តើអ្នកនឹងជ្រើសយកអ្វី ?
ដោយអែលឌើរ រ័សុល អិម ណិលសុន
ក្នុងកូរ៉ុមនៃពួកសាវកដប់ពីរនាក់
ដកស្រង់ចេញពីសុន្ទរកថានៅការប្រជុំធម្មនិដ្ឋាននៃប្រពន្ធ័អប់រំសាសនាចក្រ « យុវវ័យនៃសិទ្ធិពីកំណើតដ៏ថ្លៃថ្នូរ ៖ តើអ្នកនឹងជ្រើសយកអ្វី ? » ធ្វើឡើងនៅសាកលវិទ្យាល័យព្រិកហាំ យ៉ង់ — ហាវៃ នៅថ្ងៃទី 6 ខែ កញ្ញា ឆ្នាំ 2013 ។ សម្រាប់សុន្ទរកថាទាំងស្រុង សូមចូលទៅ cesdevotionals.lds.org ។
អ្នករាល់គ្នាត្រូវបានចាត់ដោយព្រះវរបិតាសួគ៌របស់អ្នក ដើម្បីស្ថាបនានគរព្រះនៅលើផែនដីឥឡូវនេះ ហើយរៀបចំប្រជាជនដើម្បីទទួលព្រះអង្គសង្គ្រោះ ។
រចនារូបភាពដោយ ប្រានឌិន ឌ័រមិន
ក្នុងនាមជា « យុវវ័យនៃសិទ្ធិពីកំណើតដ៏ថ្លៃថ្នូរ »1 អ្នកគឺជាបុត្រាបុត្រីពិតរបស់ព្រះ បានកើតមកក្នុងពេលពិសេសនេះនៃប្រវត្តិសាស្ត្រពិភពលោកសម្រាប់គោលបំណងពិសិដ្ឋបំផុតមួយ ។ ទោះជាតម្លៃសីលធម៌ និង សាសនាក្នុងសង្គមហាក់ដូចជាចុះអន់ថយនៅទូទាំងសាកលលោកក្ដី ក៏យុវវ័យនៃសាសនាចក្រនេះគឺជាអ្នកកាន់តាមបទដ្ឋាននៃព្រះអម្ចាស់ ហើយជាប្រភពពន្លឺដើម្បីទាញចិត្តអ្នកដទៃមករកទ្រង់ដែរ ។ អត្តសញ្ញាណ និង គោលបំណងរបស់អ្នកគឺពិសេស ។
តើអត្តសញ្ញាណរបស់អ្នកជាអ្វីទៅ ? អ្នកគឺជាកូនចៅនៃសេចក្ដីសញ្ញាដែលព្រះបានចុះជាមួយនឹងលោកឪពុកអ័ប្រាហាំ ពេលលោកអ័ប្រាហាំត្រូវបានសន្យាថា « អស់ទាំងគ្រួសារនៅផែនដីនឹងបានពរដោយសារពូជឯង » ( កិច្ចការ 3:25 សូមមើលផងដែរ នីហ្វៃទី 1 15:18, នីហ្វៃទី 3 20:25 ) ។ អ្នកក៏ជា « កូនចៅនៃជំនាន់ដែលបានសន្យានោះផងដែរ »2 ជារយៈកាលនេះនៃប្រវត្តិសាស្ត្រពិភពលោក ពេលដែលដំណឹងល្អនឹងត្រូវប្រកាសយ៉ាងទូលំទូលាយពេញពិភពលោក ។
តើគោលបំណងអ្នកជាអ្វីទៅ ? បងប្អូនប្រុស អ្នកត្រូវបានតែងតាំងពីមុននៅក្នុងពិភពជីវិតមុនជីវិតនេះ ដើម្បីកាន់បព្វជិតភាព ( សូមមើល អាលម៉ា 13:2–3 ) ។ ហើយបងប្អូនស្រី អ្នកត្រូវបានជ្រើសរើសតាំងពីមុនបង្កើតពិភពលោក ដើម្បីបង្កើត ហើយមើលថែកូនចៅព្រះ ហើយពេលធ្វើដូច្នោះ អ្នកផ្ដល់សិរីល្អដល់ព្រះ ( សូមមើល គ. និង ស. 132:63 ) ។ បងប្អូនស្រី តើអ្នកមានបានគិតវិនិច្ឆ័យពីអត្ថន័យពិតនៃការធ្វើជាអ្នកបង្កបង្កើតជាមួយព្រះដែរឬទេ ?
