ຈົ່ງມາ ແລະ ເປັນພາກສ່ວນ
ພວກເຮົາຂໍເຊື້ອເຊີນລູກໆຂອງພຣະເຈົ້າທຸກຄົນຕະຫລອດທົ່ວໂລກ ໃຫ້ມາຮ່ວມກັບພວກເຮົາໃນເປົ້າໝາຍອັນຍິ່ງໃຫຍ່ນີ້.
ອ້າຍເອື້ອຍນ້ອງ ແລະ ໝູ່ເພື່ອນທີ່ຮັກແພງຂອງຂ້າພະເຈົ້າ, ແຕ່ລະອາທິດ, ສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໃນທົ່ວໂລກ ໄດ້ນະມັດສະການພຣະບິດາເທິງສະຫວັນທີ່ຊົງຮັກ, ພຣະເຈົ້າ ແລະ ພຣະມະຫາກະສັດຂອງຈັກກະວັນ, ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ. ເຮົາໄຕ່ຕອງເຖິງພຣະຊົນຊີບ ແລະ ຄຳສອນຂອງພຣະເຢຊູຄຣິດ—ຜູ້ດຽວທີ່ບໍ່ມີບາບ ທີ່ເຄີຍມີຊີວິດຢູ່, ເປັນພຣະເມສານ້ອຍຂອງພຣະເຈົ້າທີ່ບໍ່ມີບ່ອນຕຳນິ. ເລື້ອຍໆເທົ່າທີ່ເຮົາສາມາດເຮັດໄດ້, ເຮົາຮັບສ່ວນສິນລະລຶກໃນການລະນຶກເຖິງການເສຍສະລະຂອງພຣະອົງ ແລະ ຮັບຮູ້ວ່າ ພຣະອົງເປັນສູນກາງໃນຊີວິດເຮົາ.
ເຮົາຮັກພຣະອົງ ແລະ ເຮົາໃຫ້ກຽດແກ່ພຣະອົງ. ເພາະຄວາມຮັກທີ່ເລິກຊຶ້ງ ແລະ ນິລັນດອນຂອງພຣະອົງ, ພຣະເຢຊູຄຣິດຈຶ່ງໄດ້ຮັບທຸກທໍລະມານ ແລະ ໄດ້ສິ້ນພຣະຊົນເພື່ອທ່ານ ແລະ ຂ້າພະເຈົ້າ. ພຣະອົງໄດ້ພັງປະຕູແຫ່ງຄວາມຕາຍ, ໄດ້ທຳລາຍສິ່ງກີດຂວາງທີ່ແຍກໝູ່ເພື່ອນ ແລະ ຄົນຮັກອອກຈາກກັນ,1 ແລະ ໄດ້ນຳຄວາມຫວັງມາໃຫ້ຜູ້ສິ້ນຫວັງ, ປິ່ນປົວຄົນເຈັບປ່ວຍ, ແລະ ປົດປ່ອຍຜູ້ທີ່ຖືກຈ່ອງຈຳ.2
ເຮົາອຸທິດໃຈ, ຊີວິດ, ແລະ ອຸທິດຕົນໃນແຕ່ລະວັນແດ່ພຣະອົງ. ເພາະດ້ວຍເຫດນີ້ແຫລະ, “ພວກເຮົາເວົ້າເຖິງພຣະຄຣິດ, ພວກເຮົາປິຕິຍິນດີໃນພຣະຄຣິດ, [ແລະ] ພວກເຮົາສັ່ງສອນເລື່ອງພຣະຄຣິດ, … ເພື່ອລູກຫລານຂອງພວກເຮົາ ຈະໄດ້ຮູ້ວ່າ ພວກເຂົາຈະຫລຽວຫາແຫລ່ງໃດເພື່ອການປົດບາບ.”3
ການຝຶກຝົນການເປັນສານຸສິດ
ເຖິງຢ່າງໃດກໍຕາມ, ການເປັນສານຸສິດຂອງພຣະເຢຊູຄຣິດ ແມ່ນເກີນກວ່າພຽງແຕ່ເວົ້າ ແລະ ສັ່ງສອນເຖິງພຣະຄຣິດເທົ່ານັ້ນ. ພຣະຜູ້ຊ່ວຍໃຫ້ລອດເອງໄດ້ຟື້ນຟູສາດສະໜາຈັກຂອງພຣະອົງ ເພື່ອຊ່ວຍເຮົາຢູ່ໃນເສັ້ນທາງ ເພື່ອໃຫ້ກາຍເປັນເໝືອນດັ່ງພຣະອົງຫລາຍກວ່າເກົ່າ. ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໄດ້ຖືກຈັດຕັ້ງຂຶ້ນ ເພື່ອໃຫ້ໂອກາດທີ່ຈະຝຶກຝົນພື້ນຖານຂອງການເປັນສານຸສິດ. ຜ່ານທາງການມີສ່ວນຮ່ວມໃນສາດສະໜາຈັກ, ເຮົາຮຽນຮູ້ທີ່ຈະຮັບຮູ້ ແລະ ປະຕິບັດຕາມການກະຕຸ້ນຂອງພຣະວິນຍານສັກສິດ. ເຮົາພັດທະນາຄຸນສົມບັດຂອງການເອື້ອມອອກໄປໃນຄວາມເຫັນອົກເຫັນໃຈ ແລະ ມີຄວາມເມດຕາຕໍ່ຄົນອື່ນ.
