Ko Hono Mahuʻinga ʻo e Fāmilí

ʻOku tāpalasia ʻa e fāmilí ʻi he māmani ʻo e ʻaho ní. Ko e ʻuhinga ia ʻoku mahuʻinga lahi ange ai ʻi ha toe taimi ki muʻa ke maʻu ʻe he fānaú pea mo e toʻu tupú ha fakamoʻoni ki hono mahuʻinga ʻo e fāmilí ʻi he palani ʻa e Tamai Hēvaní (vakai, Ki Hono Fakamālohia ʻo e Toʻu Tupú [2011], 14). ʻI he peesi 52 ʻo e makasini ko ʻení, ʻoku fokotuʻu mai ai ʻe Ane M. Tipi (Ann M. Dibb), ko e tokoni ua ʻi he kau palesitenisī lahi ʻo e Kau Finemuí, ha ngaahi founga ke tokoni ke maʻu ai ʻe he toʻu tupú ha fakamoʻoni ki he fāmilí.

Hangē ko ʻení, ʻokú ne tohi ʻo pehē, “ʻI hoʻomou lau ʻa e fanongonongo ʻo e [fāmilí], fakatokangaʻi ʻa e ngaahi tokāteliné, ngaahi faleʻí, ngaahi fakatokangá, mo e ngaahi tāpuaki kuo ʻosi talaʻofá pea mo ʻenau ʻuhinga kiate koé.”

Ngaahi Fokotuʻu ki hono Akoʻi ʻo e Toʻu Tupú

Lau ʻa e “Ko e Fāmilí: Ko ha Fanongonongo ki Māmaní” pea mo e konga ʻo e fāmilí ʻi he Ki Hono Fakamālohia ʻo e Toʻu Tupú. Talanoa ki heʻene fekauʻaki ʻa e ngaahi fakahinohino ko ʻení mo homou fāmilí. Fakakaukau ke fai hoʻo fakamoʻoni fekauʻaki mo hono mahuʻinga ʻo e fāmilí.
Fakakaukau ke fakahoko ha efiafi fakafāmili ʻi ʻapi fekauʻaki mo hono mahuʻinga ʻo e fāmilí (ko ha maʻuʻanga tokoni lelei ki ai ʻa e “Malí mo e Fāmilí” tefito ʻi he tohi nāunau foʻou ʻa e toʻu tupú ʻi he lds.org/youth/learn).
ʻAlu ki he youth.lds.org. Fili ʻa e “Ki Hono Fakamālohia ʻo e Toʻu tupú” pea fili ʻa e “Fāmilí” ke maʻu ʻa e ngaahi maʻuʻanga tokoni ʻe tokoni atu ke mahino lelei ange ʻa e tokāteline ʻo e fāmilí: ngaahi fakamoʻoni folofola, ngaahi vitiō (hangē ko ʻení, vakai, “Tamaí mo e Fohá”), ngaahi polokalama fakalētiō sēnolo Māmongá, ngaahi fehuʻi mo e talí, mo ha ngaahi fakamatala, kau ai e ngaahi lea naʻe fai ʻe he Kau Taki Māʻolungá.

Ngaahi Fokotuʻu ki hono Akoʻi ʻo e Fānaú

Ko e sīpinga ʻeni ʻo ha ngaahi founga te ke lava ai ʻo muimuiʻi e fakalakalaka ho fāmilí ki he ngaahi taumuʻa fakalaumālie

Kumi ha kiʻi foʻi siā, sioʻata. Fokotuʻu mo hoʻo fānaú ha taumuʻa faingofua te ne fakamālohia homou fāmilí, ʻo hangē ko hono fakahoko ha efiafi fakafāmili ʻi ʻapi ʻi he Mōnite kotoa pē pea lau e folofola ʻi he ʻaho kotoa pē mo e fāmilí. Kole ki hoʻomou fānaú ke nau ʻai ha hingoa ki he foʻi siaá ʻo hiki ai e taumuʻá. Ko e taimi kotoa pē ʻoku fakahoko ai ʻe homou fāmilí ʻa e ʻekitivitií, faʻo ha kiʻi meʻa hangē ko ha foʻi mapu pe foʻi kula ki he loto siaá. Ko e taimi pē ʻe fonu ai ʻa e siaá, fakakaukau ke fakafiefiaʻi ʻaki hano fai ha maʻu-meʻatokoni efiafi makehe ʻa e fāmilí pe ko ha ʻekitivitī.
Kole ki he fānaú takitaha ke nau tā ha fakatātā ʻo e kau mēmipa ʻo e fāmilí ʻoku nau fai ha ngāue fakaʻaho ʻoku mou fie poupouʻi, hangē ko e lotu fakafāmilí pe ako folofolá. Fokotuʻu ʻa e ngaahi fakatātaá ʻi ha feituʻu ʻe lava ʻo sio ki ai e taha kotoa. Kamata ʻa e ʻahó ʻaki hano ʻai e ngaahi fakatātaá ke nau hanga ki ʻolunga. Ko e taimi pē ʻe fakakakato ai ʻe homou fāmilí ʻa e ʻekitivitī ʻoku hā ʻi he pēsí, fulihi fakafoʻohifo. ʻE fakamanatu ʻe he ngaahi fakatātā ʻoku mou kei sio ki aí ki homou fāmilí hoʻomou ngaahi taumuʻá pea mo e meʻa te nau lava ʻo fai ke fakamālohia ai homou fāmilí. Toe fakahanga hake ʻa e ngaahi fakatātaá ʻi he kamataʻanga ʻo e ʻaho kotoa pē.

Tokoniʻi foki mo hoʻomou fānaú ke nau ʻilo ʻa e ngaahi tāpuaki ʻoku maʻu ʻe homou fāmilí ʻi hono fakahoko ʻo e ngaahi ʻekitivitī ko ʻení. ʻOku hanga ʻe hono tokoniʻi ʻo e fānaú ke nau ʻilo ʻa e ngaahi ongo lelei ʻoku maʻu mei hono maʻu ʻo e Laumālié ʻi homou ʻapí ke fakatupulaki ai ʻenau holi ke muimui ʻi he ngaahi sīpinga ʻo e anga māʻoniʻoni ko ia ʻokú ne fakamālohia ʻa e ngaahi fāmilí.

ʻE lava ʻe he muimui ʻi he faleʻi he “Ko e Fāmilí: Ko ha Fanongonongo ki Māmaní” ʻo fakamālohia mo maluʻi hotau ngaahi fāmilí.

Tā fakatātaaʻi ʻe Taia Morley