ຂໍໃຫ້ພຣະເຈົ້າໄຊຊະນະ
ທ່ານເຕັມໃຈທີ່ຈະໃຫ້ພຣະເຈົ້າໄຊຊະນະໃນຊີວິດຂອງທ່ານບໍ່? ທ່ານເຕັມໃຈທີ່ຈະໃຫ້ພຣະເຈົ້າເປັນອິດທິພົນທີ່ສຳຄັນທີ່ສຸດໃນຊີວິດຂອງທ່ານບໍ່?
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຮູ້ບຸນຄຸນຫລາຍສຳລັບຂ່າວສານທີ່ດີເລີດຂອງກອງປະຊຸມໃຫຍ່ນີ້ ແລະ ສຳລັບສິດທິພິເສດຂອງຂ້າພະເຈົ້າທີ່ຈະກ່າວກັບທ່ານໃນເວລານີ້.
ເປັນເວລາຫລາຍກວ່າ 36 ປີ ທີ່ຂ້າພະເຈົ້າໄດ້ເປັນອັກຄະສາວົກ, ຄຳສອນຂອງການເຕົ້າໂຮມອິດສະຣາເອນເປັນເລື່ອງທີ່ຂ້າພະເຈົ້າສົນໃຈຫລາຍ.1 ທຸກສິ່ງ ກ່ຽວກັບມັນແມ່ນໜ້າຕື່ນເຕັ້ນສຳລັບຂ້າພະເຈົ້າ, ລວມທັງການປະຕິບັດສາດສະໜາກິດ ແລະ ຊື່2 ຂອງອັບຣາຮາມ, ອີຊາກ, ແລະ ຢາໂຄບ; ຊີວິດ ແລະ ພັນລະຍາຂອງພວກເພິ່ນ; ພັນທະສັນຍາທີ່ພຣະເຈົ້າໄດ້ເຮັດໄວ້ກັບພວກເພິ່ນ ແລະ ຄວາມຂະຫຍາຍຕົວຜ່ານທາງເຊື້ອສາຍຂອງພວກເພິ່ນ;3 ຄົນສິບສອງເຜົ່າທີ່ກະຈັດກະຈາຍຢູ່; ແລະ ການທຳນາຍຫລາຍໆຢ່າງກ່ຽວກັບການເຕົ້າໂຮມໃນວັນເວລາຂອງເຮົາ.
ຂ້າພະເຈົ້າໄດ້ສຶກສາກ່ຽວກັບການເຕົ້າໂຮມ, ໄດ້ອະທິຖານກ່ຽວກັບມັນ, ໄດ້ຊື່ນຊົນກັບຂໍ້ພຣະຄຳພີທຸກຂໍ້ກ່ຽວກັບມັນ, ແລະ ໄດ້ທູນຂໍໃຫ້ພຣະຜູ້ເປັນເຈົ້າຊ່ວຍຂ້າພະເຈົ້າໃຫ້ເຂົ້າໃຈຫລາຍຂຶ້ນ.
ສະນັ້ນ ຂ້າພະເຈົ້າຈຶ່ງປິຕິຍິນດີຫລາຍ ເມື່ອຂ້າພະເຈົ້າໄດ້ຮັບຄວາມຮູ້ໃໝ່ເມື່ອບໍ່ດົນມານີ້. ດ້ວຍຄວາມຊ່ວຍເຫລືອຂອງນັກປາດອາຈານຝ່າຍພາສາເຮັບເຣີສອງທ່ານ, ຂ້າພະເຈົ້າໄດ້ຮຽນຮູ້ວ່າ ຄວາມໝາຍໜຶ່ງຂອງຄຳວ່າ ອິດສະຣາເອນ ໃນພາສາເຮັບເຣີແມ່ນ “ຂໍໃຫ້ພຣະເຈົ້າໄຊຊະນະ.”4 ດັ່ງນັ້ນ ຊື່ ອິດສະຣາເອນ ອ້າງເຖິງບຸກຄົນ ຜູ້ທີ່ ເຕັມໃຈ ໃຫ້ພຣະເຈົ້າໄຊຊະນະໃນຊີວິດຂອງຕົນ. ແນວຄິດນີ້ໄດ້ດົນໃຈຂ້າພະເຈົ້າຫລາຍທີ່ສຸດ!
ຄຳວ່າ ເຕັມໃຈ ແມ່ນສຳຄັນຕໍ່ການແປຄວາມໝາຍຂອງຄຳວ່າ ອິດສະຣາເອນ.5 ເຮົາທຸກຄົນໄດ້ຮັບອຳເພີໃຈ. ເຮົາສາມາດເລືອກທີ່ຈະເຂົ້າ ຫລື ບໍ່ເຂົ້າຮ່ວມອິດສະຣາເອນ. ເຮົາສາມາດເລືອກທີ່ຈະຂໍ ຫລື ບໍ່ຂໍໃຫ້ພຣະເຈົ້າໄຊຊະນະໃນຊີວິດຂອງເຮົາ. ເຮົາສາມາດເລືອກທີ່ຈະປ່ອຍ ຫລື ບໍ່ປ່ອຍໃຫ້ພຣະເຈົ້າມີອິດທິພົນອັນແຮງກ້າທີ່ສຸດໃນຊີວິດຂອງເຮົາ.
