សេចក្ដីពិតដ៏ច្បាស់ និងមានតម្លៃ
ដោយអែលឌើរ ហ្គែរី អ៊ី ស្ទីវ៉ែនសុន
នៃកូរ៉ុមពួកសាវកដប់ពីរនាក់
ការប៉ះប៉ូវដ៏សប្បុរសរបស់ព្រះវរបិតាសួគ៌ចំពោះការរស់នៅក្នុងគ្រាលំបាកនានានោះ គឺថាយើងក៏រស់នៅក្នុងកាលដ៏ពេញកំណត់ផងដែរ ។
បងប្អូនប្រុសស្រីជាទីស្រឡាញ់ អស់រយៈពេលជាច្រើនទសវត្សរ៍មកហើយ តាំងតែពីសន្និសីទទូទៅបានប្រារព្ធឡើងមក នោះទាំងប្រធាន ប៊យដ៍ ឃេ ផាកកឺ និង អែលឌើរ អិល ថម ភែរី ព្រមទាំង រីឆាដ ជី ស្កត មិនធ្លាប់ថាមិនបានអង្គុយនៅពីក្រោយវេទិកានេះ ហើយមានប្រសាសន៍នៅក្នុងសម័យប្រជុំទាំងនេះឡើយ ។ អនុស្សាវរីយ៍របស់យើងជាមួយពួកលោក គឺគួរឲ្យរំជួលចិត្តណាស់ ហើយខ្ញុំសូមបង្ហាញការគោរពរបស់ខ្ញុំចំពោះពួកលោក ពួកលោកមានលក្ខណៈផ្សេងៗគ្នារៀងៗខ្លួន ប៉ុន្តែសាក្សី និង ទីបន្ទាល់របស់ពួកលោកអំពីព្រះយេស៊ូវគ្រីស្ទ និង ដង្វាយធួនរបស់ទ្រង់មានភាពចុះសម្រុងគ្នាណាស់ ។
លើសពីនោះទៀត ខ្ញុំ ក៏ដូចជាបងប្អូនគ្រប់គ្នា បានឃើញភាពរឹងមាំ ហើយគាំទ្រដល់ប្រធាន ថូម៉ាស អេស ម៉នសុនថាជាព្យាការី អ្នកមើលឈុត និង អ្នកទទួលវិវរណៈ ហើយខ្ញុំមានការស្ងើចសរសើរចំពោះភាពស្មោះត្រង់របស់លោក និង ការបម្រើក្នុងកាតព្វកិច្ចដ៏ពេញលេញរបស់លោកជាសាវក អស់រយៈពេលជាង៥០ឆ្នាំដ៏អស្ចារ្យនេះ ។
ហើយកាលពីព្រឹកថ្ងៃអង្គារសប្តាហ៍នេះ បន្ទាប់ពីម៉ោង ៩ព្រឹក ដូចដែលគណៈប៊ីស្សពជាអធិបតីកំពុងចាប់ផ្តើមការប្រជុំជាមួយគណៈប្រធានតំបន់អាស៊ី ដែលបានមកទីនេះសម្រាប់សន្និសីទ នោះប្រធានម៉នសុនរួមទាំងទីប្រឹក្សាទាំងទ្វេរបស់លោកបានហៅខ្ញុំទៅជួប ។ មួយសន្ទុះក្រោមមក នៅពេលខ្ញុំដើរចូលទៅក្នុងបន្ទប់ប្រជុំដែលនៅជាប់នឹងការិយាល័យរបស់លោកនោះ ខ្ញុំមើលទៅដូចជាជ្រួលច្រាលក្នុងចិត្តដោយអង្គុយនៅតុម្ខាងទៀត នៅពេលលោកបានមានប្រសាសន៍យ៉ាងស្រទន់ដែលរម្ងាប់ភាពឆ្លេឆ្លារបស់ខ្ញុំ ។ ដោយមើលវ័យខ្ញុំ លោកបានមានប្រសាសន៍ថា ខ្ញុំហាក់បីដូចជាក្មេងបន្តិច ហើយមើលទៅមុខក្មេងជាងអាយុទៅទៀត ។