ນີ້ຄືຄວາມພະຍາຍາມຕະຫລອດຊີວິດ, ແລະ ມັນຮຽກຮ້ອງການຝຶກຝົນ.
ນັກກິລາທີ່ປະສົບຄວາມສຳເລັດ ໄດ້ໃຊ້ເວລາຢ່າງຫລວງຫລາຍໃນການຝຶກຝົນພື້ນຖານຝ່າຍການກິລາຂອງເຂົາເຈົ້າ. ນາຍແພດ, ນັກເຄືອຂ່າຍ, ນັກວິສະວະກອນນິວເຄຼຍ, ແລະ ແມ່ນແຕ່ຂ້າພະເຈົ້າ ເປັນນັກແຂ່ງຂັນການທຳອາຫານຢູ່ໃນຄົວຂອງ ນາງແຮຮີແອດ ຈະມີຄວາມສາມາດ ແລະ ຊຳນານ ກໍຕໍ່ເມື່ອມີການຝຶກຝົນຢ່າງພາກພຽນໃນວິຊາອາຊີບຂອງຕົນ.
ໃນຖານະເປັນກັບຕັນເຮືອບິນ, ສ່ວນຫລາຍຂ້າພະເຈົ້າໄດ້ຝຶກຝົນນັກບິນ ໂດຍການໃຊ້ຍົນຈຳລອງ—ເປັນເຄື່ອງຈັກທີ່ຊັບຊ້ອນ ຊຶ່ງໃຫ້ປະສົບການຄືກັນກັບການຂັບຍົນຕົວຈິງ. ຍົນຈຳລອງບໍ່ແມ່ນມີໃຫ້ເພື່ອຊ່ວຍນັກບິນຮຽນຮູ້ພື້ນຖານຂອງການຂັບຍົນເທົ່ານັ້ນ; ມັນຍັງໃຫ້ເຂົາເຈົ້າມີປະສົບການ ແລະ ຮັບມືກັບເຫດການທີ່ບໍ່ຄາດຄິດ ທີ່ເຂົາເຈົ້າອາດປະເຊີນ ຕອນຂັບຍົນຕົວຈິງ.
ຫລັກທຳຢ່າງດຽວກັນນີ້ກໍກ່ຽວພັນກັບສານຸສິດຂອງພຣະເຢຊູຄຣິດຄືກັນ.
ການມີພາກສ່ວນຢ່າງແຂງຂັນຢູ່ໃນສາດສະໜາຈັກຂອງພຣະເຢຊູຄຣິດ ແລະ ໃນໂອກາດທີ່ດີເດັ່ນຢ່າງຫລວງຫລາຍ ຈະຊ່ວຍເຮົາໃຫ້ກະກຽມໄດ້ດີກວ່າເກົ່າ ສຳລັບສະຖານະການທີ່ປ່ຽນແປງໃນຊີວິດ, ບໍ່ວ່າຈະເປັນສິ່ງໃດ ຫລື ຮ້າຍແຮງຫລາຍຂະໜາດໃດກໍຕາມ. ໃນຖານະສະມາຊິກຂອງສາດສະໜາຈັກ, ເຮົາຖືກຊຸກຍູ້ໃຫ້ມີພາກສ່ວນໃນພຣະຄຳຂອງພຣະເຈົ້າ ຜ່ານທາງສາດສະດາຂອງພຣະອົງ, ໃນສະໄໝບູຮານ ແລະ ໃນສະໄໝໃໝ່. ຜ່ານທາງການອະທິຖານດ້ວຍຄວາມຈິງໃຈ ແລະ ຖ່ອມຕົວ ຕໍ່ພຣະບິດາເທິງສະຫວັນຂອງເຮົາ, ເຮົາຮຽນຮູ້ທີ່ຈະຮັບຮູ້ສຸລະສຽງຂອງພຣະວິນຍານສັກສິດ. ເຮົາຮັບເອົາການເອີ້ນໃຫ້ຮັບໃຊ້, ສິດສອນ, ວາງແຜນ, ປະຕິບັດສາດສະໜາກິດ, ແລະ ບໍລິຫານ. ໂອກາດເຫລົ່ານີ້ຊ່ວຍເຮົາໃຫ້ເຕີບໂຕໃນວິນຍານ, ຄວາມຄິດ, ແລະ ຄຸນສົມບັດ.
ມັນຈະຊ່ວຍເຮົາກະກຽມທີ່ຈະເຮັດ ແລະ ຮັກສາພັນທະສັນຍາທີ່ສັກສິດ ທີ່ຈະອວຍພອນເຮົາ ໃນຊີວິດນີ້ ແລະ ໃນຊີວິດທີ່ຈະມາເຖິງ.
