ភ្នែកដែលមើលឃើញ និងត្រចៀកដែលស្ដាប់ឮ
ដោយអែលឌើរ គីម ប៊ី ក្លាក
នៃពួកចិតសិបនាក់
ប្រសិនបើយើងមើលទៅព្រះគ្រីស្ទ ហើយបើកភ្នែក និងត្រចៀករបស់យើង នោះព្រះវិញ្ញាណបរិសុទ្ធនឹងប្រទានពរឲ្យយើងមើលឃើញព្រះអម្ចាស់ ព្រះយេស៊ូវគ្រីស្ទធ្វើការក្នុងជីវិតរបស់យើង ។
ក្នុងការបម្រើលើផែនដីរបស់ទ្រង់ ព្រះយេស៊ូវបានធ្វើអព្ភូតហេតុនៃការព្យាបាលយ៉ាងអស្ចារ្យ ហើយបានបង្រៀនដោយសិទ្ធិអំណាច និងអំណាចដែលព្រះគម្ពីរបានចែងថា « ដំណឹងពីទ្រង់បានឮសុសសាយទូទៅ ពេញក្នុងស្រុកស៊ីរី … មានមនុស្សកកកុញជាប់តាមទ្រង់» ។១
មនុស្សមួយចំនួនដែលបានឃើញទ្រង់ព្យាបាល ហើយស្ដាប់ទ្រង់បង្រៀនបានបដិសេធទ្រង់ ។ អ្នកខ្លះទៀតបានដើរតាមទ្រង់មួយរយៈ ប៉ុន្តែក្រោយមកបានដកខ្លួនថយពីទ្រង់ ។២ ព្រះអម្ចាស់ព្រះយេស៊ូវគ្រីស្ទ បានគង់នៅទីនោះ នៅពីមុខពួកគេ ប៉ុន្តែពួកគេពុំបានស្គាល់ទ្រង់ថាជានរណាឡើយ ។ ពួកគេមើលមិនឃើញ ហើយជ្រើសបែរខ្លួនចេញទៅ ។ ព្រះយេស៊ូវបានមានបន្ទូលពីពួកគេ ៖
« យើងបានមករករាស្ត្រយើង តែរាស្ត្រយើងមិនបានទទួលយើងសោះ » ។៣
« ត្រចៀកពួកគេធ្ងន់ ហើយភ្នែកពួកគេបានធ្មេច » ។៤
ទោះជាយ៉ាងណាក៏មានបុរសស្ត្រីជាច្រើននាក់ រួមទាំងពួកសាវកស្មោះត្រង់របស់ទ្រង់ដែរ ដែលបានផ្ដោតជីវិតខ្លួនទៅលើទ្រង់ ។ ទោះជាពួកគេត្រូវពុះពារនឹងការអូសទាញខាងលោកិយ ការបំភ័ន្តពីរឿងដែលទ្រង់បានបង្រៀន ហើយសូម្បីតែការភ័យខ្លាចក្ដី ពួកគេបានជឿលើទ្រង់ ស្រឡាញ់ទ្រង់ ហើយដើរតាមទ្រង់ ។
ទ្រង់មានព្រះបន្ទូលអំពីពួកគេថា « តែអ្នករាល់គ្នាវិញ ភ្នែកអ្នកមានពរហើយ ដ្បិតមើលឃើញ ត្រចៀកអ្នកក៏ដែរ ដ្បិតស្តាប់ឮ » ។៥
ពីមុនការរងទុក្ខរបស់ទ្រង់នៅក្នុង ច្បារគែតសេម៉ានី និងនៅកាលវ៉ារី ព្រះយេស៊ូវបានធ្វើការសន្យាដ៏អស្ចារ្យនេះដល់ពួកសាវករបស់ទ្រង់ ៖ « អ្នកណាដែលជឿដល់ខ្ញុំ នោះនឹងធ្វើការដែលខ្ញុំធ្វើដែរ ក៏នឹងធ្វើការធំជាងការទាំងនោះទៅទៀត ពីព្រោះខ្ញុំទៅឯព្រះវរបិតា » ។៦
