ʻAi ke ke Fiefia Ai

Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “ʻA e Ngaahi Fakaʻiseʻisá mo e Tukupaá,” Liahona, Nōvema 2012, 23–24.

ʻOku ou saiʻia mo hoku uaifi ko Halietá, ke heka pasikala. ʻOku fakafiefia ke mavahe ʻo fiefia ʻi he ngaahi fakaʻofoʻofa ʻo natulá. ʻOku ʻi ai ha halanga pau ke ma lele ai, ka ʻoku ʻikai ke ma fuʻu tokanga ki he mamaʻo ʻo ʻema oó mo e vave ʻo ʻema lelé ʻi hono fakafehoanaki ki he kau heka pasikala kehé.

Neongo ia, ʻoku ou faʻa fakakaukau ke ma kiʻi feʻauʻauhi. Naʻe aʻu ʻo u fakakaukau te ma lava ʻo vave pe lele oma ange kapau te ma kiʻi feinga lahi ange. Pea ʻi he taimi ʻe niʻihi ʻoku ou faʻa fai ʻa e fehālaaki lahi ko hono talaange ʻo e foʻi fakakaukaú ni ki hoku uaifi fakaʻofoʻofá.

Ko ʻene tali angamaheni ki heʻeku faʻahinga fokotuʻu pehení ʻoku angaʻofa, mātuʻaki mahino, pea mo mātuʻaki hangatonu maʻu pē. ʻOku malimali pē mo pehē mai, “Tietā, ʻoku ʻikai ko ha lova; ko ha fononga. ʻAi ke ke fiefia ai.”

Hono ʻikai ke moʻoni!

Ko e taimi ʻe niʻihi ʻoku tau mātuʻaki tokanga pē ke ʻosi ha meʻa ʻo ʻikai ai ke tau maʻu ha fiefia ʻi he fonongá. ʻOku ʻikai ke u ʻalu ʻo heka pasikala mo hoku uaifí koeʻuhí ko ʻeku vēkeveke ke aʻu ki he fakaʻosingá. ʻOku ou ʻalú koeʻuhí he ʻoku lelei mo fakafiefia ʻa ʻeku feohi mo iá.

ʻOku ʻikai ʻapē fakavalevale ke fakameleʻi ʻa e ngaahi aʻusia lelei mo fakafiefiá koeʻuhí ko ʻetau fakakaukau pē ki he mōmēniti ʻe ngata aí?

ʻOku tau fakafanongo nai ki he fasi mālié mo tatali ki he nota fakaʻosí ke holo hifo ka tau toki mālieʻia moʻoni ai? ʻIkai. ʻOku tau fanongo mo mālieʻia he kehekehe ʻa e ngaahi ongó, fasí, mo e fakafaʻafaʻahi ʻo e taʻangá.

ʻOku fai ʻetau lotú mo fakakaukauʻi pē ʻa e “ʻēmení” pe fakaʻosí? ʻIkai. ʻOku tau lotu ke tau ofi ki heʻetau Tamai Hēvaní, ke maʻu Hono Laumālié mo ongoʻi ʻEne ʻofá.

ʻOku ʻikai totonu ke tali ʻetau fiefiá ke tau toki aʻu ki ha tuʻunga he kahaʻú, ʻo toki ʻilo ai ta naʻe ʻi ai maʻu pē ʻa e fiefiá—he taimi kotoa pē! ʻOku ʻikai fakataumuʻa ʻa e moʻuí ia ke fakahoungaʻi ʻi ha toki fakakaukau mai ki ai. Naʻe tohi ʻe he taha faʻu Sāmé, “Ko e ʻaho ʻeni kuo ngaohi ʻe he ʻEikí. “Ke tau fiefia pea nēkeneka aí.” [Saame 118:24.]