ការប្រឈមមុខនឹងឧបសគ្គនានានៃពិភពលោកសព្វថ្ងៃ
ដោយ អែលឌើរ រ៉ូបឺត ឌី ហែល
ក្នុងកូរ៉ុមនៃពួកសាវកដប់ពីរនាក់
ជម្រើសដែលអ្នកធ្វើ--បេសកកម្ម ការអប់រំ អាពាហ៍ពិពាហ៍ អាជីព និងការបម្រើនៅក្នុងសាសនាចក្រ --នឹងតម្រង់ជោគវាសនាអស់កល្បជានិច្ចរបស់អ្នក ។
មានអ្វីៗជាច្រើនដែលបានសរសេរទុក និងថ្លែងអំពីជំនាន់នៃយុវមជម្ឈិមវ័យសព្វថ្ងៃនេះ ។ ការស្រាវជ្រាវបានបង្ហាញថា មានមនុស្សជាច្រើនជំទាស់នឹងសាសនាដែលបានរៀបចំឡើង ។ មនុស្សជាច្រើនបានជំពាក់បំណុល និងគ្មានការងារធ្វើ ។ ភាគច្រើនចូលចិត្ត គំនិត នៃអាពាហ៍ពិពាហ៍ ប៉ុន្តែភាគច្រើនស្ទាក់ស្ទើតនឹងបោះជំហានទៅរកវា ។ កំណើននៃមនុស្សមិនចង់បានកូនមានកាន់តែច្រើន ។ បើគ្មានដំណឹងល្អ និងការណែនាំដ៏បំផុសគំនិតទេ នោះមនុស្សជាច្រើននឹងវង្វេងនៅលើផ្លូវចម្លែក ហើយវង្វេង ។
សំណាងល្អ សមាជិកវ័យក្មេងនៃសាសនាចក្រពុំមានទំនោរទៅរកបញ្ហាទាំងនេះខ្ពស់ទេ ដោយសារតែពួកគេត្រូវបានប្រទានពរជាមួយនឹងផែនការនៃដំណឹងល្អ ។ ផែនការអស់កល្បនោះ រួមមានទាំងការកាន់ខ្ជាប់ទៅនឹងដំបងដែក--តោងជាប់ព្រះបន្ទូលរបស់ព្រះ និងពាក្យសម្ដីរបស់ពួកព្យាការីទ្រង់ ។ យើងចាំបាច់ត្រូវចាប់កាន់ដំបងដែកដែលនាំយើងត្រឡប់ទៅរកទ្រង់វិញឲ្យណែន ។ ឥឡូវនេះ គឺជា « ថ្ងៃសម្រាប់ការជ្រើសរើស »១ សម្រាប់យើងទាំងអស់គ្នា ។
កាលពីក្មេង ពេលខ្ញុំហៀបនឹងធ្វើការជ្រើសរើសដែលមិនល្អ ពេលខ្លះ ឪពុករបស់ខ្ញុំនឹងប្រាប់ថា « រ៉ូបឺត ទៅឲ្យត្រង់ ហើយហោះឲ្យបានត្រឹមត្រូវ ! » អ្នកបាននៅទីនោះ ។ ខ្ញុំចង់និយាយចំៗទៅប្អូនៗ ជាយុវវ័យ—ជាយុវវ័យ និង—យុវមជ្ឈិមវ័យដ៏ថ្លៃថ្នូររបស់យើង « ដ្បិតព្រលឹងរបស់ខ្ញុំ ត្រេកអរចំពោះការច្បាស់ … ដើម្បី [ យើង ] អាចចេះដឹង » ។២
អ្នករាល់គ្នាកំពុងរស់នៅឆ្លងកាត់គ្រាដ៏សំខាន់នៃជីវិតរបស់អ្នក ។ ជម្រើសដែលអ្នកធ្វើ--បេសកកម្ម ការអប់រំ អាពាហ៍ពិពាហ៍ អាជីព និងការបម្រើនៅក្នុងសាសនាចក្រ --នឹងតម្រង់ជោគវាសនាអស់កល្បជានិច្ចរបស់អ្នក ។ នេះមានន័យថា អ្នកនឹងមើលទៅមុខ--មើលទៅអនាគតជានិច្ច ។