ຈົ່ງມາຮ່ວມກັບພວກເຮົາ!
ພວກເຮົາຂໍເຊື້ອເຊີນລູກໆຂອງພຣະເຈົ້າທຸກຄົນຕະຫລອດທົ່ວໂລກ ໃຫ້ມາຮ່ວມກັບພວກເຮົາໃນເປົ້າໝາຍອັນຍິ່ງໃຫຍ່ນີ້. ຈົ່ງມາ ແລະ ເບິ່ງເອົາ! ເຖິງແມ່ນໃນລະຫວ່າງທີ່ມີການທ້າທາຍເນື່ອງດ້ວຍພະຍາດໂຄວິດ-19, ຈົ່ງມາພົບກັບພວກເຮົາທາງອອນລາຍ. ພົບກັບຜູ້ສອນສາດສະໜາຂອງພວກເຮົາໄດ້ທາງອອນລາຍ. ຊອກຫາດ້ວຍຕົວເອງວ່າສາດສະໜາຈັກແມ່ນກ່ຽວກັບຫຍັງ! ເມື່ອຊ່ວງໄລຍະທີ່ຫຍຸ້ງຍາກນີ້ຜ່ານພົ້ນໄປ, ໃຫ້ມາພົບກັບພວກເຮົາຢູ່ໃນບ້ານເຮືອນ ແລະ ໃນສະຖານທີ່ນະມັດສະການຂອງພວກເຮົາ!
ພວກເຮົາຂໍເຊື້ອເຊີນທ່ານໃຫ້ມາ ແລະ ຊ່ວຍເຫລືອ! ຈົ່ງມາ ແລະ ຮັບໃຊ້ກັບພວກເຮົາ, ປະຕິບັດສາດສະໜາກິດຕໍ່ລູກໆຂອງພຣະເຈົ້າ, ເດີນຕາມພຣະບາດຂອງພຣະຜູ້ຊ່ວຍໃຫ້ລອດ, ແລະ ເຮັດໃຫ້ໂລກນີ້ເປັນບ່ອນທີ່ດີກວ່າເກົ່າ.
ຈົ່ງມາ ແລະ ເປັນພາກສ່ວນ! ທ່ານຈະເຮັດໃຫ້ພວກເຮົາເຂັ້ມແຂງຂຶ້ນ. ແລະ ທ່ານຈະກາຍເປັນຄົນທີ່ດີກວ່າເກົ່າ, ມີເມດຕາ, ແລະ ມີຄວາມສຸກຫລາຍກວ່າເກົ່າຄືກັນ. ສັດທາຂອງທ່ານຈະເລິກຊຶ້ງ ແລະ ເຕີບໂຕ ແລະ ທົນທານຫລາຍກວ່າເກົ່າ—ມີຄວາມສາມາດຕ້ານທານກັບຄວາມປັ່ນປ່ວນ ແລະ ການທົດລອງທີ່ບໍ່ຄາດຄິດຂອງຊີວິດໄດ້ດີກວ່າເກົ່າ.
ແລະ ເຮົາຈະເລີ່ມຕົ້ນໄດ້ແນວໃດ? ມັນມີຫລາຍວິທີທາງທີ່ເປັນໄປໄດ້.
ພວກເຮົາເຊື້ອເຊີນທ່ານໃຫ້ອ່ານພຣະຄຳພີມໍມອນ. ຖ້າຫາກທ່ານບໍ່ມີຊະນິດເປັນປຶ້ມ, ທ່ານສາມາດອ່ານມັນຢູ່ທີ່ ChurchofJesusChrist.org4 ຫລື ດາວໂຫລດ ແອພ ພຣະຄຳພີມໍມອນ ກໍໄດ້. ພຣະຄຳພີມໍມອນ ເປັນພະຍານອີກຢ່າງໜຶ່ງເຖິງພຣະເຢຊູຄຣິດ ແລະ ຄຽງຄູ່ໄປກັບພຣະຄຳພີເດີມ ແລະ ພຣະຄຳພີໃໝ່. ພວກເຮົາຮັກພຣະຄຳພີທີ່ສັກສິດເຫລົ່ານີ້ທັງໝົດ ແລະ ຮຽນຮູ້ຈາກມັນ.
ພວກເຮົາຂໍເຊື້ອເຊີນທ່ານໃຫ້ໃຊ້ເວລາຢູ່ທີ່ ComeuntoChrist.org ເພື່ອຊອກຫາສິ່ງທີ່ສະມາຊິກຂອງສາດສະໜາຈັກສິດສອນ ແລະ ເຊື່ອຖື.
ໃຫ້ເຊື້ອເຊີນຜູ້ສອນສາດສະໜາຢ້ຽມຢາມກັບທ່ານທາງອອນລາຍ ຫລື ຢູ່ເຮືອນຂອງທ່ານກໍໄດ້ ໃນບ່ອນທີ່ເປັນໄປໄດ້—ເຂົາເຈົ້າມີຂ່າວສານແຫ່ງຄວາມຫວັງ ແລະ ການປິ່ນປົວ. ຜູ້ສອນສາດສະໜາເຫລົ່ານີ້ ເປັນລູກຊາຍ ແລະ ລູກສາວອັນລ້ຳຄ່າຂອງພວກເຮົາ ຜູ້ຮັບໃຊ້ຢູ່ໃນຫລາຍໆບ່ອນຕະຫລອດທົ່ວໂລກ ໂດຍໃຊ້ເວລາ ແລະ ເງິນຄຳຂອງເຂົາເຈົ້າເອງ.
