ລະວັງກ່ຽວກັບຕົນເອງ

ໂດຍ ແອວເດີ ແອນໂທນີ ດີ ເພີຄິນສ໌

ແຫ່ງສາວົກເຈັດສິບ

ໃຫ້ຍຶດໝັ້ນຢູ່ໃນເສັ້ນທາງຂອງຖານະປະໂລຫິດ ໂດຍການປ່ຽນໃຈເຫລື້ອມໃສຢ່າງເລິກຊຶ້ງ ແລະ ເພີ່ມຄວາມເຂັ້ມແຂງໃຫ້ແກ່ຄອບຄົວຂອງທ່ານ. … ຫລີກເວັ້ນຈາກຄວາມໂສກເສົ້າໂດຍການເຊື່ອຟັງຕໍ່ປ້າຍ “ໃຫ້ລະວັງ” ທາງວິນຍານທີ່ພຣະເຈົ້າ ແລະ ສາດສະດາໄດ້ຕິດໄວ້ຕາມເສັ້ນທາງຂອງເຮົາ.

ຕອນຂ້າພະເຈົ້າຍັງນ້ອຍ, ຄອບຄົວຂອງຂ້າພະເຈົ້າໄດ້ຂັບລົດພາຄອບຄົວຂ້າມພູຣ໊ອກກີ້ ເພື່ອໄປຢ້ຽມຢາມພໍ່ຕູ້ແມ່ຕູ້. ເສັ້ນທາງໃນຕອນຕົ້ນກໍຮາບພຽງ, ແຕ່ຢູ່ໄກໆ ພວກເຮົາໄດ້ຫລຽວເຫັນຄ້ອຍສູງ ທີ່ເຕັມໄປດ້ວຍຕົ້ນແປກ, ແລະ ຈາກນັ້ນເປັນປ່າຂອງຕົ້ນອັສເປັນ ແລະ ຈອມພູທີ່ພວກເຮົາສາມາດຫລຽວເຫັນຈົນສຸດສາຍຕາ.

ແຕ່ເສັ້ນທາງທີ່ສວຍງາມນີ້ ບໍ່ໄດ້ເປັນເສັ້ນທາງທີ່ປອດໄພຕະຫລອດ. ສ່ວນຫລາຍຈະເປັນບ່ອນມີເຫວຊັນ. ໃນການປ້ອງກັນຄົນເດີນທາງ, ຜູ້ສ້າງທາງໄດ້ໃຊ້ຮາວເຫລັກກັນໄວ້ ແລະ ຕິດປ້າຍບອກວ່າ, “ໃຫ້ລະວັງ: ກ້ອນຫີນເຈື່ອນ.” ພວກເຮົາໄດ້ເຫັນເຫດຜົນຫລາຍຢ່າງສຳລັບການເຕືອນເຫລົ່ານັ້ນ. ກ້ອນຫີນນ້ອຍ ແລະ ກ້ອນຫີນໃຫຍ່ໄດ້ຢາຍຢູ່ໃກ້ແຄມນ້ຳຢູ່ຂ້າງລຸ່ມໃກ້ທາງ. ບາງເທື່ອ, ພວກເຮົາກໍເຄີຍເຫັນລົດທີ່ຕົກລົງເຫວ, ເປັນເພາະການຂັບລົດແບບບໍ່ລະວັງ.

ຄຳສາບານ ແລະ ພັນທະສັນຍາຂອງຖານະປະໂລຫິດ

ອ້າຍນ້ອງທັງຫລາຍ, ທ່ານແຕ່ລະຄົນໄດ້ເຮັດ, ຫລື ບໍ່ດົນຈະໄດ້ເຮັດຄຳສາບານ ແລະ ເຮັດພັນທະສັນຍາຂອງຖານະປະໂລຫິດແຫ່ງເມນຄີເສເດັກ.¹ ໃນພັນທະສັນຍານັ້ນແມ່ນຮ່ວມດ້ວຍການເດີນທາງທີ່ຮຸ່ງເຫລື້ອມ ຊຶ່ງເລີ່ມຕົ້ນດ້ວຍການຮັບເອົາຖານະປະໂລຫິດທີ່ຕ່ຳກວ່າ ແລະ ສູງກວ່າ, ກ້າວໜ້າຜ່ານການຂະຫຍາຍການເອີ້ນຂອງເຮົາ, ແລະ ປີນຂຶ້ນສູງເຖິງທິວທັດທີ່ສວຍງາມທີ່ສຸດຂອງພຣະເຈົ້າ ຈົນວ່າເຮົາໄດ້ຮັບທຸກສິ່ງທີ່ພຣະບິດາມີ.”²

