គ្រឿងសឹកសម្ងាត់
អ្នកនិពន្ធរស់នៅក្នុងរដ្ឋ អារីស្សូណា ស.រ.អា. ។
មនុស្សគ្រប់គ្នាបានមើលស្រាលនូវអ្វីដែល អាយវី អាចធ្វើ ។
« ឲ្យនូវអ្វីដែលយើងអាចផ្ដល់ឲ្យ » ( សៀវភៅចម្រៀងកុមារ ទំព័រ 116 ) ។
« តែពុំមែនជាអាយវីនោះទេ ! នាងជាក្មេងស្រី ម្នាក់ » ប្រេឌិន បានខ្សឹបប្រាប់ពីក្រោយខ្នង អ័ដាម ។
តែ អ័ដាម គឺជាប្រធានក្រុមកីឡាបាល់គប់សម្រាប់ថ្ងៃនោះ ហើយគាត់បានធ្វើការជ្រើសរើសរបស់គាត់ ។ គាត់បាននិយាយឮៗម្ដងហើយម្ដងទៀតថា « ខ្ញុំរើសយកអាយវី » ។ ថៃលើ ជាប្រធានក្រុមម្ខាងទៀត បានញញឹមបែបចំអក ។ សូម្បីតែគ្រូបង្វឹកឈ្មោះ ហ្គាសៀយ៉ា ក៏ភ្ញាក់ផ្អើលនឹងការរើសមនុស្សទីពីររបស់អ័ដាមដែរ ។
អាយវី ក៏មានទឹកមុខភ្ញាក់ផ្អើលដែរ រួចដើរចេញទាំងអៀន ។ ប្រេឌិន បានត្អូញត្អែរ ។
អាយវី មិនដូចជាក្មេងស្រីដទៃទៀតទេ ។ នាងគឺជាក្មេងស្រីមានមាឌល្អិតជាងគេនៅក្នុងថ្នាក់ ។ នាងមើលទៅដូចមិនសូវរហ័សរហួនសោះ ហើយបាល់នោះហាក់ដូចជាធំជាងខ្លួននាងទៅទៀត ។ កាល អាយវី បានដើរមក នោះ ប្រេឌិន បានពោលថា « នាងប្រហែលជាលើកបាល់មិនរួចផង តាមមើលទៅ » ។
ដោយព្យាយាមធ្វើឲ្យភាពជឿជាក់ អ័ដាម បានពោលថា « ប្រហែលជានាងអាចក្លាយគ្រឿងសឹកសម្ងាត់របស់យើងបាន » ។ ប៉ុន្តែនោះពុំមែនជាហេតុផលដែលគាត់បានរើសនាងនោះទេ ។ មានគ្រាមួយ អាយវី ធ្លាប់ប្រាប់ អ័ដាម ថានាងមិនចូលចិត្តលេងកីឡាទេ ដោយសារនាងតែងតែរើសឲ្យលេងក្រោយគេជានិច្ច ។ ពួកក្មេងប្រុសដទៃទៀតបានចំអន់ អាយវី ប៉ុន្តែឪពុកម្ដាយរបស់អ័ដាមបានប្រាប់គាត់ថា ក្មេងប្រុសគួរបង្ហាញការគោរពដល់ក្មេងស្រី ។ ដូច្នេះទើបគាត់រើស អាយវី ។ នៅពេលគាត់ឃើញ ថៃលើ រើសក្មេងប្រុសមាឌធំជាងគេក្នុងថ្នាក់ អ័ដាម បានសង្ឃឹមថា គាត់បានធ្វើការសម្រេចចិត្តដ៏ត្រឹមត្រូវ ។
បន្ទប់ពីមនុស្សគ្រប់គ្នាមានក្រុមរបស់ខ្លួនមក គ្រូបង្វឹក ហ្គាសៀយ៉ាបានភ្លុំកញ្ចែ ហើយក្រុមទាំងពីរបានរត់បែកគ្នាទៅចុងម្ខាងៗនៃទីលានប្រកួត ។ គ្រូបង្វឹក ហ្គាសៀយ៉ា បានហុចបាល់ឲ្យទៅថៃលើ ហើយថៃលើបានសម្លឹងមកមើលក្រុមអ័ដាមពីមុនគាត់សម្លឹងភ្នែកដាក់លើអាយវី ។ គាត់បានយាដៃមកក្រោយ ហើយចោលបាល់ ។
រំពេចនោះ ! បាល់នោះបានត្រូវនឹងដី ហើយលោតគ្មានប៉ះនរណាម្នាក់ឡើយ ។ អ័ដាម បានព្រិចភ្នែក ។ អាយវី បានគេចខ្លួនផុតទាន់ពេល ។ មនុស្សគ្រប់គ្នាជុំវិញគាត់ហាក់ដូចជាភ្ញាក់ផ្អើល ប៉ុន្តែអ័ដាមបានញញឹម ។ ប្រហែលជាការរើសយក អាយវី ពិតជាគំនិតមួយដ៏ល្អ ។
ការប្រកួតនោះបានបន្ត ។ ថៃលើ បានព្យាយាមគប់បាល់ឲ្យចំអាយវី ប៉ុន្តែនាងចេះតែគេចរួចខ្លួនផុតជានិច្ច ។ គ្មាននរណាម្នាក់ចោលបាល់ចំនាងឡើយ ។ ដោយថៃលើ និង មិត្តរួមក្រុមគាត់មួយចំនួនរវល់តែព្យាយាមធ្វើឲ្យអាយវីចេញ នោះពួកគេមិនបានផ្ដោតទៅលើអ្នកផ្សេងទៀតទេ ។ អ័ដាមបានញញឹម — តាមពិតទៅ មាឌរបស់អាយវីបានធ្វើឲ្យការលេងកីឡាបាល់គប់របស់នាងកាន់តែមានភាព ប្រសើរ ដោយសារនាងមានមាឌតូច ហើយលឿន នោះពួកគេពិបាកនឹងចោលត្រូវនាងណាស់ ។
នៅទីបំផុត ក្រុមអ័ដាមបានឈ្នះការប្រកួតនោះ ។ ប្រេឌិន បានពោលថា « ពិតជាគ្រឿងសឹកសម្ងាត់មែន » ។ « អាយវីលេងបានល្អណាស់ » ។
ថៃលើ បានពោលថា « មែនហើយ » ។ « លើកក្រោយ នាងនៅក្នុងក្រុមរបស់ខ្ញុំ ។ យើងនឹងឈ្នះជាពុំខានឡើយ ! » ។ អាយវីបានញញឹម កាលនាងដើរត្រឡប់ទៅថ្នាក់វិញ ដោយមានមិត្តរួមក្រុមទ័ព្ធជុំវិញ ។
អ័ដាមញញឹមមិនឈប់ កាលគាត់បានដើរពីក្រោយក្រុម។ គាត់បានធ្វើល្អចំពោះអាយវី ហើយគាត់បានជួយក្មេងប្រុសដទៃទៀតឲ្យគោរពដល់ក្មេងស្រីបន្ថែមទៀត ។ គ្រឿងសឹកសម្ងាត់ដ៏អស្ចារ្យបំផុតគឺពុំមានអ្វីដែលអស្ចារ្យនោះទេ — វាគ្រាន់តែជាការមានសណ្ដានចិត្តល្អប៉ុណ្ណោះ ។