ຢູ່ໃນສາດສະໜາຈັກຂອງພຣະເຢຊູຄຣິດ, ທ່ານຈະພົບເຫັນຄອບຄົວ ແລະ ຜູ້ຄົນທີ່ບໍ່ແຕກຕ່າງຫລາຍຈາກທ່ານ. ທ່ານຈະພົບເຫັນຜູ້ຄົນທີ່ຕ້ອງການຄວາມຊ່ວຍເຫລືອຂອງທ່ານ ແລະ ຜູ້ຢາກຊ່ວຍທ່ານ ຂະນະທີ່ທ່ານພະຍາຍາມກາຍເປັນຄົນດີທີ່ສຸດ—ເປັນຄົນທີ່ພຣະເຈົ້າໄດ້ສ້າງທ່ານເພື່ອໃຫ້ກາຍເປັນ.
ພຣະຜູ້ຊ່ວຍໃຫ້ລອດເອື້ອມອອກຫາທຸກຄົນ
ທ່ານອາດຄິດວ່າ, “ເຮົາເຄີຍເຮັດຄວາມຜິດໃນຊີວິດຂອງເຮົາ. ເຮົາບໍ່ແນ່ໃຈວ່າເຮົາຈະສາມາດຮູ້ສຶກວ່າ ເຮົາເປັນພາກສ່ວນໃນສາດສະໜາຈັກຂອງພຣະເຢຊູຄຣິດໄດ້ຫລືບໍ່. ພຣະເຈົ້າຄົງບໍ່ສົນໃຈກັບຄົນຢ່າງເຮົາດອກ.”
ພຣະເຢຊູຄຣິດ, ເຖິງແມ່ນພຣະອົງເປັນ “ພຣະມະຫາກະສັດເໜືອກະສັດທັງປວງ,”5 ແຕ່ພຣະເມຊີອາ, “ພຣະບຸດຂອງພຣະເຈົ້າທີ່ຊົງພຣະຊົນ,”6 ຫ່ວງໃຍລູກໆທຸກຄົນຂອງພຣະເຈົ້າຫລາຍທີ່ສຸດ. ພຣະອົງຫ່ວງໃຍບໍ່ວ່າຖານະບຸກຄົນຈະເປັນແນວໃດ—ຍາກຈົນ ຫລື ຮັ່ງມີ, ບົກພ່ອງ ຫລື ດີເລີດ. ລະຫວ່າງຊ່ວງມະຕະຂອງພຣະອົງ, ພຣະຜູ້ຊ່ວຍໃຫ້ລອດໄດ້ປະຕິບັດສາດສະໜາກິດຕໍ່ທຸກຄົນ: ຜູ້ມີຄວາມສຸກ ແລະ ປະສົບຄວາມສຳເລັດ, ພັງທະລາຍ ແລະ ຫລົງທາງ, ແລະ ຜູ້ທີ່ປາດສະຈາກຄວາມຫວັງ. ສ່ວນຫລາຍແລ້ວ, ຜູ້ທີ່ພຣະອົງຮັບໃຊ້ ແລະ ປະຕິບັດສາດສະໜາກິດຕໍ່ ບໍ່ໄດ້ເປັນຄົນສຳຄັນ, ງາມເລີດ, ຫລື ຮັ່ງມີ. ສ່ວນຫລາຍແລ້ວ, ຜູ້ຄົນທີ່ພຣະອົງຊ່ວຍເຫລືອ ເປັນຄົນຍາກຈົນທີ່ສຸດ ຊຶ່ງບໍ່ມີຫຍັງຕອບແທນຍົກເວັ້ນແຕ່ຄວາມຮູ້ບຸນຄຸນ, ໃຈທີ່ຖ່ອມ, ແລະ ຄວາມປາດຖະໜາທີ່ຈະມີສັດທາເທົ່ານັ້ນ.
ຖ້າຫາກພຣະເຢຊູໄດ້ໃຊ້ຊ່ວງມະຕະຂອງພຣະອົງໃນການປະຕິບັດສາດສະໜາກິດຕໍ່ “ຜູ້ທີ່ຕ່ຳຕ້ອຍທີ່ສຸດ,”7 ແລ້ວພຣະອົງຈະບໍ່ຮັກເຂົາເຈົ້າໃນທຸກວັນນີ້ບໍ? ຢູ່ໃນສາດສະໜາຈັກຂອງພຣະອົງ ມີບ່ອນໃຫ້ລູກໆທຸກຄົນຂອງພຣະເຈົ້າຢູ່ບໍ? ແມ່ນແຕ່ສຳລັບຜູ້ທີ່ຮູ້ສຶກບໍ່ມີຄ່າຄວນ, ຖືກລືມໄລ, ຫລື ໂດດດ່ຽວ ກໍມີຢູ່ບໍ?