ຜູ້ອອກແບບທີ່ສະຫລາດຂອງເສັ້ນທາງຊັ້ນສູງນັ້ນ ໄດ້ຕິດປ້າຍໄວ້ໃນເສັ້ນທາງຂອງເຮົາ. ຄຳສາບານ ແລະ ພັນທະສັນຍາຂອງຖານະປະໂລຫິດບັນຈຸຄຳເຕືອນຂອງພຣະຜູ້ເປັນເຈົ້າວ່າ ພຣະອົງໄດ້ມອບພຣະບັນຍັດຂໍ້ໜຶ່ງໃຫ້ແກ່ເຮົາ ເພື່ອໃຫ້ລະວັງກ່ຽວກັບຕົນເອງ.”³

ເປັນຫຍັງພຣະເຈົ້າຈຶ່ງບັນຊາເຮົາໃຫ້ລະວັງ? ພຣະອົງຮູ້ວ່າ ຊາຕານມີຈິງ⁴ ຜູ້ພະຍາຍາມທີ່ຈະແກ່ເຮົາລົງໄປຫາເຫວເລິກແຫ່ງຄວາມທຸກທໍລະມານ.⁵ ພຣະເຈົ້າກໍຮູ້ອີກວ່າ ການລີ້ຕົວຢູ່ໃນການດຳລົງຖານະປະໂລຫິດເປັນ “ທຳມະຊາດຂອງມະນຸດ”⁶ “ມັກຈະຫລົງທາງໄປ.”⁷ ດັ່ງນັ້ນ, ສາດສະດາຈຶ່ງໄດ້ເຊື້ອເຊີນເຮົາໃຫ້ “ຖອດຖິ້ມສະພາບມະນຸດເກົ່າ”⁸ ແລະ “ສວມຊີວິດຂອງພຣະຄຣິດ”⁹ ຜ່ານສັດທາ, ການກັບໃຈ, ພິທີການແຫ່ງຄວາມລອດ, ແລະ ການດຳລົງຊີວິດຕາມພຣະກິດຕິຄຸນໄປແຕ່ລະວັນ.

ການຫລີກເວັ້ນຈາກຄວາມໂສກເສົ້າ

ໃນຂະນະທີ່ເດີນທາງໄປໃນເສັ້ນທາງຂອງຖານະປະໂລຫິດ, ຜູ້ຊາຍທັງນ້ອຍ ຫລື ໃຫຍ່ທຸກຄົນສາມາດຖືກດຶງລົງ ຖ້າຫາກເຂົາບໍ່ລະວັງຕົວ. ທ່ານເຄີຍຕົກຕະລຶງ ແລະ ເສຍໃຈຫລາຍກັບການຕົກຂອງຊາຍໜຸ່ມທີ່ດີເດັ່ນ, ຜູ້ສອນສາດສະໜາທີ່ຫາກໍກັບມາ, ຜູ້ນຳຖານະປະໂລຫິດທີ່ໜ້ານັບຖື, ຫລື ຄົນໃນຄອບຄົວທີ່ທ່ານຮັກບໍ?

