Naʻe Muʻomuʻa ʻEma Vahehongofulú
Keuli Talepi Koki, ʻAlapama, USA
Naʻe ngāue hoku husepānití ʻi he faʻahitaʻu māfana ʻo e 2006 ko ha taha fakaʻuli loli. Naʻe hoko ko hoku tefitoʻi fatongia hono totongi homa ngaahi moʻuá koeʻuhí he naʻe mavahe maʻu pē ia mei ʻapi ʻo meimei lava ha uike ʻe ua. Naʻe tuʻunga pehē ʻene ngāué pea fetōʻaki ai ʻema paʻanga hū maí mei he māhina ki he māhina, pea naʻe kiʻi faingataʻa leva hono fakapatisetiʻi ʻema ngaahi meʻa fakapaʻangá.
ʻI he māhina ko ia ko Siulaí naʻe toe siʻisiʻi ange ʻene vahé pea nounou ia mei he meʻa naʻá ku palaniʻí. Hili ʻeku fakahū ʻene sieké, naʻá ku fakafehoanaki leva ʻa e lahi ʻoku ʻi he pangikeé mo e lisi ʻo ʻema ngaahi fakamole ʻoku fie maʻu ke totongí. Naʻá ku pehē leva kapau te u totongi e meʻa kotoa, kau ai mo ʻema vahehongofulú, ʻoku fakafuofua te ma nounou ʻaki ha $30. Naʻá ma totongi vahehongofulu kakato, he naʻá ma ako ʻi ha founga faingataʻa he ngaahi taʻu siʻi ki muʻá ʻi ha taimi naʻe tōmui ai ʻema totongi vahehongofulú. Naʻe ʻikai leva ko ha fili he taimi ko ʻení ia ke taʻetotongi e vahehongofulú.
Naʻá ku manatuʻi ʻeku fanongo ʻi ha ngaahi talanoa ʻo ha kakai naʻa nau tohi ʻenau sieke vahehongofulú pea nau maʻu ha paʻanga ʻi ha ngaahi founga fakaofo. Naʻá ku faʻa hiki ʻa e ngaahi sieké ʻo fakahokohoko fakatatau mo e ngaahi meʻa naʻe fie maʻu ke meili ʻi he ʻaho ko iá, pea naʻe tātātaha pē ke hoko ʻema sieke vahehongofulú ʻo fika ʻuluaki ke u tohi. Ka ʻi he ʻaho ko iá naʻá ku pehē ai ʻoku fie maʻu ke u fuofua tohi ʻema sieke vahehongofulú, ʻi heʻeku ʻilo ʻe foaki mai ʻe he ʻEikí ha founga ke totongi ʻaki homa ngaahi moʻuá.
ʻI he Mōnite hokó ne u maʻu ha tala kuo kaniseli e kalasi he koló naʻá ku lesisita ki ai ʻeku tamasiʻi lahí, pea naʻe fakafoki mai ʻa e sieke $20 naʻá ku tohi ʻi he māhina ki muʻá. Ko e taimi naʻá ku fakapalanisi ai ʻeku tohi sieké, ʻo fikaʻi fakafoki ʻa e $20 ko iá, ne u fakatokangaʻi naʻe fehālaaki ʻeku fiká ʻaki ha $23 ʻi he uike ki muʻá. ʻIkai ngata ai, naʻe ʻosi pē mei ai ha ʻaho ʻe ua kuó ma maʻu ha sieke $36 mei he ʻōfisi ʻo ʻema toketaá ko e hulu he paʻanga ne ma totongí. Ko e taimi ko ʻení, naʻe ʻikai ke ma toe nounou ʻaki ha $30, ka kuó ma maʻu ha meimei $50.
Kuo fakahoko ʻe he ʻEikí ʻene talaʻofa ʻi he Malakai 3:8–12 kapau te tau totongi ʻetau vahehongofulú, te Ne lilingi mai ha ngaahi tāpuaki. ʻOku ou ʻilo ʻoku tuʻunga ʻi heʻema feinga ke muimui ki he fekau ʻa e ʻEikí ke fuofua totongi ʻema vahehongofulú ne tāpuekina ai kimauá.