ຄວາມສຸກຂອງຖານະປະໂລຫິດ
ໂດຍ ປະທານດີເດີ ແອັຟ ອຸກດອບ
ທີ່ປຶກສາທີສອງໃນຝ່າຍປະທານສູງສຸດ
ຂໍໃຫ້ເຮົາຈົ່ງຮັບເອົາ ແລະ ເຂົ້າໃຈຄວາມມະຫັດສະຈັນ ແລະ ສິດທິພິເສດຂອງຖານະປະໂລຫິດ. ຂໍໃຫ້ເຮົາຈົ່ງຮັບເອົາ ແລະ ຮັກໜ້າທີ່ຮັບຜິດຊອບທີ່ເຮົາຖືກຂໍໃຫ້ບັນລຸ.
ຄວາມສຸກກັບການຂັບຍົນ
ຫລາຍປີກ່ອນ ເພື່ອນນັກບິນສອງສາມຄົນກັບຂ້າພະເຈົ້າ ໄດ້ຕັດສິນໃຈເຮັດບາງສິ່ງໃນຝັນຂອງພວກເຮົາ ນັ້ນຄືການສ້ອມແປງຍົນເກົ່າ. ພວກເຮົາໄດ້ຊື້ຍົນເກົ່າ 1938 Piper Cub ລຳໜຶ່ງ ແລະ ໄດ້ເລີ່ມສ້ອມແປງມັນໃຫ້ມີຮູບຮ່າງເໝືອນເດີມ. ມັນເປັນວຽກງານດ້ວຍຄວາມຮັກ. ມັນມີຄວາມໝາຍພິເສດສຳລັບຂ້າພະເຈົ້າ ເພາະວ່າຂ້າພະເຈົ້າໄດ້ຮຽນຂັບຍົນທີ່ຄ້າຍຄືກັນນັ້ນຕອນຂ້າພະເຈົ້າຍັງໜຸ່ມ.
ຍົນລຳນັ້ນໄດ້ຖືກສ້າງຂຶ້ນພຽງແຕ່ 35 ປີ ຫລັງຈາກ the Wright brothers ໄດ້ຂັບຍົນທີ່ມີຊື່ສຽງຂອງເຂົາເຈົ້າເປັນເທື່ອທຳອິດ. ເມື່ອຄິດກ່ຽວກັບສິ່ງນີ້ ມັນເຮັດໃຫ້ຂ້າພະເຈົ້າຮູ້ສຶກວ່າເຖົ້າແກ່ຫລາຍ.
ຍົນລຳນັ້ນບໍ່ມີເຄື່ອງຕິດຈັກແບບໂອໂຕເມຕິກ; ໃນຂະນະທີ່ຄົນໜຶ່ງພະຍາຍາມຕິດຈັກຢູ່ຫົວຍົນ, ອີກຄົນໜຶ່ງຕ້ອງໝຸນໝາກປິ່ນ, ຈົນວ່າເຄື່ອງຈັກຈະແລ່ນເປັນປົກກະຕິ. ທຸກເທື່ອທີ່ພະຍາຍາມຕິດຈັກຍົນ ເປັນເລື່ອງທີ່ໜ້າຕື່ນເຕັ້ນ ແລະ ເປັນຄວາມກ້າຫານ.
ເມື່ອຍົນຂຶ້ນຫວິດດິນ, ເຫັນໄດ້ວ່າ Piper Cub ບໍ່ໄດ້ຖືກສ້າງໃຫ້ບິນໄວ. ຕາມຄວາມຈິງແລ້ວ, ເມື່ອມີລົມພັດມາທາງໜ້າຍົນ, ເບິ່ງຄືວ່າ ເຮົາບໍ່ເຄື່ອນຍ້າຍເລີຍ. ຂ້າພະເຈົ້າຈື່ໄດ້ຕອນທີ່ໄດ້ຂັບຍົນກັບລູກຊາຍຜູ້ໄວລຸ້ນຂອງຂ້າພະເຈົ້າຢູ່ເທິງທາງຫລວງຢູ່ປະເທດເຢຍລະມັນ, ລົດຢູ່ທາງລຸ່ມແລ່ນໄວກວ່າຍົນຂອງພວກເຮົາ!