ມັນບໍ່ມີລະດັບຂອງຄວາມດີພ້ອມ ທີ່ທ່ານຈະຕ້ອງບັນລຸ ກ່ອນຈະເໝາະສົມສຳລັບພຣະຄຸນຂອງພຣະເຈົ້າ. ຄຳອະທິຖານຂອງທ່ານບໍ່ຈຳເປັນຕ້ອງອອກສຽງ ຫລື ມີໂວຫານ ຫລື ສົມບູນແບບທຸກຢ່າງ ກ່ອນຈະຂຶ້ນເຖິງສະຫວັນໄດ້.
ໃນຄວາມຈິງແລ້ວ, ພຣະເຈົ້າບໍ່ຫລິ້ນພັກຫລິ້ນພວກ8—ສິ່ງຂອງໃນໂລກທີ່ຜູ້ຄົນຖືວ່າສຳຄັນ ບໍ່ມີປະໂຫຍດຕໍ່ພຣະອົງເລີຍ. ພຣະອົງຮູ້ຈັກໃຈທ່ານ, ແລະ ພຣະອົງຮັກທ່ານ ບໍ່ວ່າທ່ານມີຕຳແໜ່ງໃດ, ມີຊັບສິນໜ້ອຍຫລາຍປານໃດ, ຫລື ມີເພື່ອນຕິດຕາມຢູ່ ອິນສະຕາແກຼມ ໜ້ອຍຫລາຍປານໃດກໍຕາມ.
ເມື່ອເຮົາໂນ້ມອຽງໃຈຂອງເຮົາໄປຫາພຣະບິດາເທິງສະຫວັນຂອງເຮົາ ແລະ ເຂົ້າໃກ້ພຣະອົງ, ແລ້ວເຮົາຈະຮູ້ສຶກວ່າພຣະອົງຢູ່ໃກ້ເຮົາ.9
ເຮົາເປັນລູກທີ່ຮັກຂອງພຣະອົງ.
ແມ່ນແຕ່ຜູ້ທີ່ປະຕິເສດພຣະອົງ.
ແມ່ນແຕ່ຜູ້ທີ່ຫົວແຂງ, ດື້ດ້ານ, ໃຈຮ້າຍໃຫ້ພຣະເຈົ້າ ແລະ ສາດສະໜາຈັກຂອງພຣະອົງ, ໄດ້ຫອບກະເປົາ, ແລ້ວເດີນອອກຈາກເຮືອນ ປະກາດວ່າເຂົາຊິໜີ ແລະ ບໍ່ກັບຄືນມາອີກ.
ເມື່ອລູກໜີອອກຈາກເຮືອນ, ເຂົາອາດບໍ່ສັງເກດເຫັນຄວາມເປັນຫ່ວງຂອງພໍ່ແມ່ ທີ່ແນມເບິ່ງເຂົາຈາກປ່ອງຢ້ຽມ. ດ້ວຍໃຈທີ່ອ່ອນໂຍນ, ເຂົາເຈົ້າໄດ້ຫລຽວເບິ່ງລູກຊາຍ ຫລື ລູກສາວເດີນໜີ—ຫວັງວ່າລູກທີ່ລ້ຳຄ່າຂອງເຂົາເຈົ້າຈະຮຽນຮູ້ບາງສິ່ງຈາກປະສົບການທີ່ເຈັບປວດໃຈນີ້ ແລະ ບາງທີເຫັນຊີວິດດ້ວຍຕາໜ່ວຍໃໝ່—ແລະ ໃນທີ່ສຸດກັບຄືນບ້ານ.
ພຣະບິດາເທິງສະຫວັນກໍເປັນແນວນັ້ນຄືກັນ. ພຣະອົງຄອຍຖ້າໃຫ້ເຮົາກັບຄືນ.
ພຣະຜູ້ຊ່ວຍໃຫ້ລອດຂອງທ່ານ, ດ້ວຍພຣະກັນແສງແຫ່ງຄວາມຮັກ ແລະ ຄວາມເຫັນອົກເຫັນໃຈ, ພຣະອົງໄດ້ລໍຖ້າການກັບຄືນຂອງທ່ານຢູ່. ແມ່ນແຕ່ເວລາທີ່ທ່ານຮູ້ສຶກຢູ່ຫ່າງໄກຈາກພຣະເຈົ້າ, ພຣະອົງຈະເຫັນທ່ານ; ພຣະອົງຈະມີຄວາມເຫັນອົກເຫັນໃຈທ່ານ ແລະ ແລ່ນມາໂອບກອດທ່ານ.10
ຈົ່ງມາ ແລະ ເປັນພາກສ່ວນ.
