Tohi Foʻou ʻa Likí
ʻOku nofo ʻa Lola Peeti ʻi ʻOlikoni ʻi he USA.
“[Ko e taimi pē ʻoku ou sai ai mo angaʻofa mo tokoniʻi ha taha ʻoku ou sio ki ai, ʻoku ou ongoʻi mātuʻaki fiefia]” (“A Happy Helper,” Childrenʻs Songbook, 197).
Ne tohoʻi hifo ʻe Liki hono ongo nimá ʻi he ngaahi mataʻitohi lanu koula ʻo e takafi muʻa ʻo ʻene tohi foʻoú. Ne fakapupunga atu hono ngaahi kaungāmeʻá ʻo ofi ange.
“ʻOku sai ʻaupito!” Pehē ange ʻa Seiki. “Kuo teʻeki ke u sio au ʻi ha Tohi ʻa Molomona lanu kulokula ki muʻa.”
Talaange ʻe Seilomi, “ʻOku ngali ʻe hao pē ʻi he kato ho soté.”
Talaange leva ʻe Liki, mo ne mono hifo ki hono kató pea toe toʻo hake, “Ko ia.” Ne feʻunga ʻeni mo hono talitali ʻe he palesiteni ʻo e Palaimelí ʻa e taha kotoa ki he taimi feʻinasiʻakí, pea tuku leva e talanoa ʻa e tamaiki tangatá. Ka ne ʻikai tuku e toutou hila hifo ʻa Liki ki heʻene tohí.
ʻI he taimi ne tuku ai ʻa e Palaimelí, ne afe ʻa Liki ʻi he nesilií ke ʻave hono kiʻi tuofefiné. Kuo ʻosi ʻi ai e Tangataʻeikí ia.
“Kuó ke sio ki he Fineʻeikí?” Ko e ʻeke atu ia ʻe he Tangataʻeikí.
Talaange ʻe Liki, “ʻIkai, ka ʻoku ou fakaʻamu pē kuo mateuteu ke tau ō.” “ʻOku ou fiekaia au!”
Naʻe hakolo e kete ʻo Likí ʻi he taimi ne nau maʻu ai e Fineʻeikí, ka naʻe malimali ʻi he taimi naʻe sio ai ʻoku tuʻu ʻa Misa mo Mīsisi Peeti ʻi hono tafaʻakí. ʻIo, naʻe tuʻu pē ʻa Misa Peeti. Ka naʻe tangutu pē ʻa Sisitā Peeti ʻi hono saliote teketeké, maʻu ai pē. Naʻe pehē ʻe he Fineʻeikí ʻoku ʻi ai ha mahaki ʻo Sisitā Peeti ʻoku ui ko e uoua mingi (multiple sclerosis), pe ko e MS, ʻa ia ʻokú ne ʻai ke faingataʻa ʻene fakaʻaongaʻi hono ngaahi uouá. Ko e taimi ʻe niʻihi ʻoku langa ai, ka ʻoku malimali maʻu pē ki he taha kotoa. ʻOku kau ʻa Misa mo Sisitā Peeti ʻi he kakai ʻoku saiʻia taha ai ʻa Liki ʻi he uōtí.
Pehē ange ʻa Misa Peeti mo lulululu e nima ʻo Likí, “Hei, mālō ʻe lelei, talavou.” “Fēfē e Palaimelí he ʻahó ni?”
“Naʻe tōtō atu. Naʻá ku fakaʻaliʻali ange ʻeni ki he taha kotoa.” Ne toʻo hake leva ʻe Liki ʻene kiʻi tohi kulokulá.
“Ko e hā ia?” ʻEke ange ʻe Sisitā Peeti.
“Ko ʻeku Tohi ʻa Molomona foʻou. Pēhe ange ʻa Liki ʻi heʻene mono ange ki aí, “Naʻe ʻomi ia heʻeku ongo kuí.”
Talaange ʻe Sisitā Peeti mo ne fulihi ʻa e kiʻi tohi kulokulá ʻi hono nimá, “Kuo teʻeki ai ke u sio ha tohi peheni. ʻOku fuʻu siʻisiʻi mo maʻamaʻa. ʻOku ou manako hono lau e Tohi ʻa Molomoná, ka ʻoku fuʻu ongosia hoku nimáʻi hono puke ʻeku folofolá pea ʻoku pau leva ke u toutou taʻofi ʻi he ʻosi pē ha ngaahi miniti siʻi. Ka te u lava ʻo toʻo ʻeni ʻi ha taimi lōloa.” Naʻá ne mono fakafoki mai leva.
Ne sio ʻa Liki ki heʻene kiʻi tohi fakaʻofoʻofá. Pea toe sio kia Sisitā Peeti.
“Ko ē, Sisitā Peeti. ʻOku ou loto ke ʻai maʻau.” Ne mono atu leva ʻe Liki ʻa e Tohi ʻa Molomoná ki hono nimá.
“Ko hoʻo moʻoni?” ko e fehuʻi ia ʻa Misa Pētí.
Talaange ʻe ia, “Ko ʻeku moʻoni.”
“Siʻi, Liki, mālō ʻaupito.” Ne loʻimataʻia ʻe fofonga ʻo Sisitā Pētí. “ʻOku tokoni hono lau ʻo e folofolá kiate au ke u lavaʻi e ngaahi ʻaho ʻoku ou mamahi aí. ʻE tokoniʻi moʻoni au ʻe hoʻo kiʻi tohí.” Naʻe kakapa mai leva ʻo fāʻofua kiate ia.
Naʻe talaange ʻe he Fineʻeikí ʻi heʻenau lue atu ki he kaá, “ʻOkú ke fuʻu fakalongolongo. ʻOkú ke mamahi ʻi hoʻo foaki hoʻo tohí?”
“ʻIkai. Naʻe fakaʻofoʻofa, ka ʻoku ʻi ai haʻaku Tohi ʻa Molomona ʻe taha ʻi ʻapi. ʻIkai ngata ai, te u pehē ʻoku mahuʻinga ange ʻa e meʻa ʻoku ʻi loto he tohí ʻi he meʻa ʻoku ʻi hono takafí.”
Naʻe kukuʻi mai leva ʻe he Fineʻeikí hono umá ʻi he ʻofa.
“ʻOku ou fakaʻamu pē he ʻikai mamahi ʻeku Kui Fefiné mo ʻeku Kui Tangatá ʻi heʻeku foaki ʻeku Tohi ʻa Molomoná.”
“Liki, tui mai kiate au, he ʻikai.”
Ne ongoʻi ʻe Liki naʻe tonu ʻene fineʻeikí.
Tā fakatātaaʻi ʻe Matt Smith