ໃຫ້ເຮົາໃຊ້ເວລາຈັກບຶດໜຶ່ງ, ເພື່ອຄິດກ່ຽວກັບຈຸດສຳຄັນໃນຊີວິດຂອງຢາໂຄບ, ຫລານຊາຍຂອງອັບຣາຮາມ. ໃນບ່ອນທີ່ຢາໂຄບເອີ້ນວ່າ Peniel [ເປນີເອນ] (ຊຶ່ງໝາຍຄວາມວ່າ “ພຣະພັກຂອງພຣະເຈົ້າ”),6 ຢາໂຄບໄດ້ຕໍ່ສູ້ກັບການທ້າທາຍທີ່ໜັກໜ່ວງ. ອຳເພີໃຈຂອງເພິ່ນໄດ້ຖືກທົດສອບ. ຜ່ານການຕໍ່ສູ້ນີ້, ຢາໂຄບໄດ້ພິສູດສິ່ງທີ່ສຳຄັນທີ່ສຸດຕໍ່ເພິ່ນ. ເພິ່ນໄດ້ສະແດງໃຫ້ເຫັນວ່າ ເພິ່ນເຕັມໃຈທີ່ຈະປ່ອຍໃຫ້ພຣະເຈົ້າໄຊຊະນະໃນຊີວິດຂອງເພິ່ນ. ໃນການຕອບຮັບ, ພຣະເຈົ້າໄດ້ປ່ຽນຊື່ຂອງຢາໂຄບເປັນ ອິດສະຣາເອນ,7 ໝາຍຄວາມວ່າ “ຂໍໃຫ້ພຣະເຈົ້າໄຊຊະນະ.” ແລ້ວພຣະເຈົ້າໄດ້ສັນຍາກັບອິດສະຣາເອນວ່າພອນ ທັງໝົດ ທີ່ໄດ້ຖືກປະກາດໃສ່ເທິງຫົວຂອງອັບຣາຮາມ ຈະເປັນຂອງເພິ່ນ.8
ໜ້າເສຍໃຈທີ່ລູກຫລານຂອງອິດສະຣາເອນບໍ່ໄດ້ຮັກສາພັນທະສັນຍາຂອງພວກເຂົານຳພຣະເຈົ້າ. ພວກເຂົາໄດ້ແກວ່ງກ້ອນຫີນໃສ່ບັນດາສາດສະດາ ແລະ ບໍ່ ເຕັມໃຈທີ່ຈະໃຫ້ພຣະເຈົ້າໄຊຊະນະໃນຊີວິດຂອງພວກເຂົາ. ຜົນທີ່ຕາມມາກໍຄື, ພຣະເຈົ້າໄດ້ກະຈັດກະຈາຍພວກເຂົາໄປທຸກຊອກທຸກມຸມຂອງແຜ່ນດິນໂລກ.9 ດ້ວຍຄວາມເມດຕາ, ຕໍ່ມາພຣະອົງໄດ້ສັນຍາວ່າຈະເຕົ້າໂຮມພວກເຂົາ, ດັ່ງທີ່ໄດ້ລາຍງານໂດຍເອຊາຢາ ທີ່ວ່າ: “ເຮົາໄດ້ປະ [ອິດສະຣາເອນ] ພຽງແຕ່ຊົ່ວຄາວ; ເຮົາຈະເອົາເຈົ້າຄືນດ້ວຍຄວາມຮັກອັນສຸດຫົວໃຈ.”10
ເມື່ອເຮົາເກັບຄວາມໝາຍຂອງຄຳວ່າ ອິດສະຣາເອນ ໃນພາສາເຮັບເຣີ ໄວ້ຢູ່ໃນໃຈ, ເຮົາຈະພົບເຫັນວ່າ ການເຕົ້າໂຮມອິດສະຣາເອນມີຄວາມໝາຍຫລາຍຂຶ້ນ. ພຣະຜູ້ເປັນເຈົ້າກຳລັງເຕົ້າໂຮມຜູ້ທີ່ເຕັມໃຈຈະໃຫ້ພຣະເຈົ້າໄຊຊະນະໃນຊີວິດຂອງຕົນ. ພຣະຜູ້ເປັນເຈົ້າກຳລັງເຕົ້າໂຮມຜູ້ທີ່ເຕັມໃຈຈະເລືອກໃຫ້ພຣະເຈົ້າເປັນອິດທິພົນທີ່ສຳຄັນທີ່ສຸດໃນຊີວິດຂອງເຂົາເຈົ້າ.