ព្រះយេស៊ូវបានបំពេញការសន្យានោះ ៖នៅពេលចាប់ផ្តើមបុណ្យថ្ងៃទី៥០ ពួកសិស្សត្រូវបានប្រទានពរដោយបុណ្យជ្រមុជដោយភ្លើង និង ដោយព្រះវិញ្ញាណបរិសុទ្ធ ។៧ តាមរយៈសេចក្តីជំនឿរបស់ពួកគេលើព្រះគ្រីស្ទ ការប្រែចិត្ត និង ការគោរពប្រតិបត្តិ នោះព្រះវិញ្ញាណបរិសុទ្ធបានក្លាយជាគូកនពួកគេ បានផ្លាស់ប្តូរដួងចិត្ត ព្រមទាំងប្រទានពរពួកគេឲ្យមាននូវសាក្សីនៃសេចក្តី ពិតជាប់ជានិច្ច ។
អំណោយទាន និងពរជ័យទាំងនេះបានពង្រឹងពួកសិស្សរបស់ព្រះអម្ចាស់ ។ ទោះជាពួកគេបានរស់នៅក្នុងគ្រាដ៏គ្រោះថ្នាក់ ហើយច្របូលច្របល់ក្ដី ពួកគេបានទទួលអំណោយទានខាងវិញ្ញាណ ដើម្បីឲ្យមានភ្នែកអាចមើលឃើញ ហើយត្រចៀកអាចស្ដាប់ឮ ។ តាមរយៈព្រះចេស្ដានៃព្រះវិញ្ញាណបរិសុទ្ធ ពួកគេបានចាប់ផ្ដើមមើលឃើញសេចក្ដីពិតនៃរឿងនានា ជាពិសេសមើលឃើញព្រះអម្ចាស់ ព្រះយេស៊ូវគ្រីស្ទ និងកិច្ចការរបស់ទ្រង់ក្នុងចំណោមពួកគេ ។៨ ព្រះវិញ្ញាណបរិសុទ្ធបានបំភ្លឺដល់ការយល់ដឹងរបស់ពួកគេ ហើយពួកគេបានស្ដាប់ឮព្រះសុរសៀងរបស់ព្រះអម្ចាស់កាន់តែច្បាស់ឡើង ។ ដំណឹងល្អនៃព្រះយេស៊ូវគ្រីស្ទបានជ្រួតជ្រាបនៅក្នុងដួងចិត្តរបស់ពួកគេ ។៩ ពួកគេបានព្យាយាម ហើយគោរពប្រតិបត្តិ ។១០ ពួកគេបានផ្សាយដំណឹងល្អដោយអង់អាច និងអំណាច ព្រមទាំងស្ថាបនានគរព្រះ ។១១ ពួកគេមានអំណរនៅក្នុងព្រះអម្ចាស់យេស៊ូវគ្រីស្ទ ។
យើងមានចរិតលក្ខណៈស្រដៀងគ្នាជាច្រើន នឹងបុរសស្ត្រីស្មោះត្រង់ទាំងនោះនៅក្នុងកាលដ៏ខ្ពង់ខ្ពស់បំផុត ។ យើងក៏រស់នៅក្នុងគ្រាមួយដែលព្រះអម្ចាស់ ព្រះយេស៊ូវគ្រីស្ទធ្វើអព្ភូតហេតុនៅក្នុងចំណោមយើង—រួមមានការព្យាបាលអ្នកឈឺ ការលាងសម្រាតយើងចេញពីអំពើបាប ការផ្លាស់ប្ដូរដួងចិត្តយើង និងការបើកសេចក្ដីសង្គ្រោះដល់កូនចៅរបស់ព្រះទាំងសងខាងនៃវាំងនន ។ នៅក្នុងជំនាន់យើង យើងក៏មានពួកព្យាការី ពួកសាវកនៅរស់ អំណាចបព្វជិតភាព អំណោយទានវិញ្ញាណ និងពរជ័យដ៏ធំនៃពិធីបរិសុទ្ធនៃសេចក្ដី សង្គ្រោះដែរ ។
ជំនាន់យើងគឺជាជំនាន់ដ៏គ្រោះថ្នាក់មួយ—ជាគ្រានៃអំពើអាក្រក់ និងការល្បួងដ៏ធំ ជាគ្រានៃសេចក្ដីបំភ័ន្ត និង ការវឹកវរ ។ ក្នុងគ្រាដ៏គ្រោះថ្នាក់ទាំងនេះ ព្យាការីរបស់ព្រះអម្ចាស់នៅលើផែនដី ប្រធានថូម៉ាស អេស ម៉នសុន បានអំពាវនាវឲ្យយើងជួយសង្គ្រោះជនដែលមានរបួសនៅក្នុងវិញ្ញាណ១២ ឲ្យឈរការពារសេចក្ដីពិតដោយក្លាហាន១៣ ហើយស្ថាបនានគរព្រះ ។១៤ ឥឡូវនេះទោះជាជីវភាពខាងវិញ្ញាណ ឬសេចក្ដីជំនឿ ឬការគោរពប្រតិបត្តិរបស់យើងស្ថិតនៅក្នុងកម្រិតណាក្ដី វាពុំគ្រាប់គ្រាន់សម្រាប់កិច្ចការដែលមាននៅខាងមុខឡើយ ។ យើងត្រូវការពន្លឺ និងអំណាចខាងវិញ្ញាណដ៏អស្ចារ្យ ។ យើងត្រូវការភ្នែកដែលមើលឃើញកាន់តែច្បាស់ថាព្រះអង្គសង្គ្រោះកំពុងធ្វើការនៅក្នុងជីវិតរបស់យើង និងត្រចៀកដែលស្ដាប់ឮព្រះសុរសៀងរបស់ទ្រង់កាន់តែជ្រៅនៅក្នុងដួងចិត្តរបស់យើង ។
ពរជ័យដ៏អស្ចារ្យនេះកើតមាននៅពេលយើងបើកដួងចិត្តរបស់យើង ហើយទទួល១៥ គឺទទួលយកព្រះអម្ចាស់ ព្រះយេស៊ូវគ្រីស្ទ គោលលទ្ធិរបស់ទ្រង់ និងសាសនាចក្ររបស់ទ្រង់ដោយពិតប្រាកដមកដាក់ក្នុងជីវិតរបស់យើង ។ យើងពុំចាំបាច់ត្រូវតែល្អឥតខ្ចោះទេ ប៉ុន្តែយើងត្រូវជាមនុស្សល្អ ហើយល្អប្រសើរឡើងរាល់ថ្ងៃ ។ យើងត្រូវខិតខំរស់នៅតាមសេចក្ដីពិតនៃដំណឹងល្អដ៏ច្បាស់ ហើយសាមញ្ញនេះ ។ ប្រសិនបើយើងលើកដាក់មកលើខ្លួនយើងនូវព្រះនាមរបស់ព្រះគ្រីស្ទ ធ្វើដោយសេចក្ដីជំនឿជឿលើទ្រង់ ដើម្បីប្រែចិត្តពីអំពើបាបរបស់យើង គោរពតាមព្រះ បញ្ញត្តិរបស់ទ្រង់ ហើយចងចាំទ្រង់ជានិច្ច នោះយើងនឹងទទួលបានភាពជាដៃគូនៃព្រះវិញ្ញាណបរិសុទ្ធតាមរយៈសេចក្ដីមេត្តាករុណា និងព្រះគុណរបស់ព្រះយេស៊ូវគ្រីស្ទ ។
ការគោរពប្រតិបត្តិដ៏សាមញ្ញយាងព្រះវិញ្ញាណឲ្យចូលទៅក្នុងដួងចិត្តរបស់យើង ។ នៅក្នុងផ្ទះរបស់យើង យើងអធិស្ឋានដោយសេចក្តីជំនឿ ស្រាវជ្រាវពីព្រះគម្ពីរ ហើយរក្សាថ្ងៃឈប់សម្រាកទុកជាបរិសុទ្ធ ។ នៅក្នុងសាលាជំនុំរបស់យើង យើងទទួលទានសាក្រាម៉ង់ ហើយធ្វើការសន្យាពិសិដ្ឋចំពោះព្រះវរបិតាសួគ៌នៅក្នុងព្រះនាមនៃព្រះគ្រីស្ទ ។ នៅក្នុងព្រះវិហារបរិសុទ្ធដ៏បរិសុទ្ធ យើងចូលរួមនៅក្នុងពិធីបរិសុទ្ធជំនួសឲ្យបងប្អូនប្រុសស្រីរបស់យើងនៅផ្នែកម្ខាងទៀតនៃវាំងនន ។ នៅក្នុងក្រុមគ្រួសារ និងការចាត់តាំងរបស់យើងពីព្រះអម្ចាស់ យើងឈោងដៃទៅជួយដល់អ្នកដទៃ សម្រាលបន្ទុកពួកគេ ហើយអញ្ជើញពួកគេឲ្យមករកព្រះគ្រីស្ទ ។