យុវជន និង យុវនារី អ្នករាល់គ្នាម្នាក់ៗ គឺត្រូវបានចាត់ដោយព្រះវរបិតាសួគ៌ ដើម្បីស្ថាបនានគរព្រះនៅលើផែនដីឥឡូវនេះ ហើយរៀបចំប្រជាជនឲ្យទទួលព្រះអង្គសង្គ្រោះ ពេលទ្រង់នឹងគ្រងរាជ្យជាព្រះមែស៊ីក្នុងសហសវត្ស ។ សិទ្ធិពីកំណើតដ៏ថ្លៃថ្នូរ អត្តសញ្ញាណ គោលបំណង និងការចាត់តាំងដ៏ទេវភាពរបស់អ្នកបានញែកអ្នកចេញពីអ្នកដទៃទៀតទាំងអស់ ។
ប៉ុន្តែសិទ្ធិពីកំណើត ការតែងតាំងពីជីវិតមុន និងការចាត់តាំងរបស់អ្នក ពុំអាចសង្គ្រោះ ឬលើកតម្កើងអ្នកបានទេ ។ អ្នកនឹងធ្វើកិច្ចការនោះតាមរយៈការសម្រេចចិត្តផ្ទាល់ខ្លួនរបស់អ្នក និងនៅពេលអ្នកជ្រើសរើសទទួលយកព្រះចេស្ដានៃដង្វាយធួនរបស់ព្រះអម្ចាស់មកក្នុងជីវិតអ្នក ។ គោលការណ៍នៃសិទ្ធិជ្រើសរើសដ៏អស់កល្បមហិមានោះមានតម្លៃចំពោះផែនការនៃព្រះវរបិតាយើង ។ ដូច្នេះ យុវវ័យនៃសិទ្ធិពីកំណើតដ៏ថ្លៃថ្នូរ ៖ តើអ្នកនឹងជ្រើសរើសយកអ្វី ?
តើអ្នកនឹងជ្រើសរើសឲ្យមានចំណេះចម្រើនឡើងមែនទេ ?
ការអប់រំគឺជាអ្វីដែលអ្នកត្រូវទទួល ។ គ្មាននរណាផ្សេងអាចទទួលវាជំនួសអ្នកបានទេ ។ មិនថាអ្នកនៅកន្លែងណាទេ សូមបង្កើតនូវបំណងប្រាថ្នាដ៏ខ្លាំងក្លាមួយដើម្បីរៀនសូត្រ ។ ចំពោះយើង ដែលជាពួកបរិសុទ្ធថ្ងៃចុងក្រោយ ការទទួលបានការអប់រំពុំមែនគ្រាន់តែជាឯកសិទ្ធិមួយប៉ុណ្ណោះទេ តែវាជាការទទួលខុសត្រូវខាងសាសនាមួយផងដែរ ។ « សិរីល្អនៃព្រះគឺជាបញ្ញា » ( គ. និង ស. 93:36 ) ។ ប្រាកដណាស់ ការអប់រំរបស់យើងនឹងនៅយូរអង្វែងដល់អស់កល្បជានិច្ច ។
« គោលការណ៍នៃបញ្ញាណាក៏ដោយដែលយើងបានទទួលនៅក្នុងជីវិតនេះ នោះនឹងនៅជាប់នឹងយើងក្នុងដំណើររស់ឡើងវិញ ។
« ហើយបើសិនជាអ្នកណាមួយបានចំណេះវិជ្ជា និងបញ្ញាច្រើនជាងអ្នកផ្សេងនៅក្នុងជីវិតនេះ … គាត់ [ ឬនាង ] នឹងបានប្រៀបច្រើននៅពិភពខាងមុខ » ( គ. និង ស. 130:18–19 ) ។
ទស្សនៈរយៈពេលយូរដូច្នោះនឹងជួយអ្នកធ្វើការជ្រើសរើសល្អពីការរៀនសូត្រ ។
ចូរកុំខ្លាចក្នុងការតោងចាប់គោលដៅអ្នកឡើយ — ទោះជាសុបិនអ្នកក្ដី ! ប៉ុន្តែសូមដឹងថា គ្មានផ្លូវកាត់ណាដើម្បីបានឧត្ដមភាព និងមានសមត្ថភាពនោះទេ ។ ការអប់រំគឺជាការខុសប្លែកគ្នារវាងការប៉ងប្រាថ្នា ថាអ្នកអាចជួយអ្នកដទៃ និង ការមានលទ្ធភាពអាច ជួយដល់ពួកគេ ។
តើអ្នកនឹងជ្រើសរើសយកការរស់នៅបែបណា ?