ແຕ່ຂ້າພະເຈົ້າຮັກຍົນລຳນ້ອຍໆນີ້ຫລາຍ! ມັນເປັນວິທີທີ່ດີທີ່ສຸດ ທີ່ຈະໄດ້ມີປະສົບການທີ່ແປກໃຈ ແລະ ເປັນຄວາມງົດງາມເລື່ອງການຂັບຍັນ. ທ່ານສາມາດໄດ້ຍິນ, ຮູ້ສຶກ, ໄດ້ກິ່ນ, ໄດ້ລອງລົດຊາດ, ແລະ ເຫັນວ່າການຂັບຍົນເປັນແບບໃດ. The Wright brothers ໄດ້ອະທິບາຍໃນທາງນີ້: “ບໍ່ມີ [ສິ່ງໃດ] ທີ່ນັກບິນມີຄວາມສຸກຫລາຍໄປກວ່າການໄດ້ຖືກຍົກຂຶ້ນເທິງອາກາດດ້ວຍປີກໃຫຍ່ສີຂາວ.”1
ກົງກັນຂ້າມ, ໃນຕົ້ນປີນີ້ ຂ້າພະເຈົ້າໄດ້ມີໂອກາດຂັບຍົນອາຍພົ່ນທີ່ຍາກທີ່ສຸດ F-18 fighter jet ທີ່ໂດ່ງດັງອັນດັບໂລກ (world-famous Blue Angels), ຂອງໜ່ວຍທະຫານເຮືອຂອງສະຫະລັດອາເມຣິກາ. ຄືກັບວ່າເປັນການຂັບຍົນຄືນຫາອາດີດ ຊຶ່ງເປັນເວລາ 50 ປີພໍດີ, ເກືອບແມ່ນມື້ດຽວກັນທີ່ຂ້າພະເຈົ້າໄດ້ສຳເລັດການຝຶກເປັນນັກບິນທະຫານອາກາດ.
ປະສົບການກັບຍົນ F-18 ນັ້ນ, ແນ່ນອນ, ແມ່ນແຕກຕ່າງຫລາຍຈາກຍົນ Piper Cub. ມັນສະແດງໃຫ້ຂ້າພະເຈົ້າເຫັນຄວາມງາມຂອງການຂັບຍົນຫລາຍກວ່າ. ຄືກັບວ່າເປັນການນຳໃຊ້ວິທີເຄື່ອນຍ້າຍວັດຖຸໃນອາກາດໃນວິທີທີ່ດີກວ່າ. ແຕ່ການຂັບຍົນ Blue Angels ກໍໄດ້ເຕືອນຂ້າພະເຈົ້າວ່າ ການເປັນນັກຂັບເຮືອບິນອາຍພົ່ນເປັນເກມຂອງຄົນໜຸ່ມ. The Wright brothers ໄດ້ກ່າວອີກວ່າ, “ຍິ່ງກວ່າສິ່ງອື່ນໃດເລື່ອງຄວາມຮູ້ສຶກ [ກ່ຽວກັບການບິນ] ຄືຄວາມສະຫງົບ, ປົນກັບຄວາມຕື່ນເຕັ້ນທີ່ລາມໄປທົ່ວທຸກເສັ້ນສາຍຢູ່ໃນຮ່າງກາຍ.”2 ນອກເໜືອຈາກນີ້, ການຂັບເຮືອບິນ Blue Angels ໄດ້ແນະນຳໃນທາງທີ່ແຕກຕ່າງກັນວ່າ “ເຫລົ່າທຸດ” ຈະອ້ອມຮອບທ່ານໄວ້ ແລະ ຄ້ຳຊູທ່ານ.
ຖ້າຫາກທ່ານຖາມຂ້າພະເຈົ້າວ່າ ຂ້າພະເຈົ້າມັກປະສົບການອັນໃດຫລາຍກວ່າກັນໃນປະສົບການສອງເທື່ອນັ້ນ, ຂ້າພະເຈົ້າກໍບອກບໍ່ໄດ້. ຍົນສອງຊະນິດແມ່ນແຕກຕ່າງກັນຫລາຍ, ເມື່ອຈະກ່າວແລ້ວ, ແຕ່ບາງສິ່ງກໍຄືກັນຫລາຍ.
ທັງໃນຍົນ Piper Cub ແລະ F-18, ຂ້າພະເຈົ້າຮູ້ສຶກຕື່ນເຕັ້ນ, ງົດງາມ, ແລະ ຊື່ນຊົມກັບການຂັບຍົນ. ຍົນທັງສອງລຳ ເຮັດໃຫ້ຂ້າພະເຈົ້າເຂົ້າໃຈເຖິງຄວາມໝາຍຂອງນັກກະວີທີ່ກ່າວວ່າ “[ອອກໄປຈາກ] ການຜູກມັດຂອງໂລກ ແລະ [ເຕັ້ນດີດ] ຢູ່ໃນທ້ອງນະພາ ດ້ວຍປີກທີ່ຂາວເປັນສີນ້ຳເງິນ.”3
ຖານະປະໂລຫິດທີ່ເໝືອນກັນຢູ່ໃນທຸກບ່ອນ
ບັດນີ້, ທ່ານອາດຢາກຖາມວ່າ, ເລື່ອງການຂັບຍົນສອງລຳນີ້ ມີສ່ວນກ່ຽວຂ້ອງຫຍັງກັບກອງປະຊຸມຂອງພວກເຮົາໃນມື້ນີ້ ຫລື ກັບຖານະປະໂລຫິດທີ່ເຮົາດຳລົງຢູ່ ຫລື ກັບການຮັບໃຊ້ຂອງຖານະປະໂລຫິດທີ່ເຮົາຮັກຫລາຍທີ່ສຸດ?
