Ko Hono Fokotuʻu ha Ngaahi Tukufakaholo ʻo e Toetuʻú ʻOku Fakatefito ʻia Kalaisí

Fai ʻe Diane L. Mangum

ʻOku nofo ʻa Taieni L. Menikamu ʻi ʻIutā, USA.

ʻOku tau fakamanatua ʻi he Toetuʻú ʻa e meʻaʻofa ʻa hotau Fakamoʻuí: ʻa e Fakaleleí.

ʻI ha pongipongi Sāpate Toetuʻu ʻe taha he ngaahi taʻu kuo hilí, ne lue mai ʻeku tamasiʻi taʻu fā ko Pení ʻi he loto holo homau falelotú ʻi he tuku ʻa e Palaimelí, mo tupetupeʻi fiefia pē ʻa e laʻi pepa naʻá ne valivalí. Naʻe ui mai ʻi he fiefia moʻoni, “Mami, Mami, kuó ke fanongo ʻi he Toetuʻú?” Naʻá ne fie fakapapauʻi pe kuó u ʻosi fanongo ʻi he ongoongo fakafiefiá. Naʻe ongo moʻoni ki he loto ʻo Pení ha faʻahinga meʻa naʻe leaʻaki ʻe heʻene faiako pea kamata fiefia ai ke mahino kiate ia ʻa e Toetuʻú. Hono ʻikai lelei ke tau ongoʻi kotoa ʻa e fiefia tatau ʻi he Toetuʻu kotoa pē!

Ko e Fakalelei ʻa Sīsū Kalaisí, kau ai mo e Toetuʻú, ʻoku ʻi he ʻelito moʻoni ia ʻo e Toetuʻú. ʻE tokoni haʻatau fokotuʻu ha ngaahi tukufakaholo ʻoku fakavaʻe ʻi he Toetuʻú ke tau tokanga taha ai ki he ngaahi meʻaʻofa ko ʻeni ʻa hotau Fakamoʻuí.

Lotu ʻi he Sāpaté mo e Ngaahi Tukufakaholó

ʻOku tau lotu fakataha ko e Kāingalotu ʻo e Ngaahi ʻAho Kimui Ní ʻi he Toetuʻú ʻo hangē ko ia ʻoku tau fai ʻi he Sāpate kotoa peé, taʻe kau ai ha ngaahi kaipola, laka fakatē, pe ngaahi kātoanga. ʻE lava ke palani ʻe hotau kau taki fakauōtí pe fakakoló ha kau malanga mo ha ngaahi fasi ʻoku nofotaha ʻia Sīsū Kalaisí. Naʻe pehē ʻe ʻEletā L. Tomu Peuli ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e Sāpate Toutuʻú: “Kuo ʻikai foki ke folofola he ʻEikí ʻo Ne tala fakapatonu mai ha ngaahi tōʻonga pē meʻa fakalotu hangē ko ha ngaahi kai fakaafe pe ngaahi kātoanga ke tau manatuʻi ai ʻa hotau ngaahi tāpuakí. Ka neongo iá, ʻoku totonu ke hoko atu pē ʻetau tauhi ʻa e ngaahi meʻa fakafonua pe tōʻonga moʻui ʻoku tau ofi ai ko e fāmili ki hotau ngaahi tofiʻa fisifisimuʻa kuo tuku fakaholo maí.” (“Family Traditions,” Ensign, Mē 1990, 20).

Ko ha ngaahi tukufakaholo kehekehe ʻeni mei ha ngaahi fāmili ʻi heʻenau fakamanatua ʻa e Toetuʻú mo tohoakiʻi honau ngaahi ʻofaʻangá ke ofí.

Ko Hono Fai ʻo e Ngaahi Fakamoʻoni ki he Toetuʻu ʻa Kalaisí

Naʻe kamataʻi ʻe Sēnisi mo Keeki ha “Pō ʻo e Ngaahi Kuí” makehe kuo hoko ko ha tukufakaholo ʻo e Toetuʻú. Naʻe pehē ʻe Sisitā Nilasoni, “ʻOku ou tui ko e meʻa lelei taha ke tau fai ʻi heʻetau hoko ko e ngaahi kuí ke ʻalu ki he ʻapi ʻetau fānaú pea nofo mo hotau ngaahi makapuná ʻo ʻai ke nau ʻilo ʻoku ʻi ai ʻetau fakamoʻoni ki he Fakamoʻuí.”
Ko e taimi naʻe kei iiki ai ʻema fānaú, naʻe fokotuʻu ʻe Hekitā mo Seulolini ʻAlapā ha taimi ʻi he efiafi kotoa pē ʻo e uike ki muʻa he Toetuʻú ke fai ai ha lēsoni nounou ʻi he ngaahi meʻa naʻe hoko he lolotonga ʻo e uike fakaʻosi e moʻui ʻa e Fakamoʻuí.
ʻOku ō ha ngaahi fāmili ʻe niʻihi ki he ngaahi faʻitoka honau ngaahi ʻofaʻangá. ʻOku nau talanoa mo ʻenau fānaú fekauʻaki mo e kau mēmipa ʻo e fāmilí kuo hiki atú pea mo fakahaaʻi ʻenau fakahoungaʻi e Toetuʻu ʻa Sīsū Kalaisí.

