ຄວາມປົກກະຕິໃໝ່
ຂ້າພະເຈົ້າຂໍເຊື້ອເຊີນທ່ານໃຫ້ຫັນຫົວໃຈ, ຈິດໃຈ, ແລະ ຈິດວິນຍານຂອງທ່ານ ມາຫາພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ ໃຫ້ຫລາຍກວ່າເກົ່າ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ສອງມື້ນີ້ຂອງກອງປະຊຸມໃຫຍ່ສາມັນ ແມ່ນປະເສີດຫລາຍ! ຂ້າພະເຈົ້າເຫັນດ້ວຍກັບແອວເດີ ແຈັບຟະຣີ ອາ ຮໍແລນ. ດັ່ງທີ່ເພິ່ນໄດ້ກ່າວມານັ້ນ, ຂ່າວສານ, ຄຳອະທິຖານ, ແລະ ສຽງເພງ ໄດ້ຖືກດົນໃຈໂດຍພຣະຜູ້ເປັນເຈົ້າ. ຂ້າພະເຈົ້າຮູ້ບຸນຄຸນຕໍ່ທຸກຄົນທີ່ມີພາກສ່ວນ ບໍ່ວ່າຈະເປັນດ້ວຍວິທີໃດກໍຕາມ.
ລະຫວ່າງກອງປະຊຸມສອງມື້ນີ້, ຂ້າພະເຈົ້າໄດ້ວາດພາບເຫັນທ່ານກຳລັງຮັບຊົມກອງປະຊຸມຢູ່. ຂ້າພະເຈົ້າໄດ້ທູນຂໍໃຫ້ພຣະຜູ້ເປັນເຈົ້າ ຊ່ວຍໃຫ້ຂ້າພະເຈົ້າເຂົ້າໃຈສິ່ງທີ່ທ່ານກຳລັງຮູ້ສຶກ, ເປັນຫ່ວງເປັນໃຍ, ຫລື ພະຍາຍາມແກ້ໄຂ. ຂ້າພະເຈົ້າເປັນຫ່ວງບໍ່ຮູ້ວ່າ ຈະກ່າວຫຍັງໃນທ້າຍກອງປະຊຸມນີ້ ເພື່ອຊ່ວຍທ່ານໃຫ້ຄິດໃນແງ່ດີ ກ່ຽວກັບອະນາຄົດ ທີ່ຂ້າພະເຈົ້າຮູ້ວ່າ ພຣະເຈົ້າປະສົງໃຫ້ທ່ານຮູ້ສຶກ.
ເຮົາມີຊີວິດຢູ່ໃນສະໄໝທີ່ຮຸ່ງໂລດ, ທີ່ບັນດາສາດສະດາໄດ້ເຫັນລ່ວງໜ້າຫລາຍສັດຕະວັດມາແລ້ວ. ນີ້ແມ່ນສະໄໝເມື່ອພອນທາງວິນຍານຈະບໍ່ຖືກຢັບຢັ້ງໄວ້ຈາກຄົນຊອບທຳ.1 ເຖິງແມ່ນວ່າໂລກນີ້ສັບສົນວຸ້ນວາຍ,2 ແຕ່ພຣະຜູ້ເປັນເຈົ້າປະສົງໃຫ້ເຮົາຄອຍຖ້າອະນາຄົດ “ດ້ວຍຄວາມກະຕືລືລົ້ນ.”3 ຂໍໃຫ້ເຮົາຢ່າຄິດແຕ່ນຳເລື່ອງອະດີດ. ການເຕົ້າໂຮມອິດສະຣາເອນກຳລັງດຳເນີນໄປໜ້າ. ອົງພຣະເຢຊູຄຣິດເຈົ້າຊີ້ນຳວຽກງານໃນສາດສະໜາຈັກຂອງພຣະອົງ, ແລະ ວຽກງານນີ້ ຈະ ບັນລຸເປົ້າໝາຍແຫ່ງສະຫວັນຂອງມັນ.
ການທ້າທາຍສຳລັບທ່ານ ແລະ ຂ້າພະເຈົ້າແມ່ນ ທີ່ຈະແນ່ໃຈວ່າ ເຮົາ ແຕ່ລະຄົນບັນລຸສັກກະຍະພາບອັນສູງສົ່ງຂອງຕົນ. ທຸກມື້ນີ້ເຮົາໄດ້ຍິນກ່ຽວກັບ “ຄວາມປົກກະຕິໃໝ່.” ຖ້າຫາກທ່ານຢາກຮັບເອົາຄວາມປົກກະຕິໃໝ່, ຂ້າພະເຈົ້າຂໍເຊື້ອເຊີນທ່ານໃຫ້ຫັນຫົວໃຈ, ຈິດໃຈ, ແລະ ຈິດວິນຍານຂອງທ່ານ ມາຫາພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ ໃຫ້ຫລາຍກວ່າເກົ່າ. ຂໍໃຫ້ມັນເປັນຄວາມປົກກະຕິໃໝ່ ຂອງທ່ານ.
