Poupouʻi ʻe he Kau Takí ʻa e Kāingalotú ke Fakafehokotaki ʻa e Hisitōlia Fakafāmilí ki he Temipalé
Naʻe tuku atu ʻe he Kau Palesitenisī ʻUluakí ha tohi ʻi ʻOkatopa 2012 ʻo kole ki he kāingalotú ke nau fakaʻaongaʻi ʻa ʻenau ngaahi hingoa fakafāmilí ki he ngāue fakatemipalé pea mo fokotuʻu atu ha meʻa mahuʻinga ʻe nima ke tokoni ki he kāingalotú ke nau a’usia ha lavameʻa lahi ange ʻi hono fakahoko ʻo e hisitōlia fakafāmilí mo e ō ki he temipalé.
ʻE lava ke tali ʻe he kāingalotú ʻa e kole ko ʻeni ke kumi, teuteu, pea mo ʻoatu ʻa e ngaahi hingoá ki he temipalé ʻaki haʻanau fakaʻaongaʻi ʻa e ngaahi nāunau mo e ngaahi maʻuʻanga tokoni ʻoku ʻoatu ʻi he LDS.org mo e FamilySearch.org. Ko e ngaahi meʻa ʻeni naʻe fokotuʻu atu ʻi he tohi ʻa e Kau Palesitenisī ʻUluakí:
1. “ʻE lava ke fakatupulaki ʻa e meʻa ʻoku tau aʻusia ʻi he temipalé ʻi he taimi ʻoku maʻu ai ʻe he kāingalotu ʻo e Siasí ʻa e hingoa ʻenau ngaahi kuí pea nau ʻave ʻa e ngaahi hingoa ko iá ki he temipalé ke fai ki ai e ngaahi ouaú.”
Naʻe pehē ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko ha taimi ʻaonga moʻoni haʻo fai ha ngāue ʻi he temipalé, ka ʻi hono fai ko ia ʻo e ngaahi ouau fakafofongá ki ha taha hoʻo ngaahi kuí, ʻe toe toputapu ange ai e taimi ʻi he temipalé mo ke maʻu ha ngaahi tāpuaki lahi ange. Naʻe fakahā ʻe he Kau Palesitenisī ʻUluakí, ‘Ko hotau tefitoʻi fatongiá ke kumi mo ʻiloʻi ʻetau ngaahi kui totonú’” (“Ko e Fiefia ʻi Hono Huhuʻi ʻo e Kau Pekiá,” Liahona, Nōvema 2012, 93–94).
Te mou ʻilo lahi ange ʻi he LDS.org, fekauʻaki mo e ʻuhinga kuo kole mai ai ke tau teuteu ha ngaahi hingoa mei heʻetau hisitōlia fakafāmilí ke ʻave ki he temipalé ʻaki haʻo lomiʻi ʻi he Resources, Family History, mo e Ko e hā ʻoku totonu ai ke tau fai e ngāue fakatemipalé maʻa ʻetau ngaahi kui totonú? (ʻe maʻu e vitioó ʻi he Ko e Hā ʻOku Tau Fakahoko ai ʻa e Ngāue Hisitōlia Fakafāmilí?).
2. “ʻOku poupouʻi atu e kāingalotu ko ia ʻoku fakangatangata pē ʻenau lava ʻo fai ʻenau fekumi hisitōlia fakafāmili ʻanautolu peé, ke nau fakahoko e ngaahi ouau fakafofongá ʻo nau fakaʻaongaʻi e ngaahi hingoa ʻa e kāingalotu kehé pe ko ia ʻoku ʻoatu ʻe he temipalé.”
ʻOku tokolahi ha kāingalotu ʻo e Siasí ʻoku faingataʻa ke nau aʻu ki he ngaahi temipalé. ʻOku poupouʻi ʻe he kau taki ʻo e Siasí ʻa e kāingalotu ko ʻení ke nau fai pē meʻa te nau lavá. ʻE lava ke fakahoko ʻe he kāingalotu ʻoku ʻikai ofi ki ha tempalé ʻa e fakatotolo ʻi he hisitōlia fakafāmilí pea tuku e ngāue ki he ouau fakatemipale ke fai ʻe ha niʻihi kehe.
ʻE fefaʻuhi ha kāingalotu kehe ʻe niʻihi mo e ongoʻi kuo ʻosi fakahoko kotoa ʻa e fakatotolo ʻi he hisitōlia fakafāmilí mo e ngāue ʻe lava ke fakahoko maʻa ʻenau ngaahi kui totonú. ʻOku poupouʻi ʻa e kāingalotu ko ʻení ke nau hoko atu ʻi he ō ki he temipalé, pea ko e sai tahá kapau te nau ō mo e ngaahi hingoa fakafāmili ʻa ha kāingalotu kehe.
ʻI he lds.org/temples, ʻe lava ai ʻa e Find a Temple ʻo tokoniʻi koe ʻi hoʻo teuteu ki hoʻo ʻalu hono hoko ki he temipalé.
3. ʻOku tautefito ʻa e fakalotolahí ki he toʻu tupú mo e kau tāutaha kei talavou “ke nau fakaʻaongaʻi ʻenau hingoa fakafāmili pē ʻanautolú pe ko e hingoa ʻo e ngaahi kui ʻa e kāingalotu honau uōtí pe siteikí.”
“ʻOku mou fie maʻu nai kakai kei talavou ha founga pau ke maluʻi ai hoʻomou moʻuí mei he mālohi ʻo e filí?” Ko e fehuʻi ia ʻa ʻEletā Sikotí. “Mou femoʻuekina ʻi he fakatotolo ki hoʻomou ngaahi kuí. Teuteuʻi honau ngaahi hingoá ki he ngaahi ouau fakafofonga toputapu ʻo e temipalé, pea ʻalu ki he temipalé ʻo fakafofongaʻi kinautolu ke nau maʻu ʻa e ouau ʻo e papitaisó mo e meʻafoaki ʻo e Laumālie Māʻoniʻoní. ʻI hoʻo matuʻotuʻa angé, te ke lava ai ke kau ʻi he ngaahi ouau kehé. ʻOku ʻikai ke u lava ʻo mafakakaukauʻi ha meʻa ʻe toe lelei ange ke ne maluʻi koe mei he takiekina ʻa e filí ʻi hoʻo moʻuí” (“Huhuʻi ʻo e Kau Pekiá,” 94).
Te ke toe maʻu foki ʻi he konga ki he Hisitōlia Fakafāmilí ʻo e LDS.org, ʻi he tefito ko e Getting Started, ha sitepu ʻe nima ke teuteuʻi ai ʻa e ngaahi hingoa fakafāmilí ki he temipalé.
4. ʻOku totonu ke fakapapauʻi ʻe he kau taki lakanga fakataulaʻeikí ko e kāingalotu kotoa pē “ʻoku [nau] ako ʻa e tokāteline ko hono liliu e loto ʻo ʻenau ngaahi tamaí [pea] pehē mo e ngaahi tāpuaki ʻo e ʻalu ki he temipalé.”
Ko e Ke Liliu ʻa e Ngaahi Lotó ko ha maʻuʻanga fakahinohino ia ʻa e takí ʻoku ʻoatu ko ha tokoni ki he Tohi Tuʻutuʻuni Fika 2: Ko Hono Puleʻi ʻo e Siasí ke tokoni ki he kau taki lakanga fakataulaʻeiki ʻo e uōtí mo e siteikí ʻi heʻenau poupouʻi ʻa e kāingalotú ʻi honau ngaahi fatongia ke fekumi ki honau kau pekiá pea mo ʻoange kiate kinautolu ʻa e ngaahi ouau fakamoʻui ʻi he temipalé. ʻOku kau ai ha ngaahi vitiō ʻoku hiki ai e founga hono ngāue ʻaki ʻe ha ngaahi siteiki ʻe niʻihi ʻa e ngāue fakatemipalé mo e hisitōlia fakafāmilí ki hono fakamālohia ʻo e fakafoʻituituí mo e ngaahi fāmilí.
Vakaiʻi ʻa e ngaahi maʻuʻanga tokoni ki he takí ʻi he LDS.org ʻaki haʻo lomiʻi ʻi he Resources, All Callings, Family History, mo e Leader Resources.
5. Ko kinautolu ko ia “‘oku lahi ʻenau ngaahi hingoa fakafāmili kuo tuku fakatatalí [ʻoku poupouʻi atu] ke tukuange mai e ngaahi hingoá ni ke lava ʻo fakahoko ki ai e ngaahi ouau ʻoku fie maʻú.”
ʻOku lolotonga ʻi ai ha ngaahi hingoa ʻe 12 miliona ʻi he FamilySearch.org naʻe taʻofi ʻe ha kau mēmipa ʻo ha ngaahi fāmili ne nau pehē ke nau fai pē ʻe kinautolu e ngaahi ouau ʻa ʻenau ngaahi kuí. Neongo ia, kuo ʻi ai ha ngaahi hingoa lahi kuo lautaʻu hono fakatatalí.
Naʻe pehē ʻe ʻEletā Sikoti, “ʻOku ʻikai ke fuʻu fiefia [ʻa e ngaahi kuí] ʻi he kei hokohoko atu ʻenau tatali ke fai ange honau ngaahi ouaú. ʻOku mau tapou atu kiate kinautolu ʻoku lahi ʻenau hingoa ʻoku teʻeki fai ha ngāue ki aí, ke nau vahevahe ki honau kāingá pe kau mēmipa ʻo e uōtí mo e siteikí ke nau tokoni atu ʻi hono fakakakato e ngāue ko iá. Te ke lava ke fai ia ʻaki hano tufa e ngaahi kaati temipalé ki he kau mēmipa ʻo e uōtí mo e siteikí ʻoku nau loto ke tokoni pe ngāue ʻaki e polokalama fakakomipiuta ko e FamilySearch ke fakahū fakahangatonu ʻaki e ngaahi hingoá ki he temipalé” (“Huhuʻi ʻo e Kau Pekiá,” 94).
ʻI he konga ko ia ko e Getting Started naʻe hā atu ʻi ʻolungá, ʻi he tefito ko e I Want to Share Names with Others, lomiʻi ʻi he Watch Video, peá ke mamata leva he foʻi vitiō ko e Releasing Names for Temple Work fekauʻaki mo e fakamatala ki hono fevahevaheʻaki e ngaahi hingoa naʻe tuku fakatatalí.
ʻOku maʻu ʻe he Siasí ha ngaahi maʻuʻanga tokoni lahi kuo ʻosi paaki pea ʻi he ʻinitanetí ke mahino ki he kāingalotú ʻa e ngaahi ʻuhinga ʻo hono teuteu ʻo e ngaahi hingoa fakafāmilí ki he temipalé mo e founga ke fai ai iá.
Tā fakatātaaʻi ʻo e ʻatá ʻe David Stoker