ʻOku pehē ʻe he Ki Hono Fakamālohia ʻo e Toʻu Tupú ke fakaʻehiʻehi mei he founga ngaohi ʻulu ʻoku fuʻu tōtuʻá. Ko e hā ʻa e faʻahinga ākenga ʻulu ʻoku lau ʻoku fuʻu tō-tuʻa?
Ko e tuʻunga tōtuʻá ʻe kehe pē mei he anga fakafonua ki he anga fakafonua pea mei he taimi ki he taimi, ko ia ʻe mātuʻaki faingataʻa ai ke fakamahino ʻa e faʻahinga ākenga ʻai-ʻulu ʻoku fuʻu tōtuʻá ki he taha kotoa. Pea ʻe anga fēfē leva haʻo ʻilo pe ʻoku “fuʻu tōtuʻa” ha faʻahinga ākenga ʻai-ʻulu? Fehuʻi pē kiate koe, “Ko e hā ʻoku ou fai ai ʻení?” Kapau kuó ke feinga lahi ke lanu kehe ho ʻulú, lōloa makehe, pea fakaākenga ʻo fakataumuʻa taha pē ke “fie hā” pe ke maʻu e tokangá, pea ta ʻoku mahalo kuó ke aʻu ki he tuʻunga “tōtuʻa” naʻe fakamatalaʻi ʻi he Ki Hono Fakamālohia ʻo e Toʻu Tupú.1
ʻOku kole atu ʻapē ʻa e kau taki o e Siasí ke mou fakaʻehiʻehi mei he ākenga tōtuʻá koeʻuhí he ʻoku nau fie maʻu ke mou fotu ngofua mo angamaheni, ʻo ʻikai ha faʻahinga ākenga pe tōʻonga? ʻOku ʻikai pehē ia. Kuo nau fai ʻa e faleʻi ko ʻení koeʻuhí he ʻoku tala ʻe homou fōtungá ha meʻa fekauʻaki mo kimoutolu. “Te ke lava ʻo fakahā ʻi ho valá mo ho fōtungá ʻokú ke ʻiloʻi ʻa hono mahuʻinga ʻo ho sinó. Te ke lava ʻo fakahaaʻi ko e ākonga koe ʻa Sīsū Kalaisi.2 ʻE lava ke lōmekina ʻe he ngaahi ākenga ʻai-ʻulu tōtuʻá ʻa e pōpoakí ni pea hā atu ʻa hoʻo tokanga ange ki he meʻa ʻo e māmaní.