ប៉ុន្មាននាទីក្រោយមក ប្រធានម៉នសុនបានពិពណ៌នាពីកិច្ចការដែលស្តីពីព្រះឆន្ទៈរបស់ព្រះអម្ចាស់ លោកបានផ្តល់ការហៅឲ្យបម្រើក្នុងកូរ៉ុមនៃពួកដប់ពីរនាក់ដល់ខ្ញុំ ។ លោកបានសួរខ្ញុំ បើសិនខ្ញុំយល់ព្រមទទួលការហៅបម្រើនោះឬទេ ក្រោយមកនោះខ្ញុំពិតជាបានបញ្ចេញតែសំឡេងដូចជានិយាយពុំរួច ដោយក្តីភ្ញាក់ផ្អើលយ៉ាងខ្លាំង នោះខ្ញុំបានតបបព្ជាក់ទៅលោកវិញ ។ ក្រោយមក ពីមុនខ្ញុំអាចរៀបរាប់ពីមនោសញ្ចេតនាដ៏ធំធេងដែលមិនអាចរៀបរាប់បានរបស់ខ្ញុំ ដែលភាគច្រើនជាអារម្មណ៍ដែលគិតថាខ្លួនឯងខ្វះចន្លោះ នោះប្រធានម៉នសុន បានមានថ្លែងមកខ្ញុំ ដោយរៀបរាប់ពីរបៀបដែលលោកត្រូវបានហៅកាលពីច្រើនឆ្នាំមុន ឲ្យធ្វើជាសាវកដោយប្រធាន ដេវីឌ អូ ម៉ាក់ខេ ដែលនៅពេលនោះលោកក៏មានអារម្មណ៍ថាខ្លួនលោកខ្វះចន្លោះផងដែរ ។ លោកបានបង្គាប់ខ្ញុំដោយស្រទន់ថា « ប៊ីស្សព ស្ទីវ៉ែនសុន ព្រះអម្ចាស់នឹងធ្វើឲ្យអស់ប៊ីស្សពដែលទ្រង់បានហៅសមនឹងកិច្ចការនោះ » ។ ប្រសាសន៍ដ៏រាបសាទាំងនេះរបស់ព្យាការី បានក្លាយជាប្រភពមួយនៃភាពសុខសាន្ត ជាភាពស្ងប់មួយនៅក្នុងព្យុះនៃការពិនិត្យមើលខ្លួនឯងយ៉ាងឈឺចាប់ និង អារម្មណ៍ដ៏ទន់ភ្លន់នៅក្នុងកាលនៃភាពឈឺចាប់ ដែលបានកើតឡើងទាំងយប់ និង ថ្ងៃតាំងពីនោះមក ។
នៅថ្ងៃបន្ទាប់មក ខ្ញុំបាននិយាយអ្វីដែលខ្ញុំទើបតែរៀបរាប់ប្រាប់អ្នកនេះ ដល់ភរិយាជាទីស្រឡាញ់របស់ខ្ញុំ ឡេសា ដែលអង្គុយនៅកន្លែងមួយស្ងាត់នៅវិសាលដ្ឋានព្រះវិហារបរិសុទ្ធ ដោយឃើញទេសភាពដ៏ស្ងប់ស្ងាត់នៃព្រះវិហារបរិសុទ្ធ និង រោងឧបោសថជាប្រវត្តិសាស្ត្រនៅពីមុខយើង ។ នៅពេលយើងព្យាយាមស្វែងយល់ និង ទទួលស្គាល់ពីព្រឹត្តិការណ៍នៅថ្ងៃនោះ នោះយើងបានដឹងថាយុថ្ការបស់យើង គឺជាសេចក្តីជំនឿរបស់យើងលើព្រះយេស៊ូវគ្រីស្ទ និង ចំណេះដឹងរបស់យើងអំពីផែនការនៃសុភមង្គលដ៏មហិមា ។ ការណ៍នេះបានឲ្យខ្ញុំបង្ហាញសេចក្តីស្រឡាញ់យ៉ាងខ្លាំងចំពោះឡេសា ។ គាត់គឺជាពន្លឺ និង ជាជីវិតរបស់ខ្ញុំ ហើយជាបុត្រីដ៏អស្ចារ្យរបស់ព្រះ ។ ជីវិតរបស់គាត់គឺជាជីវិតបែបដែលបម្រើដោយមិនគិតពីខ្លួនឯង និង មានសេចក្តីស្រឡាញ់ឥតលក្ខខណ្ឌចំពោះមនុស្សទាំងអស់ ។ ខ្ញុំនឹងព្យាយាមបន្តសក្តិសមចំពោះពរជ័យនៃការរួមរស់អស់កល្បជានិច្ចរបស់យើង ។