ອ້າຍນ້ອງທັງຫລາຍ, ບໍ່ໄດ້ເປັນຄວາມຈິງບໍທີ່ວ່າ ປະສົບການສ່ວນຕົວເລື່ອງການຮັບໃຊ້ຂອງເຮົາໃນຖານະປະໂລຫິດອາດແຕກຕ່າງກັນ? ພວກເຮົາສາມາດເວົ້າໄດ້ວ່າ ບາງຄົນໃນພວກທ່ານອາດຂັບຍົນ F-18 jets, ໃນຂະນະທີ່ບາງຄົນຂັບຍົນ Piper Cubs. ບາງຄົນໃນພວກທ່ານອາໄສຢູ່ໃນຫວອດ ແລະ ສະເຕກບ່ອນທີ່ຕຳແໜ່ງທັງໝົດ, ຈາກຜູ້ຊ່ອຍເຖິງກຸ່ມມະຫາປະໂລຫິດ ເຖິງເລຂານຸການຂອງກຸ່ມມັກຄະນາຍົກ, ສົມບູນຄົບຖ້ວນ ແລະ ມີຜູ້ດຳລົງຖານະປະໂລຫິດທີ່ເຂັ້ມແຂງ. ໂຊກດີຫລາຍທີ່ທ່ານໄດ້ເປັນພາກສ່ວນໃນຫວອດທີ່ສົມບູນແບບເຊັ່ນນັ້ນ.
ສ່ວນບາງຄົນໄດ້ອາໄສຢູ່ໃນບ່ອນທີ່ມີສະມາຊິກ ແລະ ຜູ້ນຳຖານະປະໂລຫິດຂອງສາດສະໜາຈັກພຽງເລັກໜ້ອຍ. ທ່ານອາດຮູ້ສຶກເປົ່າປ່ຽວດຽວດາຍ ແລະ ແບກຫາບພາລະໜັກກັບທຸກສິ່ງທີ່ຕ້ອງເຮັດໃຫ້ສຳເລັດ. ສຳລັບທ່ານ ອາດຕ້ອງໄດ້ລົງມືເຮັດຫລາຍສົມຄວນກ່ອນຈະເຮັດໃຫ້ເຄື່ອງຈັກແຫ່ງການຮັບໃຊ້ຂອງຖານະປະໂລຫິດແລ່ນເປັນປົກກະຕິ. ບາງເທື່ອ ອາດເບິ່ງຄືວ່າ ສາຂາ ຫລື ຫວອດຂອງທ່ານບໍ່ກ້າວໜ້າໄປເຖິງໃສ.
ເຖິງຢ່າງໃດກໍຕາມ, ບໍ່ວ່າໜ້າທີ່ຮັບຜິດຊອບ ຫລື ສະພາບການຂອງທ່ານຈະເປັນແນວໃດກໍຕາມ, ທ່ານ ແລະ ຂ້າພະເຈົ້າຮູ້ວ່າ ຈະມີຄວາມສຸກພິເສດທີ່ມາຈາກການຮັບໃຊ້ທີ່ອຸທິດຕົນໃນຖານະປະໂລຫິດ.
ຂ້າພະເຈົ້າມັກຂັບຍົນ, ບໍ່ວ່າຈະເປັນຍົນ Piper Cub, ຍົນ F-18, ຫລື ຍົນຊະນິດອື່ນໆ. ໃນຂະນະທີ່ຂັບຍົນ Piper Cub, ຂ້າພະເຈົ້າບໍ່ໄດ້ຈົ່ມກ່ຽວກັບຄວາມຊ້າຂອງມັນ; ຕອນຢູ່ໃນຍົນ F-18 ຂ້າພະເຈົ້າກໍບໍ່ໄດ້ຈົ່ມເມື່ອຮູ້ສຶກບໍ່ສະບາຍໃຈທີ່ຕົນເອງມີອາຍຸສູງແລ້ວ.
ແມ່ນແລ້ວ, ຈະມີບາງສິ່ງບົກພ່ອງໃນທຸກສະຖານະການ. ແມ່ນແລ້ວ, ງ່າຍທີ່ຈະຊອກຫາບາງສິ່ງມາຈົ່ມ.
