ຄວາມຈິງທີ່ບໍລິສຸດ, ຄຳສອນທີ່ບໍລິສຸດ, ແລະ ການເປີດເຜີຍທີ່ບໍລິສຸດ
ຈົ່ງເຮັດໃຫ້ກອງປະຊຸມນີ້ເປັນເວລາແຫ່ງການຊື່ນຊົມກັບຂ່າວສານຈາກພຣະຜູ້ເປັນເຈົ້າຜ່ານທາງຜູ້ຮັບໃຊ້ຂອງພຣະອົງ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂໍຕ້ອນຮັບທ່ານສູ່ກອງປະຊຸມໃຫຍ່ສາມັນ! ຊ່າງເປັນຄວາມຊື່ນຊົມແທ້ໆທີ່ໄດ້ມາຮ່ວມກັບທ່ານ! ທ່ານໄດ້ຢູ່ໃນຈິດໃຈຂອງຂ້າພະເຈົ້າເກືອບຕະຫລອດເວລາ ລະຫວ່າງຫົກເດືອນຜ່ານມານີ້. ຂ້າພະເຈົ້າໄດ້ອະທິຖານ ກ່ຽວກັບ ທ່ານ ແລະ ເພື່ອ ທ່ານ. ໃນໄລຍະສອງສາມອາທິດທີ່ຜ່ານມາ, ຂ້າພະເຈົ້າໄດ້ອະທິຖານດ້ວຍຄວາມຕັ້ງໃຈວ່າ ກອງປະຊຸມໃຫຍ່ນີ້ ຈະເປັນຊ່ວງເວລາແຫ່ງການເປີດເຜີຍ ແລະ ການສະທ້ອນຄິດ ສຳລັບຜູ້ທີ່ສະແຫວງຫາພອນເຫລົ່ານັ້ນ.
ພວກເຮົາດີໃຈທີ່ຈະໄດ້ກ່າວກັບທ່ານຈາກສູນກາງປະຊຸມໃຫຍ່ອີກຄັ້ງ. ບ່ອນນັ່ງສ່ວນຫລາຍຍັງວ່າງເປົ່າ, ແຕ່ການມາຮ່ວມຂອງກຸ່ມນັກຮ້ອງແທັບເບິແນັກໂກ ກໍເປັນການດຳເນີນໄປໜ້າທີ່ດີຫລາຍແລ້ວ. ພວກເຮົາຂໍຕ້ອນຮັບທ່ານທັງຫລາຍສູ່ກອງປະຊຸມທາງອອນລາຍສ່ວນໃຫຍ່, ບໍ່ວ່າທ່ານຈະຢູ່ໃສກໍຕາມ.
ພວກເຮົາຍັງປະເຊີນກັບການລະບາດຂອງພະຍາດໂຄວິດ-19 ຢູ່ ແລະ ໂຄວິດສາຍພັນແວລ້ຽນນຳອີກ. ພວກເຮົາຂໍຂອບໃຈທ່ານສຳລັບການປະຕິບັດຕາມຄຳແນະນຳຂອງພວກເຮົາ ແລະ ຄຳເຕືອນຂອງຜູ້ຊ່ຽວຊານດ້ານການແພດ ແລະ ເຈົ້າໜ້າທີ່ຝ່າຍລັດຖະບານ ຢູ່ໃນຊຸມຊົນຂອງທ່ານ.
ພວກເຮົາຈັດກອງປະຊຸມໃຫຍ່ສາມັນທຸກຄັ້ງຕາມການຊີ້ນຳຂອງພຣະຜູ້ເປັນເຈົ້າ.1 ຮູບແບບກອງປະຊຸມກໍແຕກຕ່າງໃນຊ່ວງຫລາຍປີທີ່ຜ່ານມານີ້. ຕອນຂ້າພະເຈົ້າຍັງນ້ອຍ, ກອງປະຊຸມໄດ້ຖືກຈັດຂຶ້ນສາມ ຫລື ສີ່ມື້. ຕໍ່ມາ, ກອງປະຊຸມໃຫຍ່ໄດ້ຖືກປ່ຽນເປັນສອງມື້. ທຸກຂ່າວສານ—ເມື່ອກ່ອນ ແລະ ເວລານີ້—ເປັນຜົນຈາກການອະທິຖານຢ່າງພາກພຽນ ແລະ ການກະກຽມທາງວິນຍານ.