ក្នុងនាមជាអាកាសយាន្តនិកចម្បាំង ខ្ញុំបានរៀនគោលការណ៍នេះថា ៖ មិនត្រូវប៉ុនប៉ងហោះចូលទៅក្នុងព្យុះឡើយ ។ ( ខ្ញុំនឹងមិនប្រាប់អ្នកអំពីរបៀបដែលខ្ញុំរកឃើញវាទេ ) ។ ផ្ទុយទៅវិញ បើកវៀងទៅផ្លូវផ្សេង ឬរង់ចាំឲ្យព្យុះស្ងប់មុនពេលចុះចត ។
យុវជម្ឈិមវ័យជាទីស្រឡាញ់ខ្ញុំចង់ជួយអ្នក « ឲ្យហោះហើរត្រឹមត្រូវ » នៅក្នុងព្យុះនៃថ្ងៃចុងក្រោយនេះ ។ អ្នកគឺជាអាកាសយាន្តនិក ។ អ្នកមានទំនួលខុសត្រូវដើម្បីគិតអំពីលទ្ធផលនៃជម្រើសគ្រប់យ៉ាងដែលអ្នកបានធ្វើ ។ ចូរសួរខ្លួនអ្នក « បើខ្ញុំធ្វើការជ្រើសរើសនេះ តើមានរឿងដ៏អាក្រក់បំផុតអ្វីខ្លះ ដែលអាចកើតឡើង ? ការជ្រើសរើសសុចរិតរបស់អ្នក នឹងរក្សាខ្លួនអ្នកកុំឲ្យទៅខុសផ្លូវ ។
ចូរគិតពីចំណុចនេះ ៖ ប្រសិនបើអ្នកមិនជ្រើសរើសទទួលទានគ្រឿងស្រវឹងទេ នោះអ្នកនឹងមិនញៀនគ្រឿងស្រវឹងទេ ! ប្រសិនបើអ្នកពុំធ្លាប់ជ្រើសរើសជំពាក់បំណុលទេ នោះអ្នកនឹងចៀសផុតពីការក្ស័យធុន !
គោលបំណងមួយនៃបទគម្ពីរ គឺដើម្បីបង្ហាញយើងអំពីរបៀបដែលមនុស្សសុចរិតឆ្លើយតបចំពោះការល្បួង និងការអាក្រក់ ។ និយាយឲ្យខ្លីទៅ ពួកគេចៀសវាងពីវា ! យ៉ូសែប បានរត់គេចពីប្រពន្ធរបស់ប៉ូទីផា ។៣ លីហៃ នាំគ្រួសារគាត់ចេញពីក្រុងយេរូសាឡិម ។៤ ម៉ារា និង យ៉ូសែប ភៀសខ្លួនទៅអេស៊ីព្ទ ដើម្បីគេចផុតពីផែនការអាក្រក់របស់ហេរ៉ូឌ ។៥ ព្រះវរបិតាសួគ៌បានព្រមានដល់អ្នកជឿទាំងនេះ នៅគ្រប់ស្ថានភាព ។ ស្រដៀងគ្នានេះដែរ ទ្រង់នឹងជួយយើងឲ្យដឹងថាត្រូវច្បាំង រត់គេច ឬទទួលយកការផ្លាស់ប្ដូរស្ថានភាពរបស់យើង ។ ទ្រង់នឹងមានបន្ទូលមកកាន់យើងតាមរយៈការអធិស្ឋាន ហើយនៅពេលយើងអធិស្ឋាន នោះយើងនឹងមានព្រះវិញ្ញាណបរិសុទ្ធដែលជាអង្គនឹងដឹកនាំយើង ។ យើងមាន បទគម្ពីរ ការបង្រៀនរបស់ពួកព្យាការីនៅរស់ ពរជ័យអយ្យកោ ការប្រឹក្សារបស់ឪពុកម្ដាយ និងអ្នកដឹកនាំបព្វជិតភាព និងអង្គការជំនួយ ដែលមានការបំផុសគំនិត ហើយលើសពីនោះ គឺសំឡេងតូចរហៀងរបស់ព្រះវិញ្ញាណ ។
ព្រះអម្ចាស់នឹងរក្សាការសន្យារបស់ទ្រង់ជានិច្ច ៖ « យើងនឹងដឹកនាំអ្នករាល់គ្នា » ។៦ មានសំណួរតែមួយគត់ គឺថា តើយើងយល់ព្រមឲ្យខ្លួនយើងត្រូវបានដឹកនាំឬទេ ? តើយើងនឹងស្ដាប់សំឡេងរបស់ទ្រង់ និងសំឡេងរបស់ពួកអ្នកបម្រើទ្រង់ឬទេ ?