ແຕ່ອ້າຍນ້ອງທັງຫລາຍ, ເຮົາເປັນຜູ້ດຳລົງຖານະປະໂລຫິດທີ່ສັກສິດ ຕາມລະບຽບຂອງພຣະບຸດຂອງພຣະເຈົ້າ! ເຮົາແຕ່ລະຄົນໄດ້ຖືກວາງມືໃສ່ເທິງຫົວ, ແລະ ໄດ້ຮັບຖານະປະໂລຫິດຂອງພຣະເຈົ້າ. ເຮົາໄດ້ຮັບສິດອຳນາດ ແລະ ໜ້າທີ່ຮັບຜິດຊອບທີ່ຈະກະທຳໃນພຣະນາມຂອງພຣະອົງ ໃນຖານະເປັນຜູ້ຮັບໃຊ້ຂອງພຣະອົງຢູ່ເທິງແຜ່ນດິນໂລກ. ບໍ່ວ່າຈະເປັນຫວອດໃຫຍ່ ຫລື ສາຂານ້ອຍ, ເຮົາໄດ້ຖືກເອີ້ນໃຫ້ຮັບໃຊ້, ໃຫ້ພອນ, ແລະ ເຮັດເພື່ອຄວາມດີຂອງທຸກຄົນ ແລະ ທຸກສິ່ງທີ່ເຮົາໄດ້ຖືກມອບໝາຍໃຫ້ດູແລ. ມີສິ່ງອື່ນໃດບໍທີ່ເຮັດໃຫ້ຕື່ນເຕັ້ນຫລາຍກວ່ານີ້?
ຂໍໃຫ້ເຮົາເຂົ້າໃຈ, ມີຄວາມກະຕັນຍູ, ແລະ ມີຄວາມຊື່ນຊົມກັບການຮັບໃຊ້ໃນຖານະປະໂລຫິດ.
ຄວາມສຸກຂອງຖານະປະໂລຫິດ
ການມັກຂັບຍົນຂອງຂ້າພະເຈົ້າໄດ້ເປັນອິດທິພົນໃຫ້ແກ່ການດຳເນີນຊີວິດຂອງຂ້າພະເຈົ້າມາຕະຫລອດ. ແຕ່ປະສົບການທີ່ສົດຊື່ນ ແລະ ເບີກບານໃຈໃນຖານະທີ່ເປັນນັກບິນຍັງບໍ່ເທົ່າກັບການເປັນສະມາຊິກຂອງສາດສະໜາຈັກນີ້ ຊຶ່ງໜັກແໜ້ນ, ມີຄວາມສຸກ, ແລະ ເລິກຊຶ້ງກວ່າ. ເມື່ອຂ້າພະເຈົ້າຮັບໃຊ້ຢູ່ໃນສາດສະໜາຈັກ, ຂ້າພະເຈົ້າຮູ້ສຶກເຖິງອຳນາດອັນຍິ່ງໃຫຍ່ຂອງພຣະເຈົ້າ ແລະ ຄວາມເມດຕາອັນອ່ອນໂຍນຂອງພຣະອົງ.
ໃນຖານະທີ່ເປັນນັກບິນ, ຂ້າພະເຈົ້າໄດ້ສຳພັດກັບທ້ອງນະພາ. ໃນຖານະທີ່ເປັນສະມາຊິກຂອງສາດສະໜາຈັກ, ຂ້າພະເຈົ້າໄດ້ຮູ້ສຶກເຖິງຄວາມຮັກຂອງສະຫວັນ.
ບາງເທື່ອ, ຂ້າພະເຈົ້າກໍຄິດຮອດການຂັບຍົນ. ແຕ່ການຮັບໃຊ້ຄຽງຂ້າງອ້າຍເອື້ອຍນ້ອງຂອງຂ້າພະເຈົ້າຢູ່ໃນສາດສະໜາຈັກເຮັດໃຫ້ຂ້າພະເຈົ້າພໍໃຈຫລາຍ. ການຮູ້ສຶກເຖິງຄວາມສະຫງົບ ແລະ ຄວາມຊື່ນຊົມທີ່ໄດ້ເປັນພາກສ່ວນໜຶ່ງໃນວຽກງານອັນຍິ່ງໃຫຍ່ນີ້, ຂ້າພະເຈົ້່າບໍ່ຢາກເຮັດສິ່ງອື່ນອີກ.
ມື້ນີ້ ພວກເຮົາໄດ້ມາເຕົ້າໂຮມກັນເປັນກຸ່ມໃຫຍ່ຂອງຜູ້ດຳລົງຖານະປະໂລຫິດ. ມັນເປັນຄວາມສຸກອັນສັກສິດ ແລະ ເປັນສິດທິພິເສດທີ່ເຮົາໄດ້ຮັບໃຊ້ພຣະຜູ້ເປັນເຈົ້າ ແລະ ເພື່ອນມະນຸດດ້ວຍກັນ, ເພື່ອເຮັດໃຫ້ດີທີ່ສຸດເທົ່າທີ່ເຮົາສາມາດເຮັດໄດ້ໃນອຸດົມການທີ່ຊ່ອຍຊູຄົນອື່ນ ແລະ ໃນການສ້າງສາອານາຈັກຂອງພຣະເຈົ້າ.
