Fie Maʻu ha Kau Palofesinale Fakamītiá ke Fai e Ngaahi Ngāue ʻa e Siasí
Kuo hanga ʻe he Potungāue Pulusí (Publishing Services Department) ʻo fokotuʻu ha Tānakiʻanga Ongoongo Fakapalofesinale (Media Professional Database) ko e (mediapro.lds.org) ʻi heʻenau feinga ke lelei ange hono maʻu e ongoongo ʻo e Siasí ʻi he funga ʻo e māmaní, ʻa ia ko ha tuʻasila ki he kau palofesinale he mītiá ʻoku nau fie tātānaki mo faʻu ha heleʻuhila, vitiō, fakamafola, ngaahi meʻa ʻoku hoko tonu, pea mo ha ongoongo ʻi he ʻatá maʻá e Siasí.
Ko e tefitoʻi taumuʻa ʻo e tānakiʻanga ongoongó ni ke maʻu ai ha kau palofesinale fakamītiá talēnitiʻia he funga ʻo e māmaní, pea ʻoku loto ʻa e Siasí ke fakakau mai ha kau palofesinale, niʻihi fakafoʻituitui, pea mo ha ngaahi kautaha “kuo ʻosi filifili”—pe ʻosi fakangofua—ki he lahi taha ʻe lavá. Naʻe pehē ʻe Sikoti ʻOlosoni, ko e pule ʻo e ngāue ki he tānakaiʻanga ongoongo ko ʻení, “ʻOku kumi ʻe he Siasí ha kau palofesinale kuo lauitaʻu ʻenau taukei ngāué. ʻOku ʻikai ko ha meʻa ʻeni ia maʻá e kau manako ngāué.”
Ko e taimi naʻe fie maʻu ai ʻi he kuo hilí ha ngāue fakamītiá ke faí, naʻe totongi ʻa e kau konitulekitoa ʻo ʻIutaá pea fakapuna ki ha feituʻu ke fai ai hono filimiʻi ʻo e vitioó pe ke fakakakato ha ngāue pea toki fakafoki mai ʻo fakaʻosi ʻa e ngāué ʻi he hetikuota ʻo e Siasí. ʻOku ʻikai ke ʻi ai ha kau palofesinale ki he ʻatá ʻa e Siasí ke ngāue ʻi ha ngaahi meʻa peheni, ka ʻoku lahi fau ha ngaahi meʻa fakamītiá ʻoku fie maʻu ke fakahoko ka ʻoku ʻikai malava ʻe he ngaahi timi ʻi he lotoʻi Siasí ke fakahoko kotoa kinautolu. ʻOku mahuʻinga ai ha maʻuʻanga fakamatala ki ha kau palofesinale talēnitiʻia he funga ʻo e māmaní ki he kahaʻu ʻo e ngāue fakamītiá ʻa e Siasí.
Naʻe pehē ʻe Misa ʻOlosoni, “Koeʻuhí ke lava ʻe he Siasí ʻo fakaʻaongaʻi kakato mo lelei ʻa e tānakiʻanga fakamatala ʻo e MediaPro, ʻe fie maʻu ha kau palofesinale tokolahi ange mei he funga ʻo e māmaní ke nau kau mai. Ko ʻemau taumuʻa ki he uepisaiti ko ʻení ke maʻu ha kau palofesinale fakamītiá taukei ʻoku nau maheni mo e ngāue ʻa e Siasí koeʻuhí ka fie maʻu ha ngāue ʻi ha feituʻu pē ʻo e māmaní, te mau lava ʻo ngāue ʻaki kinautolu ʻo kamata leva e ngāué.”
Ka ai ha palofesinale fakamītiá ʻoku loto ke kau ʻi he ngaahi ngāué ni, ʻoku totonu ke ʻomi hono hingoá, tuʻa-sila ʻīmeilí, pea mo hano kiʻi piokālafai nounou ki he mediapro@ldschurch.org. Ko ha konga ʻo e fakamatala ʻe fakafonu ʻe he kau palofesinale fakamītiá ko ha hisitōlia fakaʻāuliliki ʻo ʻenau ngāué, fakataha mo ha ngaahi sīpinga ʻo ʻenau ngāue ki muʻá, pōtoʻi fakangāué, pea mo ʻenau ʻatā ke ngāué. Naʻe pehē ʻe Misa ʻOlosoni, “ʻOku mahuʻinga ke ke fakamahinoʻi hoʻo pōtoʻi ngāué koeʻuhí he ʻoku lahi ʻa e ngaahi poto fakangāue ʻi he vitioó, filimí, mo e ʻinitanetí.”
ʻOku ʻikai fakapapauʻi ʻe he lesisita ʻi he MediaPro te ke maʻu ha faingamālie ke ngāue maʻá e Siasí, ka ʻo kapau he ʻikai lesisita ʻa e kau palofesinalé, mahalo he ʻikai ke nau teitei maʻu ha faingamālie. ʻOku hanga heʻenau lesisita mai honau fakamatalá mo ʻenau pōtoʻi ngāué ʻo ʻai ke ʻiloʻi ʻe he Siasí kinautolu mo ʻilo ʻa e meʻa te nau lava ʻo faí.
ʻE lava ʻe he Siasí ʻi he Tauhiʻanga Fakamatala ʻo e Kau Palofesinalé ʻo ngāue ʻaki ha ngaahi timi ʻo ha kau palofesinale fakamītiá ki hono filimiʻi vave ange mo fakaʻekonōmika ange e ngaahi vitioó ʻi he funga ʻo e māmaní.
Tā fakatātaaʻi ʻo e ʻatá ʻe Matthew Reier