ខ្ញុំសូមថ្លែងទីបន្ទាល់ថា ប្រសិនបើអ្នកនៅទីនោះសម្រាប់ព្រះអម្ចាស់ នោះទ្រង់នឹងគង់នៅទីនោះសម្រាប់អ្នក ។៧ ប្រសិនបើអ្នកស្រឡាញ់ទ្រង់ ហើយរក្សាបទបញ្ញត្តិរបស់ទ្រង់ នោះអ្នកនឹងមានព្រះវិញ្ញាណរបស់ទ្រង់ គង់នៅជាមួយអ្នក ហើយដឹកនាំអ្នក ។ « ចូរដាក់ទីទុកចិត្តរបស់អ្នកទៅនឹងព្រះវិញ្ញាណនោះ ដែលនាំឲ្យធ្វើល្អ ។ … ដោយការណ៍នេះ អ្នកនឹងដឹងគ្រប់ទាំងអស់ … ទាក់ទងទៅនឹងការណ៍ទាំងឡាយនៃសេចក្ដីសុចរិត » ។៨
ដោយមានគោលការណ៍ទាំងនោះជាគ្រឹះមួយ តើខ្ញុំសូមផ្ដល់ការប្រឹក្សាជាក់ស្ដែងខ្លះៗបានឬទេ ?
មនុស្សជាច្រើនក្នុងជំនាន់របស់អ្នកកំពុងប្រឈមមុខនឹងបំណុលដ៏ធំ ។ កាលខ្ញុំនៅវ័យស្របាលអ្នក ប្រធាន ស្ដេករបស់ខ្ញុំ គឺជាអ្នកវិនិយោគនៅក្រុមហ៊ុន វ៉ល ស្ទ្រីត ។ គាត់បានបង្រៀនខ្ញុំថា « អ្នកគឺជាអ្នកមានហើយ ប្រសិនបើអ្នកអាចរស់នៅដោយរីករាយតាមលទ្ធភាពរបស់អ្នកនោះ » ។ តើអ្នកអាចធ្វើដូច្នោះដោយរបៀបណា ? ថ្វាយដង្វាយមួយភាគក្នុងដប់របស់អ្នក ហើយសន្សំប្រាក់ ! នៅពេលអ្នករកបានច្រើន សន្សំឲ្យច្រើន ។ កុំប្រគួតប្រជែងនឹងអ្នកដទៃ ដែលប្រើប្រាស់របស់ថ្លៃៗ ។ កុំទិញអ្វីដែលហួសពីលទ្ធភាពអ្នក ។
យុវមជ្ឈិមវ័យជាច្រើន នៅក្នុងពិភពលោក នឹងជំពាក់បំណុលដើម្បីទទួលការអប់រំ ព្រោះតែថ្លៃសាលាមានតម្លៃថ្លៃជាងដែលពួកគេអាចបង់សង ។ សូមរកមើលអាហាររូបករណ៍ និង ការផ្ដល់អំណោយ ។ ធ្វើការងារក្រៅម៉ោងដើម្បីជួយបង់ថ្លៃសាលាដោយខ្លួនអ្នក បើអាចធ្វើទៅបាន ។ ការណ៍នេះ នឹងតម្រូវឲ្យមានការលះបង់ខ្លះៗ ប៉ុន្តែវានឹងជួយអ្នកទទួលជោគជ័យ ។