ພຣະເຈົ້າອະນຸຍາດໃຫ້ເຮົາຮຽນຮູ້ຈາກຄວາມຜິດພາດຂອງເຮົາ
ເຮົາເປັນນັກທັດສະນະຈອນຢູ່ໃນເສັ້ນທາງແຫ່ງຄວາມເປັນມະຕະ ໃນການຊອກຫາຄວາມໝາຍ ແລະ ຄວາມຈິງສູງສຸດ. ສ່ວນຫລາຍແລ້ວ, ສິ່ງທີ່ເຮົາສາມາດຫລຽວເຫັນແມ່ນເສັ້ນທາງທີ່ຊື່ຕົງ ຢູ່ຕໍ່ໜ້າເຮົາ—ເຮົາບໍ່ສາມາດຫລຽວເຫັນບ່ອນຄົດລ້ຽວ ຢູ່ໃນເສັ້ນທາງ. ພຣະບິດາເທິງສະຫວັນທີ່ຊົງຮັກຂອງເຮົາ ບໍ່ໄດ້ມອບຄຳຕອບໃຫ້ເຮົາໃນທຸກຢ່າງ. ພຣະອົງຄາດໝາຍໃຫ້ເຮົາຄິດອອກເອົາເອງ. ພຣະອົງຄາດໝາຍໃຫ້ເຮົາເຊື່ອ—ເຖິງແມ່ນເຮັດໄດ້ຍາກ.
ພຣະອົງຄາດໝາຍໃຫ້ເຮົາມີຄວາມກ້າຫານທີ່ຈະແກ້ໄຂບັນຫາ—ໃຊ້ຄວາມພະຍາຍາມ—ແລະ ກ້າວເດີນຕໍ່ໄປ.
ນັ້ນຄືວິທີທີ່ເຮົາຮຽນຮູ້ ແລະ ເຕີບໂຕ.
ທ່ານຢາກໃຫ້ຄົນອື່ນບອກທ່ານໃນທຸກເລື່ອງບໍ? ທ່ານຢາກໄດ້ຮັບຄຳຕອບສຳລັບຄຳຖາມທຸກຂໍ້ບໍ? ທ່ານຢາກໃຫ້ມີຄົນປູທາງໃຫ້ທ່ານຍ່າງທຸກບ່ອນບໍ?
ຂ້າພະເຈົ້າເຊື່ອວ່າພວກເຮົາສ່ວນຫລາຍຈະເບື່ອໄວ ກັບການໃຫ້ຫົວໜ້າຄວບຄຸມໃນທຸກຢ່າງ. ເຮົາຮຽນຮູ້ບົດຮຽນທີ່ສຳຄັນຂອງຊີວິດ ຜ່ານທາງປະສົບການ. ຜ່ານທາງການຮຽນຮູ້ຈາກຄວາມຜິດພາດຂອງເຮົາ. ຜ່ານທາງການກັບໃຈ ແລະ ການຍອມຮັບດ້ວຍຕົວເອງວ່າ “ຄວາມຊົ່ວຮ້າຍບໍ່ເຄີຍເປັນຄວາມສຸກເລີຍ.”11
ພຣະເຢຊູຄຣິດ, ພຣະບຸດຂອງພຣະເຈົ້າ, ໄດ້ສິ້ນພຣະຊົນເພື່ອວ່າຄວາມຜິດບາບຂອງເຮົາຈະບໍ່ກ່າວໂທດເຮົາ ແລະ ສະກັດກັ້ນຄວາມກ້າວໜ້າຂອງເຮົາຕະຫລອດໄປ. ເພາະພຣະອົງ, ເຮົາສາມາດກັບໃຈ, ແລະ ຄວາມຜິດພາດຂອງເຮົາສາມາດກາຍເປັນຂັ້ນຕອນທີ່ພາເຮົາໄປເຖິງຄວາມສະຫງ່າລາສີທີ່ຍິ່ງໃຫຍ່ກວ່າ.
ທ່ານບໍ່ຕ້ອງເດີນໄປໃນເສັ້ນທາງນີ້ດ້ວຍຕົວຄົນດຽວ. ພຣະບິດາເທິງສະຫວັນຂອງເຮົາບໍ່ໄດ້ປ່ອຍເຮົາໃຫ້ເດີນຊັດເຊໄປໃນຄວາມມືດ.
ນີ້ຄືເຫດຜົນ, ໃນລະດູໃບໄມ້ປົ່ງຂອງປີ 1820, ພຣະອົງ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ມາປະກົດຕໍ່ຊາຍໜຸ່ມ ໂຈເຊັບ ສະມິດ.
ໃຫ້ເຮົາຄິດກ່ຽວກັບເລື່ອງນີ້ຈັກບຶດໜຶ່ງ! ພຣະເຈົ້າແຫ່ງຈັກກະວານໄດ້ມາປະກົດຕໍ່ມະນຸດ!