អ្នកត្រូវបានរំពឹងទុកឲ្យរស់នៅខុសពីអ្នកដទៃ ។ អ្នកដឹងនូវអ្វីដែល ប៉ុលបានមានប្រសាសន៍ទៅកាន់យុវជន ធីម៉ូថេ ថា ៖ « ធ្វើជាគំរូដល់ពួកអ្នកជឿដោយពាក្យសម្ដី កិរិយាប្រព្រឹត្ត សេចក្ដីស្រឡាញ់ សេចក្ដីជំនឿ និង សេចក្ដីសប្បុរស » ( ធីម៉ូថេទី 1 4:12 ) ។3 សូមជ្រើសរើសយកការគិត និងទង្វើរខុសប្លែកពីមនុស្សក្នុងពិភពលោកនេះ ។ សូមជ្រើសរើសយកឲ្យមានភាពខុសប្លែក ហើយមើលឃើញពីឥទ្ធិពលល្អដែលអ្នកនឹងអាចទទួលបាន ។ ដូចស៊ីស្ទើរ អាឌីស ជី ខាប មានគ្រាមួយបានថ្លែងថា « អ្នកមិនអាចក្លាយជាអ្នកសង្គ្រោះជីវិតបានឡើយ បើអ្នកមានរូបរាងដូចនឹងពួកអ្នកហែលទឹកផ្សេងទៀតដែលនៅលើឆ្នេរសមុទ្រនោះ » ។4
ក្នុងនាមជាយុវវ័យដែលមានសិទ្ធិពីកំណើតថ្លៃថ្នូរ នោះអ្នកមានការចាប់ផ្ដើមដ៏អស្ចារ្យនៅក្នុងជីវិត ប៉ុន្តែអ្នកក៏មាននូវទំនួលខុសត្រូវបន្ថែមទៀតផងដែរ ។ « ត្បិតដល់អ្នកណាដែលត្រូវបានប្រទានឲ្យច្រើន នោះក៏មានតម្រូវការជាច្រើនវិញ » ( គ. និង ស. 82:3 សូមមើលផងដែរ លូកា 12:48 ) ។ ផ្នែកនៃតម្រូវការនោះគឺការក្លាយជាទ័ពថ្មីម្នាក់ ។ ពេលអ្នកជ្រមុជទឹក អ្នកចុះឈ្មោះជាថ្មីនៅក្នុងកងទ័ពរបស់ព្រះអម្ចាស់ ។5 ពីមុនជីវិតនេះ អ្នកបានឈរក្បែរព្រះយេស៊ូវគ្រីស្ទក្នុងចម្បាំងនៅស្ថានសួគ៌ ។ ហើយឥឡូវនេះ ចម្បាំងរវាងកម្លាំងនៃអំពើល្អ និងអំពើអាក្រក់បានបន្តនៅលើផែនដី ។ វាពិត ! ( សូមមើល វិវរណៈ 12:7–9, គ. និង ស. 29:40–41 ) ។ នៅខាងព្រះគឺព្រះយេស៊ូវគ្រីស្ទ ដែលត្រូវបានតែងតាំងទុកជាមុនជាព្រះអង្គសង្គ្រោះនៃពិភពលោក ( សូមមើល នីហ្វៃទី 1 10:4 ) ។ រីឯបក្សម្ខាងទៀតគឺសាតាំង — ដែលជាអ្នកបះបោរ ជាអ្នកបំផ្លាញសិទ្ធិជ្រើសរើស ( សូមមើល ម៉ូសេ 4:3 ) ។6
ផែនការរបស់ព្រះ អនុញ្ញាតឲ្យមារសត្រូវល្បួងអ្នក ដើម្បីឲ្យអ្នកអាចអនុវត្តសិទ្ធិជ្រើសរើសអ្នក ជ្រើសល្អជំនួសអាក្រក់ ជ្រើសប្រែចិត្ត ជ្រើសមករកព្រះយេស៊ូវគ្រីស្ទ ហើយជឿលើការបង្រៀនទ្រង់ ព្រមទាំងធ្វើតាមគំរូទ្រង់ ។ ឱ ! នេះជាការទទួលខុសត្រូវ និងជាទំនុកចិត្តដ៏ធំធេងណាស់ !
សេរីភាពអ្នកដើម្បីប្រព្រឹត្តដោយខ្លួនឯង គឺសំខាន់ចំពោះការរីកចម្រើន និងសុភមង្គលអស់កល្បរបស់អ្នក ដែលមារសត្រូវបានខិតខំយ៉ាងខ្លាំង ដើម្បីធ្វើឲ្យវាចុះខ្សោយ ( សូមមើល នីហ្វៃទី 2 2:27, 10:23 ) ។
តើអ្នកនឹងបង្កើតអាទិភាព ដើម្បីជួយអ្នកឲ្យធ្វើការជ្រើសរើសក្នុងជីវិតដែរឬទេ ?
