ភាពសក្ដិសមនឹងពរជ័យដែលបានសន្យារបស់យើង
ដោយលីនដា អេស រីវស៍ន
ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ
ទស្សនៈវិស័យនៃពរជ័យដ៏អស្ចារ្យដែលព្រះបិតារបស់យើងបានសន្យា ត្រូវតែជាការផ្ដោតដ៏សំខាន់នៅចំពោះមុខយើងជារៀងរាល់ថ្ងៃ ។
តើអ្នកមិនស្រឡាញ់បងស្រីក្នុងវីដេអូនេះទេឬអី ? យើងដឹងថា បងប្អូនរាល់គ្នាជាច្រើនដែលគ្មានឱកាសមានកូនដោយខ្លួនឯង បានចំណាយពេលពេញមួយជីវិតដើម្បីស្រឡាញ់ បង្រៀន ហើយឲ្យពរដល់កុមារតូចៗ ។ ហើយ ព្រះវរបិតាសួគ៌ និងពួកយើង ដែលជាបងប្អូនស្រីរបស់អ្នក ស្រឡាញ់អ្នកខ្លាំងណាស់ចំពោះការណ៍នេះ !
តើយើងទាំងអស់គ្នា រួមទាំងក្មួយស្រីៗជាទីស្រឡាញ់ក្នុងថ្នាក់កុមារ និងយុវនារីផងដែរ ធ្លាប់មានឱកាសបីទារកទើបនឹងកើតក្នុងដៃ ហើយដាក់ឲ្យទារក ឬទារិកានោះមើលចំមុខយើងដែរឬទេ ? តើយើងធ្លាប់មានអារម្មណ៍ពិសិដ្ឋ និងបរិសុទ្ធដែលហ៊ុមព័ទ្ធវិញ្ញាណសេលេស្ទាលនេះ ដែលព្រះវរបិតាសួគ៌របស់យើងទើបបញ្ជូនមកក្នុងរូបកាយតូចបរិសុទ្ធដែលបានបង្កើតថ្មីនេះដែរឬទេ ? ខ្ញុំកម្រមានបទពិសោធន៍ពីអារម្មណ៍ផ្អែមល្ហែម ទន់ភ្លន់ ហើយប្រកបដោយព្រះវិញ្ញាណដូចនេះណាស់ ។
រូបកាយរបស់យើង គឺជាអំណោយដ៏ពិសិដ្ឋមកពីព្រះវរបិតាសួគ៌របស់យើង ។ វាជាព្រះវិហារបរិសុទ្ធផ្ទាល់ខ្លួន ។ នៅពេលយើងរក្សាវាឲ្យស្អាតស្អំ ហើយបរិសុទ្ធ នោះយើងអាចសក្ដិសមដើម្បីជួយព្រះវរបិតាសួគ៌របស់យើងបង្កើតរូបកាយឲ្យកូនចៅវិញ្ញាណជាទីស្រឡាញ់របស់ទ្រង់ ។
នៅក្នុងប្រសាសន៍ចុងក្រោយក្នុងសន្និសីទរបស់ប្រធានប៊យដ៍ ឃេ ផាកកឺ អ្នកអាចនៅចាំ « នំឃុកឃីមួយ និងការថើប » ដែលលោកបានថ្លែងទីបន្ទាល់ថា « ព្រះបញ្ញត្តិឲ្យបង្កើតកូនជាច្រើនឡើង ហើយមានពេសពេញលើផែនដី… គឺសំខាន់… ហើយគឺជាប្រភពនៃសុភមង្គលរបស់មនុស្សលោក ។ តាមរយៈការអនុវត្តដ៏សុចរិតនៃអំណាច [ បង្កបង្កើត ] នេះ នោះយើងនឹងអាចខិតកាន់តែជិតព្រះវរបិតាសួគ៌យើង ហើយដកពិសោធន៍នូវអំណរដ៏ពេញលេញ គឺភាពជាព្រះ ។ អំណាចនៃការបង្កើតកូនពុំមែនជាផ្នែកចៃដន្យមួយនៃផែនការទេ តែវាគឺជាផែនការ » ។
លោកបានបន្ត ៖