ເປັນເວລາຫລາຍສັດຕະວັດ, ບັນດາສາດສະດາໄດ້ບອກລ່ວງໜ້າເຖິງການເຕົ້າໂຮມນີ້,11 ແລະ ມັນກໍກຳລັງເກີດຂຶ້ນໃນເວລານີ້! ເພາະມັນເປັນສິ່ງທີ່ຈຳເປັນຕໍ່ການສະເດັດມາຄັ້ງທີສອງຂອງພຣະຜູ້ເປັນເຈົ້າ, ມັນຈຶ່ງເປັນວຽກງານທີ່ສຳຄັນ ທີ່ສຸດ ຢູ່ໃນໂລກນີ້!
ການເຕົ້າໂຮມນີ້ ກ່ອນໄລຍະໜຶ່ງພັນປີ ເປັນການຂະຫຍາຍສັດທາ ແລະ ຄວາມກ້າຫານຢ່າງວິລະຊົນທາງວິນຍານສ່ວນຕົວສຳລັບຫລາຍລ້ານຄົນ. ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ຫລື “ອິດສະຣາເອນແຫ່ງພັນທະສັນຍາໃນຍຸກສຸດທ້າຍ,”12 ເຮົາໄດ້ຖືກມອບໝາຍໃຫ້ຊ່ວຍເຫລືອພຣະຜູ້ເປັນເຈົ້າກັບວຽກງານທີ່ສຳຄັນນີ້.13
ເມື່ອເຮົາກ່າວເຖິງການເຕົ້າໂຮມອິດສະຣາເອນຢູ່ທັງສອງຟາກມ່ານ, ແນ່ນອນເຮົາໝາຍເຖິງວຽກງານເຜີຍແຜ່, ວຽກງານພຣະວິຫານ, ແລະ ວຽກງານປະຫວັດຄອບຄົວ. ເຮົາກໍໝາຍເຖິງການສ້າງສັດທາ ແລະ ປະຈັກພະຍານໃນໃຈຂອງຜູ້ທີ່ເຮົາຮັກ, ແລະ ຮັບໃຊ້ນຳອີກ. ທຸກເທື່ອທີ່ເຮົາເຮັດບາງສິ່ງທີ່ຊ່ວຍບາງຄົນ—ຢູ່ທັງສອງຟາກມ່ານ—ເພື່ອເຮັດ ແລະ ຮັກສາພັນທະສັນຍາກັບພຣະເຈົ້າ, ເຮົາໄດ້ຊ່ວຍເຕົ້າໂຮມອິດສະຣາເອນ.
ເມື່ອບໍ່ດົນມານີ້, ພັນລະຍາຂອງຫລານຊາຍຄົນໜຶ່ງຂອງພວກເຮົາ ໄດ້ດີ້ນລົນທາງວິນຍານ. ຂ້າພະເຈົ້າຈະເອີ້ນນາງວ່າ “ຈຽວ.” ເຖິງແມ່ນໄດ້ຖືສິນອົດເຂົ້າ, ໄດ້ອະທິຖານ, ແລະ ໄດ້ຮັບພອນຂອງຖານະປະໂລຫິດແລ້ວ, ແຕ່ອາການຂອງພໍ່ນາງຈຽວ ກໍບໍ່ດີຂຶ້ນເລີຍ. ນາງຢ້ານວ່ານາງຈະສູນເສຍພໍ່ ແລະ ປະຈັກພະຍານຂອງນາງໄປ.
ໃນຄ່ຳຄືນໜຶ່ງ, ເວັນດີ ແນວສັນ ພັນລະຍາຂອງຂ້າພະເຈົ້າ, ໄດ້ເລົ່າສະຖານະການຂອງນາງຈຽວໃຫ້ຂ້າພະເຈົ້າຟັງ. ເຊົ້າມື້ຕໍ່ມາ ເວັນດີໄດ້ຮັບຄວາມປະທັບໃຈໃຫ້ບອກນາງຈຽວເຖິງສິ່ງທີ່ຂ້າພະເຈົ້າເວົ້າກ່ຽວກັບການຕໍ່ສູ້ທາງວິນຍານຂອງນາງ ໃນຄຳດຽວ! ຄຳນັ້ນຄື ສາຍຕາສັ້ນ.
ຕໍ່ມານາງຈຽວໄດ້ບອກເວັນດີວ່າ ໃນຕອນຕົ້ນນາງກໍບໍ່ສະບາຍໃຈກັບຄຳເວົ້າຂອງຂ້າພະເຈົ້າ. ນາງເວົ້າວ່າ, “ຂ້ານ້ອຍຫວັງວ່າພໍ່ຕູ້ປູ່ຊິສັນຍາວ່າ ການມະຫັດສະຈັນຈະເກີດຂຶ້ນກັບພໍ່ຂອງຂ້ານ້ອຍ. ຂ້ານ້ອຍບໍ່ເຂົ້າໃຈວ່າເປັນຫຍັງເພິ່ນຈຶ່ງເວົ້າອອກມາວ່າ ສາຍຕາສັ້ນ.”
