ຫາເວລາໃຫ້ພຣະຜູ້ເປັນເຈົ້າ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ຂ້າພະເຈົ້າຮຽກຮ້ອງທ່ານໃນມື້ນີ້ ໃຫ້ຕອບໂຕ້ສິ່ງທີ່ລໍ້ໃຈຂອງໂລກ ໂດຍການຫາເວລາໃຫ້ພຣະຜູ້ເປັນເຈົ້າໃນຊີວິດຂອງທ່ານ—ທຸກໆວັນ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເປັນເວລາສອງມື້ທີ່ເຮົາໄດ້ຮັບການສິດສອນໂດຍຜູ້ຮັບໃຊ້ຂອງພຣະຜູ້ເປັນເຈົ້າ ຜູ້ຊຶ່ງໄດ້ສະແຫວງຫາຢ່າງພາກພຽນເພື່ອຈະໄດ້ຮູ້ວ່າ ພຣະອົງປະສົງໃຫ້ພວກເພິ່ນກ່າວສິ່ງໃດ.

ເຮົາໄດ້ຮັບໜ້າທີ່ ທີ່ເຮົາຕ້ອງເຮັດສຳລັບຫົກເດືອນຂ້າງໜ້າ. ບັດນີ້ ຄຳຖາມມີຢູ່ວ່າ, ເຮົາຈະແຕກຕ່າງແນວໃດ ເພາະສິ່ງທີ່ເຮົາໄດ້ຍິນ ແລະ ຮູ້ສຶກນັ້ນ?

ໂຣກລະບາດໄດ້ສະແດງໃຫ້ເຫັນວ່າ ຊີວິດສາມາດປ່ຽນແປງຢ່າງໄວ, ບາງເທື່ອສະຖານະການກໍເກີນກວ່າທີ່ເຮົາຈະສາມາດຄວບຄຸມໄດ້. ເຖິງຢ່າງໃດກໍຕາມ, ມີຫລາຍສິ່ງທີ່ເຮົາ ສາມາດ ຄວບຄຸມ. ເຮົາຈັດລຳດັບຄວາມສຳຄັນຂອງເຮົາເອງ ແລະ ກຳນົດວິທີທີ່ເຮົາຈະໃຊ້ພະລັງ, ເວລາ, ແລະ ຊັບສິນຂອງເຮົາ. ເຮົາຕັດສິນໃຈວ່າ ເຮົາຈະປະຕິບັດຕໍ່ກັນແລະກັນແນວໃດ. ເຮົາເລືອກຄົນທີ່ເຮົາຈະຫັນໄປຫາເພື່ອຄວາມຈິງ ແລະ ການຊີ້ນຳ.

ສຽງ ແລະ ຄວາມກົດດັນຂອງໂລກກໍໂຈມຕີ ແລະ ມີຫລາຍ. ແຕ່ສຽງຫລອກລວງ, ຢົ້ວຢວນມີຫລາຍເກີນໄປ, ແລະ ສາມາດດຶງເຮົາອອກໄປຈາກເສັ້ນທາງແຫ່ງພັນທະສັນຍາໄດ້. ເພື່ອຫລີກເວັ້ນຈາກຄວາມເຈັບປວດໃຈທີ່ຈະຕາມມາຢ່າງຫລີກລ້ຽງບໍ່ໄດ້ນັ້ນ, ຂ້າພະເຈົ້າຈຶ່ງຮຽກຮ້ອງທ່ານໃນມື້ນີ້ ໃຫ້ຕອບໂຕ້ສິ່ງທີ່ລໍ້ໃຈຂອງໂລກ ໂດຍການຫາເວລາໃຫ້ພຣະຜູ້ເປັນເຈົ້າໃນຊີວິດຂອງທ່ານ—ທຸກໆວັນ.

ຖ້າຫາກຂໍ້ມູນສ່ວນໃຫຍ່ທີ່ທ່ານໄດ້ຮັບມາຈາກສັງຄົມ ຫລື ສື່ອື່ນໆ, ຄວາມສາມາດຂອງທ່ານໃນການທີ່ຈະໄດ້ຍິນສຸລະສຽງຂອງພຣະວິນຍານຈະລົດລົງ. ພ້ອມນີ້ ຖ້າຫາກທ່ານບໍ່ສະແຫວງຫາພຣະຜູ້ເປັນເຈົ້າຜ່ານທາງການອະທິຖານທຸກວັນ ແລະ ສຶກສາພຣະກິດຕິຄຸນ, ທ່ານກໍຈະປ່ອຍໃຫ້ຕົວເອງອ່ອນໄຫວຕໍ່ປັດຊະຍາທີ່ອາດໜ້າສົນໃຈ ແຕ່ບໍ່ເປັນຄວາມຈິງ. ແມ່ນແຕ່ໄພ່ພົນທີ່ຊື່ສັດກໍຍັງສາມາດຕົກໄປ ດ້ວຍສຽງກອງກະໜ່ຳບໍ່ຂາດສາຍຂອງວົງບາບີໂລນ.

ອ້າຍເອື້ອຍນ້ອງຂອງຂ້າພະເຈົ້າ, ຂ້າພະເຈົ້າອ້ອນວອນທ່ານໃຫ້ຫາເວລາໃຫ້ພຣະຜູ້ເປັນເຈົ້າ! ຈົ່ງໃຫ້ຮາກຖານທາງວິນຍານຂອງທ່ານໝັ້ນຄົງ ແລະ ສາມາດທົນກັບການທົດສອບຂອງເວລາ ໂດຍການເຮັດສິ່ງເຫລົ່ານັ້ນທີ່ອະນຸຍາດໃຫ້ພຣະວິນຍານບໍລິສຸດສະຖິດຢູ່ກັບທ່ານ ສະເໝີ.