ເຈົ້າໜ້າທີ່ຊັ້ນຜູ້ໃຫຍ່ ແລະ ເຈົ້າໜ້າທີ່ສາມັນຂອງສາດສະໜາຈັກ ຜູ້ຈະກ່າວ ໄດ້ເຈາະຈົງຂ່າວສານຂອງພວກເພິ່ນໃສ່ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ຄວາມເມດຕາຂອງພຣະອົງ, ແລະ ອຳນາດແຫ່ງການໄຖ່ອັນບໍ່ມີຂອບເຂດຂອງພຣະອົງ. ບໍ່ເຄີຍມີຊ່ວງເວລາໃດໃນປະຫວັດສາດຂອງໂລກ ເມື່ອຄວາມຮູ້ເຖິງພຣະຜູ້ຊ່ວຍໃຫ້ລອດຂອງເຮົາ ມີຄວາມສຳຄັນສ່ວນຕົວ ແລະ ກ່ຽວຂ້ອງກັບ ຈິດວິນຍານຂອງມວນມະນຸດ ຫລາຍໄປກວ່າໃນເວລານີ້. ໃຫ້ລອງວາດພາບວ່າ ການຂັດແຍ້ງທີ່ຮ້າຍແຮງຕະຫລອດທົ່ວໂລກ—ແລະ ຂອງຜູ້ຄົນໃນຊີວິດຂອງເຮົາ—ຈະຖືກແກ້ໄຂໄວພຽງໃດ ຖ້າຫາກເຮົາທຸກຄົນເລືອກຕິດຕາມພຣະເຢຊູຄຣິດ ແລະ ເອົາໃຈໃສ່ຕໍ່ຄຳສອນຂອງພຣະອົງ.
ໃນຄວາມຮູ້ສຶກນັ້ນ, ຂ້າພະເຈົ້າຂໍເຊື້ອເຊີນທ່ານໃຫ້ຕັ້ງໃຈຟັງສາມຢ່າງລະຫວ່າງກອງປະຊຸມໃຫຍ່ນີ້: ຄວາມຈິງທີ່ບໍລິສຸດ, ຄຳສອນຂອງພຣະຄຣິດທີ່ບໍລິສຸດ, ແລະ ການເປີດເຜີຍທີ່ບໍລິສຸດ. ກົງກັນຂ້າມກັບຄວາມສົງໄສຂອງບາງຄົນ, ຄຳວ່າ ຖືກ ແລະ ຜິດ ກໍ ມີຈິງ. ຄວາມຈິງທີ່ສົມບູນ—ຄວາມຈິງນິລັນດອນ ກໍ ມີຈິງ. ໄພພິບັດຢ່າງໜຶ່ງໃນວັນເວລາຂອງເຮົາແມ່ນວ່າ ມີໜ້ອຍຄົນເກີນໄປທີ່ຮູ້ວ່າຈະໄປຊອກຫາຄວາມຈິງໄດ້ຢູ່ບ່ອນໃດ.2 ຂ້າພະເຈົ້າຮັບຮອງກັບທ່ານໄດ້ວ່າ ສິ່ງທີ່ທ່ານໄດ້ຍິນໃນມື້ນີ້ ແລະ ໃນມື້ອື່ນ ຖືວ່າເປັນຄວາມຈິງທີ່ບໍລິສຸດ.