ការជ្រើសរើសអ្នកនឹងពុំមែនរវាងអំពើល្អ និងអំពើអាក្រក់ទាំងអស់នោះទេ ។ មនុស្សជាច្រើននឹងជ្រើសរើសរវាងជម្រើសល្អពីរ ។ សេចក្ដីពិតពុំត្រូវបានបង្កើតឡើងដូចគ្នានោះទេ ដូច្នេះអ្នកត្រូវដាក់អាទិភាព ។ ក្នុងការស្វែងរកចំណេះដឹងរបស់អ្នក សូមដឹងថា សេចក្ដីពិតដ៏សំខាន់បំផុតដែលអ្នកអាចរៀនបានមកពីព្រះអម្ចាស់ ។ ក្នុងការអធិស្ឋានទៅព្រះវរបិតាសម្រាប់ពួកសិស្សទ្រង់ ព្រះអម្ចាស់ផ្ទាល់បានបញ្ជាក់ពីការណ៍នេះ ។ ទ្រង់បានមានបន្ទូលថា « នេះគឺជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែមួយ និង ព្រះយេស៊ូវគ្រីស្ទ ដែលទ្រង់បានចាត់ឲ្យមកផង » ( យ៉ូហាន 17:3 ) ។ ក្រៅពីការព្យាយាមរៀនសូត្រ ចូរព្យាយាមស្គាល់ព្រះ ជាព្រះវរបិតាសួគ៌អ្នក និងព្រះរាជបុត្រាទ្រង់ ព្រះយេស៊ូវគ្រីស្ទ ។ សូមមកស្គាល់ទ្រង់ ហើយស្រឡាញ់ទ្រង់ដូចជាខ្ញុំ ។
បទគម្ពីរមួយទៀតស្ដីពីអាទិភាពបានជួយខ្ញុំក្នុងជីវិតខ្ញុំ គឺបទគម្ពីរមួយនេះ ៖ « ចូរស្វែងរកនគរ និង សេចក្តីសុចរិតនៃព្រះជាមុនសិន ទើបគ្រប់របស់ទាំងនោះនឹងបានប្រទានមកអ្នករាល់គ្នាថែមទៀតផង » ( ម៉ាថាយ 6:33 ) ។
លើសពីអ្វីផ្សេងទៀតក្នុងពិភពលោកនេះ អ្នកគួរតែធ្វើការជ្រើសរើសអ្វីដែលដឹកនាំទៅកាន់ជោគវាសនានៃជីវិតអស់កល្បរុងរឿងដ៏ខ្ពស់បំផុត ។ នោះជាសិរីល្អធំជាងគេរបស់ព្រះសម្រាប់អ្នក ( សូមមើល គ. និង ស. 14:7, ម៉ូសេ 1:39 ) ។ សូមជ្រើសយកជីវិតអស់កល្បជាអាទិភាពខ្ពស់បំផុតរបស់អ្នក ! សូមសិក្សាព្រះគម្ពីរ ដូចជាកណ្ឌ 76 និង 88 ក្នុងគោលលទ្ធិ និងសេចក្ដីសញ្ញា ដើម្បីយល់បន្ថែមពីពរជ័យផ្សេងៗគ្នា ដែលកំពុងរង់ចាំអ្នកដែលជ្រើសយកជីវិតអស់កល្ប និងអ្នកដែលបដិសេធ ។ សូមជ្រើសយកជីវិតអស់កល្បជាអាទិភាពខ្ពស់បំផុតរបស់អ្នក ហើយកត់សម្គាល់ពីរបៀបដែលការជ្រើសរើសផ្សេងទៀតបានកើតឡើងយ៉ាងងាយ ។
តើអ្នកនឹងជ្រើសរើសសេពគប់មនុស្សបែបណា ?
