Maʻá e Fānau Īkí
Ko ha Meʻaʻofa mei he Tamai Hēvaní
Naʻe fiefia ʻa ʻIsapela he kuo hoko ʻa e faʻahitaʻu failaú. Naʻe saiʻia ke fanongo ki he fanga manupuná. Naʻe saiʻia ke vaʻinga ʻi he musie lanumatá.
Naʻe fiefia ʻa ʻIsapela he kuo taimi ʻa e Toetuʻú. Naʻá ne ʻilo ko e Toetuʻú ko ha ʻaho makehe. ʻOku mau fakamanatua ʻi he Toetuʻú ʻa e taimi naʻe toe moʻui ai ʻa Sīsuú.
Naʻe tufa ʻi he Palaimelí ʻe Sisitā Mātini ha ngaahi kala ki he fānau kotoa ʻi he kalasí. Naʻá ne kole ange ke nau tā ʻa e meʻaʻofa maʻongoʻonga taha kuo foaki ange ʻe he Tamai Hēvaní kiate kinautolú.
Naʻe tā ʻe Maikolo ha fakatātā hono fāmilí.
Naʻe tā ʻe ʻIlisa ha fakatātā hono kaungāmeʻá.
Naʻe tā ʻe ʻAnitoni ha fakatātā ʻo hono ʻapí.
Naʻe sio ʻa ʻIsapela ki he ngaahi tā fakatātaá. Naʻa nau lelei ʻaupito.
Naʻe fakakaukau ʻa ʻIsapela pe ko e hā ʻoku totonu ke ne taá. Naʻe fiefia ke ne maʻu ha fāmili. Naʻe fiefia ke ʻi ai hano ngaahi kaungāmeʻa. Naʻe fiefia ke ʻi ai hano ʻapi.
Naʻe fakakaukau ʻa ʻIsapela ki ha meʻaʻofa kehe kuo foaki ʻe he Tamai Hēvaní ki he kakaí kotoa. Naʻá Ne foaki ki he taha kotoa ha meʻaʻofa ko ha Fakamoʻui. Ne toʻo leva ʻe ʻIsapela ʻene ngaahi foʻi kala. Naʻá ne tā ha fakatātā ʻo Sīsū Kalaisi.
Naʻe ʻeke ange ʻe Sisitā Mātini kia ʻIsapela pe ko e hā naʻá ne taá.
Talaange ʻe ʻIsapela, “Naʻá ku tā ha fakatātā ʻo Sīsū. Ko Ia ʻa e meʻaʻofa maʻongoʻonga tahá.”
Tā fakatātaaʻi ʻe Dani Jones