គ្រឹះនៃជីវិតខ្ញុំ

ដោយ រ៉ូប៊ើរតូ ប៉ាឆេកូ ព្រេតេល

អ្នកនិពន្ធរស់នៅទីក្រុង អ៊ីរេឃ្វីប៉ា ប្រទេសប៉េរូ ។

ខ្ញុំបានដឹងពីការបម្រើរបស់ព្រះគ្រីស្ទនៅក្នុងព្រះគម្ពីរប៊ីប ប៉ុន្តែតើទ្រង់ពិតជាបានយាងទៅទ្វីបអាមេរិកមែនឬ ?

កាលខ្ញុំឈានចូលវ័យ 18 ឆ្នាំ ឪពុកខ្ញុំបានអនុញ្ញាតឲ្យខ្ញុំទទួលបុណ្យជ្រមុជទឹកនៅក្នុងព្រះវិហារណាក៏បាន តាមចិត្តរបស់ខ្ញុំ ។ ខ្ញុំចង់ចូលរួមនឹងព្រះវិហារគ្រីស្ទានមួយ ដោយសារខ្ញុំបានសិក្សាព្រះគម្ពីរប៊ីបនៅក្នុងក្រុមជំនុំមួយចំនួន ហើយបានជឿលើព្រះយេស៊ូវគ្រីស្ទ ។

មានថ្ងៃមួយពូរបស់ខ្ញុំបានអញ្ជើញអ្នកផ្សព្វផ្សាយសាសនាស្រីពីរនាក់មកផ្ទះរបស់យើង ។ ពួកគេបាននិយាយដោយមានភាពជឿជាក់យ៉ាងខ្លាំង អំពីជំនឿរបស់ពួកគេលើព្រះគម្ពីរមរមនដែលជាសក្ខីបទមួយទៀតនៃព្រះយេស៊ូវគ្រីស្ទ ដោយថ្លែងថា ទ្រង់បានយាងទៅទ្វីបអាមេរិក ។

នៅត្រង់ចំណុចនោះ ខ្ញុំបានសម្ដែងនូវទស្សនៈខ្ញុំថា ប្រហែលជាពួកគេយល់ខុសហើយ ដោយសារនៅក្នុងជីវិតខ្ញុំ ខ្ញុំពុំធ្លាប់បានសិក្សាពីរឿងដូចនោះសោះ ។ អ្នកផ្សព្វផ្សាយសាសនាស្រីម្នាក់បាននិយាយមកកាន់ខ្ញុំទាំងទឹកភ្នែក និងដោយទន់ភ្លន់ថា « បងប្រុស រ៉ូប៊ើរតូ កាលដែលបងប្រុសមិនបានដឹងថាព្រះគម្ពីរមរមនគឺជាព្រះគម្ពីរពិត នោះមិនមែនមានន័យថាយើងយល់ខុសនោះទេ ។ ខ្ញុំដឹងថា ព្រះយេស៊ូវគ្រីស្ទស្រឡាញ់យើង ហើយថាទ្រង់បានយាងទៅដែនដីនោះ ហើយថាទ្រង់បានបង្រៀនដំណឹងល្អទ្រង់ ដូចដែលទ្រង់បានធ្វើនៅក្នុងដែនដីបរិសុទ្ធដែរ » ។

ពួកគេបានព្យាយាមជួយខ្ញុំជាមួយនឹងកង្វល់ និង ការសង្ស័យជាច្រើនរបស់ខ្ញុំនៅក្នុងការពិភាក្សាដំបូង ដោយយល់ស្របថា ពួកគេនឹងមកជួបខ្ញុំនៅសប្ដាហ៍ក្រោយទៀត ។

នៅយប់នោះខ្ញុំបានចាប់ផ្ដើមបើកព្រះគម្ពីរមរមនអាន ។ កាលខ្ញុំអានទំព័រចំណងជើង មានពាក្យមួយឃ្លាបានធ្វើឲ្យខ្ញុំចាប់អារម្មណ៍ ៖ « ព្រះយេស៊ូវ គឺជាព្រះគ្រីស្ទ ជាព្រះដ៏នៅអស់កល្បជានិច្ច ដែលបានសម្ដែងរូបអង្គទ្រង់ដល់គ្រប់ទាំងសាសន៍ » ។ ខ្ញុំក៏បានអាននៅក្នុងនីហ្វៃទី 3 11 អំពីការយាងទៅទ្វីបអាមេរិករបស់ព្រះអង្គសង្គ្រោះផងដែរ ហើយខ្ញុំបានមានភាពរីករាយនៅក្នុងចិត្តខ្ញុំ ។ ដូច្នេះខ្ញុំបានធ្វើនូវអ្វីដែលពួកអ្នកផ្សព្វផ្សាយសាសនាបានប្រាប់ឲ្យខ្ញុំធ្វើ ៖ ខ្ញុំបានលុតជង្គង់ ហើយទូលសួរព្រះវរបិតាសួគ៌ខ្ញុំ ថាតើព្រះគម្ពីរនេះពិតដែរឬទេ ។

កាលខ្ញុំបានបញ្ចប់ការអធិស្ឋាន ខ្ញុំទទួលអារម្មណ៍នូវសេចក្ដីសុខសាន្ត និង ការបញ្ជាក់អះអាងថា ព្រះគម្ពីរនេះគឺជាព្រះគម្ពីរពិតមែន ។ ខ្ញុំបានគិតមួយសន្ទុះថា ទឹកភ្នែករបស់ស៊ិស្ទើរទាំងពីរនាក់នោះបានធ្វើឲ្យខ្ញុំមានចិត្តរំភើប ហើយបានបណ្ដាលឲ្យខ្ញុំជឿលើទីបន្ទាល់របស់ពួកគេ ។ ដូច្នេះខ្ញុំបានបន្តអានព្រះគម្ពីរមរមនរហូតដល់ម៉ោង 4:00 ជាងនៅពេលព្រឹក ។ រាល់ពេលដែលខ្ញុំបានអធិស្ឋាន ខ្ញុំបានទទួលអារម្មណ៍កាន់តែខ្លាំងឡើងៗ នូវការបញ្ជាក់ថា ព្រះគ្រីស្ទបានយាងទៅទ្វីបអាមេរិក ហើយថាទ្រង់សព្វព្រះទ័យឲ្យខ្ញុំរៀនពីដំណឹងល្អដ៏ពិតរបស់ទ្រង់ ។

ក្នុងរយៈពេលតែប៉ុន្មានសប្ដាហ៍ ខ្ញុំបានអានព្រះគម្ពីរមរមនចប់ទាំងស្រុង ហើយខ្ញុំមានអារម្មណ៍ថាត្រូវជ្រមុជទឹកចូលទៅក្នុងសាសនាចក្រដ៏ពិតនេះ ។

ការអានព្រះគម្ពីរមរមនបានជួយខ្ញុំឲ្យខិតកាន់តែជិតទៅនឹងព្រះយេស៊ូវគ្រីស្ទ ហើយធ្វើឲ្យទ្រង់ក្លាយទៅជាគ្រឹះនៃជីវិតរបស់ខ្ញុំ ។ ខ្ញុំមានអំណរជាខ្លាំងណាស់ ដែលព្រះអង្គសង្គ្រោះបានបញ្ជូនពួកអ្នកផ្សព្វផ្សាយសាសនាទាំងពីរនាក់នោះ និងសាសនាចក្ររបស់ទ្រង់ចូលមកក្នុងជីវិតខ្ញុំ ។