ຫລັງຈາກພໍ່ຂອງນາງຈຽວໄດ້ເສຍຊີວິດ, ຄຳວ່າ ສາຍຕາສັ້ນ ໄດ້ວົນວຽນຢູ່ໃນຈິດໃຈຂອງນາງ. ນາງໄດ້ເປີດຫົວໃຈ ເພື່ອໃຫ້ຕົວເອງເຂົ້າໃຈຫລາຍຕື່ມອີກ ແລະ ຮູ້ວ່າ ສາຍຕາສັ້ນ ໝາຍຄວາມວ່າ “ຫລຽວບໍ່ເຫັນໄກ.” ແລ້ວຄວາມຄິດຂອງນາງໄດ້ປ່ຽນໄປ. ແລ້ວນາງຈຽວໄດ້ເວົ້າວ່າ, “ສາຍຕາສັ້ນ ເຮັດໃຫ້ຂ້ານ້ອຍຢຸດ, ເຮັດໃຫ້ຄິດ, ແລະ ຫາຍດີ. ບັດນີ້ຄຳນັ້ນເຮັດໃຫ້ຂ້ານ້ອຍສະຫງົບ. ມັນເຕືອນຂ້ານ້ອຍໃຫ້ຂະຫຍາຍທັດສະນະ ແລະ ສະແຫວງຫານິລັນດອນ. ມັນເຕືອນຂ້ານ້ອຍວ່າ ມັນເປັນແຜນແຫ່ງສະຫວັນ ແລະ ວ່າພໍ່ຂອງຂ້ານ້ອຍຍັງມີຊີວິດຢູ່ ແລະ ຮັກ ແລະ ຄອຍດູແລຂ້ານ້ອຍ. ສາຍຕາສັ້ນ ໄດ້ພາຂ້ານ້ອຍມາຫາພຣະເຈົ້າ.”
ຂ້າພະເຈົ້າພູມໃຈໃນຕົວຂອງຫລານສະໄພ້ທີ່ດີເລີດຂອງພວກເຮົາ. ໃນຊ່ວງເວລາທີ່ເຈັບປວດໃຈ ໃນຊີວິດຂອງນາງ, ນາງຈຽວທີ່ໜ້າຮັກໄດ້ຮັບເອົາພຣະປະສົງຂອງພຣະເຈົ້າກ່ຽວກັບພໍ່ຂອງນາງ, ດ້ວຍທັດສະນະນິລັນດອນກ່ຽວກັບຊີວິດຂອງນາງເອງ. ໂດຍ ການເລືອກ ໃຫ້ພຣະເຈົ້າໄຊຊະນະ, ນາງໄດ້ພົບຄວາມສະຫງົບ.
ຖ້າຫາກເຮົາຈະເຮັດ, ມັນມີຫລາຍວິທີທາງທີ່ຄຳເຮັບເຣີ ອິດສະຣາເອນ ສາມາດຊ່ວຍເຮົາໄດ້. ດັ່ງເຊັ່ນການອະທິຖານເພື່ອຜູ້ສອນສາດສະໜາຂອງພວກເຮົາ—ແລະ ຄວາມພະຍາຍາມຂອງເຮົາ ທີ່ຈະເຕົ້າໂຮມອິດສະຣາເອນ—ສາມາດປ່ຽນແນວຄິດນີ້ໃນຈິດໃຈຂອງເຮົາໄດ້. ເຮົາມັກອະທິຖານເລື້ອຍໆ ຂໍໃຫ້ເຮົາ ແລະ ຜູ້ສອນສາດສະໜາຂອງພວກເຮົາພົບເຫັນຜູ້ຄົນທີ່ພ້ອມແລ້ວທີ່ຈະຮັບເອົາຄວາມຈິງຂອງພຣະກິດຕິຄຸນ ຂອງພຣະເຢຊູຄຣິດທີ່ຟື້ນຟູ. ຂ້າພະເຈົ້າຢາກຮູ້ວ່າ ເຮົາຈະຖືກນຳໄປຫາຜູ້ໃດ ເມື່ອເຮົາອ້ອນວອນຂໍໃຫ້ພົບເຫັນຜູ້ທີ່ເຕັມໃຈທີ່ຈະໃຫ້ພຣະເຈົ້າໄຊຊະນະໃນຊີວິດຂອງເຂົາເຈົ້າ?