ເຮົາຮູ້ ແລະ ເຂົ້າໃຈວ່າ ຖານະປະໂລຫິດເປັນອຳນາດ ແລະ ສິດອຳນາດນິລັນດອນຂອງພຣະເຈົ້າ. ເຮົາສາມາດທ່ອງຂຶ້ນໃຈຄຳນີ້ໄດ້. ເຖິງຢ່າງໃດກໍຕາມ, ເຮົາເຂົ້າໃຈຄວາມໝາຍຂອງມັນແທ້ໆບໍ? ຂ້າພະເຈົ້າຂໍກ່າວລຶ້ມຄືນອີກ: ຖານະປະໂລຫິດເປັນອຳນາດ ແລະ ສິດອຳນາດນິລັນດອນຂອງພຣະເຈົ້າ.
ຈົ່ງຄິດກ່ຽວກັບຖ້ອຍຄຳນີ້. ຜ່ານຖານະປະໂລຫິດ, ພຣະເຈົ້າໄດ້ສ້າງ ແລະ ປົກຄອງຟ້າສະຫວັນ ແລະ ແຜ່ນດິນໂລກ.
ຜ່ານອຳນາດນີ້, ພຣະອົງໄດ້ໄຖ່ ແລະ ນຳຄວາມສູງສົ່ງມາໃຫ້ລູກໆຂອງພຣະອົງ, ທີ່ຈະໃຫ້ເກີດ “ຄວາມເປັນອະມະຕະ ແລະ ຊີວິດນິລັນດອນຂອງມະນຸດ.”4
ຖານະປະໂລຫິດ, ດັ່ງທີ່ສາດສະດາໂຈເຊັບ ສະມິດ ໄດ້ອະທິບາຍວ່າເປັນ “ແບບແຜນ ຊຶ່ງຜ່ານແບບແຜນນີ້ ພຣະຜູ້ສູງສຸດໄດ້ເລີ່ມຕົ້ນເປີດເຜີຍລັດສະໝີພາບຂອງພຣະອົງໃນຕອນ … ສ້າງແຜ່ນດິນໂລກນີ້, ແລະ ໄດ້ສືບຕໍ່ເປີດເຜີຍພຣະອົງເອງຕໍ່ລູກຫລານມະນຸດຈົນເຖິງປະຈຸບັນນີ້, ແລະ ພຣະອົງໄດ້ເຮັດໃຫ້ເຮົາຮູ້ເຖິງຈຸດປະສົງຈົນເຖິງເວລາສຸດທ້າຍ.”5
ພຣະບິດາເທິງສະຫວັນທີ່ມີອຳນາດທັງໝົດ ໄດ້ມອບສິດອຳນາດຖານະປະໂລຫິດໃຫ້ເຮົາ—ໃຫ້ມະນຸດ ຊຶ່ງຕາມຈິງແລ້ວ ມີຄວາມຂາດຕົກບົກພ່ອງ ແລະ ບໍ່ດີພ້ອມທຸກຢ່າງ. ພຣະອົງໄດ້ມອບສິດອຳນາດໃຫ້ເຮົາເພື່ອເຮັດໃນພຣະນາມຂອງພຣະອົງ ສຳລັບຄວາມລອດຂອງລູກໆຂອງພຣະອົງ. ດ້ວຍອຳນາດນີ້ ເຮົາມີສິດອຳນາດທີ່ຈະປະກາດພຣະກິດຕິຄຸນ, ປະຕິບັດພິທີການແຫ່ງຄວາມລອດ, ຊ່ອຍສ້າງອານາຈັກຂອງພຣະເຈົ້າຢູ່ເທິງແຜ່ນດິນໂລກ, ແລະ ເປັນພອນ ແລະ ຮັບໃຊ້ຄອບຄົວ ແລະ ເພື່ອນມະນຸດຂອງເຮົາ.
ມີໃຫ້ສຳລັບທຸກຄົນ
ຖານະທີ່ເຮົາດຳລົງຢູ່ນີ້ເປັນຖານະປະໂລຫິດທີ່ສັກສິດ.
ຖານະປະໂລຫິດ, ຫລື ໜ້າທີ່ຮັບຜິດຊອບຢູ່ໃນນັ້ນ, ຈະຊື້ເອົາບໍ່ໄດ້ ຫລື ບັງຄັບບໍ່ໄດ້. ບໍ່ສາມາດໃຊ້ອຳນາດຖານະປະໂລຫິດໂດຍການໃຊ້ອິດທິພົນ, ຊັກຊວນ, ຫລື ຂົ່ມເຫັງ, ຫລື ດ້ວຍຊັບສົມບັດ ຫລື ສິດອຳນາດໃດໆ. ມັນເປັນອຳນາດທາງວິນຍານຊຶ່ງທຳງານຕາມກົດຂອງສະຫວັນ. ມັນມາຈາກພຣະບິດາເທິງສະຫວັນ ຊຶ່ງໄດ້ມອບໃຫ້ເຮົາທຸກຄົນ. ອຳນາດຂອງມັນຖືກບັງຄັບ ແລະ ຄວບຄຸມໄດ້ພຽງແຕ່ຕາມຫລັກທຳແຫ່ງຄວາມຊອບທຳເທົ່ານັ້ນ,6 ບໍ່ແມ່ນຕາມຄວາມຊອບທຳຂອງບຸກຄົນ.