អ្នកនឹងសេពគប់មនុស្សល្អជាច្រើនដែលជឿលើព្រះដែរ ។ មិនថាពួកគេជាសាសនាយូដា កាតូលីក ប្រូតេស្ដង់ ឬម៉ូស្លីមទេ ពួកអ្នកជឿដឹងថាមានសេចក្ដីពិត ។ ពួកអ្នកជឿលើព្រះក៏មានសតិសម្បជញ្ញៈមួយដែរ ។ ពួកអ្នកជឿគោរពតាមច្បាប់សង្គម និងច្បាប់ព្រះដោយស្ម័គ្រចិត្ត ទោះជាច្បាប់នោះមិនអាចប្រតិបត្តិតាមបានក្ដី ។
ជាមួយការតាំងចិត្តរបស់អ្នកដើម្បីគោរពច្បាប់សង្គម និងច្បាប់ព្រះ នោះអ្នកនឹងឈប់នៅត្រង់ភ្លើងពណ៌ក្រហម ទោះជាគ្មានចរាចរដែលអាចមើលឃើញនឹងភ្នែកក្ដី ។ ក្នុងនាមជាកូនចៅនៃព្រះ ទោះជានគរបាលមិនបានចាប់អ្នក ទោះជាអ្នកបានលួច ធ្វើឃាត ឬធ្វើអំពើកំផិតក្ដី អ្នកដឹងថា ទង្វើទាំងនេះខុស ហើយថានៅទីបំផុត ព្រះនឹងតម្រូវឲ្យអ្នកទទួលខុសត្រូវ ។ អ្នកដឹងថា លទ្ធផលចំពោះការមិនប្រតិបត្តិតាមគឺមានដល់ភាពអស់កល្ប ពុំមែនត្រឹមតែខាងសាច់ឈាមនោះទេ ។
នៅពេលអ្នកធ្វើដំណើរក្នុងជីវិត អ្នកក៏នឹងជួបមនុស្សដែលមិនជឿព្រះផងដែរ ។ ពួកគេភាគច្រើនពុំទាន់ស្វែងរកឃើញសេចក្ដីពិតពីព្រះនៅឡើយ ហើយមិនដឹងពីទីកន្លែងនឹងរកវា ។ ប៉ុន្តែ អ្នករាល់គ្នាដែលជាយុវវ័យដែលមានសិទ្ធិពីកំណើតថ្លៃថ្នូរនឹងជួយសង្គ្រោះដល់ពួកគេ ។ ក្នុងចំនួនដ៏ធំ អ្នកកំពុងប្រមូលផ្ដុំគ្នាតាមសំណើររបស់ព្យាការីនៃព្រះ ដើម្បីមានពួកអ្នកផ្សព្វផ្សាយសាសនាកាន់តែច្រើន ។ យើងមានអំណរជាខ្លាំងចំពោះពួកគេម្នាក់ៗ !
នៅពេលអ្នកសេពគប់នឹងពួកអ្នកមិនជឿព្រះ ចូរប្រុងប្រយ័ត្នថា ពួកគេមួយចំនួនអាចនឹងមិនខ្វល់ពីចំណាប់អារម្មណ៍ក្នុងចិត្តអ្នកឡើយ ( សូមមើល គ. និង ស. 1:16, 89:4 ) ។ រំពេចណាអ្នកដឹងពីការណ៍នោះ សូមចាកចេញពីពួកគេភ្លាម ហើយជារៀងរហូត ( សូមមើល ធីម៉ូថេទី 1 6:5–6, 11 ) ។
ជាអកុសល អ្នកនឹងជួបមនុស្សដែលការស្វែងរកសុភមង្គលរបស់ពួកគេហាក់ដូចជាកំពុងនាំពួកគេចុះទៅចំណោតរអិលនៃអំពើបាប ។ សូមប្រុងប្រយ័ត្នចំពោះចំណោតរអិលនោះ ! រាល់ភាពរីករាយក្នុងអំពើបាបគឺមានរយៈពេលខ្លី ហើយការចងចាំដ៏អាក្រក់ របស់វានឹងអន្ទងតាមរយៈការព្រួយ និងកំហុស ។ ទង្វើរខុសឆ្គងនៃភាពស្និទ្ធស្នាល ធ្វើឲ្យខូចអ្វីៗដែលបានរៀបចំឡើងដោយព្រះដើម្បីរួបរួមប្ដី និងប្រពន្ធ វាគឺជាតម្រាប់ក្លែងក្លាយ ។ បទពិសោធន៍មិនស្របច្បាប់នីមួយៗ គឺបានដកយកចេញនូវអត្ថន័យជ្រាលជ្រៅ និងអនុស្សាវរីយដ៏ផ្អែមល្ហែម ។
តើអ្នកនឹងជ្រើសយកសេរីភាព ឬការជាប់ឃុំឃាំង ?
