Ko Hono ʻOmi ʻo e Palaimelí ki ʻApi

Ko Sīsū Kalaisi Hotau Fakamoʻuí

Te ke lava ʻo fakaʻaongaʻi e lēsoni mo e ʻekitivitī ko ʻení ke ke ʻilo lahi ange ai ki he kaveinga ʻa e Palaimelí he māhina ní.

ʻI ha meʻa ʻe taha ʻi he kei siʻi ʻa ʻEletā Likuleni Lisiate ko e Siʻí ʻo e Kau Fitungofulú, naʻe vaʻinga ai mo hono kiʻi tuofefiné ʻi ha kiʻi vaka ʻi ha vaitafe. ʻI he kamataʻangá naʻá na fiefia ʻi heʻena meʻa naʻe faí, ka ʻi he ʻauhia ʻa e kiʻi vaká ʻo mamaʻo mei ʻutá, naʻá na fakatokangaʻi ʻokú na tēkina hangatonu atu ki ha potu vai fakatuʻutāmaki ʻi lalo.

Naʻe kamata leva ʻa e ongo kiʻi tamaikí ke ui tokoni. Naʻe ongoʻi ʻe heʻena tangataʻeikí ʻena uí pea lele fakavave atu ki he vaká ke fakahaofi kinaua. Naʻá ne fakahaofi kinaua, ʻa ia ko ha meʻa ʻeni naʻe ʻikai ke na lava ʻo fakahoko maʻanaua. Naʻá ne fai ʻeni koeʻuhí he naʻe ʻofa ʻiate kinaua.

ʻOku tau fai ʻi he taimi ʻe niʻihi ha ngaahi fili hala mo fakahoko ha ngaahi meʻa ʻoku nau ʻave fakalaumālie kitautolu mei he Tamai Hēvaní. Naʻe fekau mai heʻetau Tamai Hēvaní ʻa Hono ʻAlo ko Sīsū Kalaisí ke fakahaofi kitautolu. Naʻe fuesia ʻe Sīsū Kalaisi ʻetau ngaahi angahalá ka tau lava ʻo fakatomala mo foki lelei ki ʻapi ke nofo mo e Tamai Hēvaní. Naʻe fakahoko ʻe he Fakamoʻuí ha meʻa naʻe ʻikai ke tau lava ʻo fai maʻatautolu. Naʻe loto fiemālie pē ke Ne fai ʻeni koeʻuhí he ʻoku ʻofa ʻiate kitautolu.

Hivá mo e Folofolá

• “Naʻá Ne Fekau Hono ʻAló” (Tohi Hiva ʻa e Fānaú, 20)

• Sione 3:16

Tau Talanoa

Hivaʻi ʻa e “Naʻá Ne Fekau Hono ʻAló” pea aleaʻi ʻa e ngaahi fehuʻi ʻi he foʻi hivá. Fakakaukauʻi ha meʻa te mou lava ʻo fai fakafāmili ke mou moʻui ai hangē ko Sīsū Kalaisi.

ʻOku Fakamoʻoni ʻa e Kau Palōfitá ki he Fakamoʻuí

Fakatauhoa ʻa e ngaahi fakamoʻoni ʻi laló mo e palōfita naʻá ne leaʻaki iá. Hiki e hingoa ʻo e palōfitá ʻi he kiʻi puhá.

• “Pea kuo mau mamata mo [fakamoʻoniʻi] kuo fekau ʻe he Tamaí ʻa e ʻAló ko e Fakamoʻui ki he māmaní” (1 Sione 4:14).

• “Ko ia, kuo mole pea ʻi he tuʻunga tōkilalo ʻa e faʻahinga kotoa ʻo e tangatá, pea te nau pehē ai pē ʻo taʻengata kae ʻoua kuo nau falala ki he Huhuʻi ko iá” (1 Nīfai 10:6).

• “ʻOku ou ʻiloʻi ʻe hāʻele mai ʻa Sīsū Kalaisi, ʻio, ʻa e ʻAló, ʻa e ʻAlo pē taha naʻe fakatupu ʻo e Tamaí, ʻoku fonu ʻi he ʻaloʻofa, mo e manavaʻofa, pea mo e moʻoni. Pea vakai, ko ia ia ʻe hāʻele mai ke ʻave ʻa e ngaahi angahala ʻa māmaní, ʻio, ʻa e ngaahi angahala ʻa e tangata kotoa pē ʻoku tui moʻoni ki hono huafá” (ʻAlamā 5:48).

• “Pea ʻe hoko ʻo pehē ko ia ia ʻe tui ki he ʻAlo ʻo e ʻOtuá, ʻe maʻu ʻe ia ʻa e moʻui taʻengatá” (Hilamani 14:8).

• “Naʻá ku sio ki he Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi, ʻokú na tuʻu mai ʻi ʻolunga ʻiate au ʻi he ʻataá. Naʻe folofola mai ʻa e toko taha kiate au, ʻo ne ui au ʻaki hoku hingoá, ʻo ne tuhu ki he tokotahá ʻo pehē—Ko hoku ʻAlo ʻOfaʻangá ʻeni. Fanongo kiate Ia!” (Siosefa Sāmita—Hisitōlia 1:17).

• “Ko Sīsuú … ko e ʻAlo pē taha naʻe fakatupu ʻo e Tamaí ʻi he kakanó. Ko Ia hotau Huhuʻí; ko ia hotau Taukapo ki he Tamaí. Ko ia ia naʻe pekia he kolosí ke fakalelei maʻa ʻetau ngaahi angahalá” (“ʻOku Moʻui Hoku Huhuʻí!” Liahona, Mē 2007, 25).

1. ʻAlamā

2. Siosefa Sāmita

3. Samuela ko e Leimaná

4. Sione

5. Palesiteni Tōmasi S. Monisoni

6. Līhai

Toʻohemá: tā fakatātaaʻi ʻe Jennifer Tolman; toʻomataʻú: tā fakatātaaʻi ʻe Jerry Thompson mo Paul Mann; Thomas S. Monson, TĀ FAKATĀTAAʻI ʻE Knud Edsberg, ʻI HE ANGALELEI ʻA E MUSIUME HISITŌLIA ʻO E SIASÍ