ʻI he Siasí Fakakātoa
ʻAho Tokoni ʻo e Lepupelika Silovākiá
Naʻe fakataha hake ha kāingalotu ʻe toko 130 tupu mei he Lepupelika Sekí mo e Lepupelika Silovākiá mo e kau faifekau Seki mo Silovākia ne ʻosi ki muʻá ki Silina, Lepupelika Silovākiá he ʻaho 8 ʻo Sepitema 2012, ke fai ha ngāue tokoni ki he koló—ʻo nau fetuku ai ha toni ʻe 1.5 (1.3 tonnes) ʻo e veve mei he tānakiʻanga vai Siliná, fakaleleiʻi ʻa e fale ʻo e kinitakāteni mo e nesilī ʻo e koló, pea mo taʻataʻaki ʻa e ngoue ʻakau he koló.
“Ko ha meʻa fakaʻofoʻofa ke mamata ki he kau ngāue tokoní ʻi heʻenau ngāue mālohí pea mo e malimali mo e fiefia ʻi honau fofongá!” ko e lau ia ʻa e taha ngāue tokoni ko Hena Sinātalova, naʻe kau hono fāmilí ʻi he kau fuofua ului ki he Siasí ʻi Silovākiá. “ʻOku ou tui ko e ʻuhinga ia ʻoku mau saiʻia lahi ai ʻi he ngaahi ngāue ko ʻení. ʻOku mau fie tokoni—fie poupou—pea ʻoku mau fiefia ai.”
Lava ke Maʻu Atu He Taimí ni ʻa e Fuakava Foʻoú he Lea Faka-Sipeiní ʻAtaʻatā pē
Ne toki tuku atú ni ʻe he Siasí ha tohi Fuakava Foʻou ʻi he lea faka-Sipeiní ʻataʻatā pē Santa Biblia: Reina Valera 2009, ʻo maʻungofua ai ʻa e folofolá pea mo faingofua ki he kāingalotu ʻo e Siasí mo e kakai teʻeki Siasí fakatouʻosi.
Ko e paaki foʻoú ni ko e lahi angamahení ai pē pea ʻoku ʻi ai ʻa e fakamatala fakafolofola ʻo e Fuakava Foʻoú, ngaahi futinoutí, mo e ngaahi kongokonga ne fili mei he Liliu ʻa Siosefa Sāmitá.
ʻOku maʻu ʻa e Fuakava Foʻou ko ʻeni ʻi he takafi moluú he ngaahi senitā tufakiʻanga nāunau kotoa ʻa e Siasí pe store.lds.org (fika 09215002).
Ngaahi Fetongi ʻi he Kau Palesitenisī Fakaʻēlia ʻo e ʻĒlia ʻAmelika Tonga Sauté
Naʻe tukuange he ʻaho 6 ʻo Sānuali 2013 ʻa ʻEletā Uolotā F. Konisālesi mei heʻene hoko ko e mēmipa ʻo e Kau Palesitenisī ʻo e Kau Fitungofulú ʻo ne fetongi ʻa ʻEletā Melevini A. ʻĀnolo ko e Palesiteni ʻo e ʻĒlia ʻAmelika Tonga Sauté ʻi Puenosi ʻAealesi, ʻĀsenitina. Ne maʻu ʻe ʻEletā ʻĀnolo ha ngāue foʻou ke ne fakahoko ʻi he hetikuota ʻo e Siasí.
ʻOku kei hoko pē ʻa ʻEletā Siosi F. Sepalosi mo Felenisisikou J. Vīnasi ko e ongo tokoni ʻi he Kau Palesitenisī Fakaʻēliá.
ʻOku pehē ʻe ha tohi mei he Kau Palesitenisī ʻUluakí, “ʻOku fakahoko atu ʻemau houngaʻia ʻi he ngāue līʻoa ʻa e kau tangatá ni pea ʻoku mau talamonū atu ʻi heʻenau ngaahi ngāué.”
ʻOku Fiefia ʻa e Kāingalotu ʻi Potisuaná ʻi Hono Fokotuʻu ʻo e ʻUluaki Siteikí
Naʻe fakatahataha hifo ha kāingalotu ʻe meimei 900 nai ʻo e Siasí ʻi Nōvema 2012 ki Potisuana ʻi ʻAfilika ke sio tonu ʻi hono fokotuʻu ʻo e Siteiki foʻou ʻi Kapolone Potisuaná—ko e fuofua siteiki ia he fonuá.
Naʻe tokangaʻi ʻa e fakatahá ʻe he Palesiteni Fakaʻēlia ʻo e ʻĒlia ʻAfilika Tonga-hahaké, ʻEletā Teili G. Lenilani mo ʻEletā Kōlini H. Pilikineli, ko ha Fitungofulu Fakaʻēlia. Naʻe uiuiʻi ʻa Kilīmeni M. Matisiuakofeta ko e palesiteni fakasiteiki, pea ui ʻa Sefilī Temipou ke tokoni ʻuluaki, mo ʻOtuetisi S. Mokueni ke tokoni ua.
Naʻe pehē ʻe Taniela Holo ko e palesiteni ʻo e Siteiki Lutipooti Saute ʻAfiliká, “ʻE hoko ʻa e siteikí ko ha feituʻu hūfangaʻanga, ko ha feituʻu ʻo e ako, ko ha feituʻu ʻo e lelei mo e malu, ko ha feituʻu ʻo e maau, ko ha feituʻu ʻo e angaʻofa mo e ʻofa, mo ha feituʻu ʻo e ʻOtuá.”
Naʻe ngāue fiefia ha kāingalotu tokoni ʻo e Siasí mei he Lepupelika Sekí mo e Lepupelika Silovākiá ʻi ha ngaahi houa lahi he vela ʻa e ʻeá, ʻi he kauvai fakahihifo ʻo e tānakiʻanga vai Siliná ke tānaki e ngeʻesi hiná, pepá, pelesitikí, pepa fefeká, milemilá, pea mo ha ngaahi veve kehe he lolotonga ʻe ʻaho ngāue tokoni ʻi Sepitema 2012.
Taá naʻe fai ʻe Evelyn Scott