Ko e Ngaahi Tāpuaki ʻo e Vahehongofulú

ʻOku ʻomai ʻe he totongi vahehongofulú ha ngaahi tāpuaki maʻongoʻonga, tautautefito ʻi hono tokoniʻi kitautolu ke tau fakatokangaʻi lelei ange ʻa e toʻukupu ʻo e ʻEikí ʻi heʻetau moʻuí.

Kuo fekauʻi kitautolu ʻe he ʻEikí ke tau totongi vahehongofulu. ʻI he tafaʻaki ʻe tahá, ʻOku talaʻofa te Ne “fakaava … ʻa e ngaahi matapā ʻo e langí, pea lilingi … mai ha tāpuaki, he ʻikai ha potu ʻe faʻa hao ki ai” (Malakai 3:10). Ka, ko ʻEne ngaahi tāpuakí ʻoku hoko mai ia ʻi Heʻene founga pē ʻAʻana pea ʻi Hono taimi pē ʻOʻona pea ʻe lava pē ke fakalaumālie pe fakatuʻasino.

ʻI he ngaahi taimi ʻo e faingataʻa fakaʻekonōmiká pe fakafāmilí, ʻe hangē ʻoku ngali taumamaʻo e ngaahi tāpuaki kuo talaʻofa mai ʻe he ʻEikí ki he niʻihi ʻoku totongi totonu ʻenau vahehongofulú. Kae hangē ko e fakakaukau ʻa e Kāingalotu ʻo e Ngaahi ʻAho Kimuí Ni ko ʻení, ʻoku tokoni ʻa e totongi vahehongofulú ke fakatokangaʻi lelei ange ai ʻe he Kāingalotu ʻo e Siasí ʻa e toʻukupu ʻo e ʻEikí ʻi heʻenau moʻuí.

Maʻá e Mātuʻá

ʻI he talanoa ʻo e “Kiʻi Sēniti pē ʻe Taha” (Liahona, ʻAokosi 2011, 70–71), ʻoku ʻilo ai ʻe Taniela ko e totongi vahehongofulú ko ha fili ʻoku lelei—tatau ai pē kapau ko ʻene foakí ko ha foʻi paʻanga maka pē ʻe taha. ʻOku fakamatalaʻi ʻe he ʻekitivitī ʻoku ʻoatu hení ha ngaahi founga ʻoku fakaʻaongaʻi ki ai ʻa e paʻanga vahehongofulú. ʻE lava ke hoko hono lau fakafāmili ʻo e fakamatala ko ʻení ko ha founga lelei ke kamataʻaki ha pōtalanoa fekauʻaki mo e vahehongofulú. Fakakaukau ke ngāue ʻaki ha niʻihi ʻo e ngaahi fakatātā ʻi he ʻekitivitií ke teuteuʻi ʻaki ʻenau fanga kiʻi foʻi hina pe puha vahehongofulú, ke tokoni ke manatuʻi ʻe hoʻo fānaú ʻa e founga ʻoku ngāue ʻaki ki ai ʻe he Siasí ʻa e vahehongofulú.

Ko e ngaahi pulusinga ki muʻa ʻo e Liahoná ʻe lava ke maʻu ia ʻi he liahona.lds.org.

Ko Hono Tali ʻo e Ngaahi Fehuʻí

ʻOku Fakaʻaongaʻi Fēfē ʻa e Vahehongofulú?

Ko e tefitoʻi moʻoni ʻo e vahehongofulú—ʻa hono foaki taʻe-fakakounaʻi ʻa e vahe hongofulu ʻe taha ʻo ʻetau tupú ki he ngāue ʻa e ʻOtuá—naʻe akoʻi ia talu mei he taimi ʻo e Fuakava Motuʻá (vakai, Sēnesi 14:17–21). Ko e founga ʻeni hono fakapaʻanga ʻe he ʻEikí Hono Siasí. ʻOku ngāue ʻaki he ʻahó ni ʻa e vahehongofulú ki he (1) langa ʻo e ngaahi temipalé, ngaahi falelotú, pea mo ha ngaahi fale kehe ʻo e Siasí; (2) ʻoatu ha paʻanga ngāue ki he Siasí; (3) fakapaʻanga e polokalama ngāue fakafaifekaú (ʻoku ʻikai ke kau heni ʻa e ngaahi fakamole fakafoʻituitui ʻa e faifekaú); (4) teuteu ʻo e ngaahi nāunau ʻoku ngāue ʻaki ʻi he ngaahi kalasi he Siasí mo e ngaahi houalotú; pea mo (5) hono fakahoko ʻo ha ngaahi ngāue mahuʻinga kehe, hangē ko e ngāue fakatemipalé mo e hisitōlia fakafāmilí.

Toʻohemá: faitaá © Photospin; ʻata mei muí ne fai ʻe Sarah Carabine; toʻomataʻú: Against the Wind, tā ʻe Liz Lemon Swindle, ʻikai totonu ke hiki hano tatau

Faitaaʻi ʻe Ed Ferrin