Ko e hā hono mahuʻinga ʻo e kalasí mo e kau palesitenisī fakakōlomú ki he toʻu tupú?
“Oku fakatouʻaonga ʻa e kau palesitenisī fakakalasi ʻo e Kau Finemuí mo e kau palesitenisī fakakōlomu ʻo e Lakanga Taulaʻeiki Faka-ʻĒloné kiate kinautolu ʻoku nau maʻu ʻa e fatongiá pea kiate kinautolu ʻoku nau ngāue ki aí.
ʻOku maʻu ʻe he kau mēmipa ʻo e kau palesitenisií ʻa e totonu ki he ngaahi fakahinohino fakalaumālie fekauʻaki mo e kalasí pe kōlomú, ʻa ia te ne lava ʻo tokoniʻi kinautolu ke nau ʻilo e founga ke hūfia ai pea mo fakafeohi ki he kau mēmipa ʻo ʻenau kalasí pe kōlomú, tautautefito kiate kinautolu ʻoku kei foʻou pe māmālohí. ʻOku tokoni ʻa e kau ʻi he kau palesitenisií ki he toʻu tupú ke nau ako ʻa e ngaahi poto fakatakimuʻá ʻo hangē ko hono vahe ʻo e ngāué, ngāue tokoní, fetuʻutakí, pea mo kau ʻi he ngaahi fakataha alēleá. ʻOku tokoni ʻa e ako ko ia ke fokotuʻutuʻu mo tataki e ngaahi fakatahá mo e ʻekitivitī ki he kau taki ʻo e toʻu tupú ke nau teuteu ai ki ha ngāue fakafaifekau pe ngaahi fatongia kehe ʻi he kahaʻú ʻi heʻenau ako ki hono mahuʻinga ʻo e fakahoko honau fatongiá pea mo e founga hono faʻu ʻo ha palani mo fakahokó.
ʻOku maʻu foki ʻe he kau mēmipa ʻo e kalasí pe kōlomú ha ngaahi tāpuaki ʻe niʻihi ʻo fou ʻi he kau taki ko ʻení. ʻOku nau maʻu ha taha ʻi honau toʻú ke talanoa mo ia pea mo ne lava ke tokoniʻi mo poupouʻi kinautolu ʻi hono moʻuiʻaki ʻa e ongoongoleleí mo fakahoko ha ngaahi meʻa lahi, ʻo tautautefito ʻi heʻenau fakakakato ʻa e Fakalakalaka Fakatāutahá pe Fatongia ki he ʻOtuá. Koeʻuhí ʻoku kau ʻa e kau palesiteni ʻo e ngaahi kalasí pe kōlomú ʻi he kōmiti toʻu tupu ʻa e pīsopé, ʻoku nau lava ʻo fakahoko ki he pīsopé ʻa e ngaahi palopalema, ngaahi meʻa ʻoku nau tokanga ki ai, pe ngaahi ngāue lelei ʻi heʻenau ngaahi kalasí mo e ngaahi kōlomú.
ʻOku hoko hono ui ko ia ki he kau palesitenisī fakakalasi pe kōlomú ko ha fatongia maʻongoʻonga ʻokú ne tokoniʻi ai ʻa e toʻu tupú ke nau maʻu ha lotolahi, ako ke hoko ko ha taki mo ha faʻifaʻitakiʻanga, pea mo fakatupulaki ha ʻofa mo ha uouangataha ʻi he kalasí pe kōlomú.