ພຣະສັນຍາເດີມໄດ້ບອກເລື່ອງລາວກ່ຽວກັບດາວິດ ຊຶ່ງເປັນຕົວຢ່າງເຖິງການຖິ້ມຖານະປະໂລຫິດໄປລ້າໆ. ເຖິງແມ່ນວ່າເພິ່ນໄດ້ເອົາຊະນະໂກລີອາດຕອນຍັງນ້ອຍ ແລະ ໄດ້ດຳລົງຊີວິດຢ່າງຊອບທຳເປັນເວລາຫລາຍສິບປີ,¹⁰ ແຕ່ກະສັດດາວິດຍັງມີຈຸດອ່ອນທາງວິນຍານ. ໃນຊ່ວງເວລາທີ່ສຳຄັນນັ້ນ, ຕອນເພິ່ນຢືນຢູ່ເທິງຫລັງຄາເພິ່ນໄດ້ຫລຽວເຫັນນາງບັດຊີບາທີ່ສວຍສົດງົດງາມອາບນ້ຳຢູ່, ບໍ່ມີຜູ້ອາລັກຂາເອີ້ນເຕືອນ, “ຈົ່ງລະວັງ, ພຣະອົງດາວິດ, ທ່ານຕົກໂງ່!” ຄວາມອ່ອນແອທີ່ຈະເຕືອນຕົນເອງ¹¹ ແລະ ບໍ່ໄດ້ເຮັດຕາມການກະຕຸ້ນຂອງພຣະວິນຍານ¹² ໄດ້ເຮັດໃຫ້ເພິ່ນສູນເສຍຄອບຄົວນິລັນດອນຂອງເພິ່ນໄປ.¹³

ອ້າຍນ້ອງທັງຫລາຍ, ຖ້າຫາກວ່າ ແມ່ນແຕ່ດາວິດຜູ້ຍິ່ງໃຫຍ່ຍັງຖືກກວາດລົງຈາກເສັ້ນທາງແຫ່ງຄວາມສູງສົ່ງ, ເຮົາຈະສາມາດຫລີກເວັ້ນຈາກຊາຕາກຳທີ່ຄ້າຍຄືກັນນັ້ນໄດ້ແນວໃດ?

ຮາວເຫລັກປ້ອງກັນສອງຢ່າງຂອງການປ່ຽນໃຈເຫລື້ອມໃສ ແລະ ຄວາມສຳພັນອັນແໜ້ນແຟ້ນຂອງຄອບຄົວຈະຊ່ອຍເຫລືອເຮົາໃຫ້ຢູ່ໃນເສັ້ນທາງແຫ່ງສະຫວັນໄດ້.

ໂດຍທີ່ຮູ້ຈັກແນວນີ້, ຊາຕານຈຶ່ງໄດ້ວາງກ້ອນຫີນຂະໜາດໃຫຍ່ໄວ້ໃນເສັ້ນທາງຂອງຖານະປະໂລຫິດແຫ່ງການປ່ຽນໃຈເຫລື້ອມໃສ ແລະ ການຜູກມັດຂອງຄອບຄົວ. ໂຊກດີທີ່ພຣະເຢຊູຄຣິດ ແລະ ສາດສະດາຂອງພຣະອົງໄດ້ຕິດປ້າຍ “ໃຫ້ລະວັງ” ໄວ້ຕາມເສັ້ນທາງນັ້ນ. ພວກເພິ່ນໄດ້ເຕືອນເຮົາສະເໝີກ່ຽວກັບຄວາມຈອງຫອງ¹⁴ ແລະ ບາບເຊັ່ນ ຄວາມໂມໂຫ, ຄວາມໂລບມາກ, ແລະ ຕັນຫາລາມົກ.

ດົນນານມາແລ້ວ ໂມເຊໄດ້ແນະນຳວ່າ, “ຈົ່ງແນ່ໃຈວ່າພວກເຈົ້າບໍ່ໄດ້ລືມໄລພຣະຜູ້ເປັນເຈົ້າ.”¹⁵ ຢູ່ໃນໂລກທີ່ດຳເນີນໄປຢ່າງໄວ ແລະ ການບັນເທີງຂະຫຍາຍໄປທົ່ວໂລກ, ມະນຸດຈະມັກ “ຫລົງລືມພຣະຜູ້ເປັນເຈົ້າ, ... ກະທຳຄວາມຊົ່ວ, ແລະ ຖືກຊັກຊວນໄປຫາມານຮ້າຍ.”¹⁶

ການປ່ຽນໃຈເຫລື້ອມໃສທີ່ເລິກຊຶ້ງ ແລະ ການເພີ່ມຄວາມເຂັ້ມແຂງໃຫ້ແກ່ຄອບຄົວ

ໃນການຢູ່ໃນເສັ້ນທາງຂອງຖານະປະໂລຫິດຢ່າງປອດໄພໃນທ່າມກາງກ້ອນຫີນຂອງການລໍ້ລວງທີ່ເຈື່ອນລົງມາ, ຂ້າພະເຈົ້າຂໍເຕືອນທ່ານດ້ວຍຫລັກທຳຂັ້ນພື້ນຖານຫົກຂໍ້ທີ່ເຮັດໃຫ້ການປ່ຽນໃຈເຫລື້ອມໃສເລິກຊຶ້ງ ແລະ ເພີ່ມຄວາມເຂັ້ມແຂງໃຫ້ແກ່ຄອບຄົວ.

