Ko e Ongo Lami ʻa Mīkení
ʻOku nofo ʻa Suliana K. Mili ʻi ʻAlesona ʻi he USA.
“Mou Ngāue ke Fetauhiʻaki ʻIate Kimoutolu” (Mōsaia 2:18).
“Kuo pau ke ngāueʻi ʻe he fanga monumanú honau tauhí.” Naʻe toe ongona e ngaahi lea ʻa e Tangataʻeikí ʻi he fakakaukau ʻa Mīkení. Naʻe leʻo ʻe he fanga kulií ʻa e fanga sipí, pea fakatō ʻe he fanga moá ʻa e foʻimoá. Ne ʻomi ʻe he fanga sipí ha fulufulu ke fakatau. Naʻe tokoni ʻa Mīkeni ʻi hono kosi kinautolú ʻi he faʻahitaʻu failau kotoa pē, pea naʻe hangē maʻu pē honau fulufulu matolú ko ha sinou ʻoku vaia ʻi ha lotoʻataʻatā lau maʻuiʻui.
Ka naʻe kehe ʻa e ongo lami ia ʻa Mīkení. Ko e ongo kiʻi siʻisiʻi taha ʻeni naʻe fāʻeleʻi ʻi he taʻu kuo ʻosí, pea naʻá na fuʻu iiki ke ʻomi ha fulufulu feʻunga ke totongi ʻaki hona tauhí. Naʻe loto ʻa e Tangataʻeikí ke ʻave kinaua ki he fale fahiʻanga manú, ka naʻe toʻoa ʻe he ongo kiʻi ʻuhiki iiki mo vaivaí e loto ʻo Mīkení. Naʻe kole ke tuku pē muʻa kinaua, pea fāifai pē ʻo loto ki ai e Tangataʻeikí. Naʻe fakatokanga ange ki ai, “Ka, kuo pau ke ke tokangaʻi pē ʻe koe kinaua.”
Naʻe lelei ʻa e meʻa kotoa ʻi he kamataʻangá. Naʻe ngāueʻaki ʻe Mīkeni ʻa e paʻanga hono ʻaho fāʻeleʻí ke fakatau ʻaki ha mohuku ʻi he taimi naʻe kamata kai ai e ongo lamí. Ka ko ʻeni kuo ʻosi e paʻanga ia hono ʻaho fāʻeleʻí, pea talaange ʻe he Tangataʻeikí ia ʻoku fuʻu fakamole ke tuku e ongo kiʻi lamí ke na kaikai ʻi he loto ʻā naʻá ne totongi ʻi he tuʻakoló. ʻIkai ngata ai, naʻe ʻilo ʻe Mīkeni ʻe tātātaha haʻane sio kiate kinaua kapau te na ō ki ai. Naʻe fakatau ʻene mānavá ʻi heʻene sio ki he kaikai ʻene ongo kiʻi lamí ʻi he fakaʻosinga ʻo e mohukú. ʻE ʻosi ia ʻa pongipongi, pea naʻe fie maʻu ke ne kumi ha founga ke fafanga ai ʻene ongo lamí.
Naʻe milimili pē ʻe Mīkeni ʻa e fulufulu hinehina ʻi he ʻulu ʻo e ongo lamí ʻi heʻene falala ki he ʻaá. Naʻe lava pē ke sio kia Misa Falaoa ʻi heʻene tokangaʻi ʻene ngaahi losé ki mui atu ʻi he halá. Naʻe toketu mai ʻa Mīsisi Uilimoti ki tuʻa ke ʻave ʻene meilí, ʻi ha fale ʻe ua mei he feituʻu naʻe ʻi aí. Ko Mīsisi Uilimotí ko ha uitou naʻe nofo tokotaha pē. Naʻe tafi he taimi ʻe niʻihi ʻe he tuongaʻane ʻo Mīkení ʻa e veve he ʻapi ʻo Mīsisi Uilimotí, ka naʻe lāunga maʻu pē koeʻuhí he naʻe ʻikai ke lava ʻe Mīsisi Uilimoti ʻo totongi.
Naʻe fakatokangaʻi ʻe Mīkeni ʻa e loloa e musie he ʻapi ʻo Mīsisi Uilimotí. Pehē leva ʻe Mīkeni, “Te u kole ke u kosi e musié. Ka ʻe ʻikai ʻi he taimí ni. ʻOku fie maʻu ke u kumi ha founga ke fafanga ai ʻeku ongo lamí.”
Fakafokifā pē kuo maʻu ʻe Mīkeni ha foʻi fakakaukau. ʻOku maʻu ʻe Mīsisi Uilimoti e musié, pea ʻoku maʻu ʻe Mīkeni ha ongo sipi ʻoku fie maʻu ke na kaikai—meʻa hoa lelei moʻoni! Ne tātaaʻi leva ʻe Mīkeni ʻene ongo lamí pea lele fakavavevave ki he fale ʻo Mīsisi Uilimotí. Ko e taimi naʻe fakaava mai ai ʻe Mīsisi Uilimoti e matapaá, naʻe malimali kia Mīkeni, ʻi heʻene maʻu ha taha ʻaʻahi angé. Naʻe ʻuha mai e leá mei he ngutu ʻo Mīkení ʻi heʻene fakamatalaʻi ʻene fakakaukaú.
“ʻE Mīsisi Uilimoti, ʻoku ou tui ʻe lelei ʻeni kiate kitaua fakatouʻosi!” Pea ngata ai ʻa Mīkeni. Naʻe fakamānavaloloa, ʻi heʻene tatali ke fai mai e talí.
“ʻOku ou fakakaukau pehē mo au!” Ko e lea ange ia ʻa Mīsisi Uilimotí. “ʻE ʻaonga kia au ha taha, pea ʻe ʻaonga ha tokoni ki hoku loto ʻataʻataá. ʻOmai e ongo lamí pongipongia ʻa uhu.” Ne femalimaliʻaki ʻa Mīkeni mo Mīsisi Uilimoti, pea katakata ai pē ʻa Mīkeni ʻo aʻu ki ʻapi.
Ko e ʻaho hono hokó ko ha kamataʻanga ia ʻo ha feohi lōloa mo fakaʻofoʻofa. Naʻe ʻave ʻe Mīkeni ʻene ongo sipí ki he ʻapi ʻo Mīsisi Uilimotí he pongipongi kotoa pē ki muʻa ʻi he akó pea ʻi he efiafí, naʻe nofo ʻo kiʻi talanoa taimi nounou ki muʻa peá ne toki fakafoki ki ʻapi ʻene ongo lamí ke mohe. Naʻe nonou lelei ʻa e musie ʻo Mīsisi Uilimotí, pea maʻu ʻe he ongo lami ʻa Mīkení hona tauhí.
Tā fakatātaaʻi ʻe Guy Francis