ʻOku Tāpuakiʻi ʻe he Vahehongofulú ʻa e Ngaahi Fāmilí

Senitī Kuleihemi, Niu ʻIoke, USA

Naʻá ku tupu hake ʻi he Siasí ka naʻá ku ʻauhia atu ʻi hoku taʻu hongofulu tupú. Ko e taimi naʻá ku foki mai ai ki he Siasí, naʻe poupouʻi au ʻe hoku husepāniti ko Teilí, ka naʻe ʻikai fie talanoa ia mo e kau faifekaú.

Naʻá ku talanoa mo e pīsopé ke maʻu haʻaku lekomeni temipale ʻi he hili ʻo ʻeku foki mai ʻo mālohí. Naʻá ne ʻeke mai pe ko ha taha totongi vahehongofulu kakato au, pea naʻá ku fiefia ke talaange, ʻio. Naʻá ku ʻohovale ʻi he ʻeke mai ʻe he pīsopé, “ʻOku ʻilo ʻe ho husepānití ʻokú ke totongi vahehongofulu?” Naʻá ku ʻohovale—ko e hā hano mahuʻinga? Naʻe kole fakalelei mai ʻe he pīsopé ke u toki foki ange ʻi ha hili haʻaku fakahā kia Teili naʻá ku totongi vahehongofulú.

Naʻe fāifai peá u maʻu ha loto lahi ʻi ha pongipongi Sāpate ʻe taha ke talaange ki hoku husepānití naʻá ku totongi vahehongofulu. Naʻe fakaʻohavaleʻi au ʻe Teili ʻaki haʻane pehē mai pē, “ʻOku ou ʻilo.” Ko e taha ʻeni ʻo e ngaahi mana lahi ʻo e vahehongofulú.

Taimi nounou pē mei ai, kuo tuku mai ʻe Teili kiate au ʻa e ngaahi meʻa fakapaʻanga ʻo e fāmilí. Ko e taimi naʻá ku talaange ai te u totongi vahehongofulu ʻi heʻemau paʻanga hū maí kotoá, naʻá ne tali ia koeʻuhí he kuó ne mamata ki he ngaahi tāpuaki ʻoku lava ke ʻomi ʻe he vahehongofulú.

Ko e taimi ní ʻoku fonu maʻu pē ʻemau ʻū kōpaté, ʻoku mau lotu fakafāmili ʻi he ʻaho kotoa pē, ʻoku mau fakaafeʻi ʻa e kau faifekaú meimei tuʻo taha ʻi he māhina, pea ʻoku kau hoku husepānití ʻi he efiafi fakafāmili ʻi ʻapí. ʻOku ou tui ʻe kau ʻa Teili ʻi ha ʻaho ki he Siasí pea ʻe kamata ʻene uluí ʻi heʻemau fili ke totongi vahehongofulu kakató.