ຄຳສອນທີ່ບໍລິສຸດຂອງພຣະຄຣິດມີພະລັງຫລາຍ. ມັນປ່ຽນຊີວິດຂອງທຸກຄົນທີ່ເຂົ້າໃຈ ແລະ ສະແຫວງຫາທີ່ຈະນຳໃຊ້ມັນໃນຊີວິດຂອງຕົນ. ຄຳສອນຂອງພຣະຄຣິດຊ່ວຍເຮົາໃຫ້ພົບເຫັນ ແລະ ຢູ່ໃນເສັ້ນທາງແຫ່ງພັນທະສັນຍາ. ການຢູ່ໃນເສັ້ນທາງທີ່ແຄບ ແຕ່ຊັດເຈນນັ້ນ ຈະເຮັດໃຫ້ທ່ານເໝາະສົມທີ່ຈະໄດ້ຮັບທຸກສິ່ງທີ່ພຣະເຈົ້າມີ ໃນທີ່ສຸດ.3 ບໍ່ມີສິ່ງໃດທີ່ມີຄ່າຫລາຍໄປກວ່າ ທຸກສິ່ງ ທີ່ພຣະບິດາຂອງເຮົາມີ!
ສຸດທ້າຍ, ການເປີດເຜີຍທີ່ບໍລິສຸດສຳລັບຄຳຖາມໃນໃຈຂອງທ່ານ ຈະເຮັດໃຫ້ກອງປະຊຸມນີ້ກຸ້ມຄ່າ ແລະ ໜ້າຊົງຈຳທີ່ສຸດ. ຖ້າຫາກທ່ານຍັງບໍ່ໄດ້ສະແຫວງຫາການປະຕິບັດສາດສະໜາກິດຂອງພຣະວິນຍານບໍລິສຸດ ເພື່ອຊ່ວຍທ່ານໃຫ້ໄດ້ຍິນສິ່ງທີ່ພຣະຜູ້ເປັນເຈົ້າຢາກໃຫ້ທ່ານໄດ້ຍິນລະຫວ່າງສອງມື້ນີ້, ຂ້າພະເຈົ້າຂໍເຊື້ອເຊີນທ່ານໃຫ້ເຮັດໃນເວລານີ້. ຈົ່ງເຮັດໃຫ້ກອງປະຊຸມນີ້ເປັນເວລາແຫ່ງການຊື່ນຊົມກັບຂ່າວສານຈາກພຣະຜູ້ເປັນເຈົ້າຜ່ານທາງຜູ້ຮັບໃຊ້ຂອງພຣະອົງ. ໃຫ້ຮຽນຮູ້ວິທີທີ່ຈະນຳໃຊ້ມັນໃນຊີວິດຂອງທ່ານ.
ນີ້ ແມ່ນ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ພວກເຮົາແມ່ນຜູ້ຄົນແຫ່ງພັນທະສັນຍາຂອງພຣະອົງ. ພຣະຜູ້ເປັນເຈົ້າໄດ້ປະກາດວ່າ ພຣະອົງຈະເລັ່ງວຽກງານຂອງພຣະອົງເມື່ອເຖິງເວລາຂອງມັນ,4 ແລະ ພຣະອົງກຳລັງເຮັດເຊັ່ນນັ້ນດ້ວຍຄວາມໄວທີ່ເພີ່ມຂຶ້ນເລື້ອຍໆ. ເຮົາໄດ້ຮັບສິດທິພິເສດທີ່ໄດ້ເປັນພາກສ່ວນໃນວຽກງານອັນສັກສິດຂອງພຣະອົງ.
ຂ້າພະເຈົ້າຂໍມອບພອນໃຫ້ທຸກຄົນທີ່ກຳລັງສະແຫວງຫາຄວາມສະຫວ່າງ, ຄວາມຮູ້, ແລະ ຄວາມຈິງ. ຂ້າພະເຈົ້າຂໍສະແດງຄວາມຮັກຂອງຂ້າພະເຈົ້າຕໍ່ທ່ານແຕ່ລະຄົນ, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.