ເຮົາອາດຖືກພາໄປຫາບາງຄົນທີ່ບໍ່ເຄີຍເຊື່ອໃນພຣະເຈົ້າ ຫລື ພຣະເຢຊູຄຣິດ ແຕ່ເວລານີ້ ຢາກຮຽນຮູ້ກ່ຽວກັບພວກພຣະອົງ ແລະ ແຜນແຫ່ງຄວາມສຸກຂອງພວກພຣະອົງ. ບາງຄົນອາດໄດ້ “ເກີດໃນພັນທະສັນຍາ”14 ແຕ່ ນັບແຕ່ນັ້ນມາ ໄດ້ໜີໄປຈາກເສັ້ນທາງແຫ່ງພັນທະສັນຍາແລ້ວ. ບັດນີ້ ເຂົາເຈົ້າອາດພ້ອມແລ້ວທີ່ຈະກັບໃຈ, ກັບຄືນມາ, ແລະ ໃຫ້ພຣະເຈົ້າໄຊຊະນະ. ເຮົາສາມາດຊ່ວຍເຂົາເຈົ້າໄດ້ ໂດຍການຕ້ອນຮັບເຂົາເຈົ້າດ້ວຍອ້ອມແຂນ ແລະ ດ້ວຍໃຈທີ່ເປີດກວ້າງ. ແລະ ບາງຄົນທີ່ເຮົາອາດຖືກພາໄປຫາ ເຂົາເຈົ້າອາດຮູ້ສຶກຕະຫລອດມາວ່າມີບາງສິ່ງທີ່ຂາດເຫລືອໃນຊີວິດຂອງເຂົາເຈົ້າ. ເຂົາເຈົ້າຄືກັນ ຢາກຮູ້ສຶກສົມບູນ ແລະ ຢາກຊື່ນຊົມຄືກັນກັບຜູ້ທີ່ເຕັມໃຈທີ່ຈະໃຫ້ພຣະເຈົ້າໄຊຊະນະໃນຊີວິດຂອງຕົນ.
ຕາໜ່າງແຫ່ງພຣະກິດຕິຄຸນທີ່ຈະເອົາໄປຕູ້ມເອົາຊາວອິດສະຣາເອນນັ້ນ ເປັນຜືນໃຫຍ່. ມັນມີບ່ອນສຳລັບແຕ່ລະຄົນຜູ້ທີ່ຈະຮັບເອົາພຣະກິດຕິຄຸນຂອງພຣະເຢຊູຄຣິດ. ຜູ້ປ່ຽນໃຈເຫລື້ອມໃສແຕ່ລະຄົນກາຍເປັນລູກແຫ່ງພັນທະສັນຍາຄົນໜຶ່ງຂອງພຣະເຈົ້າ,15 ບໍ່ວ່າໂດຍກຳເນີດ ຫລື ໂດຍການຖືກຮັບເຂົ້າເປັນລູກບຸນທຳກໍຕາມ. ແຕ່ລະຄົນກາຍເປັນຜູ້ຮັບມູນມໍລະດົກຢ່າງເຕັມສ່ວນ ໃນທຸກສິ່ງທີ່ພຣະເຈົ້າໄດ້ສັນຍາໄວ້ກັບລູກຫລານທີ່ຊື່ສັດຂອງອິດສະຣາເອນ!16
ເຮົາແຕ່ລະຄົນມີສັກກະຍະພາບທີ່ສູງສົ່ງ ເພາະເຮົາແຕ່ລະຄົນເປັນລູກຂອງພຣະເຈົ້າ. ທຸກຄົນເທົ່າທຽມກັນໃນສາຍພຣະເນດຂອງພຣະອົງ. ຄວາມໝາຍຂອງຄວາມຈິງນີ້ແມ່ນເລິກເຊິ່ງ. ອ້າຍເອື້ອຍນ້ອງທັງຫລາຍ, ຈົ່ງຟັງຢ່າງລະມັດລະວັງ ໃນສິ່ງທີ່ຂ້າພະເຈົ້າກຳລັງຈະກ່າວ. ພຣະເຈົ້າບໍ່ໄດ້ຮັກເຊື້ອຊາດໃດຫລາຍກວ່າໝູ່. ຄຳສອນຂອງພຣະອົງໃນເລື່ອງນີ້ແມ່ນແຈ່ມແຈ້ງ. ພຣະອົງເຊື້ອເຊີນ ທຸກຄົນ ໃຫ້ມາຫາພຣະອົງ, “ດຳ ແລະ ຂາວ, ຂ້າທາດ ແລະ ເປັນອິດສະລະ, ຊາຍ ແລະ ຍິງ.”17
ຂໍໃຫ້ທ່ານແນ່ໃຈໄດ້ວ່າ ຖານະຂອງທ່ານຕໍ່ພຣະເຈົ້າບໍ່ໄດ້ຂຶ້ນກັບຜິວພັນຂອງທ່ານ. ຄວາມໂປດປານ ຫລື ບໍ່ໂປດປານຕໍ່ພຣະເຈົ້າແມ່ນຂຶ້ນກັບຄວາມອຸທິດຕົນຂອງທ່ານຕໍ່ພຣະເຈົ້າ ແລະ ຕໍ່ພຣະບັນຍັດຂອງພຣະອົງ ແລະ ບໍ່ແມ່ນຂຶ້ນກັບຜິວພັນຂອງທ່ານ.
