លុះត្រាជួបទៀត
តើខ្ញុំអាចដឹងថា ព្រះអម្ចាស់បានអត់ទោសឲ្យខ្ញុំតាមរបៀបណា ?
ដកស្រង់ពី « Stand Ye in Holy Places » Ensign ខែ កក្កដា ឆ្នាំ 1973 ទំព័រ 122 ។
តើអ្នកនឹងឆ្លើយតបចំពោះមនុស្សម្នាក់ដែលមកសួរអ្នកនៅសំណួរនោះតាមរបៀបណា ?
ជាយូរយារមកហើយ ប្រធាន [ ម៉ារុន ជី ] រ៉ូមនី [ 1897–1988 ] និង ខ្ញុំបានអង្គុយនៅក្នុងការិយាល័យរបស់ខ្ញុំ ។ ទ្វារបានបើកឡើង ហើយមានយុវជនដ៏ប្រពៃម្នាក់បានដើរចូលមកដោយមានទឹកមុខសោកសៅ ហើយគាត់បាននិយាយថា « បងប្អូនប្រុស ខ្ញុំនឹងទៅព្រះវិហារបរិសុទ្ធជាលើកដំបូងនៅថ្ងៃស្អែក ។ ខ្ញុំបានធ្វើកំហុសមួយចំនួនកាលពីអតីតកាល ហើយខ្ញុំបានធ្លាប់ទៅជួបនឹងប៊ីស្សព និង ប្រធានស្តេករបស់ខ្ញុំ ហើយខ្ញុំបានសារភាពវាទាំងអស់ ហើយក្រោយពីការប្រែចិត្ត និង ការបញ្ជាក់មួយរយៈពេលមក ដើម្បីប្រាកដថាខ្ញុំមិនត្រឡប់ទៅធ្វើកំហុសទាំងនោះម្ដងទៀត ឥឡូវនេះពួកគាត់បានប្រកាសថា ខ្ញុំអាចទៅព្រះវិហារបរិសុទ្ធបានហើយ ។ ប៉ុន្តែ បងប្អូនប្រុស ការណ៍នោះវាមិនទាន់គ្រប់គ្រាន់នៅឡើយទេ ។ ខ្ញុំចង់ដឹង ហើយថាតើខ្ញុំអាចដឹងតាមរបៀបណាបានថា ព្រះអម្ចាស់ក៏បានអត់ទោសឲ្យខ្ញុំហើយផងដែរ » ។
តើអ្នកនឹងឆ្លើយចំពោះជនម្នាក់ដែលមកសួរអ្នកនូវសំណួរនោះតាមរបៀបណា ? កាលយើងបានសញ្ជឹងគិតមួយភ្លែត យើងបាននឹកចាំពីសុន្ទរកថារបស់ស្ដេចប៊េនយ៉ាមីននៅក្នុងព្រះគម្ពីរម៉ូសាយ ។ ឥឡូវនេះ នេះគឺជាមនុស្សមួយក្រុមដែលចង់បានពិធីបុណ្យជ្រមុជទឹក ហើយពួកគេបាននិយាយថា ពួកគេបានមើលឃើញខ្លួនឯងនៅក្នុងស្ថានភាពខាងរូបកាយរបស់ពួកគេ ៖
« ហើយពួកគេទាំងអស់គ្នាបានស្រែកព្រមគ្នា ដោយសំឡេងតែមួយថា ៖ ឱសូមមេត្តាផង ហើយសូមប្រទាននូវព្រះលោហិតដ៏ធួននៃព្រះគ្រីស្ទ ដើម្បីឲ្យយើងអាចបានទទួលនូវការអភ័យទោសចំពោះអំពើបាបទាំងឡាយរបស់យើង ហើយដើម្បីឲ្យចិត្តយើងអាចបានជ្រះបរិសុទ្ធផងចុះ ។ …
« … បន្ទាប់ពីពួកគេបានពោលពាក្យទាំងនេះហើយ នោះព្រះវិញ្ញាណនៃព្រះអម្ចាស់ក៏បានចុះមកសណ្ឋិតលើពួកគេ ហើយពួកគេក៏ពោរពេញទៅដោយសេចក្ដីអំណរ ដោយបានទទួលការផ្ដាច់បាបទាំងឡាយរបស់គេ ហើយដោយមានសេចក្ដីសុខសាន្តក្នុងសតិសម្បជញ្ញៈ » ( ម៉ូសាយ 4:2–3 ) ។
មាននូវចម្លើយ ។
ប្រសិនបើពេលនោះមកដល់ នៅពេលអ្នកបានធ្វើនូវអ្វីៗទាំងអស់ដែលអ្នកអាចធ្វើដើម្បីប្រែចិត្តចេញពីអំពើបាបរបស់អ្នក មិនថាអ្នកជានរណា អ្នកនៅកន្លែងណា ហើយបានធ្វើការសងថ្លៃ និង ការផ្គុំសងវិញអស់ពីសមត្ថភាពរបស់អ្នក ប្រសិនបើវាជាអ្វីមួយដែលប៉ះពាល់ដល់សមាជិកភាពរបស់អ្នក នៅក្នុងសាសនាចក្រ ហើយអ្នកបានទៅរកអ្នកមានសិទ្ធិអំណាចត្រឹមត្រូវ បន្ទាប់មកអ្នកនឹងចង់បានចម្លើយនៃការបញ្ជាក់នោះ ថាតើព្រះអម្ចាស់បានទទួលយកអ្នកហើយឬនៅ ។ នៅក្នុងការស្វែងរកវិញ្ញាណរបស់អ្នក ប្រសិនបើអ្នកស្វែងរក ហើយអ្នករកឃើញសេចក្ដីសុខសាន្តក្នុងសតិសម្បជញ្ញៈនោះ តាមរបៀបនោះហើយដែលអាចដឹងថាព្រះអម្ចាស់បានទទួលយកការប្រែចិត្តរបស់អ្នកហើយ ។ សាតាំងនឹងធ្វើឲ្យអ្នកបែរចិត្តគំនិតផ្សេងពីនោះ ហើយពេលខ្លះវាញុះញុងឲ្យអ្នកគិតថា ឥឡូវនេះដោយសារអ្នកធ្វើបានធ្វើកំហុសមួយហើយ នោះអ្នកអាចនឹងធ្វើបន្ត ធ្វើម្ដងហើយម្ដងទៀតដោយគ្មានការត្រឡប់មកវិញបានទេ ។ នេះគឺជាការកុហកដ៏ធំមួយ ។ អព្ភូតហេតុនៃការអត់ទោសគឺមានចំពោះមនុស្សគ្រប់គ្នាដែលងាកចេញពីការធ្វើអាក្រក់ ហើយមិនត្រឡប់ទៅធ្វើវាទៀតឡើយ ។