ຄຳຕອບຈະແມ່ນພຣະເຢຊູຄຣິດສະເໝີ
ບໍ່ວ່າທ່ານຈະມີຄຳຖາມ ຫລື ບັນຫາໃດກໍຕາມ, ທ່ານຈະພົບຄຳຕອບຢູ່ໃນພຣະຊົນຊີບ ແລະ ຄຳສອນຂອງພຣະເຢຊູຄຣິດສະເໝີ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ພວກເຮົາໄດ້ຮັບການລ້ຽງດູທາງຝ່າຍວິນຍານໃນຊ່ວງໄລຍະສອງວັນນີ້. ກຸ່ມນັກຮ້ອງກໍສຸດຍອດ. ຜູ້ທີ່ກ່າວປາໄສໄດ້ເປັນເຄື່ອງມືສຳລັບພຣະຜູ້ເປັນເຈົ້າແທ້ໆ. ຂ້າພະເຈົ້າອະທິຖານວ່າ ທ່ານຈະສະແຫວງຫາພຣະວິນຍານບໍລິສຸດ ເພື່ອນຳພາທ່ານໃນການສຶກສາຂອງທ່ານ ຂະນະທີ່ທ່ານໄຕ່ຕອງຄວາມຈິງທີ່ຖືກສິດສອນຈາກແທ່ນປາໄສບ່ອນນີ້. ພວກເພິ່ນຖືກສົ່ງມາຈາກສະຫວັນຢ່າງແທ້ຈິງ.
ໜຶ່ງອາທິດຈາກມື້ນີ້ ຈະເປັນວັນອາທິດອີດສະເຕີ. ມັນເປັນການສະເຫລີມສະຫລອງທາງສາດສະໜາ ທີ່ສຳຄັນທີ່ສຸດສຳລັບຜູ້ຕິດຕາມຂອງພຣະເຢຊູຄຣິດ. ເຫດຜົນຕົ້ນຕໍທີ່ເຮົາສະເຫລີມສະຫລອງຄຣິດສະມາດ ກໍຍ້ອນອີດສະເຕີ. ບົດຮຽນໃນປຶ້ມ ຈົ່ງຕາມເຮົາມາ ອາທິດນີ້ ກະຕຸ້ນໃຫ້ທ່ານສຶກສາການສະເດັດເຂົ້ານະຄອນເຢຣູຊາເລັມຂອງພຣະຜູ້ຊ່ວຍໃຫ້ລອດຢ່າງຜູ້ມີໄຊ, ການຊຳລະລ້າງພຣະວິຫານຂອງພຣະອົງ, ການຮັບທຸກທໍລະມານທີ່ເຄັດເຊມາເນຂອງພຣະອົງ, ການຄຶງຂອງພຣະອົງ, ແລະ ການຟື້ນຄືນພຣະຊົນຢ່າງສະຫງ່າລາສີຂອງພຣະອົງ, ແລະ ການປະກົດຕົວຕໍ່ຜູ້ຕິດຕາມຂອງພຣະອົງຫລັງຈາກນັ້ນ.1
ຈົ່ງຊື່ນຊົມກັບຂໍ້ພຣະຄຳພີທີ່ສັກສິດເຫລົ່ານີ້ ແລະ ຊອກຫາໃນທຸກວິທີທາງທີ່ທ່ານຈະສາມາດເຮັດໄດ້ ເພື່ອຂອບພຣະໄທພຣະບິດາເທິງສະຫວັນ ທີ່ໄດ້ສົ່ງພຣະບຸດອົງດຽວທີ່ຖືກຳເນີດຂອງພຣະອົງມາໃຫ້ເຮົາ.2 ຍ້ອນພຣະເຢຊູຄຣິດ, ເຮົາຈຶ່ງສາມາດກັບໃຈ ແລະ ໄດ້ຮັບການໃຫ້ອະໄພຈາກບາບຂອງເຮົາ. ຍ້ອນພຣະອົງ, ເຮົາແຕ່ລະຄົນຈຶ່ງຈະໄດ້ຟື້ນຄືນຊີວິດ.
