ។ ពួកគេបានជួបជុំគ្នា, បានហែកទំព័រសៀវភៅកំណត់ហេតុ, ហើយបានបោះវាទៅក្នុងរណ្ដៅនោះ គឺដូចជាប្រជាជនអាំម៉ូនបានធ្វើចំពោះគ្រឿងសឹករបស់ពួកគេ នៅក្នុងព្រះគម្ពីរមរមន ។¹² បន្ទាប់មកពួកគេបានកប់ទំព័រទាំងនោះចោល ហើយថ្ងៃនោះ ពួកគេម្នាក់ៗបានធ្វើការតាំងចិត្តមួយដើម្បីផ្លាស់ប្ដូរ ។ ពួកគេបានប្រែចិត្ត ។ ពួកគេបានប្ដេជ្ញាដើម្បីក្រោកឡើង !

តើអ្នកមានអ្វីក្នុងជីវិតអ្នក ដែលអ្នកត្រូវការផ្លាស់ប្ដូរទេ ? អ្នកអាចធ្វើដូចនេះ ។ អ្នកអាចប្រែចិត្ត ដោយសារការបូជាដ៏ធួនបំផុតរបស់ព្រះអង្គសង្គ្រោះ ។ ទ្រង់បានធ្វើឲ្យវាកើតឡើងសម្រាប់អ្នក និងខ្ញុំ ដើម្បីផ្លាស់ប្ដូរ, ដើម្បីក្លាយជាបរិសុទ្ធ និងស្អាតម្ដងទៀត, និងដើម្បីក្លាយដូចជាទ្រង់ ។ ហើយទ្រង់បានសន្យាថា ពេលយើងធ្វើដូច្នោះ ទ្រង់នឹងមិនចាំពីអំពើបាប និងកំហុសយើងទៀតឡើយ ។¹³

ជួនកាល វាហាក់ដូចជាស្ទើរតែមិនអាចទៅរួចសោះ ដើម្បីបន្តបញ្ចាំងពន្លឺចេញទៅ ។ អ្នកជួបនូវឧបសគ្គជាច្រើន ដែលធ្វើឲ្យងងឹតដល់ប្រភពនៃពន្លឺទាំងអស់ គឺព្រះអង្គសង្គ្រោះ ។ ជួនកាលផ្លូវនោះពិបាកពេក ហើយពេលខ្លះ វាហាក់ដូចជាមានអ័ព្ទដ៏ក្រាស់មកបាំងពន្លឺនោះ ។ នោះជាករណីមួយរបស់យុវនារីម្នាក់ឈ្មោះ ប្ល័រិន ឆាតវិក ។ កាលពីអាយុ 10 ឆ្នាំ ប្ល័រិន បានដឹងថា នាងជាអ្នកហែលទឹកដ៏ប៉ិនប្រសប់ ។ នាងបានហែលកាត់ឈូងសមុទ្រអង់គ្លេស ក្នុងកំណត់ត្រាថេរៈវេលា 13 ម៉ោង និង 20 នាទី ។ ប្ល័រិន ចូលចិត្តអ្វីដែលពិបាក ហើយក្រោយមកនាងមានបំណងហែលពីជួរសមុទ្រ កាលីហ្វូញ៉ា ទៅកោះ កាតាលីណា---ចម្ងាយប្រហែល 34 km ។ ក្នុងការហែលនេះ នាងបានចុះខ្សោយបន្ទាប់ពីហែលបាន 15 ម៉ោង ។ អ័ព្ទដ៏ក្រាស់បានគ្របបាំងជួរសមុទ្រនោះ ។ ម្ដាយនាងបានជិះទូកក្បែរនាងជាប់ ហើយ ប្ល័រិន បានប្រាប់ម្ដាយនាងថា នាងគិតថានាងមិនអាចបញ្ចប់វាបានទេ ។ ម្ដាយ និងគ្រូបង្វឹកនាងបានលើកទឹកចិត្តនាងឲ្យបន្ត តែអ្វីដែលនាងអាចមើលឃើញ គឺមានតែអ័ព្ទប៉ុណ្ណោះ ។ នាងបានបោះបង់ការហែលរបស់នាង តែពេលចូលដល់ក្នុងទូក នាងបានដឹងថា គឺនៅតែ 1 គីឡូ 600 ម៉ែត្រ ទៀតប៉ុណ្ណោះ គឺដល់ច្រាំងហើយ ។ ក្រោយមក ពេលសម្ភាសន៍គេសួរថា ហេតុអ្វីនាងបានបោះបង់ការហែលរបស់នាង នាងបានសារភាពថា វាមិនមែនដោយសារទឹកត្រជាក់ ហើយក៏មិនមែនដោយសារចម្ងាយដែរ ។ នាងបាននិយាយថា « ខ្ញុំត្រូវបានបោកបញ្ឆោតដោយអ័ព្ទ » ។¹⁴