កងកម្លាំងសត្រូវនៅព័ទ្ធជុំវិញ ។ អ្នកកំពុងរស់នៅក្នុង ដែនដីដែលសត្រូវកាន់កាប់ ។7 ជំងឺនៃរូបអាសគ្រាមដ៏អាក្រក់កើតមានពាសពេញ ។ វាដាក់អន្ទាក់ដល់អស់ជនដែលងាកទៅរកឥទ្ធិពលអាក្រក់របស់វា ។
ការណ៍នេះត្រូវបានទតឃើញជាមុនដោយព្រះអម្ចាស់ ដោយទ្រង់មានបន្ទូលថា « ហើយឥឡូវនេះ យើងបង្ហាញដល់អ្នកនូវសេចក្ដីអាថ៌កំបាំងមួយ ជាការណ៍ដែលមាននៅក្នុងបន្ទប់សម្ងាត់ ដើម្បីនាំឲ្យកើតមានសេចក្ដីបំផ្លិចបំផ្លាញដល់អ្នក កន្លងពេលក្រោយមក ហើយអ្នករាល់គ្នាពុំបានដឹងសោះ » ( គ. និង ស. 38:13 សូមមើលផងដែរ ខ 28 ) ។
សូមពិចារណាពីរបៀបដែលមនុស្សជាច្រើន ក្នុងបន្ទប់សម្ងាត់ជាច្រើនកំពុងស្វែងរកបំផ្លាញជីវិត និងសុភមង្គលអ្នកនៅពេលនេះ ! ការល្បួងខាងរូបកាយពុំមែនជារឿងថ្មីនោះទេ ។ សាវកពេត្រុសបានព្រមានពីអន្ទាក់ដូចគ្នានេះ កាលលោកបានសរសេរថា ៖
« គេ … បិទនុយប្រកបដោយសេចក្ដីសម្រើបខាងសាច់ឈាម … ដើម្បីចាប់ពួកអស់អ្នកដែលទើបតែនឹងរួចចេញពីពួកវង្វេង ។ …
« ទាំងសន្យាឲ្យអ្នកទាំងនោះបានសេរីភាពផង តែខ្លួនគេក៏នៅជាប់ជាបាវបម្រើរបស់ពួកពុករលួយវិញ ៖ ត្បិតបើអ្នកណាត្រូវគេបង្ក្រាបខ្លួន នោះត្រូវនៅជាប់ជាបាវរបស់អ្នកនោះហើយ » ( ពេត្រុសទី 2 2:18–19 ) ។
សូមជៀសពីការជាប់ឃុំឃាំងនោះ ឱ បងប្អូនប្រុសស្រីជាទីស្រឡាញ់របស់ខ្ញុំអើយ ។ បើអ្នកកំពុងមើលរូបអាសគ្រាមនៅពេលនេះ សូមបញ្ឈប់វា ! សូមស្វែងរកជំនួយពីប៊ីស្សពអ្នក ។ គ្មាននរណាម្នាក់ឆ្លាតគ្រប់គ្រាន់ ដើម្បីយកឈ្នះលើសត្រូវតែម្នាក់ឯងបានឡើយ នៅពេលពួកគេត្រូវបានបំពុលដោយរូបអាសគ្រាមនោះ ។ វាអាក្រក់ដូចជាជំងឺឆ្លង ញៀនដូចជាថ្នាំ ហើយកាត់ដូចជាទឹកអាស៊ីត ។
តើអ្នកនឹងជ្រើសរើសដើរតាមព្រះអម្ចាស់ ឬគំនិតរបស់មនុស្ស ?
សូមសិក្សាដោយយកចិត្តទុកដាក់នូវ « ក្រុមគ្រួសារ ៖ ការប្រកាសដល់ពិភពលោក » ។8 គ្រួសារស្ថិតនៅក្រោមការវាយប្រហារនៅជុំវិញពិភពលោក ប៉ុន្តែសេចក្ដីពិតនៃការប្រកាសពីគ្រួសារនឹងពង្រឹងដល់អ្នក ។
អ្នកត្រូវយល់ដឹងពីផលវិបាកដ៏នៃចម្បាំងបច្ចុប្បន្នរបស់សង្គមទៅលើនិយមន័យជាច្រើននៃអាពាហ៍ពិពាហ៍ ។ ការជជែកវែកញែកសព្វថ្ងៃនេះជាប់ទាក់ទងនឹងសំណួរថា តើមនុស្សពីរនាក់មានភេទដូចគ្នាអាចរៀបការបានដែរឬទេ ។ ប្រសិនបើអ្នកមានសំណួរពីគោលជំហររបស់សាសនាចក្រចំពោះបញ្ហានេះ ឬបញ្ហាដ៏សំខាន់ណាមួយផ្សេងទៀត សូមសញ្ជឹងគិតវាប្រកបដោយការអធិស្ឋាន បន្ទាប់មកសូមស្ដាប់តាមសារលិខិតរបស់ព្យាការីដែលកំពុងរស់នៅ ។ ប្រសាសន៍ដ៏បំផុសគំនិតរបស់ពួកលោក រួមជាមួយនឹងការបំផុសគំនិតពីព្រះវិញ្ញាណបរិសុទ្ធ នឹងផ្ដល់ការយល់ដឹងពេញលេញដ៏ពិតដល់គំនិតអ្នក ។9