ພຣະຄຣິດເປັນແຫລ່ງຂອງສິດອຳນາດທີ່ຖືກຕ້ອງຂອງຖານະປະໂລຫິດ ແລະ ອຳນາດຢູ່ເທິງແຜ່ນດິນໂລກ.7 ມັນເປັນວຽກງານຂອງພຣະອົງ, ຊຶ່ງເປັນສິດທິພິເສດສຳລັບເຮົາທີ່ໄດ້ຊ່ອຍເຫລືອ. ແລະ ບໍ່ມີໃຜຈະສາມາດຊ່ອຍໃນວຽກງານນີ້ ຍົກເວັ້ນແຕ່ເຂົາຈະຖ່ອມຕົວ ແລະ ເຕັມໄປດ້ວຍຄວາມຮັກ, ໂດຍມີສັດທາ, ຄວາມຫວັງ, ແລະ ຄວາມໃຈບຸນ, ຢັບຢັ້ງຕົນໃນທຸກສິ່ງ, ບໍ່ວ່າອັນໃດກໍຕາມທີ່ຈະຝາກຝັງໄວ້ໃນການດູແລຂອງເຂົາ.”8
ເຮົາບໍ່ໄດ້ເຮັດໄປເພື່ອຫາລາຍໄດ້ເປັນສ່ວນຕົວ, ແຕ່ເຮົາສະແຫວງຫາທີ່ຈະຮັບໃຊ້ ແລະ ຊ່ອຍຊູຄົນອື່ນ. ເຮົາບໍ່ໄດ້ຖືກຂົ່ມໃຫ້ເຮັດ ແຕ່ເຮັດໂດຍການຊັກຊວນ, … ໂດຍຄວາມອົດກັ້ນ, … ໂດຍຄວາມອ່ອນໂຍນ ແລະ ໂດຍຄວາມອ່ອນນ້ອມ, ແລະ ໂດຍຄວາມຮັກອັນບໍ່ແກ້ງເຮັດ.”9
ຖານະປະໂລຫິດຂອງພຣະເຈົ້າຜູ້ຊົງລິດອຳນາດຍິ່ງໃຫຍ່ມີໃຫ້ຊາຍທຸກຄົນທີ່ມີຄ່າຄວນ ບໍ່ວ່າເຂົາເຈົ້າຈະຢູ່ບ່ອນໃດກໍຕາມ—ບໍ່ວ່າຈະເປັນເຊື້ອຊາດໃດ, ບໍ່ວ່າສະພາບການຂອງເຂົາເຈົ້າຈະຕ່ຳຕ້ອຍພຽງໃດ, ບໍ່ວ່າຈະຢູ່ໃກ້ ຫລື ໄກຢູ່ໃນໂລກນີ້. ມັນມີໃຫ້ຟຣີໆໂດຍບໍ່ຄິດຄ່າ. ສາດສະດາເອຊາຢາໃນສະໄໝໂບຮານໄດ້ກ່າວວ່າ, ທຸກໆຄົນ ຜູ້ທີ່ຫິວນ້ຳ ນ້ຳມີໃຫ້ດື່ມຢູ່ທີ່ນີ້ເດ, ແລະ ຜູ້ທີ່ບໍ່ມີເງິນ ກໍເຊີນມາກິນ!10
ແລະ ເປັນເພາະການຊົດໃຊ້ນິລັນດອນ ແລະ ບໍ່ອາດເຂົ້າໃຈໄດ້ຂອງພຣະຜູ້ຊ່ອຍໃຫ້ລອດ, ພຣະເຢຊູຄຣິດ, ຖານະປະໂລຫິດຂອງພຣະເຈົ້າຈຶ່ງມີໃຫ້ ແມ່ນແຕ່ທ່ານເຄີຍເຕະສະດຸດມາກ່ອນ ຫລື ບໍ່ມີຄ່າຄວນໃນຊ່ວງໄລຍະທີ່ຜ່ານມາ. ຜ່ານການຫລໍ່ຫລອມທາງວິນຍານ ແລະ ຂັ້ນຕອນຂອງການຊຳລະລ້າງຂອງການກັບໃຈ, ທ່ານສາມາດລຸກຂຶ້ນ ແລະ ສ່ອງແສງອອກໄປ”!11 ເປັນຍ້ອນຄວາມຮັກທີ່ບໍ່ມີຂອບເຂດ ແລະ ທີ່ໃຫ້ອະໄພຂອງພຣະຜູ້ຊ່ອຍໃຫ້ລອດ ແລະ ພຣະຜູ້ໄຖ່, ທ່ານຈຶ່ງສາມາດຫລຽວເຫັນ, ກາຍເປັນຄົນທີ່ສະອາດ ແລະ ມີຄ່າຄວນ, ແລະ ພັດທະນາຕົນໄປສູ່ຄວາມຊອບທຳ ແລະ ເປັນບຸດທີ່ມີກຽດຂອງພຣະເຈົ້າ—ເປັນຜູ້ດຳລົງທີ່ມີຄ່າຄວນຂອງຖານະປະໂລຫິດທີ່ສັກສິດຂອງພຣະເຈົ້າຜູ້ຊົງລິດອຳນາດຍິ່ງໃຫຍ່.