ក្រោយមក នាងព្យាយាមហែលម្ដងទៀត ហើយមានអ័ព្ទដ៏ក្រាស់ទៀត ។ តែលើកនេះ នាងបន្តហែល រហូតទៅដល់ទីដោយជោគជ័យ ។ ពេលនេះ ពេលនាងត្រូវបានសួរថា តើវាខុសគ្នាយ៉ាងណា ? នាងបាននិយាយថា នាងបានរក្សារូបភាពច្រាំងនៅក្នុងគំនិតនាង ឆ្លងកាត់អ័ព្ទដ៏ក្រាស់ និងរយៈចម្ងាយនៃការហែលរបស់នាង ។¹⁵

សម្រាប់ ប្ល័រិន ឆាតវិក ច្រាំងសមុទ្រគឺជាគោលដៅនាង ។ សម្រាប់យើងម្នាក់ៗ ព្រះវិហារបរិសុទ្ធជាគោលដៅយើង ។ យុវនារី សូមបន្តយកចិត្តទុកដាក់ ។ សូមកុំវង្វែងពីគំហើញនៃគោលដៅរបស់អ្នកឡើយ ។ សូមកុំឲ្យអ័ព្ទដ៏ក្រាស់នៃការបំពុលខាងសីលធម៌ និងសម្លេងនៃការបាក់ទឹកចិត្តរបស់ពិភពលោករារាំងអ្នកពីការសម្រេចគោលដៅអ្នកឡើយ, ចូររស់នៅតាមបទដ្ឋាន, ចូររីករាយនឹងភាពជាដៃគូនៃព្រះវិញ្ញាណបរិសុទ្ធ, ហើយចូរមានភាពសក្ដិសមដើម្បីចូលព្រះវិហារបរិសុទ្ធ ។ ចូររក្សាទស្សនៈនៃព្រះវិហារបរិសុទ្ធ និងដំណាក់ដ៏បរិសុទ្ធរបស់ព្រះអង្គសង្គ្រោះ នៅក្នុងដួងចិត្ត និងគំនិតអ្នកជានិច្ច ។