ທຳອິດ, ການອະທິຖານສະເໝີຈະເປີດປະຕູສຳລັບຄວາມຊ່ອຍເຫລືອຈາກສະຫວັນເພື່ອ “ເອົາຊະນະຊາຕານ.”¹⁷ ທຸກເທື່ອທີ່ພຣະເຢຊູໄດ້ເຕືອນຜູ້ດຳລົງຖານະປະໂລຫິດ “ໃຫ້ລະວັງ, ເພາະວ່າຊາຕານປາຖະໜາທີ່ຈະຝັດ [ພວກທ່ານ],” ພຣະອົງໄດ້ສັ່ງວ່າ ການອະທິຖານເປັນການກະທຳປ້ອງກັນຈາກການລໍ້ລວງ.¹⁸ ປະທານທອມມັສ ແອັສ ມອນສັນ ໄດ້ສອນວ່າ: “ຖ້າຄົນໃດໃນພວກເຮົາຊັກຊ້າໃນການເຊື່ອຟັງຕໍ່ຄຳແນະນຳທີ່ຈະອະທິຖານສະເໝີ, ບໍ່ມີເວລາໃດອີກທີ່ເໝາະສົມໄປກວ່າເວລານີ້ ທີ່ຈະເລີ່ມຕົ້ນອະທິຖານ. … ບໍ່ມີຊາຍຄົນໃດທີ່ສູງໄປກວ່າຕອນລາວນັ່ງຄຸເຂົ່າ.”¹⁹

ສອງ, ການສຶກສາພຣະຄຳພີເດີມ ແລະ ຂອງສະໄໝປະຈຸບັນ ຕິດຕໍ່ເຮົາໃສ່ກັບພຣະເຈົ້າ. ພຣະຜູ້ເປັນເຈົ້າໄດ້ເຕືອນສະມາຊິກຂອງສາດສະໜາຈັກໃຫ້ລະວັງກັບວິທີທີ່ພວກເຂົານັບຖື [ສາດສະດາ] ຖ້າບໍ່ດັ່ງນັ້ນພວກເຂົາຈະນັບຖືວ່າເປັນເລື່ອງເລັກນ້ອຍ, ແລະ ຈະຖືກນຳມາຢູ່ພາຍໃຕ້ການກ່າວໂທດເພາະການນັ້ນ, ແລະ ສະດຸດ ແລະ ລົ້ມ.”²⁰ ໃນການຫລີກເວັ້ນຈາກການກ່າວໂທດອັນໜັກໜ່ວງນັ້ນ, ເຮົາຄວນອ່ານພຣະຄຳພີຢ່າງພາກພຽນ, ເຊັ່ນດຽວກັບວາລະສານຂອງສາດສະໜາຈັກ ແລະ ເວບໄຊ້ທີ່ຊ່ອຍເຮົາໃຫ້ໄດ້ຮັບ “ຄຳແນະນຳໃນທາງທີ່ສູງສຸດ ແລະ ເປັນສ່ວນຕົວ ຈາກສາດສະດາທີ່ [ພຣະຜູ້ເປັນເຈົ້າ] ໄດ້ເລືອກໄວ້.”²¹