ຂ້າພະເຈົ້າຂໍເຊື້ອເຊີນໃຫ້ທ່ານສຶກສາເລື່ອງລາວກ່ຽວກັບການປະກົດຕົວຂອງພຣະຜູ້ຊ່ວຍໃຫ້ລອດຕໍ່ຊາວນີໄຟໃນອາເມຣິກາຄືນອີກ, ດັ່ງທີ່ມີບັນທຶກໄວ້ຢູ່ໃນ 3 ນີໄຟ ນຳອີກ. ບໍ່ດົນກ່ອນການປະກົດຕົວ, ສຸລະສຽງຂອງພຣະອົງກໍໄດ້ຍິນທ່າມກາງຜູ້ຄົນ ລວມທັງຄຳອ້ອນວອນຕໍ່ໄປນີ້:
“ບັດນີ້ພວກເຈົ້າຍັງຈະບໍ່ຫັນກັບມາຫາເຮົາບໍ, ແລະ ກັບໃຈຈາກບາບຂອງພວກເຈົ້າ ແລະ ປ່ຽນໃຈເຫລື້ອມໃສ, ເພື່ອເຮົາຈະໄດ້ປິ່ນປົວພວກເຈົ້າ?
“… ຈົ່ງເບິ່ງ, ແຂນແຫ່ງຄວາມເມດຕາສົງສານຂອງເຮົາໄດ້ເດ່ອອກມາຫາພວກເຈົ້າແລ້ວ, ແລະ ຜູ້ໃດກໍຕາມທີ່ຈະເຂົ້າມາຫາເຮົາ, ເຮົາຈະຮັບເອົາໄວ້.”3
ອ້າຍເອື້ອຍນ້ອງທີ່ຮັກແພງ, ພຣະເຢຊູຄຣິດໄດ້ເຊື້ອເຊີນເຮົາແບບດຽວກັນນັ້ນ ໃນມື້ນີ້. ຂ້າພະເຈົ້າຂໍໃຫ້ທ່ານມາຫາພຣະອົງ ເພື່ອພຣະອົງຈະສາມາດປິ່ນປົວ ທ່ານ! ພຣະອົງຈະປິ່ນປົວທ່ານຈາກບາບ ເມື່ອທ່ານກັບໃຈ. ພຣະອົງຈະປິ່ນປົວທ່ານຈາກຄວາມໂສກເສົ້າ ແລະ ຄວາມຢ້ານກົວ. ພຣະອົງຈະປິ່ນປົວທ່ານຈາກບາດແຜຂອງໂລກນີ້.
ບໍ່ວ່າທ່ານຈະມີຄຳຖາມ ຫລື ບັນຫາໃດກໍຕາມ, ທ່ານຈະພົບຄຳຕອບຢູ່ໃນພຣະຊົນຊີບ ແລະ ຄຳສອນຂອງພຣະເຢຊູຄຣິດສະເໝີ. ຈົ່ງຮຽນຮູ້ກ່ຽວກັບການຊົດໃຊ້ຂອງພຣະອົງ, ຄວາມຮັກຂອງພຣະອົງ, ຄວາມເມດຕາຂອງພຣະອົງ, ຄຳສອນຂອງພຣະອົງ, ແລະ ພຣະກິດຕິຄຸນແຫ່ງການປິ່ນປົວ ແລະ ຄວາມກ້າວໜ້າ ທີ່ຖືກຟື້ນຟູຂອງພຣະອົງ. ຈົ່ງຫັນມາຫາພຣະອົງ! ຈົ່ງຕິດຕາມພຣະອົງ!
ພຣະເຢຊູຄຣິດຄືເຫດຜົນທີ່ພວກເຮົາສ້າງພຣະວິຫານ. ແຕ່ລະແຫ່ງເປັນບ້ານທີ່ສັກສິດຂອງພຣະອົງ. ການເຮັດພັນທະສັນຍາ ແລະ ການຮັບເອົາພິທີການທີ່ສຳຄັນຢູ່ໃນພຣະວິຫານ, ຕະຫລອດທັງການສະແຫວງຫາທີ່ຈະຫຍັບເຂົ້າໃກ້ພຣະອົງຫລາຍຂຶ້ນໃນທີ່ນັ້ນ, ຈະເປັນພອນໃຫ້ແກ່ຊີວິດຂອງທ່ານ ໃນວິທີທີ່ການນະມັດສະການແບບອື່ນບໍ່ສາມາດເຮັດໄດ້. ດ້ວຍເຫດນີ້, ພວກເຮົາຈຶ່ງເຮັດທຸກສິ່ງທຸກຢ່າງໃນອຳນາດຂອງພວກເຮົາ ເພື່ອໃຫ້ສະມາຊິກຂອງພວກເຮົາທົ່ວໂລກສາມາດເຂົ້າເຖິງພອນຂອງພຣະວິຫານໄດ້ຫລາຍຂຶ້ນ. ມື້ນີ້, ຂ້າພະເຈົ້າກະຕັນຍູທີ່ຈະປະກາດແຜນຂອງພວກເຮົາທີ່ຈະສ້າງພຣະວິຫານໃໝ່ ໃນສະຖານທີ່ດັ່ງຕໍ່ໄປນີ້:
-
ເມືອງເຣຕາລູເລວ, ປະເທດກວາເຕມາລາ
-
ເມືອງອີກີໂຕສ໌, ປະເທດເປຣູ
-
ເມືອງເຕເຣຊີນາ, ປະເທດບຣາຊິນ
-
ເມືອງນາຕານ, ປະເທດບຣາຊິນ
-
ເມືອງທູເກກາຣາວ, ປະເທດຟີລິບປິນ
-
ເມືອງອິລູໂລ, ປະເທດຟີລິບປິນ
-
ເມືອງຈາກາຕາ, ປະເທດອິນໂດເນເຊຍ
-
ເມືອງແຮມເບີກ, ປະເທດເຢຍລະມັນ
-
ເມືອງເລດບຣິຈ, ແຂວງອາເບີຕາ, ປະເທດການາດາ
-
ເມືອງແຊນໂຮເຊ, ລັດຄາລິຟໍເນຍ
-
ເມືອງເບກເກີຊະຟຽວ, ລັດຄາລິຟໍເນຍ
-
ເມືອງສະປຣິງຟຽວ, ລັດມີເຊີຣີ
-
ເມືອງຊາລ໊ອດ, ລັດນອດຄາໂຣລາຍນາ
-
ເມືອງວິນເຈດສະເຕີ, ລັດເວີຈີເນຍ
-
ເມືອງແຮຣິສະເບີກ, ລັດເພັນໂຊເວເນຍ
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າເປັນພະຍານວ່າ ພຣະເຢຊູຄຣິດຊີ້ນຳວຽກງານໃນສາດສະໜາຈັກຂອງພຣະອົງ. ຂ້າພະເຈົ້າເປັນພະຍານວ່າ ການຕິດຕາມພຣະອົງເປັນພຽງຫົນທາງດຽວທີ່ຈະນຳໄປສູ່ຄວາມສຸກອັນຍືນຍົງໄດ້. ຂ້າພະເຈົ້າຮູ້ວ່າ ອຳນາດຂອງພຣະອົງກຳລັງລົງມາສູ່ຜູ້ຄົນທີ່ຮັກສາພັນທະສັນຍາຂອງພຣະອົງ, ຜູ້ “ມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່.”4 ຂ້າພະເຈົ້າຂໍເປັນພະຍານ, ດ້ວຍຄວາມຮັກ ແລະ ພອນສຳລັບທ່ານແຕ່ລະຄົນ, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.