បងប្អូនប្រុសស្រី ខ្ញុំដឹងថា ប្រសិនបើយើងធ្វើរឿងទាំងនេះ ព្រះវិញ្ញាណបរិសុទ្ធនឹងយាងមក ! យើងនឹងរីកចម្រើនខាងវិញ្ញាណ ហើយទទួលបទពិសោធន៍នឹងព្រះវិញ្ញាណបរិសុទ្ធ ហើយទ្រង់នឹងក្លាយជាដៃគូរបស់យើង ។ ប្រសិនបើយើងមើលទៅព្រះគ្រីស្ទ ហើយបើកភ្នែក និងត្រចៀករបស់យើង ព្រះវិញ្ញាណបរិសុទ្ធនឹងប្រទានពរឲ្យយើងមើលឃើញព្រះអម្ចាស់ ព្រះយេស៊ូវគ្រីស្ទកំពុងធ្វើការក្នុងជីវិតរបស់យើង កំពុងពង្រឹងសេចក្ដីជំនឿរបស់យើងលើទ្រង់ជាមួយនឹងការធានា និង ភស្ដុតាង ។ យើងនឹងមើលឃើញរាល់បងប្អូនប្រុសស្រីរបស់យើងកាន់តែច្បាស់តាមរបៀបដែលព្រះមើលឃើញពួកគេ ដោយសេចក្ដីស្រឡាញ់ និងសេចក្ដីមេត្តាករុណា ។ យើងស្ដាប់ឮព្រះសុរសៀងរបស់ព្រះអង្គសង្គ្រោះនៅក្នុងព្រះគម្ពីរ ក្នុងការខ្សឹបប្រាប់នៃព្រះវិញ្ញាណ និងនៅក្នុងប្រសាសន៍នៃពួកព្យាការីនៅរស់ ។១៦ យើងនឹងមើលឃើញព្រះចេស្ដានៃព្រះ ស្ថិតនៅលើព្យាការីរបស់ទ្រង់ និងរាល់ថ្នាក់ដឹកនាំនៃសាសនាចក្រដែលពិត ហើយសកម្ម ហើយយើងនឹងស្គាល់ដោយភាពពិតប្រាកដថានេះគឺជាកិច្ចការបរិសុទ្ធរបស់ព្រះ ។១៧ យើងនឹងមើលឃើញ ហើយយល់ពីខ្លួនឯង និងពិភពលោកជុំវិញយើងតាមរបៀបដែលព្រះអង្គសង្គ្រោះទតឃើញ ។ យើងនឹងមានអ្វីដែលសាវកប៉ុលបានហៅថា « គំនិតជារបស់ផងព្រះគ្រីស្ទ » ។១៨ យើងមានភ្នែកដែលមើលឃើញ ហើយមានត្រចៀកដែលស្ដាប់ឮ ហើយនឹងស្ថាបនានគរព្រះ ។
ជីវិតអាចនឹងជួបការលំបាក ការភ័ន្តច្រឡំ និង ការបាក់ទឹកចិត្ត ។ ខ្ញុំសូមថ្លែងទីបន្ទាល់របស់ខ្ញុំដល់បងប្អូនថា តាមរយៈភាពជាដៃគូនៃព្រះវិញ្ញាណបរិសុទ្ធ ពន្លឺនៃដំណឹងល្អនៃយេស៊ូវគ្រីស្ទនឹងភ្លឺកាត់ការភ័ន្ដច្រឡំ ការឈឺចាប់ និងភាពងងឹត ។ ទោះជាវាមកជាសូរដ៏ខ្លាំង ឬជាលំហូរដ៏ទន់ភ្លន់ក្ដី អំណាចខាងវិញ្ញាណដ៏រុងរឿងនោះនឹងញ៉ាំងឲ្យសេចក្ដីស្រឡាញ់ និងការលួងលោមដែលព្យាបាលចូលទៅក្នុងព្រលឹងរងរបួសដែលបានប្រែចិត្ត កំចាត់ភាពងងឹតដោយពន្លឺនៃសេចក្ដីពិត ហើយបណ្ដេញការបាក់ទឹកចិត្តដោយសេចក្ដីសង្ឃឹមលើព្រះគ្រីស្ទ ។ យើងនឹងមើលឃើញពរជ័យដែលកើតមាន ហើយយើងនឹងស្គាល់ដោយសាក្សីនៃព្រះវិញ្ញាណថា ព្រះអម្ចាស់កំពុងធ្វើការនៅក្នុងជីវិតរបស់យើង ។ ពិតណាស់ បន្ទុករបស់យើងនឹង « ត្រូវបានលេបទៅក្នុងអំណរនៃ [ ព្រះដ៍ប្រោសលោះរបស់យើង ] » ។១៩
