Koeʻuhí ʻOkú Ne Moʻui
“Kuo toe tuʻu moʻoni ʻa e ʻEikí” (Luke 24:34).
Naʻe kiʻi tuʻu ʻa Uātoi ʻi he lalo fuka lanu fakaʻofoʻofa ʻo Filipaini ʻi tuʻa ʻi hono ʻapi akó ki muʻa pea toki hū ki loto.
Pehē mai ʻene faiakó, “Mālō ʻetau maʻu e pongipongí ni, kalasi. Kuo taimi ki heʻetau lotu pongipongí.”
Naʻe ala kotoa ʻa e ngaahi kaungāmeʻa ʻo Uātoi naʻe tuʻu takatakai ʻiate iá ki honau takitaha foʻi laʻe, fatafata, pea mo honau umá ke faʻu ha fōtunga ʻo ha kolosi. Pea nau toki lau leva ʻa e lotu naʻa nau faʻa fai maʻu pē ʻi he kamataʻanga ʻo e kalasí. Hangē ko e anga mahení, naʻe ʻikai ke kau atu ʻa Uātoi ia. Ka, naʻe kuikui hono matá, punou hono ʻulú, ʻo fai haʻane lotu fakalongolongo pē ʻaʻana. Naʻá ne lotua ʻi he taimi kotoa pē ha ngaahi meʻa kehekehe, ʻo hangē ko hono akoʻi ia ʻi ʻapi pea ʻi he Palaimelí.
Ko e taimi naʻe ʻosi ai pea hanga haké, naʻá ne fakatokangaʻi ʻoku siofi ia ʻe heʻene faiakó ʻi ha mata puputuʻu.
“ʻE lava ke ta talanoa ʻi he ʻosi ʻa e akó?” ko ʻene leá ia.
Naʻe folo pē ʻe Uātoi hono fāvaí mo kamo. Naʻe ʻi ai nai haʻane kovi?
ʻI he taimi ne ʻosi ai ʻa e ngaahi kalasí he ʻaho ko iá, ne lue atu leva e faiako ʻa Uātoí ki ai.
Naʻá ne ʻeke ange, “ʻOku ou fakatokangaʻi ʻoku ʻikai ke ke kūnima pe lau ʻetau lotu pongipongí. “ʻE lava ke ke talamai hono ʻuhingá?”
Ne toki fakatau leva ʻe Uātoi ʻene mānavá. Naʻe ʻikai ʻita ʻene faiakó, ko e fieʻilo pē! Naʻe fakakaukau pe te ne tali fēfeeʻi.
Naʻe kamata leva, “ʻIo, ko e taimi ʻoku mau lotu ai ʻi homau siasí, ʻoku mau talanoa ki he Tamai Hēvaní fekauʻaki mo ha ngaahi meʻa kehekehe lahi. Pea ʻoku fakamanatu ʻe he kolosí kiate kimautolu ʻa e taimi naʻe pekia ai ʻa Sīsuú. Ka ʻoku ʻikai mate ʻa Sīsū ia. ʻOkú Ne Moʻui!
Naʻe kiʻi fakakaukau ki heni ʻene faiakó pea toki kamokamo māmālie.
Naʻá ne talaange, “Fakamālō atu ʻi hoʻo fakamatalaʻi mai kiate aú.”
ʻI he luelue ʻa Uātoi ki he ako ʻakapulú, naʻá ne ongoʻi māfana mo lelei ʻi hono lotó. Naʻe saiʻia ʻi hono akoʻi ʻo e niʻihi kehé fekauʻaki mo Sīsū Kalaisí.
Tā fakatātaaʻi ʻe Brad Teare