ការជជែកគ្នាពីអាពាហ៍ពិពាហ៍គឺគ្រាន់តែជាការវែកញែកគ្នាមួយ ដែលនឹងសាកល្បងអ្នកនាពេលអនាគត ។ ដើម្បីប្រឆាំងនឹងសំឡេងរំខាននៃមារសត្រូវ អ្នករាល់គ្នា ជាយុវវ័យដែលមានសិទ្ធិពីកំណើតដ៏ថ្លៃថ្នូរ នឹងជ្រើសរើសដើម្បីឈរការពារព្រះអម្ចាស់ និង សេចក្ដីពិតរបស់ទ្រង់ ។
សាវកប៉ុលបានព្យាករពីស្ថានភាពអាក្រក់នៃជំនាន់យើង ( សូមមើល ធីម៉ូថេទី 2 3:1–5 ) ។ ទស្សនៈដ៏ត្រឹមត្រូវរបស់លោកអំពីការបំផ្លិចបំផ្លាញខាងវិញ្ញាណនៅជំនាន់យើងត្រូវបានអមដោយការសន្និដ្ឋានបញ្ជាក់សារជាថ្មីរបស់លោក ដោយប្រាប់យើងពីរបៀបរស់នៅឲ្យមានសុវត្ថិភាពថា ៖ « តាំងពីក្មេងតូចមក អ្នកបានស្គាល់បទគម្ពីរទាំងប៉ុន្មានដែលអាចនឹងនាំឲ្យអ្នកមានប្រាជ្ញាដល់ទីសង្គ្រោះ ដែលបានដោយសារសេចក្ដីជំនឿជឿដល់ព្រះយេស៊ូវគ្រីស្ទផង » ( ធីម៉ូថេទី 2 3:15 ) ។
ខ្ញុំសូមបន្ថែមការណែនាំផ្ទាល់របស់ខ្ញុំពីលើការណែនាំរបស់លោកថា ៖ សូមបន្តសិក្សាព្រះគម្ពីរ ។ សូមបន្តធ្វើរឿងដែលស្ថាបនាសេចក្ដីជំនឿអ្នកលើព្រះយេស៊ូវគ្រីស្ទ ។ រួចហើយកត់សម្គាល់ពីការជ្រើសរើសដ៏ឈ្លាសវៃ ដែលអ្នកបានលើកទឹកចិត្តឲ្យតាមដោយឯកឯង ។
សេចក្ដីជំនឿរបស់អ្នកលើព្រះយេស៊ូវគ្រីស្ទ និង លើដំណឹងល្អទ្រង់នឹងផ្ដល់នូវភាពក្លាហានដល់អ្នក ដើម្បីរៀបអាពាហ៍ពិពាហ៍ ហើយនាំកូនចៅមកក្នុងគ្រួសារអ្នក ខណៈដែលអ្នកនៅក្មេង ហើយមានលទ្ធភាពមានពួកគេ ។ នៅពេលអ្នកមានវ័យដូចខ្ញុំ អ្នកនឹងឲ្យតម្លៃដល់កូនចៅអ្នក និង កូនរបស់ពួកគេលើសពីកេរ្ដិរ៍ឈ្មោះ ឬទ្រព្យដែលនឹងអាចកើតមានឡើងទាំងអស់ ។
តើអ្នកនឹងរៀបចំខ្លួនសម្រាប់ការសម្ភាសផ្ទាល់របស់អ្នកជាមួយនឹងព្រះអង្គសង្គ្រោះដោយរបៀបណា ?
អ្នករាល់គ្នា ដែលជាយុវវ័យដែលមានសិទ្ធិពីកំណើតដ៏ថ្លៃថ្នូរ គឺមិនទាន់ល្អឥតខ្ចោះនៅឡើយទេ ។ គឺយើងគ្រប់គ្នា ។ ដូច្នេះ រួមនឹងពួកយើងផ្សេងទៀត មានអំណរគុណជាខ្លាំងចំពោះដង្វាយធួននៃព្រះអង្គសង្គ្រោះ ដែលផ្ដល់ការអភ័យទោសពេញលេញ នៅពេលប្រែចិត្តដោយពិតប្រាកដ ។ អ្នកក៏ដឹងដែរថា ជីវិតរមែងស្លាប់នេះខ្លីណាស់ ។ នៅពេលកំណត់មួយ អ្នករាល់គ្នានឹងបញ្ចប់ពីជីវិតរមែងស្លាប់នេះ ហើយផ្លាស់ទៅភពមួយទៀត ។
ថ្ងៃជំនុំជម្រះរង់ចាំយើងម្នាក់ៗ ។ ខ្ញុំដឹងថា « អ្នកឆ្មាំទ្វារគឺជាព្រះដ៏បរិសុទ្ធនៃសាសន៍អ៊ីស្រាអែល ហើយទ្រង់មិនជួលបាវបម្រើនៅឡើយ » ( នីហ្វៃទី 2 9:41 ) ។ ពិតណាស់ យើងម្នាក់ៗនឹងមានការសម្ភាសផ្ទាល់ខ្លួនមួយជាមួយនឹងព្រះយេស៊ូវគ្រីស្ទ ។