ប៉ុន្មានសប្ដាហ៍កន្លងមក ខ្ញុំបានឈរនៅក្នុងបន្ទប់សេឡេស្ទាលក្នុងព្រះវិហារបរិសុទ្ធ រីណូ ណាវ៉ាដា ។ ពន្លឺដែលជះចូលក្នុងបន្ទប់នោះ គឺចែងចាំងណាស់ ហើយកាន់តែចែងចាំងទៀត ជាមួយនឹងចង្កៀងគ្រីស្ទាល់ ដែលចាំងពន្លឺលើក្បូរក្បាច់ជាច្រើនរបស់វា ហើយធ្វើឲ្យកើតមានជាពន្លឺឥន្ទធនូគ្រប់ទីកន្លែង ។ វាធ្វើឲ្យខ្ញុំរំភើបណាស់ ពេលដែលខ្ញុំបានដឹងថា ព្រះអង្គសង្គ្រោះជា « ពន្លឺ ហើយជាជីវិតនៃពិភពលោក »¹⁶ ថាវាជាពន្លឺទ្រង់ដែលយើងត្រូវតោងជាប់ និងគិតដល់ ។ យើងជាគ្រីស្ទាល់ដ៏តូច ដែលឆ្លុះបញ្ចាំងពន្លឺទ្រង់ ហើយដើម្បីធ្វើដូច្នោះ យើងត្រូវតែស្អាតស្អំ និងគ្មានប្រឡាក់ធូលីនៃលោកិយ ។ កាលដែលខ្ញុំបានឈរក្នុងព្រះវិហារបរិសុទ្ធថ្ងៃនោះ ខ្ញុំបានឮក្នុងគំនិតខ្ញុំម្ដងទៀត នូវការហៅរបស់មរ៉ូណៃ ចំពោះយើង---ជាបុត្រីនៃស៊ីយ៉ូនថា ៖ « ចូរភ្ញាក់ឡើង និងចូរក្រោកឡើងពីធូលីដី » ។¹⁷ « ហើយកុំប៉ះពាល់ដល់អំណោយទានអាក្រក់ ឬវត្ថុដែលពុំស្អាតឡើយ » ។¹⁸ « ចូរភ្ញាក់ឡើង ហើយក្រោកឡើង … ឱកូនស្រីនៃក្រុងស៊ីយ៉ូនអើយ ចូរប្រដាប់ដោយសម្លៀកបំពាក់ដ៏រុងរឿងរបស់អ្នកចុះ … , ដើម្បីឲ្យសេចក្ដីសញ្ញានៃព្រះវរបិតាដ៏នៅអស់កល្បជានិច្ច ដែលបានធ្វើដល់អ្នក អាចបានបំពេញ » ។¹⁹

ពរជ័យដែលបានសន្យាទាំងឡាយនៃព្រះវិហារបរិសុទ្ធ មិនត្រឹមតែមានដល់អ្នកប៉ុណ្ណោះទេ តែដល់គ្រប់ជំនាន់ទាំងអស់ ។ ពេលអ្នកដាក់ព្រះវិហារបរិសុទ្ធជាគោលដៅរបស់អ្នក នោះឥទ្ធិពលសម្រាប់ក្ដីល្អរបស់អ្នក នឹងមានលើសលុបគ្រប់ពេល និងទីន្លែង ហើយកិច្ចការដែលអ្នកធ្វើសម្រាប់ពួកអ្នកដែលបានស្លាប់ទៅហើយ នឹងក្លាយជាការបំពេញដល់ដល់ការព្យាករណ៍ !

នៅសន្និសីទទូទៅចុងក្រោយនេះ ខ្ញុំរំភើបជាខ្លាំង ពេលខ្ញុំបានស្ដាប់ អែលឌើរ ដេវីឌ អេ. ប៊ែតណា អញ្ជើញអ្នកគ្រប់គ្នាឲ្យឧស្សាហ៍ចូលរួមក្នុងការធ្វើពង្សប្រវត្តិគ្រួសារអ្នកផ្ទាល់ និងធ្វើកិច្ចការព្រះវិហារបរិសុទ្ធសម្រាប់ពួកអ្នកដែលបានស្លាប់ទៅដោយមិនបានទទួលពរជ័យនៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ។²⁰ ពេលលោកដាក់ចេញនូវការអញ្ជើញនេះដល់អ្នក បេះដូងខ្ញុំលោតកញ្រ្ជោលនៅខាងក្នុង ។ ក្នុងគោលលទ្ធិ និងសេចក្ដីសញ្ញា យើងអានថា « ពួកវិញ្ញាណជម្រើសៗឯទៀត ដែលបានរក្សាទុកឲ្យមកនៅពេលពេញកំណត់ ដើម្បីចូលរួមក្នុងការដាក់គ្រឹះនៃកិច្ចការដ៏ធំនៅថ្ងៃចុងក្រោយ ព្រមទាំងការកសាង ... ព្រះវិហារ [ បរិសុទ្ធ ] ទាំងឡាយ និងការប្រព្រឹត្តិនៃពិធីទាំងឡាយនៅទីនោះ សម្រាប់សេចក្ដីប្រោសលោះដល់ពួកអ្នកស្លាប់ » ។²¹ នេះជាពេលរបស់អ្នក ហើយកិច្ចការរបស់អ្នកបានចាប់ផ្ដើមហើយ ! ឥឡូវនេះជាពេលដើម្បីមានភាពសក្ដិសម និងដើម្បីទទួលប័ណ្ណចូលព្រះវិហារបរិសុទ្ធមួយ ។ កាលអ្នកធ្វើកិច្ចការនេះ អ្នកនឹងក្លាយជាពួកអ្នកដែលបានសង្គ្រោះឡើងមកឯភ្នំស៊ីយ៉ូន ។²²