ការអប់រំរៀបចំអ្នកឲ្យមានឱកាសការងារល្អ ។ វាដាក់អ្នកឲ្យស្ថិតនៅក្នុងទីតាំងល្អប្រសើរដើម្បីបម្រើ និងប្រទានពរដល់អ្នកទាំងឡាយដែលនៅជុំវិញអ្នក ។ វានឹងដាក់អ្នកនៅលើផ្លូវនៃការរៀនសូត្រយូរអង្វែង ។ វានឹងពង្រឹងអ្នកប្រយុទ្ធនឹងភាពឆោតល្ងង់ និងភាពខុសឆ្គង ។ ដូចយ៉ូសែប ស្ម៊ីធ បានបង្រៀនថា ៖ « ចំណេះដឹងលុបបំបាត់នូវភាពងងឹតងងល់ ចម្ងល់ និងសង្ស័យ ដ្បិតរបស់ទាំងនោះពុំអាចមានវត្តមាននៅក្នុងចំណេះដឹងបានទេ ។ … នៅក្នុងចំណេះដឹងគឺមាននូវអំណាច » ។៩ « រៀនសូត្រគឺជាការល្អ បើពួកគេស្ដាប់តាមដំបូន្មានរបស់ព្រះ » ។១០ ការអប់រំនឹងរៀបចំអ្នកសម្រាប់អ្វីដែលនៅខាងមុខ រួមទាំងអាពាហ៍ពិពាហ៍ផងដែរ ។
ជាថ្មីម្ដងទៀត ខ្ញុំសូមនិយាយដោយចំៗបានទេ ? ផ្លូវដែលនាំទៅរកអាពាហ៍ពិពាហ៍ឆ្លងកាត់ទីតាំងដែលហៅថា ការដើរលេងជាគូ ! ការដើរលេងជាគូ គឺជាឱកាសដើម្បីមានការសន្ទនាយូរ ។ នៅពេលអ្នកដើរលេងជាគូ ចូររៀនអ្វីៗជាច្រើនតាមដែលអ្នកអាចធ្វើបានពីគ្នាទៅវិញទៅមក ។ ចូរស្គាល់គ្រួសាររបស់គ្នាទៅវិញទៅមកឲ្យបានច្រើនបើអាចធ្វើទៅបាន ។ តើគោលដៅរបស់អ្នកត្រូវគ្នាឬទេ ? តើអ្នកបានចែកចាយអារម្មណ៍ដូចគ្នាអំពីបទបញ្ញត្តិ ព្រះអង្គសង្គ្រោះ បព្វជិតភាព ព្រះវិហារបរិសុទ្ធ ភាពជាឪពុកម្ដាយ ការហៅបម្រើក្នុងសាសនាចក្រ និងការបម្រើដល់អ្នកដទៃឬទេ ? តើអ្នកបានសង្កេតមើលគ្នាទៅវិញទៅមកនៅក្នុងភាពតានតឹង ការឆ្លើយតបចំពោះភាពជោគជ័យ និងបរាជ័យ ការទប់កំហឹង និងការដោះស្រាយឧបសគ្គឬទេ ? តើមនុស្សដែលអ្នកដើរលេងជាមួយ ធ្វើឲ្យអ្នកដទៃធ្លាក់ចុះ ឬស្ថាបនាអ្នកដទៃឡើង ? តើអាកប្បកិរិយា និង ភាសា ព្រមទាំងទង្វើរបស់គាត់ ឬនាង ជាអ្វីដែលអ្នកចង់រស់នៅជាមួយប្រចាំថ្ងៃឬទេ ?