ຈົ່ງຮັບເອົາຄວາມປົກກະຕິໃໝ່ຂອງທ່ານດ້ວຍການກັບໃຈທຸກວັນ. ຈົ່ງສະແຫວງຫາທີ່ຈະເພີ່ມຄວາມບໍລິສຸດໃນຄວາມຄິດ, ໃນຄຳວາຈາ, ແລະ ໃນການກະທຳ. ຈົ່ງປະຕິບັດສາດສະໜາກິດຕໍ່ຄົນອື່ນ. ຈົ່ງຮັກສາທັດສະນະນິລັນດອນ. ຈົ່ງຂະຫຍາຍການເອີ້ນຂອງທ່ານ. ບໍ່ວ່າການທ້າທາຍຂອງທ່ານຈະເປັນສິ່ງໃດກໍຕາມ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຈົ່ງດຳລົງຊີວິດທຸກວັນ ໃນທາງທີ່ ທ່ານ ຈະກຽມພ້ອມທີ່ຈະພົບກັບພຣະຜູ້ສ້າງຂອງທ່ານ.4
ດ້ວຍເຫດນີ້ ພວກເຮົາຈຶ່ງມີພຣະວິຫານ. ພິທີການ ແລະ ພັນທະສັນຍາຂອງພຣະຜູ້ເປັນເຈົ້າ ຈະຕຽມທ່ານສຳລັບຊີວິດນິລັນດອນ, ຊຶ່ງເປັນພອນທີ່ຍິ່ງໃຫຍ່ທີ່ສຸດໃນພອນທັງໝົດຂອງພຣະເຈົ້າ.5 ດັ່ງທີ່ທ່ານຮູ້, ການແຜ່ລະບາດຂອງພະຍາດໂຄວິດ ໄດ້ເຮັດໃຫ້ພວກເຮົາຕ້ອງປິດພຣະວິຫານຂອງພວກເຮົາ. ແລ້ວ ພວກເຮົາໄດ້ພິຈາລະນາເລີ່ມຕົ້ນເປີດພຣະວິຫານຄືນອີກ, ເປັນໄລຍະ ໄລຍະໄປ. ດ້ວຍໄລຍະທີ 2 ຂອງພຣະວິຫານຫລາຍແຫ່ງ ໃນເວລານີ້, ຫລາຍພັນຄູ່ໄດ້ຮັບການຜະນຶກ, ແລະ ຫລາຍພັນຄົນໄດ້ຮັບຂອງປະທານສັກສິດສຳລັບຕົວເອງ ພຽງແຕ່ໃນເວລາສອງສາມເດືອນຜ່ານມານີ້. ພວກເຮົາລໍຖ້າວັນທີ່ສະມາຊິກທີ່ມີຄ່າຄວນຂອງສາດສະໜາຈັກ ຈະສາມາດກັບຄືນໄປຮັບໃຊ້ບັນພະບຸລຸດຂອງເຂົາເຈົ້າ ແລະ ນະມັດສະການຢູ່ໃນພຣະວິຫານທີ່ສັກສິດຄືນອີກ.
ບັດນີ້ຂ້າພະເຈົ້າຍິນດີທີ່ຈະປະກາດແຜນການສ້າງພຣະວິຫານໃໝ່ຫົກແຫ່ງ ທີ່ຈະຖືກສ້າງຂຶ້ນຢູ່ໃນສະຖານທີ່ດັ່ງຕໍ່ໄປນີ້: ທາຣາວາ, ກິຣີບາຕີ; ຜອດວິລາ, ວານູອາຕູ; ລິນດອນ, ຢູທາ; ກະເຣດເຕີ ກົວເຕມາລາ ຊີທີ, ກົວເຕມາລາ; ຊ້າວປາໂລ ຕາເວັນອອກ, ບຣາຊິນ; ແລະ ແຊນຕາຄຣູສ໌, ໂບລີວີ.
ຂະນະທີ່ພວກເຮົາສ້າງ ແລະ ຮັກສາພຣະວິຫານເຫລົ່ານີ້, ພວກເຮົາອະທິຖານວ່າ ທ່ານແຕ່ລະຄົນຈະສ້າງ ແລະ ຮັກສາຕົວເອງ ເພື່ອວ່າທ່ານຈະສາມາດມີຄ່າຄວນ ທີ່ຈະເຂົ້າໄປໃນພຣະວິຫານທີ່ສັກສິດໄດ້.
ບັດນີ້, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຂໍອວຍພອນທ່ານໃຫ້ເຕັມໄປດ້ວຍສັນຕິສຸກຂອງອົງພຣະເຢຊູຄຣິດເຈົ້າ. ສັນຕິສຸກຂອງພຣະອົງແມ່ນເກີນກວ່າມະນຸດທັງປວງຈະເຂົ້າໃຈໄດ້.6 ຂ້າພະເຈົ້າຂໍອວຍພອນທ່ານໃຫ້ມີຄວາມປາດຖະໜາ ແລະ ຄວາມສາມາດຫລາຍຍິ່ງຂຶ້ນ ທີ່ຈະເຊື່ອຟັງກົດຂອງພຣະເຈົ້າ. ຂ້າພະເຈົ້າສັນຍາວ່າ ເມື່ອທ່ານເຮັດແນວນັ້ນ, ທ່ານຈະໄດ້ຮັບພອນ, ມີຄວາມກ້າຫານຫລາຍຂຶ້ນ, ໄດ້ຮັບການເປີດເຜີຍສ່ວນຕົວຫລາຍກວ່າເກົ່າ, ມີຄວາມຖືກຕ້ອງປອງດອງໃນຄອບຄົວ, ແລະ ມີຄວາມສຸກ ແມ່ນແຕ່ໃນທ່າມກາງຄວາມບໍ່ແນ່ນອນນີ້.
ຂໍໃຫ້ເຮົາຈົ່ງດຳເນີນໄປໜ້ານຳກັນ ເພື່ອບັນລຸໜ້າທີ່ມອບໝາຍອັນສູງສົ່ງຂອງເຮົາ—ເພື່ອກະກຽມຕົວເອງ ແລະ ໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ. ຂ້າພະເຈົ້າຂໍເປັນພະຍານໃນເລື່ອງນີ້, ດ້ວຍການສະແດງຄວາມຮັກຕໍ່ທ່ານທັງຫລາຍ, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.