អែលឌើរ រ័សុល អិម ណិលសុន បានមានប្រសាន៍ពីអ្នកថា « ឥទ្ធិពលរបស់យុវនារីនៃសាសនាចក្រ ដូចជាយក្សដែលកំពុងដេក, នឹងដាស់ឲ្យភ្ញាក់ឡើង, ក្រោកឡើង, និងបំផុសដល់មនុស្សជាតិទាំងឡាយលើផែនដី ដូចជាកម្លាំងដ៏មហិមាមួយសម្រាប់ភាពសុចរិត » ។²³ យុវនារីចូរក្រោកឡើង ហើយដាក់ខ្លួនអ្នកនៅកន្លែងដ៏រុងរឿង ដែលនឹងសម្រាំងអនាគតអ្នក និងអនាគតនៃពិភពលោកនេះ ។ ដល់ពេលហើយ !

« នៅលើកំពូលភ្នំខ្ពស់ មានទង់មួយត្រូវលើកឡើង ។ ប្រជាជាតិគន់មើលឃើញ ទង់បក់ទៅគ្រប់ប្រទេស ! »²⁴យុវនារីអើយ អ្នកជាទង់នោះ ! ចូរប្រកបដោយគុណធម៌ និងបរិសុទ្ធ, ចូរស្វែងរកភាពជាដៃគូនៃព្រះវិញ្ញាណបរិសុទ្ធ, ចូរកប់ចោលអំពើបាប និងអំពើរំលងរបស់អ្នក, ចូរបន្តយកចិត្តទុកដាក់ ហើយកុំឲ្យអ័ព្ទនៃការបំពុលខាងសីលធម៌បាំងបិទគោលដៅអ្នកឡើយ ។ ចូរមានភាពសក្ដិសមដើម្បីចូលក្នុងព្រះវិហារបរិសុទ្ធ ។ ចូរពាក់ « ពន្លឺចែងចាំង » របស់អ្នក ! ខ្ញុំសូមថ្លែងទីបន្ទាល់ដោយអស់ពីដួងចិត្តខ្ញុំថា ព្រះមានព្រះជន្មរស់នៅ ហើយថាទ្រង់នឹងបំភ្លឺជីវិតអ្នក ពេលដែលអ្នកខិតកាន់តែជិតព្រះរាជ្របុត្តាសំណព្វរបស់ទ្រង់---ជាព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ ដូចជាមរ៉ូណៃដែរ ខ្ញុំសូមអធិស្ថានថា យើងនឹង « ក្រោកឡើង ហើយបញ្ចាំងពន្លឺចេញទៅ ប្រយោជន៍ឲ្យពន្លឺ [ របស់យើង ] អាចបានជាបមាណីយដល់សាសន៍នានា » ! ²⁵ ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាមែន ។