Ko e Fakahaofi mei he Loto Manafa Mainá

Fai ʻe Russell Westergard

ʻOku nofo ʻa Lāsolo Uesitakaati ʻi Vesinia ʻi he USA.

Naʻe ʻikai ke mau lava ʻo ʻomi ʻa e sōtia ne maʻú, ka ne mau lava pē ʻo fakalotolahiʻi ia, mo fakaʻaiʻai ʻene ngaahi feingá, pea fiefia ʻi heʻene lavameʻá.

Naʻá ku taki ha kau sōtia ki Kueiti ʻi he lolotonga ʻo e Tau he Kūlifá. ʻI he taimi ne mau avangi ai e laine maluʻí, ne mau kumi e ngaahi toitoiʻanga ʻo e filí ke fakapapauʻi te mau malu pea mo kumi ha faʻahinga meʻa pē naʻe mahuʻinga ke ʻilo.

Naʻá ku toki hū atu pē ki ha feituʻu leʻo naʻe kapa feʻunga mo haʻaku fanongo atu ki ha sātini Pilitānia ʻoku kaikaila leʻo lahi, “Tuʻu! ʻOua naʻá ke toe manga!” Ne hū atu hoku ʻulú ki tuʻa mei he luó, ʻou sio ki ha taha ʻo ʻeku kau sōtiá ʻoku ʻi ha tuʻunga fakatuʻutāmaki. Ne lue atu ia ki ha feituʻu ʻataʻatā ke toʻo mai ha meʻa fakapepa ka kuo tuʻu ʻeni ia ʻi ha fuʻu loto ʻataʻatā fonu maina. Ko e taimi naʻe fanongo ai ki he kaila ʻa e sātiní, naʻe tuʻu peá ne ʻiloʻi hono tuʻunga fakatuʻutāmakí.

ʻI heʻemau fakatahataha atu ki he ngataʻanga ʻo e manafa fonu mainá, ne lava ʻemau timí ke ʻiloʻi ʻoku puna e muú he sōtia kei siʻí ni pea naʻe tetetete hono sinó. Naʻe fie maʻu ke mau ngāue fakavavevave ka naʻe ʻikai ke mau lava ʻo ʻoatu ha kau sōtia ke ʻomai ʻo taʻe fakatuʻutāmaki ki heʻenau moʻuí pea pehē ki haʻaná. Naʻe ʻikai ke mau toe aleaʻi pe toe momou ka mau kamata talanoa ki he sōtiá, ʻo kaila atu ʻaki ha ngaahi lea fakafiemālie, fakalotolahi, pea mo ha fakahinohino. Naʻe lava ke mau mamata ki he tafe hifo ʻa e loʻimatá ʻi hono fofongá mo ongoʻi ʻa e ilifiá ʻi heʻene tali maí, ka naʻe kamata ke kiʻi nonga ʻi heʻemau fakalotolahí.

Naʻá ne maʻu ha lotolahi feʻunga ʻi ha ʻosi ha kiʻi taimi ke fakasio ki mui ki he anga ʻo ʻene haʻú, peá ne talamai ʻoku lava ʻo sio ki he ʻilonga tamatemate hono vaʻé ʻi he ʻoneʻoné. Naʻe kamata māmālie leva ʻi heʻemau fakalotolahí atu ke muimui ʻo foki ʻi hono halangá. ʻI heʻene molomolomuivaʻe māmālie ʻi hono halanga ʻi muʻá, naʻe lava ai ʻo hao mai mei he manafa fonu mainá, pea puna mai ʻo fāʻofua kiate kimautolu ʻi heʻene fakahoko ʻa e foʻi sitepu fakaʻosí. Naʻe kaila ʻa e kau sōtia tokolahi naʻe ʻi he tafaʻakí ʻi he fiefia ʻi heʻemau toe talitali lelei mai iá. Naʻe fetongi e ngaahi loʻimata ʻo e manavasiʻí ʻaki ha malimali mo e fefāʻofuaʻaki.

ʻOku ʻi ai hotau tokosiʻi kuo ʻosi tuʻu ʻi he ngutungutu ʻo ha manafa maina moʻoni. Ka ʻoku ʻilo ʻe hotau tokolahi ʻa kinautolu kuo mavahe mei he malaʻe malu fakalaumālié ʻo tofanga ʻi ha ngaahi manafa maina ʻo e moʻuí. Pea hangē ko e sōtia kei talavoú, ʻe lava mo kinautolu ke ongoʻi liʻekina, ilifia, pea mo taʻepauʻia. Ka naʻe ʻikai teitei liʻekina ʻa e sōtia ko iá. Naʻe ʻi ai haʻane timi ʻi he tafaʻakí naʻa nau fakalotolahi ki ai, ha ngaahi kaungāmeʻa naʻa nau fie maʻu ai ke foki mai pea naʻe ʻikai ke nau foʻi. Naʻe ʻi ai hano kau taki naʻa nau fai ha fakahinohino mo ha fakalotolahi. Ka ko ia naʻe pau ke lue ki tuʻa mei he manafa mainá, ka naʻá mau tokoniʻi fakakātoa ia ke ne maʻu ha ivi ke fakahoko ia. Naʻa mau fakafiefiaʻi hili ʻa hono fakahaofí ʻaki ha ʻofa mo ha fiefia moʻoni.

ʻE lava ke lahi pehē pē mo e ngaahi fakahaofi fakalaumālié. Tatau ai pē pe ʻoku tau ala atu ʻo tokoni fakafāmili, ko ha ngaahi kaungāmeʻa, pe fakauooti pe fakakolo, ka ʻe lava ʻetau ngaahi ngāué ʻo ʻaonga. Mahalo naʻe hanga ʻe he ngaahi lea taimi totonu ʻo e fakalotolahí mo e fakahinohinó ʻo fakahaofi e moʻui ʻa e sōtiá. Ko e meʻa tatau pē, te tau lava ʻo tokoni ke fakahaofi ha niʻihi kehe mei he ngaahi fakatuʻutāmaki ʻo e fakapoʻuli fakalaumālié ʻaki hano fai e fakalotolahi mo e fakahinohino te ne fakaiku fakafoki mai kinautolú. ʻI heʻetau fai iá, ʻe lahi ʻa ʻetau fiefiá—ʻo ʻikai ʻi ha mōmēniti pē ʻo e moʻui ko ʻení ka ʻi ʻitāniti foki (vakai, T&F 18:15).

Tā fakatātaaʻi ʻo e ʻatá ʻe Craig Dimond