ສາມ, ການມີສ່ວນຮ່ວມໃນພິທີການຢ່າງມີຄ່າຄວນ ຈະຕຽມເຮົາໃຫ້ຮັບເອົາພຣະວິນຍານສັກສິດເພື່ອການນຳພາ.”²² ເມື່ອພຣະຜູ້ຊ່ອຍໃຫ້ລອດໄດ້ເຕືອນວ່າ, ໃຫ້ລະວັງ ຖ້າບໍ່ດັ່ງນັ້ນເຈົ້າຈະຖືກຫລອກລວງ,” ພຣະອົງໄດ້ສັນຍາເຮົາວ່າ ເຮົາຈະບໍ່ເປັນເຊັ່ນນັ້ນ ຖ້າຫາກເຮົາສະແຫວງຫາ … ຂອງປະທານທີ່ດີທີ່ສຸດຢ່າງຕັ້ງໃຈຂອງພຣະວິນຍານ.²³ ການຮັບສ່ວນສິນລະລຶກຢ່າງມີຄ່າຄວນແຕ່ລະອາທິດ ຈະຊ່ອຍສະມາຊິກໃຫ້ “ມີພຣະວິນຍານຂອງພຣະອົງຢູ່ດ້ວຍຕະຫລອດເວລາ.”²⁴ ຢູ່ໃນການນະມັດສະການໃນພຣະວິຫານ ເຮົາຈະໄດ້ຮັບຄວາມສົມບູນແຫ່ງພຣະວິນຍານບໍລິສຸດ.”²⁵

ສີ່, ການສະແດງຄວາມຮັກທີ່ຈິງຈັງ ເປັນຫລັກທຳທີ່ສຳຄັນທີ່ສຸດໃນການປ່ຽນໃຈເຫລື້ອມໃສ ແລະ ຄວາມສຳພັນໃນຄອບຄົວ. ກະສັດເບັນຢາມິນໄດ້ແນະນຳວ່າ, “ຈົ່ງລະວັງ ເພາະຢ້ານວ່າມັນຈະເກີດມີການຂັດແຍ້ງກັນຂຶ້ນໃນບັນດາພວກທ່ານ.”²⁶ ຢ່າລືມວ່າ ຊາຕານເປັນ “ບິດາຂອງການຂັດແຍ້ງ”²⁷ ແລະ ຢາກໃຫ້ຄອບຄົວ “ຕໍ່ສູ້ ແລະ ຜິດຖຽງກັນ.”²⁸ ອ້າຍນ້ອງທັງຫລາຍ ຖ້າຫາກເຮົາທຳຮ້າຍຄົນໃດຢູ່ໃນຄອບຄົວຂອງເຮົາບໍ່ວ່າຈະເປັນທາງຄວາມຮູ້ສຶກ ຫລື ຂົ່ມເຫັງຄົນອື່ນ, ແລ້ວເຮົາຈະສູນເສຍອຳນາດຖານະປະໂລຫິດໄປ.²⁹ ຈົ່ງເລືອກທີ່ຈະຄວບຄຸມຄວາມໂມໂຫ. ຄົນໃນຄອບຄົວຄວນໄດ້ຍິນຄຳສັນລະເສີນ ບໍ່ແມ່ນຄຳປ້ອຍດ່າຂອງເຮົາ. ເຮົາຕ້ອງເປັນຕົວຢ່າງໃຫ້ແກ່ຄົນອື່ນໂດຍການຊັກຊວນ, ອົດກັ້ນ, ອ່ອນໂຍນ, ອ່ອນນ້ອມ, ຮັກແບບບໍ່ແກ້ງເຮັດ, ມີເມດຕາ, ແລະ ໃຈບຸນເທົ່ານັ້ນ.³⁰

ຫ້າ, ການເຊື່ອຟັງກົດສ່ວນສິບ ເປັນສິ່ງສຳຄັນຫລາຍຕໍ່ສັດທາ ແລະ ຄວາມເປັນໜຶ່ງໃນຄອບຄົວ. ເພາະວ່າຊາຕານຈະໃຊ້ຄວາມໂລບ ແລະ ການສະແຫວງຫາສິ່ງຂອງເປັນສິ່ງຊຸກຄອບຄົວໃຫ້ຕົກຈາກທາງຊັ້ນສູງ, ພຣະເຢຊູຈຶ່ງໄດ້ເຕືອນວ່າ, “ຈົ່ງລະວັງຈາກຄວາມໂລບ.”³¹ ຄວາມໂລບຈະຖືກຢັບຢັ້ງເມື່ອເຮົາວາງແຜນເລື່ອງການເງິນ, ຈ່າຍສ່ວນສິບຢ່າງຊື່ສັດ ແລະ ເພື່ອແຜ່ໃນການຈ່າຍເງິນບໍລິຈາກ, ງົບປະມານການໃຊ້ຈ່າຍ, ຫລີກເວັ້ນຈາກໜີ້ສິນທີ່ບໍ່ຈຳເປັນ, ເກັບທ້ອນສຳລັບຄວາມຈຳເປັນໃນອະນາຄົດ, ແລະ ກາຍເປັນຄົນກຸ້ມຕົນເອງທາງໂລກ. ພຣະເຈົ້າໄດ້ສັນຍາກັບເຮົາວ່າ “ຈົ່ງສະແຫວງຫາລາຊາອານາຈັກຂອງພຣະເຈົ້າ ແລະ ຄວາມຊອບທຳຂອງພຣະອົງເສຍກ່ອນ, ແລ້ວພຣະອົງຈະເພີ່ມສິ່ງເຫລົ່ານີ້ໃຫ້ແກ່ເຈົ້າ.”³²