ຂ້າພະເຈົ້າໂສກເສົ້າທີ່ອ້າຍເອື້ອຍນ້ອງຄົນດຳພວກເຮົາຕ້ອງໄດ້ຮັບທຸກທໍລະມານກັບຄວາມເຈັບປວດກັບການຖືກຈຳແນກ ແລະ ຄວາມອະຄະຕິ. ມື້ນີ້ ຂ້າພະເຈົ້າຂໍໃຫ້ສະມາຊິກຂອງພວກເຮົາໃນທຸກແຫ່ງຫົນ ເປັນຕົວຢ່າງໃນການປະຖິ້ມຄວາມອະຄະຕິ. ຂ້າພະເຈົ້າອ້ອນວອນທ່ານໃຫ້ສົ່ງເສີມການມີຄວາມນັບຖືຕໍ່ລູກໆທຸກຄົນຂອງພຣະເຈົ້າ.
ຄຳຖາມສຳລັບເຮົາແຕ່ລະຄົນ, ໂດຍບໍ່ຄຳນຶງເຖິງເຊື້ອຊາດ, ແມ່ນເໝືອນກັນ. ທ່ານ ເຕັມໃຈທີ່ຈະໃຫ້ພຣະເຈົ້າໄຊຊະນະໃນຊີວິດຂອງທ່ານບໍ່? ທ່ານ ເຕັມໃຈທີ່ຈະໃຫ້ພຣະເຈົ້າເປັນອິດທິພົນທີ່ສຳຄັນທີ່ສຸດໃນຊີວິດຂອງທ່ານບໍ່? ທ່ານຈະອະນຸຍາດໃຫ້ພຣະຄຳຂອງພຣະອົງ, ພຣະບັນຍັດຂອງພຣະອົງ, ແລະ ພັນທະສັນຍາຂອງພຣະອົງມີອິດທິພົນໃນສິ່ງທີ່ທ່ານເຮັດແຕ່ລະວັນບໍ່? ທ່ານຈະອະນຸຍາດໃຫ້ສຸລະສຽງຂອງພຣະອົງມີຄວາມສຳຄັນກວ່າສິ່ງອື່ນໆບໍ່? ທ່ານ ເຕັມໃຈ ທີ່ຈະເຮັດສິ່ງໃດກໍຕາມທີ່ພຣະອົງປະສົງໃຫ້ທ່ານເຮັດ ມີຄວາມສຳຄັນກວ່າຄວາມທະເຍີທະຍານທຸກຢ່າງຂອງທ່ານບໍ່? ທ່ານ ເຕັມໃຈ ທີ່ຈະໃຫ້ຄວາມປະສົງຂອງທ່ານຖືກກືນລົງໄປໃນພຣະປະສົງຂອງພຣະອົງບໍ່?18
ໃຫ້ພິຈະນາວ່າ ຄວາມເຕັມໃຈສາມາດເປັນພອນໃຫ້ແກ່ທ່ານຫລາຍຂະໜາດໃດ. ຖ້າຫາກທ່ານຍັງບໍ່ໄດ້ແຕ່ງງານ ແລະ ພວມຊອກຫາຄູ່ຊີວິດນິລັນດອນຢູ່, ຄວາມປາດຖະໜາຂອງທ່ານທີ່ຈະເປັນ “ອິດສະຣາເອນ” ຈະຊ່ວຍທ່ານຕັດສິນໃຈວ່າ ທ່ານຄວນຄົບຫາຜູ້ໃດ ແລະ ດ້ວຍວິທີໃດ.
ຖ້າຫາກທ່ານໄດ້ແຕ່ງງານກັບຄົນທີ່ເຮັດຜິດຕໍ່ພັນທະສັນຍາ, ຄວາມເຕັມໃຈຂອງທ່ານທີ່ຈະໃຫ້ພຣະເຈົ້າໄຊຊະນະໃນຊີວິດຂອງທ່ານ ຈະອະນຸຍາດໃຫ້ພັນທະສັນຍາຂອງທ່ານທີ່ເຮັດໄວ້ກັບພຣະເຈົ້າມີຜົນສັກສິດຢູ່ຄືເກົ່າ. ພຣະຜູ້ຊ່ວຍໃຫ້ລອດຈະປິ່ນປົວຫົວໃຈທີ່ຊອກຊ້ຳຂອງທ່ານ. ຟ້າສະຫວັນຈະເປີດ ຂະນະທີ່ທ່ານສະແຫວງຫາວິທີທີ່ຈະດຳເນີນໄປໜ້າ. ທ່ານບໍ່ຈຳເປັນຕ້ອງລະຫົກລະເຫີນ ຫລື ສົງໄສ.