ນີ້ແມ່ນໜຶ່ງໃນຫລາຍໆໂອກາດທີ່ໂຈເຊັບ ໄດ້ພົບຢູ່ກັບພຣະເຈົ້າ ແລະ ບຸກຄົນອື່ນໆຈາກສະຫວັນ. ສິ່ງທີ່ບຸກຄົນຈາກສະຫວັນໄດ້ກ່າວກັບເພິ່ນ ໄດ້ຖືກບັນທຶກໄວ້ຢູ່ໃນພຣະຄຳພີຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ທ່ານສາມາດເຂົ້າເຖິງໄດ້ແບບງ່າຍໆ. ໃຜໆກໍສາມາດອ່ານໄດ້ ແລະ ຮຽນຮູ້ຂ່າວສານດ້ວຍຕົວເອງ ໃນສິ່ງທີ່ພຣະເຈົ້າມອບໃຫ້ເຮົາ ໃນວັນເວລາຂອງເຮົາ.
ພວກເຮົາເຊື້ອເຊີນທ່ານໃຫ້ສຶກສາມັນດ້ວຍຕົວເອງ.
ໂຈເຊັບ ສະມິດ ໄດ້ຮັບການເປີດເຜີຍເຫລົ່ານີ້ຕອນເພິ່ນຍັງໜຸ່ມ. ເພິ່ນໄດ້ຮັບການເປີດເຜີຍສ່ວນຫລາຍກ່ອນເພິ່ນມີອາຍຸໄດ້ 30 ປີ.12 ເພິ່ນຂາດປະສົບການ, ແລະ ບາງຄົນ, ເວົ້າວ່າເພິ່ນບໍ່ເໝາະສົມທີ່ຈະເປັນສາດສະດາຂອງພຣະຜູ້ເປັນເຈົ້າ.
ແຕ່ພຣະອົງກໍໄດ້ເອີ້ນເພິ່ນຢູ່ດີ—ຕາມແບບແຜນທີ່ເຮົາພົບເຫັນຕະຫລອດທົ່ວພຣະຄຳພີທີ່ສັກສິດ.
ພຣະເຈົ້າບໍ່ໄດ້ລໍຖ້າໃຫ້ພົບເຫັນຄົນທີ່ດີພ້ອມທຸກຢ່າງ ກ່ອນຈະຟື້ນຟູພຣະກິດຕິຄຸນຂອງພຣະອົງ.
ຖ້າຫາກເປັນແນວນັ້ນ, ພຣະອົງຍັງຄົງລໍຖ້າຢູ່.
ໂຈເຊັບຄືກັນກັບທ່ານ ແລະ ຂ້າພະເຈົ້າ. ເຖິງແມ່ນໂຈເຊັບເຮັດຄວາມຜິດ, ແຕ່ພຣະເຈົ້າກໍໄດ້ໃຊ້ເພິ່ນໃຫ້ບັນລຸຈຸດປະສົງອັນຍິ່ງໃຫຍ່ຂອງພຣະອົງ.
ປະທານທອມມັສ ແອັສ ມອນສັນ ມັກກ່າວເນັ້ນຄຳແນະນຳຂໍ້ນີ້: “ພຣະຜູ້ເປັນເຈົ້າຈະຮັບຮອງຜູ້ທີ່ພຣະອົງເອີ້ນ.”13
ອັກຄະສາວົກໂປໂລ ໄດ້ໃຫ້ເຫດຜົນຕໍ່ໄພ່ພົນຢູ່ໃນເມືອງໂກຣິນໂທວ່າ: “ພີ່ນ້ອງທັງຫລາຍເອີຍ, ຈົ່ງພິຈາລະນາເບິ່ງວ່າ ພວກເຈົ້າທີ່ພຣະເຈົ້າໄດ້ເອີ້ນມານັ້ນ ເປັນຄົນຢ່າງໃດ, ຄືຄົນທີ່ມະນຸດຖືວ່າສະຫລາດກໍມີໜ້ອຍຄົນ, ຄົນທີ່ມີອຳນາດກໍມີໜ້ອຍຄົນ, ຄົນທີ່ມີຖານະສູງກໍມີໜ້ອຍຄົນ.”14
ພຣະເຈົ້າໃຊ້ຄົນອ່ອນແອ ແລະ ລຽບງ່າຍ ເພື່ອນຳຈຸດປະສົງຂອງພຣະອົງອອກມາ. ຄວາມຈິງນີ້ຕັ້ງຢູ່ເປັນພະຍານວ່າ ມັນແມ່ນອຳນາດຂອງພຣະເຈົ້າ, ບໍ່ແມ່ນຂອງມະນຸດ, ທີ່ບັນລຸວຽກງານຂອງພຣະອົງ ຢູ່ເທິງແຜ່ນດິນໂລກ.15
ຈົ່ງຟັງພຣະອົງ, ຕິດຕາມພຣະອົງ
ເມື່ອພຣະເຈົ້າປະກົດຕໍ່ໂຈເຊັບ ສະມິດ, ພຣະອົງໄດ້ແນະນຳພຣະບຸດຂອງພຣະອົງ, ພຣະເຢຊູຄຣິດ, ແລະ ກ່າວວ່າ, “ຈົ່ງຟັງທ່ານ!”16
ໂຈເຊັບໄດ້ໃຊ້ຕະຫລອດຊີວິດຂອງເພິ່ນ ໃນການຮັບຟັງ ແລະ ຕິດຕາມພຣະອົງ.