ຫົກ, ດຳລົງຊີວິດຕາມກົດພົມມະຈັນຢ່າງເຄັ່ງຄັດ ຍຶດໝັ້ນຢູ່ໃນຄວາມແນ່ນອນໃຈທີ່ຈະສາມາດຢືນຢູ່ໃນທີ່ປະທັບຂອງພຣະເຈົ້າ ໂດຍມີພຣະວິນຍານບໍລິສຸດເປັນເພື່ອນຂອງທ່ານສະເໝີ.”³³ ຊາຕານພວມໂຈມຕີຄຸນນະທຳ ແລະ ການແຕ່ງງານດ້ວຍສິ່ງລາມົກຢ່າງຫລວງຫລາຍ. ເມື່ອພຣະຜູ້ເປັນເຈົ້າໄດ້ເຕືອນຄົນຫລິ້ນຊູ້ໃຫ້ລະວັງ ແລະ ກັບໃຈຢ່າງໄວ, ຄຳເຕືອນຂອງພຣະອົງບໍ່ແມ່ນແຕ່ສຳລັບການຫລິ້ນຊູ້ທາງຮ່າງກາຍເທົ່ານັ້ນ ແຕ່ສຳລັບການຫລິ້ນຊູ້ທາງໃຈນຳອີກ³⁴ ສາດສະດາໃນສະໄໝໃໝ່ ແລະ ອັກຄະສາວົກໄດ້ກ່າວເລື້ອຍໆຢ່າງແຈ່ມແຈ້ງກ່ຽວກັບໂລກລະບາດຂອງຮູບພາບລາມົກ. ປະທານກໍດອນ ບີ ຮິງລີ ໄດ້ສອນວ່າ: “[ຮູບພາບລາມົກ] ເປັນເໝືອນດັ່ງລົມພະຍຸທີ່ຮ້າຍແຮງ, ທຳລາຍບາງຄົນ ແລະ ຄອບຄົວ, ທຳລາຍສິ່ງທີ່ເຄີຍດີງາມຈົນໝົົດສິ້ນ. ... ວັນເວລາໄດ້ມາເຖິງແລ້ວສຳລັບເຮົາທຸກຄົນຜູ້ຢາກປີນຂຶ້ນຈາກບຶງ.”³⁵ ຖ້າຫາກທ່ານຖືກລໍ້ລວງໃຫ້ລະເມີດກົດພົມມະຈັນ ບໍ່ວ່າຈະເປັນໃນຮູບແບບໃດກໍຕາມ, ຈົ່ງເຮັດຕາມຕົວຢ່າງຂອງໂຢເຊັບໃນເອຢິບ, ຜູ້ໄດ້ “ຫລົບໜີ, ແລະ ແລ່ນອອກໄປຂ້າງນອກ.”³⁶