Kuo meimei hoko ʻa e foʻimoá ko ha fakaʻilonga fakamāmani lahi ʻo e Toetuʻú ke ne fakafofongaʻi hono veteki ʻe he Fakamoʻuí ʻa e ngaahi haʻi ʻo e maté ʻaki ʻEne Toetuʻú. Kuo hoko ai hono fakalanulanu mo fufuuʻi ʻa e ngaahi foʻimoá ki he kumi foʻimoa ʻo e Toetuʻú ko ha tukufakaholo angamaheni he funga ʻo e māmaní.

ʻOku faʻa fetāpaaki ʻa e kakaí ʻi Lūsia ʻi he Toetuʻú ʻaki haʻanau pehē, “Kuo toe tuʻu ʻa Sīsū.” ʻOku tali mai leva ʻa e tahá, “ʻIo, kuo toe tuʻu.” ʻI ʻAlapēniá ʻoku meimei tatau pē ʻa e tukufakaholó; ʻoku nau fakapakihi ha ngaahi foʻimoa maka mo pehē, “Kuo toe tuʻu ʻa Kalaisi.”
ʻOku mataʻikoloa ʻaki ʻe Keuleni Sipenisā ʻa e ngaahi manatu ki he fakamanatua heʻene kui fefine Tenimaʻaké ʻa e Toetuʻú pea ʻoku kei manako pē ke fakalanu ʻa e ngaahi foʻimoá ʻaki e kili ʻo e onioni lanu vāleti kuo ʻosi haká ʻo hangē ko ia naʻe fai ʻe heʻene kui fefiné. ʻOku lau ʻe hono fāmilí ko ha taimi lelei ia ke talanoa ai fekauʻaki mo e hoko ʻa e foʻimoá ko ha fakataipe ʻo ha moʻui foʻou pea mo e Toetuʻú.
ʻOku ʻi ai ha ngaahi fāmili ʻe niʻihi ʻoku nau fiefia mo e fānau īkí ʻi he kumi foʻimoa ʻo e Toetuʻú ʻoku ʻi ai ha kiʻi pōpoakí. ʻOku mono ʻi ha lotoʻi foʻimoa pelesitiki ha kiʻi meʻa ʻokú ne fakataipe ha faʻahinga meʻa fekauʻaki mo e pekia pea mo e Toetuʻu ʻa Kalaisí pea mo ha potu folofola ke lau. Pea ʻoku nau fakafika leva ʻa e ngaahi foʻimoá ʻo fakatatau mo e fakahokohoko ʻo e talanoa ʻo e Toetuʻú. ʻI he taimi ʻoku fakaava fakahokohoko ai ʻe he fānaú ʻa e ngaahi foʻimoá, ʻoku nau ako ai ki he Fakalelei pea mo e Toetuʻu ʻa Kalaisí.

Ko e Feʻinasiʻaki e Fasi ʻo e Toetuʻú

ʻE lava ke maʻu ʻe he mūsiká ha mālohi fakaʻofoʻofa kiate kitautolu ʻi he Toetuʻú.

ʻOku manako ʻa Tēvita mo Soisi Pia ke kumi e ngaahi koniseti fekauʻaki mo e Toetuʻú ke tokoni ke na manatuʻi ʻa e feilaulau ʻa e Fakamoʻuí.
ʻOku manako ʻa Teivi mo Nenisī Hāmoni ke fanongo ki he fasi ʻa Siaosi Feletiliki Haniteli (George Frideric Handel) ko e Mīsaiá, he ʻoku ongoʻi ʻe Sisitā Hāmoni “ʻoku fekauʻaki moʻoni ange ia mo e Toetuʻú ʻi he Kilisimasí.”
ʻOku ʻi ai ha faʻē ʻe taha ʻokú ne poupouʻi ʻene fānau ʻoku nau ako e lēsoni mūsiká ke nau ako ha foʻi hiva Toetuʻu he māhina ko iá.
ʻOku haʻohaʻo takai ʻa e famili ʻo Teili mo Sala ʻOkalení ʻi he pianó ke hiva ha ngaahi himi mo ha ngaahi hiva Palaimeli fekauʻaki mo e Toetuʻú.

