Teuteuʻi ʻe he Siasí Ha Ngaahi Maʻuʻanga Tokoni ʻi he ʻInitanetí maʻá e Ngaahi ʻEkitivitī ʻa e Toʻu Tupú

ʻI he feinga ‘a e Siasí ke fakamālohia e kau talavou mo e kau finemui ʻo e Siasí he funga māmaní, ʻoku nau teuteuʻi ai ha maʻuʻanga tokoni ʻi he ʻInitanetí maʻá e ngaahi ʻekitivitī ʻa e toʻu tupú. ʻOku faʻufaʻu ʻa e konga foʻou ko ia maʻá e ngaahi ʻekitivitī ʻa e toʻu tupú ʻi he LDS.org ke tokoni ki he kau taki ʻo e toʻu tupú pea mo ʻenau kau ʻetivaisa kakai lalahí ke palani ha ngaahi ʻekitivitī ʻe mahuʻingamālié maʻá e ngaahi kōlomu ʻo e Lakanga Taulaʻeiki Faka-ʻĒloné mo e kalasi ʻa e Kau Finemuí ʻi he siteiki mo e uooti kotoa ʻi he Siasí.

ʻOku fakataumuʻa ʻa e uepisaití ke poupou ki he hokohoko atu hono fakamamafaʻi ʻe he Siasí ʻa hono fakamālohia ʻo e toʻu tupú, ʻa ia ne fakaʻilongaʻi ʻi he liliu ne toki fai ki he taʻu motuʻa ʻoku fie maʻu ki he ngāue fakafaifekau taimi kakató, maʻuʻanga tokoni fakaako foʻou ʻa e toʻu tupú Haʻu, ʻo Muimui ʻIate Aú, mo ha fakaafe ki he toʻu tupú ke kau atu ki he hisitōlia fakafāmilí.

Ki he kau talavoú, ʻoku tokoni lelei ʻa e saití ki hono fakatefito ʻo e tokangá ʻi he polokalama fakalaumālie ʻo e Fatongia ki he ʻOtuá pea mo e ngaahi maʻuʻanga tokoni ki he fakalakalaka fakatuʻasinó, fakasōsialé, mo e fakaakó.