ជីវិតរាល់ថ្ងៃលើផែនដីផ្ដល់ពេល និង ឱកាសដល់អ្នកឲ្យរៀបចំខ្លួនសម្រាប់ការសម្ភាសនោះ ។ សូមដឹងពីការណ៍នេះថា ៖ ពេលអ្នកជ្រើសរស់នៅខាងព្រះអម្ចាស់ នោះអ្នកនឹងមិនឯកោឡើយ ។ ព្រះបានប្រទានសិទ្ធិដល់អ្នកដើម្បីទទួលបានជំនួយរបស់ទ្រង់ ខណៈដែលអ្នកធ្វើដំណើរលើផ្លូវដ៏គ្រោះថ្នាក់ក្នុងជីវិតរមែងស្លាប់នេះ ។ ពេលអ្នកបង្វែរចិត្តអ្នកទៅរកទ្រង់ ដោយព្យាយាមយ៉ាងស្មោះក្នុងការអធិស្ឋានប្រចាំថ្ងៃ ទ្រង់នឹងបញ្ជូនពួកទេវតាទ្រង់មកជួយអ្នក ( សូមមើល គ. និង ស. 84:88 ) ។ ទ្រង់ប្រទានព្រះវិញ្ញាណបរិសុទ្ធឲ្យគង់នៅក្បែរអ្នក ពេលអ្នករស់នៅដោយសក្ដិសម ។ ទ្រង់ប្រទានព្រះគម្ពីរដល់អ្នក ដើម្បីអ្នកអាចត្រូវបានចិញ្ចឹមបីបាច់យ៉ាងពេញលេញដោយព្រះបន្ទូលនៃព្រះយេស៊ូវគ្រីស្ទ ( សូមមើល នីហ្វៃទី 2 9:51, 32:3 ) ។ ទ្រង់ប្រទានប្រសាសន៍នៃព្យាការីកំពុងរស់នៅឲ្យអ្នកស្ដាប់ ។
តើអ្នកនឹងដាក់ការទុកចិត្តអ្នកទៅលើនរណា ?
អ្នកដឹងថា ព្រះគឺជាព្រះវរបិតារបស់អ្នក ។ ទ្រង់ស្រឡាញ់អ្នក ។ ទ្រង់សព្វព្រះទ័យឲ្យអ្នករីករាយ ។ សូមដាក់ការទុកចិត្តអ្នកលើទ្រង់ ( សូមមើល នីហ្វៃទី 2 4:34, 28:31 ) ។ សូមរក្សាការផ្ដោតអារម្មណ៍អ្នកលើព្រះវិហារបរិសុទ្ធរបស់ទ្រង់ ។ ចូរមានភាពសក្ដិសមដើម្បីទទួលបានពិធីបរិសុទ្ធនៃអំណោយទានពិសិដ្ឋ និង ការផ្សារភ្ជាប់របស់អ្នក ។ ចូរបន្តស្មោះត្រង់ចំពោះសេចក្ដីសញ្ញានោះ ហើយត្រឡប់ទៅព្រះវិហារបរិសុទ្ធជាញឹកញាប់ ។ សូមចងចាំថា គោលដៅដ៏ខ្ពស់បំផុតរបស់អ្នកគឺដើម្បីទទួលពរជ័យដ៏ធំជាងគេរបស់ព្រះ នោះគឺជាជីវិតដ៏នៅអស់កល្បជានិច្ច ( សូមមើល គ. និង ស. 14:7 ) ។ ពិធីបរិសុទ្ធនៅក្នុងព្រះវិហារបរិសុទ្ធគឺចាំបាច់ចំពោះពរជ័យនោះ ( សូមមើល គ. និង ស. 131:1–3 ) ។
ខ្ញុំសូមអញ្ជើញអ្នកឲ្យសិក្សាបទគម្ពីរអំពីអត្តសញ្ញាណ គោលបំណង និង ពរជ័យរបស់អ្នកប្រកបដោយការអធិស្ឋាន ( សូមមើល គ. និង ស. 86:8–11 ) ។ មែនហើយ អ្នកពិតជាយុវវ័យដែលមានសិទ្ធិពីកំណើតដ៏ថ្លៃថ្នូរ ដែលបានបង្កើតតាមរូបភាពនៃព្រះ ។ អ្នកគឺជាកូនចៅពេញច្បាប់របស់ទ្រង់ នៅទីនេះដើម្បីព្យាយាម ហើយសាកល្បង។ សូមឲ្យអ្នកជ្រើសធ្វើជាពន្លឺដល់ពិភពលោកនេះ ដើម្បីជួយសង្គ្រោះដល់កូនចៅរបស់ព្រះ ដើម្បីមានសេចក្ដីអំណរ ហើយសំខាន់បំផុតគឺដើម្បីទទួលបានពរជ័យនៃជីវិតដ៏នៅអស់កល្បជានិច្ច ។