ʻOku Fakatupulaki ʻe he Vahehongofulú ʻa e Tuí

Loutesi Solisi ti Tulani, Polivia

Naʻe ʻosi pē ha taimi nounou mei heʻema malí, ne u hiki mo hoku husepānití ki ha kolo mamaʻo ʻi he fakahahake ʻo Poliviá pea ko kimaua pē naʻe Siasi ʻi aí. Ko hoku husepānití ko ha ului foʻou, ka naʻá ma loto ke ma talangofua ki he ngaahi fekau kotoa pē ʻa e ʻEikí.

Naʻá ma tānaki ʻema vahehongofulú ʻi he māhina kotoa pē ʻi ha sila kae ʻoua kuó ma lava ʻo ʻave ia ki heʻema pīsopé. Naʻe maʻu ʻe hoku husepānití ha fakamoʻoni mālohi kapau te ma talangofua ki he fono ko ʻeni, ʻe tāpuakiʻi pea mo maluʻi kimaua.

Naʻá ma nofo ʻi ha loki ʻafu, totongi mamafa, mo ʻefiʻefi ʻi he hōtelé lolotonga ʻokú ma kei kumi ha ʻapi ke ma nofo totongi ai. Naʻe ʻaho lahi ʻema kumí ka naʻe ʻikai ha ola. Ko e fale pē naʻá ma lava ʻo maʻú, ko ha kiʻi fale siʻisiʻi mo fakaʻofoʻofa ka ne nofo ʻa e toko taha ʻoku ʻoʻoná ia ʻi ha kolo ʻe taha. Naʻe tokolahi ha kakai haʻu naʻa nau feinga ke nofo-totongi he ʻapí, ka naʻe ʻikai ke nau teitei maʻu ʻa e toko taha naʻe ʻoʻoná.

Hili haʻama lotu ʻi he pongipongi ʻe taha fekauʻaki mo e tuʻunga ne ma ʻi aí, kuo tukituki mai ha talavou homa matapaá. Naʻá ne talamai ko e toko taha ʻoku ʻoʻoná ʻa e ʻapí ʻoku kiʻi foki taimi nounou mai pē. Naʻe fakavavevave atu leva hoku husepānití ke talanoa mo ia kau kei hoko atu pē he lotú ke ma lava ʻo maʻu ʻa e falé. Naʻá ne talamai ʻi heʻene foki maí kuo tuku mai ʻe he fefiné kiate kimaua ʻa e falé ʻi ha totongi mātuʻaki maʻamaʻa. Ko e meʻa naʻe fakalahi ʻaki ʻema fiefiá he naʻe ʻosi fakanāunau ʻa e falé. Ko e meʻa pē naʻá ma maʻu ʻi he taimi ko iá ko ha ongo puha mo ha katoleta ʻe taha ʻoku fonu ʻi heʻema ʻū meʻá.

ʻOku ʻikai ha fekauʻaki ʻa e fono ia ʻo e vahehongofulú mo e paʻangá ka ko e tuí. Naʻe ʻikai ke lahi e vahe hoku husepānití, ka naʻá ma totongi totonu ʻema vahehongofulú, pea naʻe tāpuakiʻi kimaua ʻe he ʻEikí ke ma maʻu ha ʻapi lelei ʻo lava ai ke ma maʻu ha meʻa ke tauhi ʻaki kimaua.