ຄວາມມະຫັດສະຈັນ ແລະ ສິດທິພິເສດຂອງຖານະປະໂລຫິດ
ຂ້າພະເຈົ້າຮູ້ສຶກເສຍໃຈນຳຄົນທີ່ບໍ່ເຂົ້າໃຈ ແລະ ມີຄວາມກະຕັນຍູຕໍ່ຄວາມມະຫັດສະຈັນ ແລະ ສິດທິພິເສດຂອງຖານະປະໂລຫິດ. ເຂົາເຈົ້າເປັນເໝືອນນັກໂດຍສານຢູ່ໃນຍົນ ຜູ້ໃຊ້ເວລາຈົ່ມກ່ຽວກັບຂະໜາດຂອງຖົງໝາກຖົ່ວດິນ ໃນຂະນະທີ່ເຂົາເຈົ້ານັ່ງຢູ່ເທິງອາກາດ—ຊຶ່ງເປັນບາງສິ່ງທີ່ບັນດາກະສັດໃນສະໄໝໂບຮານອາດມອບທຸກສິ່ງທີ່ພວກເພິ່ນມີ ເພື່ອຈະໄດ້ລອງຂີ່ ແລະ ມີປະສົບການແມ່ນແຕ່ເທື່ອດຽວໃນຊີວິດ!
ອ້າຍນ້ອງທັງຫລາຍ, ເຮົາໄດ້ຮັບພອນຫລາຍເມື່ອເຮົາຮັບເອົາສິດທິພິເສດ ແລະ ມີພະລັງຂອງຖານະປະໂລຫິດອັນຍິ່ງໃຫຍ່ນີ້ຢ່າງຖ່ອມຕົນ. ຂໍໃຫ້ເຮົາຈົ່ງມືນຕາ ແລະ ເຫັນ, ຮັບຮູ້, ແລະ ຮັບເອົາໂອກາດທີ່ເປັນຈິງນີ້.
ຜ່ານຄວາມຊອບທຳ, ຄວາມຮັກ, ແລະ ການຮັບໃຊ້ທີ່ອຸທິດຕົນໃນຖານະປະໂລຫິດ, ເຮົາຈະສາມາດມີປະສົບການກັບຄວາມໝາຍອັນແທ້ຈິງຂອງການເປີດເຜີຍ ທີ່ວ່າ: ເຮົາຈະອອກໜ້າພວກເຈົ້າ. ເຮົາຈະຢູ່ທາງຂວາມືພວກເຈົ້າ ແລະ ທາງຊ້າຍມືພວກເຈົ້າ, ແລະ ວິນຍານຂອງເຮົາຈະຢູ່ໃນໃຈຂອງພວກເຈົ້າ, ແລະ ທູດຂອງເຮົາຈະອ້ອມຮອບພວກເຈົ້າໄວ້, ເພື່ອຄ້ຳຊູພວກເຈົ້າ.”12
ຂໍໃຫ້ເຮົາຈົ່ງຮັບເອົາ ແລະ ເຂົ້າໃຈຄວາມມະຫັດສະຈັນ ແລະ ສິດທິພິເສດຂອງຖານະປະໂລຫິດ. ຂໍໃຫ້ເຮົາຈົ່ງຮັບເອົາ ແລະ ຮັກໜ້າທີ່ຮັບຜິດຊອບ ທີ່ເຮົາຖືກຂໍໃຫ້ບັນລຸ—ໜ້າທີ່ຮັບຜິດຊອບຢູ່ໃນບ້ານຂອງເຮົາ ແລະ ຢູ່ໃນສາດສະໜາຈັກຂອງເຮົາ, ບໍ່ວ່າມັນຈະນ້ອຍ ຫລື ໃຫຍ່ກໍຕາມ. ຂໍໃຫ້ເຮົາຈົ່ງມີຄວາມຊອບທຳ, ອຸທິດຕົນ, ແລະ ຮັບໃຊ້ໃນຖານະປະໂລຫິດໃຫ້ຫລາຍຂຶ້ນກວ່າເກົ່າ. ຂໍໃຫ້ເຮົາຈົ່ງພົບຄວາມສຸກໃນການຮັບໃຊ້ຢູ່ໃນຖານະປະໂລຫິດ!
