យុវវ័យ
ដំបូន្មានសម្រាប់ជម្រើសដ៏ពិបាក
ប្រធាន ហិនរី ប៊ី អាវរិង ជាប្រឹក្សាទីមួយក្នុងគណៈប្រធានទីមួយ បានប្រាប់ពីគ្រាមួយដែលលោកបានធ្វើតាមដំបូន្មានរបស់ព្យាការី ។ អំឡុងពេលមួយ ក្នុងសន្និសីទទូទៅ ប្រធាន អ៊ែសរ៉ា ថាហ្វ ប៊ែនសឹន ( 1899–1994 ) បានលើកទឹកចិត្តសមាជិកឲ្យចៀសចេញពីបំណុល — ជាពិសេសបំណុលនៃការទិញផ្ទះ ។
ប្រធាន អាវរិង បានថ្លែងថា ៖ « ខ្ញុំងាករកភរិយាខ្ញុំបន្ទាប់ពីការប្រជុំនោះ ហើយបានសួរថា ‹ តើអូនគិតថា មានវិធីណាមួយដែលយើងអាចធ្វើបែបនោះបានទេ ? › ដំបូង យើងមិនអាចធ្វើបានឡើយ » ។ ប៉ុន្តែ លុះនៅល្ងាចនោះ លោកបានគិតពីផ្ទះមួយដែលពួកលោកបានលក់វាជាច្រើនឆ្នាំ ប៉ុន្តែលក់មិនដាច់សោះ ។ « យើងបានទុកចិត្តលើព្រះ និង … សារលិខិតរបស់អ្នកបម្រើទ្រង់ [ដូច្នេះ] យើងបានធ្វើការហៅទូរសព្ទមួយ ។ … ខ្ញុំបានឮចម្លើយមួយដែលបានពង្រឹងការទុកចិត្តរបស់ខ្ញុំលើព្រះ និង ពួកអ្នកបម្រើទ្រង់រហូតមកដល់សព្វថ្ងៃនេះ » ។ នៅថ្ងៃដដែលនោះ មានបុរសម្នាក់បានឲ្យថ្លៃផ្ទះរបស់គ្រួសារអាវរិងនៅក្នុងចំនួនមួយដែលលើសពីតម្លៃផ្ទះរបស់ពួកលោក ។ មិនយូរប៉ុន្មានគ្រួសារអាវរិងបានរួចផុតពីបំណុល ( សូមមើល « Trust in God, Then Go and Do » Liahona ខែ វិច្ឆិកា ឆ្នាំ 2010 ទំព័រ 72–73 ) ។
អ្នកប្រហែលជាគ្មានផ្ទះដែលត្រូវបង់រំលោះនោះទេ ប៉ុន្តែការប្រឹក្សារបស់ព្យាការីអាចដឹកនាំអ្នកនៅពេលនេះដោយឆ្លងកាត់នូវការសម្រេចចិត្តដ៏ពិបាកៗទាក់ទងនឹងការងារ ការអប់រំ បេសកកម្ម និង ការការដើរលេងជាគូ ។ សូមពិភាក្សាជាមួយនឹងគ្រួសារ ឬមិត្តភក្ដិរបស់អ្នកពីរបៀបដែលអ្នកអាចធ្វើតាមព្យាការី កាលអ្នកត្រូវធ្វើការសម្រេចចិត្តនានានោះ ។