« ក្តីស្រឡាញ់ពិតតម្រូវឲ្យរក្សាទុកក្តីស្រឡាញ់នោះ រហូតក្រោយពីរៀបការសិន ដើម្បីបើកអំណាចពិសិដ្ឋដល់ការបង្កើតកូន … [ ដោយ ] ចៀសវាងពីស្ថានភាពដែលបំណងប្រាថ្នាខាងរូបកាយអាចនឹងមកគ្រប់គ្រង ។ …
« … សុភមង្គលនៅក្នុងជីវិតរមែងស្លាប់ អំណរ និង ភាពតម្កើងឡើងរបស់យើងគឺផ្អែកលើរបៀបដែលយើងឆ្លើយតបចំពោះអារម្មណ៍ដែលទាក់ទាញនៃចំណង់ខាងរូបកាយដែលមាននេះ ។១
បងប្អូនស្រីជាទីស្រឡាញ់ ទាំងក្មេង និងទាំងចាស់ ខ្ញុំមានចិត្តរំភើបជាពិសេសពេលរៀបចំការនិយាយនេះ ។ ដូចដែលអាលម៉ាជាកូន បានបង្ហាញ « ខ្ញុំមានបំណងពីជម្រៅចិត្តខ្ញុំ… សូមឲ្យអ្នករាល់គ្នា … អំពាវនាវដល់ព្រះនាមដ៏បរិសុទ្ធរបស់ទ្រង់ ហើយចាំយាម និង អធិស្ឋានជានិច្ច ដើម្បីកុំឲ្យអ្នកត្រូវល្បួងលើសជាងអ្វីដែលអ្នករាល់គ្នាអាចអត់ទ្រាំបានឡើយ … ដើម្បីឲ្យអ្នករាល់គ្នាបានលើកឡើងនៅថ្ងៃចុងក្រោយបង្អស់ » ។២
ក្រោយមក មរមនក៏បានថ្លែងទីបន្ទាល់ផងដែរថា នៅក្នុងជំនាន់របស់អាលម៉ា កូរីហូ ជាអ្នកប្រឆាំងព្រះគ្រីស្ទ « បានផ្សាយ … បង្វែរចិត្ត … ស្ត្រីចេញជាច្រើន » ។៣
បងប្អូនស្រីអើយ សាតាំងបានមានឥទ្ធិពលជោគជ័យ ដូចកូរីហូ នៅក្នុងជំនាន់របស់យើង ។ តើឧបករណ៍មួយចំនួនរបស់វាមានអ្វីខ្លះ ? ប្រលោមលោកមនោសញ្ចេតនាដែលទាក់ទាញ រឿងល្ខោនភាគតាមទូរទស្សន៍ ស្ត្រីដែលរៀបការ និងមិត្តប្រុសចាស់មានទំនាក់ទំនងតាមប្រព័ន្ធសង្គម និងរឿងអាសគ្រាម ។ យើងត្រូវតែប្រយ័ត្នប្រយ៉ែងបំផុត បងប្អូនស្រីទាំងឡាយ ! យើងមិនអាចលលេងនឹងព្រួញភ្លើងរបស់សាតាំង ហើយឥតរលាកនោះទេ ។ ខ្ញុំដឹងថា គ្មានអ្វីមួយដែលធ្វើឲ្យយើងសក្ដិសមនឹងមានភាពជាដៃគូនៃព្រះវិញ្ញាណបរិសុទ្ធជាប្រចាំជាងគុណធម៌ឡើយ ។
មនុស្សជាច្រើននៅក្នុងពិភពលោកសព្វថ្ងៃ កំពុងស្វែងរកការបំពេញចិត្តភ្លាមៗ និងចំណេះដឹងភ្លាមៗតាមអ៊ិនធើរណិត ។ ផ្ទុយទៅវិញ យើងមានពរខ្លាំងណាស់ បើយើងអនុវត្តសេចក្ដីជំនឿ ហើយអត់ធ្មត់ រួចទៅរកព្រះវរបិតាសួគ៌របស់យើង ជាប្រភពនៃសេចក្ដីពិតគ្រប់យ៉ាងចំពោះកង្វល់របស់យើង ។ ដូច្នេះមានចម្លើយ និងការអះអាងជាច្រើនដែលអាចកើតមាន តាមរយៈការស្រាវជ្រាវ និងការសិក្សាព្រះគម្ពីរជាប្រចាំ និងដោយស្មោះ ព្រមទាំងដោយការអធិស្ឋានទូលអង្វរ ប៉ុន្តែវាគ្មានការសន្យាដូច្នេះនៅលើអ៊ិនធើរណិតឡើយ ។ ព្យាការី យ៉ាកុប បានថ្លែងទីបន្ទាល់ថា ៖ « ព្រោះព្រះវិញ្ញាណទ្រង់មានព្រះបន្ទូលតែការពិត ហើយមិនកុហកឡើយ ។ ហេតុដូច្នោះហើយ ព្រះវិញ្ញាណទ្រង់មានព្រះបន្ទូលអំពីរឿងទាំងឡាយ តាមដែលមាននៅពេលនេះ ហើយអំពីរឿងទាំងឡាយតាមដែលនឹងមាននៅពេលខាងមុខ » ។៤
នៅពេលយើងមើល អាន ឬដកពិសោធន៍អ្វីៗដែលនៅក្រោមបទដ្ឋានរបស់ព្រះវរបិតាសួគ៌របស់យើង នោះវាធ្វើឲ្យយើងទន់ខ្សោយ ។ មិនថាយើងមានវ័យណាទេ ប្រសិនបើយើងមើល អាន ស្ដាប់ ឬជ្រើសរើសធ្វើអ្វីដែលមិនត្រូវតាមបទដ្ឋានរបស់ព្រះអម្ចាស់ នៅក្នុងកូនសៀវភៅដើម្បីកម្លាំងនៃយុវជន ចូរបិទវា ហែកវាចោល ហើយកុំទៅរកវាទៀត ។
គ្មានយើងណាម្នាក់ល្អឥតខ្ចោះឡើយ ប៉ុន្តែនៅពេលយើងមានអំពើបាប ប្រធានផាកកឺ បានរំឭកថា ៖
« ការសន្យានោះគឺ ៖ ‹ មើលចុះ អ្នកណាដែលប្រែចិត្តពីអំពើបាបទាំងឡាយរបស់ខ្លួន អ្នកនោះឈ្មោះថាបានអត់ទោសឲ្យហើយ ហើយយើងជាព្រះអម្ចាស់មិនចាំពីអំពើបាបទាំងនោះទៀតទេ › (គ និង ស ៥៨:៤២) ។ …
« … ដង្វាយធួនអាចកែយើងម្នាក់ៗជាថ្មី ដោយគ្មាននៅដានស្នាមឡើយ ។ នោះមានន័យថា មិនថាយើងបានធ្វើអ្វី ឬយើងបានទៅកន្លែងណា ឬមានអ្វីមួយកើតឡើងដោយរបៀបណាទេ បើយើងបានប្រែចិត្តពិត ទ្រង់បានសន្យាថា ទ្រង់នឹងធ្វើឲ្យធួន ។ ហើយនៅពេលទ្រង់ធ្វើឲ្យធួន នោះទ្រង់ដោះស្រាយរឿងនោះហើយ ។ មានគ្នាយើងជាច្រើននាក់ បានវិលវល់…ជាមួយនឹងអារម្មណ៍ខុសឆ្គង ដោយពុំដឹងថាត្រូវគេចចេញដោយរបៀបណា ។ បងប្អូនអាចគេចចេញបាន តាមរយៈការទទួលយកដង្វាយធួនរបស់ព្រះគ្រីស្ទ ហើយអ្វីៗដែលឈឺចាប់អាចត្រឡប់ទៅជាស្រស់ស្អាត ហើយគួរស្រឡាញ់ និងអស់កល្បជានិច្ច » ។៥
ក្រៅពីការប្រែចិត្ត តើជំនួយ ឬឧបករណ៍អ្វីខ្លះដែលបានផ្ដល់ឲ្យយើងបន្ដនៅស្អាតស្អំ និងប្រកបដោយគុណធម៌នោះ ? កុមារអង្គការបឋមសិក្សា និងយុវនារីរបស់យើងទាំងអស់គ្នាចេះច្រៀងបទ « អំណាចព្រះគម្ពីរ » ៦ តើយើងអាចពង្រីកវាឲ្យទៅជា « អំណាចអធិស្ឋាន » « អំណាចព្រះវិហារបរិសុទ្ធ » « អំណាចសេចក្ដីសញ្ញា » « អំណាចថ្ងៃឈប់សម្រាក » « អំណាចព្យាការី » « អំណាចគុណធម៌ » បានទេ ?