ເຮົາສາມາດເຮັດໄດ້ດີທີ່ສຸດ ໂດຍການນຳໃຊ້ຫລັກທຳແຫ່ງຄວາມຮູ້ແຈ້ງ, ເຊື່ອຟັງ, ແລະ ສັດທາ.
ນັ້ນໝາຍຄວາມວ່າ, ທຳອິດ, ເຮົາຕ້ອງຮູ້ ແລະ ເຮັດໃຫ້ຄຳສອນຂອງຖານະປະໂລຫິດເປັນພາກສ່ວນໃນຊີວິດຂອງເຮົາ ຊຶ່ງພົບເຫັນໄດ້ຢູ່ໃນພຣະຄຳຂອງພຣະເຈົ້າ. ສຳຄັນສຳລັບເຮົາທີ່ຈະເຂົ້າໃຈພັນທະສັນຍາ ແລະ ພຣະບັນຍັດ ຊຶ່ງຖານະປະໂລຫິດດຳເນີນຕາມ.13
ຕໍ່ໄປ, ຂໍໃຫ້ເຮົາສະຫລາດ ແລະ ເຮັດຕາມຄວາມຮູ້ແຈ້ງທີ່ເຮົາໄດ້ຮັບມາຢ່າງສະໝ່ຳສະເໝີ ແລະ ດ້ວຍກຽດ. ເມື່ອເຮົາເຊື່ອຟັງຕໍ່ກົດຂອງພຣະເຈົ້າ, ຄວບຄຸມແນວຄິດ ແລະ ຮ່າງກາຍຂອງເຮົາ, ແລະ ປັບການກະທຳຂອງເຮົາໃຫ້ສອດຄ່ອງກັບແບບແຜນແຫ່ງຄວາມຊອບທຳທີ່ສອນໂດຍສາດສະດາ, ແລ້ວເຮົາຈະມີປະສົບການທີ່ຊື່ນຊົມໃນການຮັບໃຊ້ໃນຖານະປະໂລຫິດ.
ແລະ ສຸດທ້າຍ, ຂໍໃຫ້ເຮົາຈົ່ງມີສັດທາອັນເລິກຊຶ້ງໃນພຣະຜູ້ເປັນເຈົ້າຂອງເຮົາ, ພຣະເຢຊູຄຣິດ. ຂໍໃຫ້ເຮົາຈົ່ງຮັບເອົາພຣະນາມຂອງພຣະອົງໄວ້ກັບເຮົາ ແລະ ສັນຍາທີ່ຈະເດີນໄປໃນເສັ້ນທາງຂອງການເປັນສານຸສິດໃນທຸກວັນ. ຈົ່ງໃຫ້ວຽກງານຂອງເຮົາເຮັດໃຫ້ສັດທາຂອງເຮົາດີພ້ອມ.14 ຜ່ານການເປັນສານຸສິດ ເຮົາຈະຖືກເຮັດໃຫ້ດີພ້ອມໄປແຕ່ລະບາດກ້າວ ໂດຍການຮັບໃຊ້ຄອບຄົວຂອງເຮົາ, ເພື່ອນມະນຸດຂອງເຮົາ, ແລະ ພຣະເຈົ້າ.
ເມື່ອເຮົາຮັບໃຊ້ໃນຖານະປະໂລຫິດດ້ວຍສຸດໃຈ, ດ້ວຍສຸດພະລັງ, ດ້ວຍສຸດຄວາມຄິດ, ດ້ວຍສຸດກຳລັງຂອງເຮົາ, ແລ້ວເຮົາຈະໄດ້ຮັບຄວາມຮູ້ແຈ້ງ, ຄວາມສະຫງົບ, ແລະ ຂອງປະທານທາງວິນຍານທີ່ໄດ້ສັນຍາໄວ້. ເມື່ອເຮົາໃຫ້ກຽດແກ່ຖານະປະໂລຫິດທີ່ສັກສິດ, ພຣະເຈົ້າກໍຈະໃຫ້ກຽດເຮົາ, ແລະ ເຮົາຈະຢືນຢູ່ຢ່າງປາດສະຈາກຂໍ້ຕຳນິຢູ່ຕໍ່ພຣະພັກຂອງພຣະເຈົ້າໃນວັນສຸດທ້າຍ.”15
ຂ້າພະເຈົ້າອະທິຖານວ່າເຮົາຈະມີຕາທີ່ຈະເຫັນ ແລະ ມີຫົວໃຈທີ່ຈະຮູ້ສຶກເຖິງຄວາມມະຫັດສະຈັນ ແລະ ຄວາມສຸກຂອງຖານະປະໂລຫິດຂອງພຣະເຈົ້າຜູ້ຍິ່ງໃຫຍ່ ແລະ ສູງສຸດ, ໃນພຣະນາມຂອງພຣະເຢຊູຄຣິດ, ອາແມນ.