ຖ້າຫາກທ່ານມີຄຳຖາມທີ່ຈິງໃຈກ່ຽວກັບພຣະກິດຕິຄຸນ ຫລື ສາດສະໜາຈັກ, ຂະນະທີ່ທ່ານເລືອກໃຫ້ພຣະເຈົ້າໄຊຊະນະ, ທ່ານຈະຖືກນຳພາໄປພົບ ແລະ ເຂົ້າໃຈຄວາມຈິງທີ່ແນ່ນອນ ແລະ ນິລັນດອນ ທີ່ຈະນຳພາຊີວິດ ແລະ ຊ່ວຍທ່ານໃຫ້ຍຶດໝັ້ນຢູ່ໃນເສັ້ນທາງແຫ່ງພັນທະສັນຍາ.
ເມື່ອທ່ານປະເຊີນກັບການລໍ້ລວງ—ເຖິງແມ່ນວ່າການລໍ້ລວງມີມາຕອນທ່ານອ່ອນແຮງ ຫລື ຮູ້ສຶກໂດດດ່ຽວ ຫລື ເຂົ້າໃຈຜິດ—ໃຫ້ຄິດວ່າ ທ່ານຈະສາມາດຮວບຮວມຄວາມກ້າຫານໄດ້ຫລາຍພຽງໃດ ຖ້າຫາກທ່ານເລືອກທີ່ຈະໃຫ້ພຣະເຈົ້າໄຊຊະນະໃນຊີວິດຂອງທ່ານ ແລະ ຂະນະທີ່ທ່ານອ້ອນວອນຂໍໃຫ້ພຣະອົງເພີ່ມຄວາມເຂັ້ມແຂງໃຫ້ແກ່ທ່ານ.
ເມື່ອຄວາມປາດຖະໜາສູງສຸດຂອງທ່ານ ແມ່ນການຢາກໃຫ້ພຣະເຈົ້າໄຊຊະນະ, ແມ່ນການຢາກເປັນພາກສ່ວນຂອງອິດສະຣາເອນ, ການຕັດສິນໃຈຫລາຍໆຢ່າງຈະງ່າຍຂຶ້ນ. ບັນຫາຫລາຍຢ່າງຈະໝົດໄປ! ທ່ານຈະຮູ້ຈັກວິທີແຕ່ງຕົວທີ່ຮຽບຮ້ອຍ. ທ່ານຈະຮູ້ຈັກວ່າຄວນເບິ່ງຫຍັງ ແລະ ອ່ານຫຍັງ, ວ່າຄວນໃຊ້ເວລາກັບສິ່ງໃດ, ແລະ ຄວນພົບປະສັງສັນກັບຄົນໃດ. ທ່ານຈະຮູ້ວ່າ ຢາກບັນລຸສິ່ງໃດ. ທ່ານຈະຮູ້ວ່າ ທ່ານຢາກເປັນຄົນແບບໃດແທ້ໆ.
ບັດນີ້, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ທ່ານຕ້ອງໃຊ້ທັງສັດທາ ແລະ ຄວາມກ້າຫານ ເພື່ອໃຫ້ພຣະເຈົ້າໄຊຊະນະ. ທ່ານຕ້ອງໃຊ້ຄວາມພະຍາຍາມທີ່ບໍ່ລົດລະ ແລະ ເຂັ້ມງວດ ໃນການກັບໃຈ ແລະ ປະຖິ້ມມະນຸດທີ່ມີຈິດໃຈທຳມະດາ ຜ່ານທາງການຊົດໃຊ້ຂອງພຣະເຢຊູຄຣິດ.19 ທ່ານຕ້ອງໃຊ້ຄວາມພະຍາຍາມຢ່າງສະໝ່ຳສະເໝີທຸກວັນ ເພື່ອພັດທະນານິໄສຕົວເອງໃຫ້ສຶກສາພຣະກິດຕິຄຸນ, ຮຽນຮູ້ກ່ຽວກັບພຣະບິດາເທິງສະຫວັນ ແລະ ພຣະເຢຊູຄຣິດ, ແລະ ສະແຫວງຫາ ແລະ ຕອບຮັບການເປີດເຜີຍສ່ວນຕົວຫລາຍກວ່າເກົ່າ.
