Toʻu Tupú
Kātaki ʻo Fakamoʻui Hoku Lotó
Kelesi Lotaki, nofo ‛i Minesota, Minnesota, USA.
ʻI he kakato e taʻu taha ʻo e mate hoku tokouá, naʻá ku fakakaukau ki hoku taimi talu mei heʻene maté. Naʻe ʻikai ngata pē ʻi heʻeku manatuʻi e mamahi lahi naʻá ku ongoʻí ka mo e ngaahi tāpuaki foki naʻe foaki mai ʻe he ʻOtuá kiate aú.
Naʻe ʻikai teitei mahino kiate au e ʻuhinga ʻo e pehē ʻe he kakaí ʻe lava ʻe he mate ha ʻofaʻangá ʻo ʻomi ha ngaahi tāpuakí. Naʻe ʻikai ke lava ʻo mahino kiate au pe ʻe anga fēfē haʻaku maʻu ha fiefia mo fakahoungaʻi ha faʻahinga meʻa ʻokú ne fakamamahiʻi lahi au. Neongo ia, naʻe ʻi ai ha pō ʻe taha, naʻá ne liliu fakaʻaufuli ʻeku fakakaukaú.
Naʻá ku ofo hake ʻi he vaeua poó mo ha loto mafasia kuo teʻeki ke u maʻu ki muʻa. Naʻe fakafulutāmakiaʻi au ʻe he mamahí. Naʻá ku tūʻulutui ʻo tangi ʻi ha lotu ki heʻeku Tamai Hēvaní. Naʻe akoʻi au ʻi heʻeku moʻuí kotoa ki he Fakaleleí pea mo e mālohi faifakamoʻui fakaofo ʻo Sīsū Kalaisí. Ka ko ʻeni kuo siviʻi ʻeku tuí. Naʻá ku tui moʻoni nai? Naʻá ku kole ki heʻeku Tamai Hēvaní ke kātaki muʻa ʻo fakamoʻui hoku lotó. Naʻe tōtuʻa ʻa e mamahí ke u lava ʻo fefaʻuhi tokotaha mo ia.
Pea ne lōmekina hoku sinó kakato ʻe ha ongoʻi nonga, fakafiemālie, pea mo ha ʻofa. Naʻá ku ongoʻi ʻo hangē kuo ʻōʻōfaki au ʻe he ʻOtuá ʻaki Hono toʻukupú mo maluʻi au mei he mamahi lahi fau naʻá ku ongoʻí. ʻOku ou kei ʻofa pē ki hoku tokouá, ka ne u lava ʻeni ke fulihi ʻeku fakakaukaú. Naʻe lahi fau ha ngaahi meʻa keu ako mei he meʻá ni.
ʻOku ou ʻilo ʻoku ʻatā ke maʻu ʻa e ʻofa mo e melino ʻa e ʻEikí. Ko e meʻa pē ʻoku fie maʻú ke tau maʻu ia.