Ko Hono Moʻuiʻaki e Ngaahi Tefitoʻi Moʻoni ʻo e Moʻui Fakalala pē Kiate Kitá
Neongo ko Luisi Kīsepi ʻo La Pase ʻo Polīviá ʻoku ʻā pē siʻono mata ʻe taha, ka ʻokú ne ʻiloʻi lelei ʻene taumuʻa ke moʻui fakafalala pē kiate ia mo tokonaki maʻa hono fāmilí. Neongo ʻoku fehangahangai mo ha ngaahi palopalema fakaʻekonōmika mo fakamoʻui lelei, ka ʻoku falala pē ʻa Luisi ki hono kahaʻú. ʻOkú ne fakahoko ʻa e meʻa kotoa pē ʻokú ne lavá ke tokoniʻi ia kae lolotonga ko iá ʻokú ne fakamoʻoniʻi ʻa ʻene fakafalala ki heʻene Tamai ʻi he Langí. ʻOkú ne pehē, “Kuó u ako, ʻoku ʻikai ha meʻa ia ʻe taʻe malava ʻi he taimi ʻokú ke maʻu ai e Tokoni ʻa ʻetau Tamaí.”
Moʻui Fakafalala pē Kiate Kitá: Ko ha Tefitoʻi Moʻoni Fakalaumālie mo Fakatuʻasino
ʻI he taʻu ʻe valu kuo maliu atú, ne fakatou ngāue mo ako ai siʻi tamai taʻu 46 ko ʻeni ʻo ha fānau ʻe toko ono ke maʻu ha mataʻitohi ʻi he saienisi ʻo e kelekelé mo e ngoué (agronomy). Ne kau ʻi he ngaahi taʻu ʻo e ako ʻa Luisí haʻane fononga ʻi ha meimei maile ʻe 60 (kilomita ʻe 97) mei hono kiʻi kolo siʻisiʻi ko ʻAkaasi (Achacachi) ke ako ʻi he ʻUnivēsiti Maio ti Seni ʻEnitulesí (Universidad Mayor de San Andres). Neongo e feilaulaú, ne lavaʻi lelei ʻe Luisi ʻene akó pea ʻoku tokanga taha ʻeni ki heʻene taumuʻa hono hokó ke maʻu haʻane faama pē ʻaʻana.
ʻOku hoko ʻa Luisi ko ha sīpinga lelei ʻo e moʻui fakafalala pē kiate kitá ʻi he ngaahi meʻa fakatuʻasinó, ʻo hangē ko e ngāué, uelofeá, mo e fakatolonga ʻo e meʻakaí. Ka ʻoku tatau pē e tefitoʻi moʻoni ʻo e moʻui fakafalala pē kiate kitá ʻi hono tuʻunga fakalaumālié mo hono tuʻunga fakatuʻasinó. Ne fakamatalaʻi ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e moʻui fakafalala pē kiate kitá ko hono “fatongiaʻaki ia ʻetau uelofea fakalaumālie mo fakatuʻasinó pea mo kinautolu kuo fakafalala mai ʻe he Tamai Hēvaní ke tau tokangaʻí.”1
Kuo ʻosi folofola ʻa e ʻEikí kuo teʻeki ai ke Ne teitei foaki ha fono naʻe fakatuʻasino ʻataʻatā pē (vakai, T&F 29:34–35). Mahalo ʻoku toe ʻuhinga pē ʻa e fekau ke ngāué ke tāpuakiʻi fakalaumālie lahi ange ai kitautolu pea mo tokonaki fakatuʻasino maʻatautolu (vakai, Sēnesi 3:17–19).
Moʻui Fakafalala Fakalaumālie Pē Kiate Kita
ʻOku toki mahino e ngaahi tāpuaki ʻo e moʻui fakafalala fakatuʻasino pē kiate kitá ʻi he taimi ʻo e faingataʻá hangē ko e ngaahi fakatamaki fakanatulá, taʻe maʻu ngāué, pe faingataʻaʻia fakapaʻangá. Ka ʻoku mahuʻinga tatau pē mo e moʻui fakafalala fakalaumālie pē kiate kitá ʻi he ngaahi taimi peheé. Ko kinautolu ʻoku nau maʻu ha ngaahi fakavaʻe fakalaumālie mālohí ʻoku tāpuakiʻi ʻaki ha nonga, pau, pea mo ha tui lahi ange ʻi he taimi ʻoku nau tangi ai ki he Tamai Hēvaní ke maʻu ha tokoní.