ຢ່າປະໝາດຄວາມຈິງອັນເລິກເຊິ່ງ ທີ່ “ພຣະວິນຍານກ່າວ … ເລື່ອງດັ່ງທີ່ ເປັນ ຈິງ, ແລະ ເລື່ອງດັ່ງທີ່ ຈະ ເປັນ.”¹ “ພຣະວິນຍານຈະສະແດງທຸກຢ່າງທີ່ພວກທ່ານຄວນເຮັດໃຫ້ແກ່ພວກທ່ານ.”²

ບໍ່ມີສິ່ງໃດທີ່ເຊື້ອເຊີນພຣະວິນຍານໄດ້ຫລາຍກວ່າການສຸມໃຈໃສ່ພຣະເຢຊູຄຣິດ. ຈົ່ງເວົ້າເຖິງພຣະຄຣິດ, ປິຕິຍິນດີໃນພຣະຄຣິດ, ຊື່ນຊົມກັບພຣະຄຳຂອງພຣະຄຣິດ, ແລະ ມຸ້ງໜ້າດ້ວຍຄວາມແນ່ວແນ່ໃນພຣະຄຣິດ.³ ຈົ່ງເຮັດໃຫ້ວັນຊະບາໂຕຂອງທ່ານເປັນວັນທີ່ມີຄວາມສຸກ ຂະນະທີ່ທ່ານນະມັດສະການພຣະອົງ, ຮັບສ່ວນສິນລະລຶກ, ແລະ ຮັກສາວັນຂອງພຣະອົງໃຫ້ສັກສິດ.⁴

ດັ່ງທີ່ຂ້າພະເຈົ້າໄດ້ກ່າວເນັ້ນມື້ເຊົ້ານີ້, ຈົ່ງຫາເວລາໃຫ້ພຣະຜູ້ເປັນເຈົ້າ ຢູ່ໃນບ້ານຂອງພຣະອົງ. ບໍ່ມີສິ່ງໃດຈະເພີ່ມຄວາມເຂັ້ມແຂງໃຫ້ຮາກຖານທາງວິນຍານຂອງທ່ານໄດ້ ຄືກັນກັບການຮັບໃຊ້ ແລະ ການນະມັດສະການໃນພຣະວິຫານ.

ພວກເຮົາຂໍຂອບໃຈທຸກຄົນ ຜູ້ທີ່ກຳລັງກໍ່ສ້າງພຣະວິຫານໃໝ່ຂອງພວກເຮົາ. ມັນກຳລັງຖືກສ້າງຂຶ້ນຢູ່ທົ່ວໂລກ. ມື້ນີ້ ຂ້າພະເຈົ້າຍິນດີທີ່ຈະປະກາດແຜນການສ້າງພຣະວິຫານຂອງພວກເຮົາຕື່ມອີກ ໃນສະຖານທີ່ ຫລື ໃກ້ສະຖານທີ່ດັ່ງຕໍ່ໄປນີ້: ຄາວຊັງ, ໄຕ້ຫວັນ; ຕາຄະໂລບານ, ຟີລິບປິນ; ມອນໂຣເວຍ, ລີເບເຣຍ; ຄານັງກາ, ສາທາລະນະລັດປະຊາທິປະໄຕຄອງໂກ; ແອນທານານາຣິໂວ, ມາດາກາສະກາ; ຄູເລຍຄ້ານ, ແມັກຊິໂກ; ວິທໍເຣຍ, ບຣາຊິນ; ລາປາສ໌, ໂບລີວີ; ຊານຕີເອໂກຕາເວັນຕົກ, ຈີເລ; ຝອດເວີດ, ເທັກຊັດ; ໂຄດີ, ວາຍໂອມິງ; ແຣັກສະເບີກເໜືອ, ໄອດາໂຮ; ຮີເບີວາລີ, ຢູທາ; ແລະ ການບູລະນະພຣະວິຫານໂພຣໂວ ຢູທາ ຫລັງຈາກພຣະວິຫານອໍເຣັມ ຢູທາ ໄດ້ຮັບການອຸທິດ.

ຂ້າພະເຈົ້າຮັກທ່ານ, ອ້າຍເອື້ອຍນ້ອງທີ່ຮັກແພງທັງຫລາຍ. ພຣະຜູ້ເປັນເຈົ້າຮູ້ຈັກທ່ານ ແລະ ຮັກທ່ານ. ພຣະອົງເປັນພຣະຜູ້ຊ່ວຍໃຫ້ລອດຂອງທ່ານ ແລະ ພຣະຜູ້ໄຖ່ຂອງທ່ານ. ພຣະອົງນຳພາ ແລະ ຊີ້ນຳສາດສະໜາຈັກຂອງພຣະອົງ. ພຣະອົງຈະນຳພາ ແລະ ຊີ້ນຳ ທ່ານ ໃນຊີວິດສ່ວນຕົວຂອງທ່ານ ຖ້າຫາກທ່ານຈະ ຫາເວລາໃຫ້ພຣະອົງ ໃນຊີວິດຂອງທ່ານ—ທຸກໆວັນ.

ຂໍໃຫ້ພຣະເຈົ້າຈົ່ງສະຖິດຢູ່ກັບທ່ານຈົນກວ່າພວກເຮົາຈະພົບກັນອີກ, ຂ້າພະເຈົ້າອະທິຖານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.