ຫລັກທຳຂັ້ນພື້ນຖານຫົກຂໍ້ນີ້ ຈະຊ່ອຍເຫລືອຜູ້ດຳລົງຖານະປະໂລຫິດໃຫ້ດຳເນີນຕໍ່ໄປໃນເສັ້ນທາງ ຮັກສາຕົນໃຫ້ຢູ່ລະຫວ່າງຮາວເຫລັກແຫ່ງການປ່ຽນໃຈເຫລື້ອມໃສ ແລະ ຄວາມສຳພັນຂອງຄອບຄົວ. ຊາຍໜຸ່ມທັງຫລາຍ, ການເຊື່ອຫລັກທຳເຫລົ່ານີ້ຈະຕຽມພວກເຈົ້າສຳລັບພຣະວິຫານ, ເປັນຜູ້ສອນສາດສະໜາເຕັມເວລາ, ແລະ ແຕ່ງງານຊົ່ວນິລັນດອນ. ສາມີ ແລະ ພໍ່ທັງຫລາຍ, ການດຳລົງຊີວິດຕາມຫລັກທຳເຫລົ່ານີ້ ຈະເຮັດໃຫ້ທ່ານປົກຄອງຄອບຄົວດ້ວຍຄວາມຊອບທຳ, ຮັບໃຊ້ເປັນຜູ້ນຳທາງວິນຍານໃນຄອບຄົວຂອງທ່ານ, ໂດຍມີພັນລະຍາຂອງທ່ານເປັນຫຸ້ນສ່ວນທີ່ເທົ່າທຽມກັນ.³⁷ ເສັ້ນທາງຂອງຖານະປະໂລຫິດ ເປັນການເດີນທາງທີ່ເຕັມໄປດ້ວຍຄວາມສຸກ.

ການຢູ່ໃນເສັ້ນທາງຂອງຖານະປະໂລຫິດ

ຫັນຄືນກັບໄປກ່າວກ່ຽວກັບປະສົບການຂອງຂ້າພະເຈົ້າຕອນຍັງນ້ອຍ, ຂ້າພະເຈົ້າຈື່ໄດ້ວ່າ ເທື່ອໜຶ່ງຂ້າພະເຈົ້າໄດ້ຂ້າມພູຣ໊ອກກີ້ໄປ. ຫລັງຈາກໄດ້ເດີນຜ່ານປ້າຍ “ໃຫ້ລະວັງ: ກ້ອນຫີນເຈື່ອນ”, ພໍ່ຂອງຂ້າພະເຈົ້າໄດ້ສັງເກດເຫັນຫີນກ້ອນນ້ອຍໆຢາຍຢູ່ຕາມຫົນທາງຢູ່ທາງໜ້າຂອງພວກເຮົາ. ເພິ່ນໄດ້ຜ່ອນລົດລົງເກືອບຢຸດ ໃນຂະນະທີ່ຫີນກ້ອນໜຶ່ງເທົ່າກັບໜ່ວຍໝາກບານໄດ້ຕົກລົງມາຢູ່ທາງໜ້າພວກເຮົາ. ເພິ່ນໄດ້ລໍຖ້າໃຫ້ຫີນກ້ອນນັ້ນກິ້ງໜີ ແລ້ວຈຶ່ງໄດ້ຂັບລົດຕໍ່ໄປ. ການມີສະຕິລະວັງຕົວຂອງພໍ່ຂອງຂ້າພະເຈົ້າໄດ້ຊ່ອຍໃຫ້ຄອບຄົວຂອງເພິ່ນປອດໄພ ແລະ ໄປເຖິງຈຸດໝາຍປາຍທາງ.

ອ້າຍນ້ອງທັງຫລາຍ, ຊາຕານສະແຫວງຫາທີ່ຈະທຳລາຍຈິດວິນຍານຂອງມະນຸດ.”³⁸ ຖ້າຫາກຈິດວິນຍານຂອງທ່ານເລື່ອນໄປໃກ້ເຫວຊັນແລ້ວ, ຈົ່ງຢຸດກ່ອນມັນຈະຕົກລົງໄປ, ແລະ ໃຫ້ຖອຍກັບຄືນໄປຫາເສັ້ນທາງ.³⁹ ຖ້າຫາກທ່ານຮູ້ສຶກວ່າ ຈິດວິນຍານຂອງທ່ານໄດ້ຕົກລົງໄປ ແລະ ເພພັງຢູ່ພື້ນເຫວ ແທນທີ່ຈະຢູ່ໃນເສັ້ນທາງຂອງຖານະປະໂລຫິດເພາະຂາດການເອົາໃຈໃສ່ຕໍ່ປ້າຍ “ໃຫ້ລະວັງ” ແລະ ໄດ້ເຮັດບາບ, ແລ້ວຂ້າພະເຈົ້າຂໍເປັນພະຍານວ່າ ຜ່ານການກັບໃຈທີ່ຈິງໃຈ ແລະ ອຳນາດການຊົດໃຊ້ຂອງພຣະເຢຊູຄຣິດ, ທ່ານຈະສາມາດຖືກຍົກຂຶ້ນມາ ຫາເສັ້ນທາງສະຫວັນຂອງພຣະເຈົ້າໄດ້.⁴⁰