ຄືກັນກັບໂຈເຊັບ, ການເປັນສານຸສິດຂອງເຮົາເລີ່ມຕົ້ນດ້ວຍການຕັດສິນໃຈຂອງເຮົາ ທີ່ຈະຮັບຟັງ ແລະ ຕິດຕາມພຣະຜູ້ຊ່ວຍໃຫ້ລອດ ພຣະເຢຊູຄຣິດ.
ຖ້າຫາກທ່ານປາດຖະໜາທີ່ຈະຕິດຕາມພຣະອົງ, ໃຫ້ຮວບຮວມສັດທາຂອງທ່ານເອງ ແລະ ຍົກເອົາໄມ້ກາງແຂນຂອງພຣະອົງແບກໄປ.
ທ່ານຈະພົບວ່າ ທ່ານ ກໍ ເປັນພາກສ່ວນໃນສາດສະໜາຈັກຂອງພຣະອົງ—ອົບອຸ່ນ ແລະ ຖືກຮັບຕ້ອນ ໃນບ່ອນທີ່ທ່ານສາມາດເຂົ້າຮ່ວມເພື່ອສະແຫວງການເປັນສານຸສິດ ແລະ ການມີຄວາມສຸກ ອັນຍິ່ງໃຫຍ່.
ມັນເປັນຄວາມຫວັງຂອງຂ້າພະເຈົ້າ, ໃນວັນຄົບຮອບສອງຮ້ອຍປີຂອງພາບທີ່ມາໃຫ້ເຫັນຄັ້ງທຳອິດ, ເມື່ອເຮົາໄຕ່ຕອງ ແລະ ຮຽນຮູ້ກ່ຽວກັບການຟື້ນຟູຂອງສາດສະໜາຈັກຂອງພຣະເຢຊູຄຣິດ, ເຮົາຈະຮັບຮູ້ວ່າ ມັນບໍ່ໄດ້ເປັນພຽງເຫດການແຫ່ງປະຫວັດສາດເທົ່ານັ້ນ. ທ່ານ ແລະ ຂ້າພະເຈົ້າມີບົດບາດທີ່ສຳຄັນໃນເລື່ອງລາວທີ່ຍິ່ງໃຫຍ່ອັນຕໍ່ເນື່ອງນີ້.
ແລ້ວ, ແມ່ນຫຍັງຄືພາກສ່ວນຂອງທ່ານ ແລະ ຂ້າພະເຈົ້າ?
ມັນເປັນການຮຽນຮູ້ກ່ຽວກັບພຣະເຢຊູຄຣິດ. ເປັນການຮຽນຮູ້ພຣະຄຳຂອງພຣະອົງ. ເປັນການຮັບຟັງ ແລະ ຕິດຕາມພຣະອົງໂດຍການມີພາກສ່ວນຢ່າງແຂງຂັນໃນວຽກງານອັນຍິ່ງໃຫຍ່ນີ້. ຂ້າພະເຈົ້າເຊື້ອເຊີນທ່ານໃຫ້ມາ ແລະ ເປັນພາກສ່ວນ!
ທ່ານບໍ່ຈຳເປັນຕ້ອງດີພ້ອມທຸກຢ່າງ. ຂໍໃຫ້ພຽງແຕ່ມີຄວາມປາດຖະໜາທີ່ຈະພັດທະນາສັດທາຂອງທ່ານ ແລະ ຢາກເຂົ້າໃກ້ພຣະອົງຫລາຍກວ່າເກົ່າໃນແຕ່ລະວັນກໍພໍແລ້ວ.
ພາກສ່ວນຂອງເຮົາແມ່ນ ໃຫ້ຮັກ ແລະ ຮັບໃຊ້ພຣະເຈົ້າ ແລະ ໃຫ້ຮັກ ແລະ ຮັບໃຊ້ລູກໆຂອງພຣະອົງ.
ເມື່ອທ່ານເຮັດແນວນີ້, ພຣະເຈົ້າຈະປະທານຄວາມຮັກ, ຄວາມສຸກ, ແລະ ການຊີ້ນຳທີ່ແນ່ນອນແກ່ທ່ານຕະຫລອດຊີວິດ, ແມ່ນແຕ່ໃນສະຖານະການທີ່ຮ້າຍແຮງທີ່ສຸດ, ແລະ ແມ່ນແຕ່ຫລາຍກວ່ານັ້ນ.
ຂ້າພະເຈົ້າເປັນພະຍານເຖິງສິ່ງນີ້ ແລະ ອວຍພອນທ່ານ ໃນຄວາມຮູ້ບຸນຄຸນ ແລະ ດ້ວຍຄວາມຮັກ ທີ່ມີໃຫ້ແກ່ທ່ານແຕ່ລະຄົນ, ໃນພຣະນາມອັນສັກສິດຂອງພຣະຜູ້ຊ່ວຍໃຫ້ລອດຂອງເຮົາ, ພຣະອາຈານຂອງເຮົາ—ໃນພຣະນາມຂອງພຣະເຢຊູຄຣິດ, ອາແມນ