ក៏មានពរជ័យដ៏ច្រើន និងការសន្យាការពារ ដែលមានមកជាមួយនឹងការពាក់សំលៀកបំពាក់បរិសុទ្ធនៃព្រះវិហារបរិសុទ្ធរបស់យើងដោយត្រឹមត្រូវផងដែរ ។ ខ្ញុំបានទទួលអារម្មណ៍ថា ហាក់ដូចជា ខ្ញុំកំពុងពាក់សំលៀកបំពាក់ក្សត្រ ដែលព្រះវរបិតាសួគ៌របស់យើងបានប្រទានមកខ្ញុំ ។ ខ្ញុំសូមថ្លែងទីបន្ទាល់ថា នៅពេលយើងព្យាយាមពាក់សំលៀកបំពាក់បរិសុទ្ធដោយត្រឹមត្រូវ នោះព្រះបិតាយើងទទួលស្គាល់ថាវាជាទីសម្គាល់ដ៏អស្ចារ្យនៃក្ដីស្រឡាញ់ និងការលះបង់របស់យើងចំពោះទ្រង់ ។ វាគឺជាទីសម្គាល់មួយនៃសេចក្ដីសញ្ញា ដែលយើងបានធ្វើនឹងទ្រង់ ហើយទ្រង់បានសន្យាថា « យើងជាព្រះអម្ចាស់ជាប់សន្យា កាលណាអ្នករាល់គ្នាប្រព្រឹត្តិតាមអ្វី ដែលយើងមានព្រះបន្ទូល ប៉ុន្តែកាលណាអ្នករាល់គ្នាមិនប្រព្រឹត្តិតាមអ្វីដែលយើងមានព្រះបន្ទូលទេ នោះអ្នករាល់គ្នាពុំមាន សេចក្តីសន្យាឡើយ » ។៧
ថ្មីៗនេះ ខ្ញុំបាននិយាយនឹងមិត្តចាស់ម្នាក់ដែលបានឆ្លងកាត់ការលែងលះគ្នាពីរដង ដោយសារតែការញៀន និងភាពមិនស្មោះត្រង់របស់ស្វាមីគាត់ ។ គាត់ និងកូនបីនាក់ បានរងទុក្ខយ៉ាងដំណំ ។ គាត់បានអង្វរថា « ខ្ញុំបានខំព្យាយាមរស់នៅដោយសុចរិត ។ ហេតុអ្វីក៏ខ្ញុំមានការសាកល្បងច្រើនម្ល៉េះ ? តើខ្ញុំបានធ្វើអ្វីខុសទៅ ? តើព្រះវរបិតាសួគ៌ចង់ឲ្យខ្ញុំធ្វើអ្វី ? ខ្ញុំបានអធិស្ឋាន ហើយអានព្រះគម្ពីរ ជួយកូនៗ ហើយទៅព្រះវិហារបរិសុទ្ធជាញឹកញាប់ » ។
នៅពេលខ្ញុំស្ដាប់បងស្រីរូបនេះ ខ្ញុំចង់ស្រែកប្រាប់ថា « អ្នកកំពុងធ្វើវាហើយ ! អ្នកកំពុងធ្វើអ្វីៗទាំងអស់ដែលព្រះវរបិតាសួគ៌សព្វព្រះទ័យ ហើយសង្ឃឹមថាអ្នកនឹងធ្វើវា ! »
ច្បាស់ណាស់ មនុស្សជាច្រើនបានសម្ដែងថា ពរជ័យដែលព្រះបិតាយើងបានសន្យា គឺ « នៅយូរណាស់» ជាពិសេសនៅពេលជីវិតរបស់យើង កំពុងពោរពេញដោយបញ្ហានោះ ។ ប៉ុន្តែ អាម៉ូលេក បានបង្រៀនថា « ជីវិតនេះជាពេលដើម្បីត្រៀមខ្លួនទៅជួបព្រះ … »៨ វាមិនមែនជាពេលទទួលគ្រប់ពរជ័យរបស់យើងទេ ។ ប្រធាន ផាកកឺ បានពន្យល់ «‹ ហើយពួកគេទាំងអស់គ្នាបានរស់នៅដោយសប្បាយរីករាយជាដរាបតទៅ › គឺពុំដែលបានសរសេរជាផ្នែកនៃជីវិតរមែងស្លាប់នេះទេ ។ ឃ្លានោះគឺនៅក្នុងជីវិតបន្ទាប់ ពេលដែលអាថ៌កំបាំងទាំងឡាយត្រូវបានបើក ហើយអ្វីៗគ្រប់យ៉ាងដាក់ឲ្យត្រឹមត្រូវ » ។៩ ទោះជាយ៉ាងណាក៏ដោយ ទស្សនៈវិស័យនៃពរជ័យដ៏អស្ចារ្យដែលរបស់ព្រះបិតារបស់យើងបានសន្យា ត្រូវតែជាការផ្ដោតដ៏សំខាន់នៅចំពោះមុខយើងជារៀងរាល់ថ្ងៃ -- ក៏ដូចជាការដឹងជាមុន « អំពីព្រះគុណដ៏ទន់ភ្លន់របស់ទ្រង់ » ១០ដែលយើងដកពិសោធន៍ជាប្រចាំផងដែរ ។
បងប្អូនស្រីអើយ ខ្ញុំមិនដឹងថា ហេតុអ្វីយើងមានការសាកល្បងច្រើនដូច្នេះទេ ប៉ុន្តែខ្ញុំមានអារម្មណ៍ផ្ទាល់ខ្លួនថា រង្វាន់មានសន្ធឹកណាស់ វានៅអស់កល្ប និងជានិរន្ដរ ពេញដោយអំណរ ហើយហួសពីការយល់ដឹងរបស់យើង ហើយនៅក្នុងថ្ងៃនៃការទទួលរង្វាន់នោះ យើងអាចមានអារម្មណ៍ចង់ទូលទៅព្រះបិតាជាទីស្រឡាញ់ ប្រកបដោយព្រះគុណ និងក្ដីសប្បុរសរបស់យើងថា « ត្រូវធ្វើតែប៉ុណ្ណឹងឬ ! » ខ្ញុំជឿថា ប្រសិនបើយើងចងចាំ ហើយទទួលស្គាល់ជម្រៅនៃក្ដីស្រឡាញ់ដែលព្រះវរបិតាសួគ៌ និងព្រះអង្គសង្គ្រោះរបស់យើងមានចំពោះយើងជាប្រចាំ នោះយើងនឹងមានឆន្ទៈធ្វើអ្វីៗគ្រប់យ៉ាង ដើម្បីត្រឡប់ទៅក្នុងវត្តមានទ្រង់ម្ដងទៀត ដែលមានពេញដោយក្ដីស្រឡាញ់ដ៏អស់កល្បរបស់ទ្រង់ ។ បងប្អូនស្រីជាទីស្រឡាញ់ តើអ្វីដែលយើងបានរងទុក្ខនៅទីនេះនឹងសំខាន់យ៉ាងណា បើនៅទីបំផុត ការសាកល្បងទាំងនោះ គឺជារឿងដែលធ្វើឲ្យយើងសក្ដិសមចំពោះជីវិតអស់កល្បជានិច្ច និងភាពតម្កើងឡើងនៅក្នុងនគរនៃព្រះជាមួយព្រះវរបិតាយើង និងព្រះអង្គសង្គ្រោះនោះ ?
ខ្ញុំសូមថ្លែងទីបន្ទាល់ថា រូបកាយរបស់យើង គឺជាអំណោយទានដ៏ពិសិដ្ឋមកពីព្រះវរបិតាសួគ៌របស់យើង ហើយថា នៅពេលយើងរក្សាជីវិតរបស់យើងឲ្យបរិសុទ្ធ និងស្អាតស្អំ តាមរយៈពលិកម្មធួននៃព្រះអង្គសង្គ្រោះរបស់យើង ហើយរក្សាទស្សនៈវិស័យនៃរង្វាន់ដែលព្រះបិតាយើងបានសន្យាប្រចាំនៅពីខាងមុខយើង នោះថ្ងៃណាមួយយើងនឹងទទួលបាន « អ្វីៗគ្រប់យ៉ាងដែលព្រះបិតា [ របស់យើង ] មាន » ។១១ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