ພຣະເຢຊູໄດ້ສອນວ່າ, “ຈົ່ງລະວັງຄວາມ … ໜ້າຊື່ໃຈຄົດ.”⁴¹ ຖ້າຫາກທ່ານບໍ່ມີຄ່າຄວນພໍທີ່ຈະໃຊ້ຖານະປະໂລຫິດ, ຈົ່ງໄປພົບກັບອະທິການຂອງທ່ານ, ຜູ້ສາມາດຊ່ອຍເຫລືອທ່ານໃຫ້ກັບໃຈ. ຈົ່ງກ້າຫານ ເຖິງແມ່ນພຣະຜູ້ຊ່ອຍໃຫ້ລອດໄດ້ກ່າວວ່າ, “ຈົ່ງລະວັງ, … ແລະ ຫລີກເວັ້ນຈາກບາບ,”⁴² ແຕ່ພຣະອົງກໍໄດ້ສັນຍາອີກວ່າ, ເຮົາ, ພຣະຜູ້ເປັນເຈົ້າ, ຈະໃຫ້ອະໄພແກ່ເຈົ້າ … ຈົ່ງໄປຕາມທາງຂອງເຈົ້າ ແລະ ຢ່າເຮັດບາບອີກຕໍ່ໄປ.”⁴³

ຂ້າພະເຈົ້າຂໍເຊື້ອເຊີນຜູ້ຊາຍທັງນ້ອຍ ແລະ ໃຫຍ່ ໃຫ້ຍຶດໝັ້ນຢູ່ໃນເສັ້ນທາງຂອງຖານະປະໂລຫິດ ໂດຍການປ່ຽນໃຈເຫລື້ອມໃສຢ່າງເລິກຊຶ້ງ ແລະ ເພີ່ມຄວາມເຂັ້ມແຂງໃຫ້ແກ່ຄອບຄົວຂອງທ່ານ. ການອະທິຖານ, ພຣະຄຳພີ, ແລະ ພິທີການ ຈະຊ່ອຍໃຫ້ການປ່ຽນໃຈເຫລື້ອມໃສເລິກຊຶ້ງຫລາຍຂຶ້ນ. ຄວາມຮັກ, ສ່ວນສິບ, ແລະ ຄວາມໃຈບຸນ ຈະເພີ່ມຄວາມເຂັ້ມແຂງໃຫ້ແກ່ຄອບຄົວ. ຫລີກເວັ້ນຈາກຄວາມໂສກເສົ້າໂດຍການເຊື່ອຟັງຕໍ່ປ້າຍ “ໃຫ້ລະວັງ” ທາງວິນຍານ ທີ່ພຣະເຈົ້າ ແລະ ສາດສະດາໄດ້ຕິດໄວ້ຕາມເສັ້ນທາງຂອງເຮົາ. ຈົ່ງພະຍາຍາມເຮັດຕາມຕົວຢ່າງອັນດີພ້ອມທຸກຢ່າງຂອງພຣະເຢຊູຄຣິດ, ຜູ້ໄດ້ທົນກັບການລໍ້ລວງຕ່າງໆນາງໆ ແຕ່ບໍ່ໄດ້ເອົາໃຈໃສ່ກັບມັນ.”⁴⁴

ຂ້າພະເຈົ້າສັນຍາວ່າ ຖ້າຫາກຜູ້ຊາຍຮັກສາພັນທະສັນຍາຂອງຖານະປະໂລຫິດທີ່ໃຫ້ລະວັງກ່ຽວກັບຕົນເອງ,”⁴⁵ ແລ້ວເຮົາ ແລະ ຄອບຄົວຂອງເຮົາຈະສາມາດແນ່ໃຈໄດ້ວ່າ ເຮົາຈະໄປເຖິງຈຸດໝາຍປາຍທາງຂອງເຮົາດ້ວຍຄວາມປອດໄພ ແລະ ປິຕິຍິນດີ ໃນອານາຈັກຊັ້ນສູງ. ຂ້າພະເຈົ້າເປັນພະຍານໃນພຣະນາມຂອງພຣະເຢຊູຄຣິດ, ອາແມນ.