Ko e Maʻu-meʻatokoni Toetuʻu Fakatahá

ʻOku hoko e maʻu-meʻatokoni fakafāmilí ko ha tukufakaholo mahuʻinga ia ʻe taha ʻo e Toetuʻú he māmaní kotoa.

ʻOku ʻi ai ha fāmili ʻe taha ʻoku nau kai hemi mo talanoa fekauʻaki mo e founga hono fakakakato ʻe Kalaisi e Fono ʻa Mōsesé. Ko ha fāmili ʻe taha ʻoku nau kai ika ke fakamanatu ʻe meʻakai naʻe taumafa ai ʻa Sīsuú. ʻOku kai ʻe he fāmili ʻo ʻIlisa mo Maikolo Peleilá ha meʻatokoni ʻoku kau ai e sipí, pea ʻoku nau talanoa fekauʻaki mo e fakataipe ʻi he talanoa ʻo e Lakaatú.
ʻI he ʻosi ʻo e maʻu-meʻatokoni efiafi Toetuʻu hoku fāmilí, ʻoku mau ʻai ha tā ʻo e kau mēmipa kotoa ʻo e fāmilí mo e ngaahi kaungāmeʻa mamae ne mau maʻu-meʻatokoni fakatahá. ʻOku ʻi ai haʻamau tohi tā ʻo e Toetuʻú ko e taʻu ʻaki ʻeni ʻe 30 tupu ʻo e ngaahi manatu fakafiefia ʻo e fāmilí.
ʻOku ʻi ai ha ongomeʻa kuo lalahi ʻena fānaú naʻá na fakaafeʻi ha na ngaahi kaungāmeʻa lalahi ki ha maʻu-meʻatokoni makehe. ʻOku nau fevahevaheʻaki heni ha ngaahi manatu pea mo fakakaukau ki he ʻuhinga ʻo e Toetuʻú.
ʻI he ngaahi fonua ʻe niʻihi ʻoku kau ʻi he ʻaho mālōlō ʻo e Toetuʻú ʻa e Falaité mo e Mōnité. ʻOku faʻa kaimeʻakai fakataha ʻa e kau mēmipa ʻo e fāmilí ia ʻi Tahiti ki ha ngaahi motu kehe. ʻOku fakaʻaongaʻi ʻe ha Kāingalotu ia ʻe niʻihi ʻi ʻAmelika Lotoloto honau taimi makehé ke talanoa ai mo honau fāmilí, maʻu-meʻatokoni fakataha, pea nau toki ō ki he temipalé.

Ko e Fevahevaheʻaki ʻi he Ngaahi Tukufakaholo Fakatuʻasinó ʻi ha ʻAho Kehe

ʻOku faʻa fakahoko ʻe he ngaahi fāmili ʻo e Kāingalotú ha ngaahi ʻekitivitī fakatuʻasino fekauʻaki mo e Toetuʻú ʻi ha ʻaho kehe mei he Sāpaté.

ʻI Palāsilá, ʻoku tuku ai ʻe ha kui fefine Siasi ʻi he ʻaho Falaite pe Tokonaki ki muʻa he Toetuʻú ha kiʻi toenga kāloti e taha pe ua ʻi ha feituʻu ʻoku lava ʻo fai ha sio ki ai pea fufuuʻi ha ngaahi foʻimoa ʻo e Toetuʻú ʻo ofi ki he kālotí.
ʻI he Mōnite hoko ʻi he Toetuʻú, ʻoku fakahoko ai ʻe he fāmili ʻo Soisi mo Sikoti Henitulikí ha kaitunu ʻi tuʻa mo fai ha kumi foʻimoa makehe ʻo e Toetuʻú.

Fokotuʻu Maʻu pē ʻa Kalaisi ʻi he Toetuʻú

ʻE lava ʻe he ako fekauʻaki mo Sīsū Kalaisi ʻi he efiafi fakafāmili ʻi ʻapí, fakafanongo ki he ngaahi fasi ʻo e Toetuʻú, pe maʻu-meʻatokoni fakataha makehé ha ivi fakalaumālie ʻi ha faʻahinga tuʻunga pē ʻo e moʻuí. ʻOku ʻikai fie maʻu e ngaahi fakamanatuá ia ke tokolahi. ʻE lava pē ke mahuʻinga tatau ha faʻahinga fakamanatua ʻo ha tukufakaholo fakafoʻituitui ʻi ha ʻapi tokotaha pe ʻi ha loto.

Te tau lava mo kitautolu ʻo manatuʻi mo fakamanatua ʻa e tuʻunga fiefia ʻo e Toetuʻú ʻo hangē ko kiʻi Peni, naʻe lue mai ʻi he holo ʻo e falelotú ke vahevahe ʻa e ongoongo lelei fekauʻaki mo e Toetuʻú.