នោះបានន័យថា គ្មានយើងណាម្នាក់ រៀបការ នឹងមនុស្សល្អឥតខ្ចោះនោះទេ ប៉ុន្ដែយើងរៀបការ នឹងមនុស្សមាន សក្ដានុពល ។ អាពាហ៍ពិពាហ៍ត្រឹមត្រូវ មិនគ្រាន់តែអំពីអ្វីដែលខ្ញុំចង់បាននោះទេ វាក៏ជាអ្វីដែលនាងចង់បាន និង ត្រូវការឲ្យខ្ញុំប្រែក្លាយផងដែរ—ដែលនាងនឹងក្លាយជាដៃគូរបស់ខ្ញុំ ។
និយាយឲ្យត្រង់ទៅ ចូរកុំដើរលេងជាគូនៅក្នុងវ័យ ២០ ឆ្នាំរបស់អ្នកដើម្បី គ្រាន់តែ « សប្បាយ » ដូច្នេះពន្យាការរៀបការដោយសារតែចំណាប់អារម្មណ៍ និងសកម្មភាពផ្សេងៗ ។ ហេតុអ្វី ? ដោយសារតែការដើរលេងជាគូ និងអាពាហ៍ពិពាហ៍ ពុំមែនជាទិសដៅចុងក្រោយនោះទេ ។ វាគឺជាច្រកផ្លូវទៅកាន់កន្លែងដែលអ្នកចង់ទៅនៅទីបំផុតវិញទេតើ ។ « ដោយហេតុនោះ បានជាមនុស្សប្រុសនឹងលាចេញពីឪពុកម្តាយខ្លួន ទៅនៅជាប់នឹងប្រពន្ធវិញ » ។១១
ទំនួលខុសត្រូវរបស់អ្នក ឥឡូវនេះ គឺត្រូវមានភាពសក្ដិសមនឹងមនុស្សដែលអ្នកចង់រៀបការជាមួយ ។ ប្រសិនបើអ្នកចង់រៀបការនឹងមនុស្សដែលល្អ គួរស្រឡាញ់ ស្មោះត្រង់ រីករាយ ខំធ្វើការនឹងមានព្រះវិញ្ញាណខ្ពស់ ចូរធ្វើជា មនុស្សប្រភេទនោះ ។ ប្រសិនបើអ្នក គឺជា មនុស្សប្រភេទ នោះ ហើយអ្នកពុំ បានរៀបការ ចូរអត់ធ្មត់ ។ សូមដាក់ការរងចាំលើព្រះអម្ចាស់ ។ ខ្ញុំសូមថ្លែងទីបន្ទាល់ថា ព្រះអម្ចាស់ ស្គាល់បំណងប្រាថ្នារបស់អ្នក ហើយស្រឡាញ់អ្នកចំពោះការលះបង់ដោយស្មោះរបស់អ្នកចំពោះទ្រង់ ។ ទ្រង់មានផែនការសម្រាប់អ្នក មិនថាវានៅក្នុងជីវិតនេះ ឬ ជីវិតបន្ទាប់ពីនេះឡើយ ។ ចូរស្ដាប់តាមព្រះវិញ្ញាណទ្រង់ ។ « ចូរកុំចង់ទូន្មានដល់ព្រះអម្ចាស់ឡើយ តែចូរទទួលដំបូន្មានពីព្រះហស្តរបស់ទ្រង់វិញ » ។១២ នៅក្នុងជីវិតនេះ ឬជីវិតបន្ទាប់ ការសន្យារបស់ទ្រង់នឹងត្រូវបានបំពេញ ។ « បើសិនជាអ្នករាល់គ្នាបានប្រុងប្រៀបទុកជាស្រេច នោះអ្នករាល់គ្នានឹងមិនត្រូវខ្លាចឡើយ » ។១៣
ប្រសិនបើអ្នកពុំមានធនធានបរិបូរ ចូរកុំបារម្ភ ។ សមាជិកសាសនាចក្រដ៏ល្អម្នាក់បានប្រាប់ខ្ញុំថ្មីៗនេះថា « ខ្ញុំមិនចិញ្ចឹមកូនដោយសារប្រាក់ទេ គឺខ្ញុំចិញ្ចឹមពួកគេដោយសេចក្ដីជំនឿ » ។ មាននូវសេចក្តីពិតដ៏អស្ចារ្យមួយចំពោះចំណុចនោះ ។ ចូរចាប់ផ្ដើមអនុវត្តសេចក្ដីជំនឿរបស់អ្នកនៅគ្រប់ផ្នែកនៃជីវិតរបស់ខ្លួន ។ ប្រសិនបើអ្នកមិនធ្វើទេ អ្នកនឹងត្រូវរងទុក្ខនូវអ្វីដែលខ្ញុំនឹងហៅថា « ជំនឿទន់ខ្សោយ» ។ កម្លាំងដែលត្រូវការដើម្បីអនុវត្តសេចក្ដីជំនឿរបស់អ្នក នឹងរលាយសាបសូន្យទៅ ។ ដូច្នេះចូរអនុវត្តសេចក្ដីជំនឿរបស់អ្នកប្រចាំថ្ងៃ ហើយអ្នកនឹង « បានមុតមាំខ្លាំងឡើងៗ… ហើយបានរឹងប៉ឹងឡើងៗនៅក្នុងសេចក្ដីជំនឿជឿដល់ព្រះគ្រីស្ទ » ។១៤
ចូរត្រៀមខ្លួនជាស្រេចដើម្បីរៀបការ ចូរប្រាកដថាអ្នកមានភាពសក្ដិសមដើម្បីទទួលទានសាក្រាម៉ង់ និងកាន់បណ្ណចូលព្រះវិហារបរិសុទ្ធ ។ ចូរទៅព្រះវិហារបរិសុទ្ធជាទៀងទាត់ ។ បម្រើនៅក្នុងសាសនាចក្រ ។ បន្ថែមពីលើការហៅបម្រើក្នុងការហៅរបស់សាសនាចក្រ ចូរធ្វើតាមគំរូរបស់ព្រះអង្គសង្គ្រោះ ដែល« យាងចុះឡើងធ្វើការល្អ » ។១៥
ឥឡូវ អ្នកអាចនឹងមានសំណួរសំខាន់អំពីជម្រើសនៅខាងមុខ ។ នៅក្នុងវ័យក្មេងរបស់ខ្ញុំ ខ្ញុំបានស្វែងរកដំបូន្មានមកពីឪពុកម្ដាយខ្ញុំ ហើយនឹងអ្នកឲ្យដំបូន្មានស្មោះត្រង់ និងដែលទុកចិត្តបាន ។ មនុស្សម្នាក់គឺអ្នកដឹកនាំបព្វជិតភាពមួយរូប ហើយម្នាក់ទៀត គឺគ្រូបង្រៀនដែលមានជំនឿចិត្តលើខ្ញុំ ។ អ្នកទាំងពីរបានថ្លែងមកខ្ញុំថា « ប្រសិនបើអ្នកចង់បានដំបូន្មានខ្ញុំ ចូរត្រៀមខ្លួនទទួលយកវា » ។ ខ្ញុំបានយល់ពីអត្ថន័យនោះ ។ សូមជ្រើសរើសអ្នកប្រឹក្សាដោយការអធិស្ឋានជាអ្នកដែលមានដួងចិត្តចង់ឲ្យអ្នកមានសុខុមាលភាពខាងវិញ្ញាណល្អ ។ ចូរប្រយ័ត្នក្នុងការយកដំបូន្មានមកពីមិត្តភក្ដិរបស់អ្នក ។ ប្រសិនបើអ្នកចង់បានដំបូន្មានបន្ថែមចូរ ទៅរក ដំបូន្មានពីមនុស្សចាស់ទុំ កុំទៅរក ពីមិត្តភក្ដិអ្នកឡើយ !១៦
ចូរចងចាំថា គ្មាននរណាអាចជ្រើសរើសជំនួសអ្នកឡើយ ។ មានតែសេចក្ដីជំនឿ និងការអធិស្ឋាន របស់អ្នក ប៉ុណ្ណោះ ដែលនឹងបណ្ដាលឲ្យអ្នកលើកខ្លួនឡើង ហើយមានការផ្លាស់ប្រែចិត្តជឿដ៏ធំបាន ។ មានតែដំណោះស្រាយ របស់អ្នក ដើម្បីគោរពប្រតិបត្តិប៉ុណ្ណោះ ដែលអាចផ្លាស់ប្ដូរជីវិតរបស់អ្នកបាន ។ ដោយសារតែពលិកម្មធួនរបស់ព្រះអង្គសង្គ្រោះសម្រាប់អ្នក នោះអំណាចមាននៅក្នុងខ្លួនអ្នក ។១៧ អ្នកមានសិទ្ធិជ្រើសរើសរបស់អ្នក អ្នកមានទីបន្ទាល់រឹងមាំ ប្រសិនបើអ្នកគោរពប្រតិបត្តិ ហើយអ្នកអាចធ្វើតាមព្រះវិញ្ញាណដែលដឹកនាំអ្នក ។