ʻOku faleʻi kitautolu ʻe he kau taki ʻo e Siasí ke tau teuteu ki he ngaahi fakatamaki fakalaumālié. Naʻe pehē ʻe Palesiteni Poiti K. Peeka, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá:
“[Kuo ʻosi akoʻi kitautolu ke tau tokonaki … ha meʻakai, vala, pea mo ha lolo/penisini ʻo kapau ʻe lava—ʻi ʻapi. …]
“[ʻOku ʻikai ke tau lava ʻo fakatokangaʻi ko e tefitoʻi moʻoni tatau pē ʻoku ngāueʻaki ki he tataki fakalaumālié mo e fakahaá, ki hono fakaleleiʻi ʻo e ngaahi palopalemá, faleʻí, mo e fakahinohinó? …]
“Kapau ʻe mole meiate kitautolu ʻa ʻetau tauʻatāina fakaeloto mo fakalaumālié pea mo ʻetau moʻui fakafalala pē kiate kitautolú, ʻe lava ʻo fakavaivaiʻi lahi kitautolu, pea mahalo ʻe laka ange ia, ʻi he taimi ʻoku tau falala ai pē kiate kitautolu he koloá.2
Ko e Foakí mo e Talí
ʻOku ʻikai totonu ke maʻu hala ʻa e moʻui fakafalala pē kiate kitá ʻo pehē ko ha tauʻatāina kakato. Ko hono fakalūkufuá, ʻoku tau fakafalala kotoa ki heʻetau Tamai Hēvaní ʻi he meʻa kotoa pē (vakai, Mōsaia 2:21). ʻOku tau fie maʻu ʻa ʻEne fakahinohinó, tauhí, mo ʻEne maluʻí.
ʻOku tau toe fe-fakafalalaʻaki foki. Koeʻuhí ʻoku foaki mai kiate kitautolu ha ngaahi meʻafoaki fakalaumālie kehekehe, ʻoku fie maʻu leva kitautolu ke tau fevahevaheʻaki ʻa e meʻa kuo foaki kiate kitautolú koeʻuhí ke tāpuekina ʻa e taha kotoa (vakai, T&F 46:11–12). Ko e kií ke tau hoko ʻo moʻui fakafalala pē kiate kitautolu ʻi he ngaahi meʻa ʻoku tau maʻu e mālohi ke fai iá, ke fetokoniʻaki ʻi he taimi ʻoku tau lava aí, pea mo tuku ke maʻu ʻe he niʻihi kehé ʻa e tāpuaki ʻo hono tokoniʻi kitautolú ʻi he taimi ʻoku hoko ai ʻa e ngaahi fie maʻú.
Ko e lahi ange ʻo ʻetau moʻui fakafalala pē kiate kitautolú—fakalaumālie mo fakatuʻasino fakatouʻosi—ko e lahi ange ia ʻetau malava ke hoko ko ha fakafofonga ki he leleí. Naʻe fakamatalaʻi ʻe ʻEletā Heili: “Ko e tumutumu ia ʻetau taumuʻá ke tau hoko ʻo hangē ko e Fakamoʻuí, pea ʻoku fakatupulekina e taumuʻa ko iá ʻe heʻetau tokoni taʻesiokita ki he niʻihi kehé. ʻOku hanga ʻe he tuʻunga ʻo ʻetau moʻui fakafalala kiate kitá ʻo fakatupulekina pe holoki ʻetau malava ke tokoní.”3
Ko ha Fatongia Fakafoʻituitui
Kuo sio ʻa Luisi Kīsepi ia ki heʻene kītaki mo falala ki he ʻEikí, ʻi he ngaahi tāpuaki fakatuʻasino ʻo e ngāué, mataʻitohi mei he ʻunivēsití, pea mo ha fāmili ʻoku mālohi angé. Ko hono olá, kuo hanga ʻe he koloa fakatuʻasino ko iá ʻo fakamālohia hono fāmilí. ʻOkú ne muimui ʻi he naʻinaʻi ʻa Palesiteni Sipenisā W. Kimipoló (1895–1985): [“ʻOku ʻikai ha mēmipa moʻoni ia ʻo e Siasí, ʻi he lolotonga ʻene kei malava fakaesino mo fakaelotó, ke hilifaki atu ʻene kavengá pe ko e tauhi ʻo hono fāmilí ki ha taha kehe.] [ʻI he lolotonga ʻo ʻene kei malavá, te ne tokonaki maʻana mo hono fāmilí ʻi he malumalu ʻo e fakahinohino fakalaumālie ʻa e ʻEikí pea mo ʻene ngāué, ʻa e ngaahi fie maʻu fakatuʻasino mo fakalaumālie ʻo e moʻuí.”]4
Ko e lahi ange ʻo ʻetau moʻui fakafalala pē kiate kitautolu—fakalaumālie mo fakatuʻasino fakatouʻosi—ko e lahi ange ia ʻetau malava ke hoko ko ha fakafofonga ki he leleí.
Tā fakatātaaʻi ʻo e ʻatá ʻe Craig Dimond, Cody Bell, mo Howard Collett © IRI