ខ្ញុំសូមបង្ហាញសេចក្តីស្រឡាញ់យ៉ាងជ្រាលជ្រៅរបស់ខ្ញុំចំពោះកូនប្រុសទាំងបួននាក់របស់យើង និង គ្រួសាររបស់ពួកគេ មានកូនយើងបីនាក់ និង ភរិយាដ៏ស្រស់ស្អាតរបស់ពួកគេនៅទីនេះ ដែលជាម្តាយនៃចៅទាំងប្រាំមួយនាក់របស់យើង ដែលចៅទីបួនគឺជាអ្នកផ្សព្វផ្សាយសាសនា ដែលមានការអនុញ្ញាតជាពិសេសដើម្បីមិនទាន់ចូលគេង ហើយកំពុងមើលការចាក់ផ្សាយផ្ទាល់នេះជាមួយនឹងប្រធានបេសកកម្ម និង ភរិយារបស់លោក ចេញពីផ្ទះបេសកកម្មនៅប្រទេស តៃវ៉ាន់ ។ ខ្ញុំស្រឡាញ់ពួកគេគ្រប់គ្នា ហើយស្រឡាញ់របៀបដែលពួកគេស្រឡាញ់ព្រះអង្គសង្គ្រោះ និង ដំណឹងល្អ ។
ខ្ញុំសូមបង្ហាញសេចក្តីស្រឡាញ់របស់ខ្ញុំចំពោះសមាជិកម្នាក់ៗនៃគ្រួសាររបស់ខ្ញុំ ៖ ចំពោះម្តាយជាទីស្រឡាញ់របស់ខ្ញុំ ឪពុកខ្ញុំដែលបានចែកឋានកាលពីឆ្នាំមុន ដែលបានបណ្តុះទីបន្ទាល់នៅក្នុងខ្លួនខ្ញុំ ដែលវាស្ថិតក្នុងចិត្តខ្ញុំតាំងតែពីអនុស្សវរីយ៍ពីអតីតកាលរបស់ខ្ញុំនោះមកម្ល៉េះ ។ ខ្ញុំសូមបន្តថ្លែងអំណរគុណនេះដល់បងប្អូនប្រុសស្រីរបស់ខ្ញុំ និង ស្វាមី ឬ ភរិយាដ៏ស្មោះត្រង់របស់ពួកគេ ព្រមទាំងគ្រួសាររបស់ឡេសា ដែលពួកគេភាគច្រើនមានវត្តមាននៅទីនេះក្នុងថ្ងៃនេះ ។ ខ្ញុំសូមបង្ហាញអំណរគុណនេះដល់សាច់ញាតិ មិត្តភក្ដិ អ្នកផ្សព្វផ្សាយសាសនា ថ្នាក់ដឹកនាំ និង គ្រូបង្រៀន និង អស់អ្នកដែលខ្ញុំបានស្គាល់ ។
ខ្ញុំបានទទួលពរជ័យដែលធ្វើការ យ៉ាងជិតស្និទ្ធជាមួយសមាជិកនៃគណៈប្រធានទីមួយ ពួកដប់ពីរនាក់ ពួកចិតសិបនាក់ និង គណៈប្រធានអង្គការជំនួយទូទៅ ។ ខ្ញុំសូមបង្ហាញសេចក្តីស្រឡាញ់របស់ខ្ញុំ និង ការគោរពចំពោះបងប្អូនប្រុសស្រីគ្រប់រូប ហើយនឹងព្យាយាមបម្រើ ដើម្បីមានភាពសក្តិសមចំពោះទំនាក់ទំនងបន្តទៀតជាមួយគ្នា ។ គណៈប៊ីស្សពជាអធិបតីរីករាយនឹងការរួបរួមសួគ៌ានេះ ។ ខ្ញុំនឹងនឹករឭកសហការីរបស់ខ្ញុំដែលធ្វើការជាមួយខ្ញុំរាល់ថ្ងៃគឺ ប៊ីស្សព កូសសែ និង ប៊ីស្សព ដេវីស ព្រមទាំង បុគ្គលិកនានា ។
ខ្ញុំឈរនៅពីមុខបងប្អូន ក្នុងនាមជាភស្តុតាងនៃព្រះបន្ទូលរបស់ព្រះអម្ចាស់ដែលបានកត់ត្រានៅក្នុងកណ្ឌទីមួយនៃគោលលទ្ធិ និងសេចក្ដីសញ្ញា ៖ « ដើម្បីឲ្យមានភាពពោរពេញនៃដំណឹងល្អរបស់យើង អាចបានប្រកាសប្រាប់ ដោយពួកកំសោយ និង ពួករាបទាប ដល់អស់ចុង[ ផែនដី ] និង នៅចំពោះពួកមហាក្សត្រ និង ពួកអ្នកត្រួតត្រាទាំងឡាយ » ។១ បន្ទូលទាំងនេះបានមកបន្ទាប់ពីព្រះបន្ទូលរបស់ព្រះអម្ចាស់ដែលបានប្រកាស បង្ហាញពីសេចក្តីស្រឡាញ់របស់ព្រះវរបិតាចំពោះកូនចៅរបស់ទ្រង់ ៖ « ហេតុដូច្នោះហើយ យើងជាព្រះអម្ចាស់ដោយជ្រាបនូវគ្រោះដែលនឹងមានមកលើ បណ្តាជនទាំងឡាយនៅ លើផែនដីនោះបានហៅ យ៉ូសែប ស៊្មីធ ជុញ្ញ័រជាអ្នកបម្រើរបស់យើង ហើយបាននិយាយមកកាន់លោកពីលើស្ថានសួគ៌ ហើយបានប្រទានព្រះបញ្ញត្តិទាំងឡាយដល់លោក » ។២