ໃນເວລາທີ່ຫຍຸ້ງຍາກເຫລົ່ານີ້ ຊຶ່ງອັກຄະສາວົກໂປໂລໄດ້ທຳນາຍ,20 ຊາຕານໄດ້ເຊົາ ພະຍາຍາມ ປິດບັງການໂຈມຕີແຜນຂອງພຣະເຈົ້າ. ຄວາມຊົ່ວຮ້າຍທີ່ກ້າຫານມີຢູ່ຢ່າງຫລວງຫລາຍ. ສະນັ້ນ, ວິທີດຽວທີ່ຈະເອົາຕົວລອດທາງວິນຍານ ຄືຄວາມຕັ້ງໃຈທີ່ຈະໃຫ້ພຣະເຈົ້າໄຊຊະນະໃນຊີວິດຂອງທ່ານ, ຮຽນວິທີທີ່ຈະໄດ້ຍິນສຸລະສຽງຂອງພຣະອົງ, ແລະ ໃຊ້ກຳລັງຂອງເຮົາເພື່ອຊ່ວຍເຕົ້າໂຮມອິດສະຣາເອນ.
ບັດນີ້, ພຣະຜູ້ເປັນເຈົ້າ ຮູ້ສຶກ ແນວໃດກ່ຽວກັບຜູ້ຄົນທີ່ເຕັມໃຈໃຫ້ພຣະເຈົ້າໄຊຊະນະ? ນີໄຟສະຫລຸບມັນໄດ້ດີ ທີ່ວ່າ: “[ພຣະຜູ້ເປັນເຈົ້າ] ຮັກ ຜູ້ທີ່ຮັບຮູ້ພຣະອົງເປັນພຣະເຈົ້າຂອງພວກເຂົາ. ຈົ່ງເບິ່ງ, ພຣະອົງຮັກບັນພະບຸລຸດຂອງພວກເຂົາ, ແລະ ພຣະອົງເຮັດພັນທະສັນຍາໄວ້ກັບພວກເຂົາ, ແທ້ຈິງແລ້ວ, ເຖິງແມ່ນກັບອັບຣາຮາມ, ອີຊາກ, ແລະ ຢາໂຄບ; ແລະ ພຣະອົງຈື່ຈຳພັນທະສັນຍາທີ່ໄດ້ກະທຳໄວ້.”21
ແລະ ພຣະຜູ້ເປັນເຈົ້າເຕັມພຣະໄທ ທີ່ຈະ ເຮັດ ຫຍັງເພື່ອອິດສະຣາເອນ? ພຣະຜູ້ເປັນເຈົ້າໄດ້ສັນຍາວ່າ ພຣະອົງຈະ “ສູ້ຮົບໃຫ້ [ພວກເຮົາ], ແລະ ໃຫ້ລູກ [ຂອງພວກເຮົາ], ແລະ ໃຫ້ລູກຂອງລູກຂອງພວກເຮົາ … ຈົນເຖິງຄົນລຸ້ນທີສາມ ແລະ ທີສີ່”!22
ຂະນະທີ່ທ່ານສຶກສາພຣະຄຳພີຂອງທ່ານລະຫວ່າງຫົກເດືອນໜ້ານີ້, ຂ້າພະເຈົ້າຂໍຊຸກຍູ້ທ່ານໃຫ້ຂຽນຄຳສັນຍາທັງໝົດຂອງພຣະຜູ້ເປັນເຈົ້າລົງໄວ້ ອັນທີ່ພຣະອົງຈະກະທຳເພື່ອອິດສະຣາເອນແຫ່ງພັນທະສັນຍາ. ຂ້າພະເຈົ້າຄິດວ່າທ່ານຈະປະຫລາດໃຈ! ຈົ່ງໄຕ່ຕອງຄຳສັນຍາເຫລົ່ານີ້. ຈົ່ງເວົ້າລົມກ່ຽວກັບມັນກັບຄອບຄົວ ແລະ ໝູ່ເພື່ອນຂອງທ່ານ. ແລ້ວໃຫ້ດຳລົງຊີວິດ ແລະ ເບິ່ງຄຳສັນຍາເຫລົ່ານີ້ບັນລຸຄວາມສຳເລັດໃນຊີວິດຂອງທ່ານເອງ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເມື່ອທ່ານເລືອກທີ່ຈະໃຫ້ພຣະເຈົ້າໄຊຊະນະໃນຊີວິດຂອງທ່ານ, ທ່ານຈະເຫັນດ້ວຍຕົວເອງວ່າພຣະເຈົ້າຂອງເຮົາ ເປັນ “ພຣະເຈົ້າແຫ່ງສິ່ງມະຫັດສະຈັນ.”23 ໃນສ່ວນລວມ, ເຮົາເປັນລູກແຫ່ງພັນທະສັນຍາຂອງພຣະອົງ, ແລະ ເຮົາຈະຖືກເອີ້ນຕາມພຣະນາມຂອງພຣະອົງ. ຂ້າພະເຈົ້າເປັນພະຍານເຖິງສິ່ງນີ້ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.