គ្រានៃសេឡេស្ទាល
អ្នកនិពន្ធរស់នៅក្នុងរដ្ឋ ឡាណាស្សៀរភាគខាងជើងប្រទេសស្កតឡង់ ។
ជួនកាលខ្ញុំមានអារម្មណ៍មួយថា ស្ថានសួគ៌នៅមិនឆ្ងាយឡើយ ។
នាថ្ងៃមួយ អ្នកដឹកនាំថ្នាក់យុវនារីរបស់ខ្ញុំបានបង្រៀនពួកយើងអំពីគ្រាអស្ចារ្យនានា ដែលអ្នកទទួលអារម្មណ៍ពីព្រះវិញ្ញាណ ហើយមានអារម្មណ៍ថានៅក្បែរព្រះ ។ ពួកគេហៅវាថា « គ្រានៃសេឡេស្ទាល » ជាឃ្លាសាមញ្ញមួយដែលងាយចងចាំ ។ សម្រាប់ខ្ញុំ ខ្ញុំបានដឹងរួចទៅហើយថា « គ្រានៃសេឡេស្ទាល » គឺជាអ្វីនោះ ដ្បិតខ្ញុំធ្លាប់ទទួលអារម្មណ៍នេះកាលពីមុន គឺដូចជាពេលដែលអ្នកមានអារម្មណ៍តិចតួច ឬ ភ្លក់រសជាតិនៃជីវិតនៅនគរសេឡេស្ទាលដូច្នោះដែរ ។ ខ្ញុំមានគ្រាទាំងនេះជាច្រើន ។
បន្ទាប់ពីពួកអ្នកដឹកនាំបានណែនាំអំពីគំនិតនេះ យើងបាននាំគ្នាចេញទៅក្រៅថ្នាក់ ។ ព្រះអាទិត្យកំពុងរះចាំងទៅលើដើមឈើ ។ យើងបានបិទភ្នែក ។ ខ្ញុំមានអារម្មណ៍ថា ព្រះអាទិត្យដែលចាំងពន្លឺមកលើមុខខ្ញុំនោះដូចជាខ្យល់ជំនោរបក់មកយ៉ាងកក់ក្តៅ ។ សត្វបក្សាបក្សីស្រែកច្រៀង ហើយដើមឈើបក់យោលយោគទៅតាមខ្យល់បក់ ខណៈដែលយើងរីករាយនឹងការបង្កបង្កើតរបស់ព្រះ ។ នោះហើយគឺជាគ្រានៃសេឡេស្ទាល ។
ពេលមួយទៀតដែលខ្ញុំមានអំពីគ្រានៃសេឡេស្ទាលនោះគឺបន្ទាប់ពីមិត្តភក្តិរបស់ខ្ញុំបានជ្រមុជទឹករួច ។ នៅពេលយើងបានដើរត្រឡប់ចូលទៅក្នុងរោងថ្វាយបង្គំវិញ រហូតដល់កម្មវិធីនោះចប់ នាងបានចាប់ដៃរបស់ខ្ញុំ ហើយនិយាយអំពីភាពអស្ចារ្យដែលពួកយើងបានក្លាយជាមិត្តនឹងគ្នា ហើយនឹងបន្តរហូតតទៅ—គឺរហូតដល់អស់កល្បជានិច្ច ។ ខ្ញុំនឹងមិនភ្លេចគ្រានោះឡើយ ។ ខ្ញុំមានចិត្តរំភើប និង រីករាយ ព្រមទាំងមានអំណរគុណ !
មួយឆ្នាំក្រោយមក យើងទាំងពីរនាក់ មានអំណរដដែលនោះជាថ្មីម្តងទៀត នៅពេលយើងឈរនៅអាងជ្រមុជទឹក ហើយមើលម្តាយរបស់នាងចូលទៅក្នុងទឹកនៃបុណ្យជ្រមុជ ។ ពិតជាមានលម្អនៅព័ទ្ធជុំវិញមែន ។
ប្រហែលជាកន្លែងដ៏ល្អបំផុតដើម្បីមានបទពិសោធន៍នេះគឺមាននៅក្នុងព្រះដំណាក់របស់ព្រះអម្ចាស់ ។ គ្រាដំបូងដែលខ្ញុំបានចូលក្នុងព្រះវិហារបរិសុទ្ធ នោះខ្ញុំមានពរដែលបានចូលទៅទីនោះជាមួយឪពុកម្តាយ និង ប្អូនស្រីរបស់ខ្ញុំ ។ ខ្ញុំបានជ្រមុជទឹកឲ្យជីដូនទួតរបស់ខ្ញុំ ហើយខ្ញុំមានអារម្មណ៍ថាគាត់មានក្តីរីករាយ ។
គ្រានៃសេឡេស្ទាលអាចកើតមានឡើងនៅគ្រប់ទីកន្លែង និង គ្រប់ពេលវេលា—អំឡុងពេលស្តាប់តន្ត្រី ឬ អំឡុងពេលរាត្រីជួបជុំក្រុមគ្រួសារ ឬ ពេលនៅសាលារៀន ។ ខ្ញុំចាំពីរាត្រីជួបជុំក្រុមគ្រួសារមួយ នៅពេលបងប្អូនទាំងអស់គ្នាបានសើចរហូត ! នោះគឺជាគ្រាមួយដែលខ្ញុំពេញចិត្តបំផុត ។
គ្រានៃសេឡេស្ទាលទាំងនេះបានពង្រឹងទីបន្ទាល់របស់ខ្ញុំ ហើយបានជួយខ្ញុំឲ្យមានស្មារតីមួយកាន់តែមានអំណរគុណថែមទៀត ។ គ្រាទាំងនោះបានបង្រៀនខ្ញុំនូវមេរៀនដ៏អស្ចារ្យជាច្រើន ។ លើសពីនេះទៀត គ្រាទាំងនោះបានធ្វើឲ្យខ្ញុំរីករាយ និង រំភើបចិត្តអំពីដំណឹងល្អ ! ខ្ញុំដឹងថា ប្រសិនបើខ្ញុំបន្តរស់នៅតាមដំណឹងល្អ នោះលម្អទាំងអស់ សុភមង្គល ភាពសុខសាន្ត និង សេចក្តីស្រឡាញ់ដែលខ្ញុំមាននៅក្នុងគ្រានៃសេឡេស្ទាលនីមួយៗ នឹងក្លាយជាអ្វីមួយដែលខ្ញុំអាចទទួលអារម្មណ៍អំពីវាជានិច្ច—ក្នុងកម្រិតមួយយ៉ាងខ្លាំង—នៅក្នុងនគរសេឡេស្ទាល ។