ព្រះវរបិតាសួគ៌ និង ព្រះរាជបុត្រារបស់ទ្រង់ដ៏ជាទីស្រឡាញ់ គឺព្រះយេហូវ៉ា ជាមួយនឹងចំណេះដឹងតាំងតែដើមរៀងមក៣ ដោយបើកឋានសួគ៌ និង សម័យកាន់កាប់ត្រួតត្រានេះ ដើម្បីប៉ះប៉ូវនឹងគ្រោះនានាដែលទ្រង់ជ្រាបថានឹងមកដល់ ។ សាវកប៉ុលបានរៀបរាប់ពីគ្រោះកាចដែលនឹងមកនេះថាជា « គ្រាលំបាកណាស់ » ។៤ សម្រាប់ខ្ញុំ ការណ៍នេះបង្ហាញថា ការប៉ះប៉ូវដ៏សប្បុរសរបស់ព្រះវរបិតាសួគ៌ចំពោះការរស់នៅក្នុងគ្រាលំបាកនានានោះ គឺថាយើងក៏រស់នៅក្នុងកាលដ៏ពេញកំណត់ផងដែរ ។
នៅពេលខ្ញុំសោកសៅចំពោះភាពខ្វះចន្លោះរបស់ខ្ញុំក្នុងសប្ដាហ៍នេះ ខ្ញុំបានទទួលនូវអារម្មណ៍ជាក់លាក់ ទាំងការវាយផ្ចាល និងការលួងលោមចិត្ត ៖ ដែលពុំផ្ដោតតែលើអ្វីដែលខ្ញុំពុំអាចធ្វើនោះទេ ប៉ុន្តែទៅលើអ្វីដែលខ្ញុំអាចធ្វើវិញ ។ ខ្ញុំអាចថ្លែងទីបន្ទាល់អំពីសេចក្ដីពិតដ៏ច្បាស់ និងមានតម្លៃនៃដំណឹងល្អ ។
ទាំងនេះគឺជាពាក្យដែលខ្ញុំបានចែកចាយរាប់រយដងមកហើយជាមួយនឹងអ្នកទាំងឡាយដែលនៅក្នុងសាសនាចក្រ និងអ្នកដែលពុំមែនជាសមាជិក ៖ « ព្រះជាព្រះវរបិតាសួគ៌ពេញដោយ [ សេចក្តីស្រឡាញ់ ] របស់យើង ។ យើងគឺជាកូនចៅទ្រង់ ។ … ទ្រង់ព្រះកន្សែងជាមួយយើង ពេលយើងរងទុក្ខ ហើយរីករាយពេលយើងធ្វើអ្វីដែលត្រូវ ។ ទ្រង់ចង់ទាក់ទងនឹងយើង ហើយយើងអាចទាក់ទងនឹងទ្រង់តាមរយៈការអធិស្ឋានដោយស្មោះ ។ …
« ព្រះវរបិតាសួគ៌ បានប្រទានដល់យើង ជាកូនចៅរបស់ទ្រង់ នូវរបៀបមួយ … ដើម្បីត្រឡប់ទៅរស់នៅក្នុងវត្តមានរបស់ទ្រង់វិញ ។ … ចំណុចសំខាន់នៃ ផែនការរបស់ព្រះវរបិតា[ សួគ៌ ] របស់យើង គឺដង្វាយធួនរបស់ព្រះយេស៊ូវគ្រីស្ទ » ។៥
ព្រះវរបិតាសួគ៌បានបញ្ជូនព្រះរាជបុត្រារបស់ទ្រង់មកកាន់ផែនដីដើម្បីធួនចំពោះអំពើបាបរបស់មនុស្សលោក ។ ចេញពីសេចក្ដីពិតដ៏ច្បាស់ និងមានតម្លៃនេះ ខ្ញុំសូមថ្លែងទីបន្ទាល់របស់ខ្ញុំ ហើយខ្ញុំសូមពោលពាក្យទាំងនេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។