ថ្មីៗនេះអ្នកផលិតភាពយន្តវ័យក្មេងម្នាក់ បាននិយាយថា គាត់មានអារម្មណ៏ថាគាត់ជាផ្នែកមួយនៃ « ជំនាន់កូនខ្ជះខ្ជាយ » — ជាជំនាន់ « ស្វែងរកសេចក្តីជំនឿ ភាពរីករាយ និង ភាពជោគជ័យ ប៉ុនែ្តបែរជារកខុសកន្លែង និង ផ្លូវខុស » ។១៨
នៅក្នុងរឿងប្រៀបធៀបរបស់ព្រះអង្គសង្គ្រោះ អំពីកូនប្រុសខ្ជះខ្ជាយ កូនប្រុសនោះមានពរជ័យជាច្រើននៅរង់ចាំគាត់ ប៉ុន្តែមុនពេលគាត់អាចទទួលបានវា នោះគាត់ត្រូវតែមើលឲ្យដិតដល់ពីជីវិតរបស់គាត់ ជម្រើសរបស់គាត់ និងស្ថានភាពរបស់គាត់ ។ អព្ភូតហេតុដែលបានកើតឡើងបន្ទាប់ ត្រូវបានពិពណ៌នានៅក្នុងគម្ពីរដោយឃ្លាសាមញ្ញមួយ ៖ « កាលវាភ្ញាក់ដឹងខ្លួន » ។១៩ ខ្ញុំសូមលើកទឹកចិត្តអ្នកឲ្យភ្ញាក់ដឹងខ្លួនបានឬទេ ? នៅក្នុងសាសនាចក្រ នៅពេលមានការសម្រេចចិត្តសំខាន់ដែលត្រូវធ្វើឡើង នោះជាញឹកញាប់ យើងធ្វើការប្រជុំក្រុមប្រឹក្សា ។ ក្រុមប្រឹក្សាគ្រួសារមានឡើងក្នុងគោលបំណងស្រដៀងគ្នា ។ អ្នកអាចនឹងចង់ធ្វើនូវអ្វីដែលអ្នកនឹងហៅថា « ការប្រឹក្សាខ្លួនឯង » ។ បន្ទាប់ពីអធិស្ឋាន សូមចំណាយពេលខ្លះនៅតែឯង ។ ចូរគិតអំពីអ្វីដែលនៅខាងមុខ ។ ចូរសួរខ្លួនអ្នក ៖ « តើផ្នែកណាខ្លះក្នុងជីវិតខ្ញុំ ដែលខ្ញុំចង់ពង្រឹងដើម្បីខ្ញុំអាចពង្រឹងដល់អ្នកដទៃ ? តើខ្ញុំចង់ក្លាយជាអ្វី ក្នុងរយៈពេលមួយឆ្នាំទៀត ចាប់ពីពេលនេះ ? ពីរឆ្នាំទៀតចាប់ពីពេលនេះតទៅ ? តើការសម្រេចចិត្តអ្វីខ្លះដែលខ្ញុំចាំបាច់ត្រូវធ្វើដើម្បីទៅដល់ទីនោះ ? » គ្រាន់តែចាំថាអ្នកគឺជាអាកាសយាន្តនិក ហើយអ្នកកំពុងបើកបរ ។ ខ្ញុំសូមថ្លែងទីបន្ទាល់ថា នៅពេលអ្នកភ្ញាក់ដឹងខ្លួន នោះព្រះវរបិតាសួគ៌របស់អ្នក នឹងមករកអ្នក ។ តាមរយៈព្រះហស្តលួងលោមនៃព្រះវិញ្ញាណបរិសុទ្ធ នោះទ្រង់នឹងជួយអ្នកនៅតាមផ្លូវ ។
ខ្ញុំសូមថ្លែងទីបន្ទាល់របស់ខ្ញុំថា ព្រះមានព្រះជន្មរស់ ។ ខ្ញុំថ្លែងជាសាក្សីរបស់ខ្ញុំថា ព្រះអង្គសង្គ្រោះស្រឡាញ់អ្នក ។ « តើយើងពុំគួរដើរនៅលើផ្លូវ [ ដ៏មហិមារបស់ទ្រង់ ] ទេឬ ? ចូរឆ្ពោះទៅមុខ កុំថយក្រោយឡើយ » ។២០ នៅពេលអ្នកដើរតាមទ្រង់ នោះទ្រង់នឹងពង្រឹងហើយលើកអ្នកឡើង ។ ទ្រង់នឹងនាំអ្នកឡើងទៅដល់ផ្ទះដ៏ខ្ពស់បំផុតរបស់អ្នក ។ ក្នុងព្រះនាមនៃព្រះយេស៊ូវគ្រីស្ទ អាម៉ែន ៕