បទពិសោធន៍មួយដែលឪពុកម្ដាយខ្ញុំមានជាច្រើនឆ្នាំមកហើយបានគូសបង្ហាញពីសារៈសំខាន់ និងអំណាចនៃភ្នែកដែលមើលឃើញ និងត្រចៀកដែលស្ដាប់ឮ ។ នៅឆ្នាំ ១៩៨២ ឪពុកម្ដាយខ្ញុំត្រូវបានហៅឲ្យបម្រើនៅបេសកកម្មដាវ៉ាអូហ្វីលីពីន ។ នៅពេលម្ដាយខ្ញុំបានបើកសំបុត្រនោះ ហើយបានឃើញពីទីកន្លែងដែលពួកគាត់ត្រូវបានហៅ គាត់បានប្រាប់ឪពុកខ្ញុំថា « ទេ ! បងត្រូវតែទូរសព្ទប្រាប់ពួកគេថា យើងមិនអាចទៅប្រទេសហ្វីលីពីនបានទេ ។ ពួកគេដឹងហើយថាបងមានជំងឺហឺត » ។ ឪពុកខ្ញុំបានរងទុក្ខដោយសារជំងឺហឺតនេះអស់ជាច្រើនឆ្នាំ ហើយម្ដាយខ្ញុំបារម្ភពីគាត់ខ្លាំងណាស់ ។
ពីរបីយប់ក្រោយមក ម្ដាយខ្ញុំបានដាស់ឪពុកឡើងនៅម៉ោងប្រហែល ២:៣០ ព្រឹក ។ គាត់បានពោលថា « មើលីន តើបងបានឮសំឡេងនោះទេ ? »
« បងអត់បានឮសំឡេងអីទេ » ។
« មែនហើយ នៅយប់នេះអូនបានឮដូចគ្នាបីដង ពោលថា ‹ ហេតុអ្វីអ្នកព្រួយបារម្ភ ? តើអ្នកមិនដឹងថា យើងដឹងថាគាត់មានជំងឺហឺតទេឬ ? យើងនឹងមើលថែគាត់ ហើយយើងនឹងមើលថែអ្នក ។ ចូរត្រៀមខ្លួនបម្រើនៅប្រទេសហ្វីលីពីនចុះ › » ។
ឪពុកម្ដាយខ្ញុំបានបម្រើនៅប្រទេសហ្វីលីពីន ហើយមានបទពិសោធន៍មួយដ៏អស្ចារ្យ ។ ព្រះវិញ្ញាណបរិសុទ្ធគឺជាដៃគូពួកគាត់ ហើយពួកគាត់មានពរ ព្រមទាំងបានការពារ ។ ឪពុកខ្ញុំពុំដែលមានបញ្ហាណាមួយជាមួយនឹងជំងឺហឺតឡើយ ។ គាត់បានបម្រើជាទីប្រឹក្សាទីមួយនៅក្នុងគណៈប្រធានបេសកកម្ម ហើយគាត់ និងម្ដាយខ្ញុំបានហ្វឹកហ្វឺនពួកអ្នកផ្សាយសាសនារាប់រយនាក់ និង ពួកបរិសុទ្ធស្មោះត្រង់រាប់ពាន់នាក់ត្រៀមខ្លួនសម្រាប់ការកើតមានវួដ និងស្ដេកនៅលើកោះមិនដាណាអូ ។ ពួកគាត់បានទទួលពរ ដោយមានភ្នែកដែលមើលឃើញ និងត្រចៀកដែលស្ដាប់ឮ ។
បងប្អូនប្រុសស្រី ខ្ញុំសូមថ្លែងជាសាក្សីពីព្រះយេស៊ូវគ្រីស្ទ ។ ខ្ញុំដឹងថា ទ្រង់មានព្រះជន្មរស់ ។ ទ្រង់គឺជាព្រះអង្គសង្គ្រោះ និងជាព្រះប្រោសលោះរបស់យើង ។ ខ្ញុំដឹងថា ប្រសិនបើយើងទទួលយកទ្រង់ដាក់ក្នុងជីវិតរបស់យើង ហើយរស់នៅតាមសេចក្ដីពិតនៃដំណឹងល្អរបស់ទ្រង់ដែលច្បាស់ ហើយសាមញ្ញ យើងនឹងរីករាយនឹងភាពជាដៃគូនៃព្រះវិញ្ញាណបរិសុទ្ធ ។ យើងមានអំណោយទានដ៏មានតម្លៃនៃភ្នែកដែលមើលឃើញ និងត្រចៀកដែលស្ដាប់ឮ ។ ខ្ញុំថ្លែងទីបន្ទាល់ដូច្នោះ ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។