ការសន្យាទាំង ៥ អំពីការអធិស្ឋាន
អ្នកនិពន្ធរស់នៅរដ្ឋ យូថាហ៍ ស.រ.អា. ។
ព្រះវរបិតាសួគ៌បានប្រទានការអធិស្ឋានទុកជារបៀបមួយដើម្បីទាក់ទងដោយផ្ទាល់ជាមួយទ្រង់ ដើម្បីថ្លែងអំណរគុណ ទូលសូមពរជ័យ ហើយ រីកចម្រើនខាងវិញ្ញាណ ។ ជួនកាលអ្វីដែលត្រូវធ្វើនោះគឺឱនក្បាល ឱបដៃ ហើយពោលពាក្យមួយចំនួនដែលសាមញ្ញ ហើយ ស្មោះសរ ។ តើវាអស្ចារ្យណាស់ មែនទេ ? នេះគឺជាការសន្យា ឬ ពរជ័យប្រាំផ្សេងៗគ្នា ដែលយើងអាចទទួលបាន ប្រសិនបើយើងអធិស្ឋាន ៖
១ កម្លាំងដើម្បីមានជ័យជម្នះ
ដោយសារយើងជាមនុស្ស យើងអាចមានអារម្មណ៍ទន់ខ្សោយក្នុងចំណុចជាច្រើន—ខាងរូបកាយ អារម្មណ៍ វិញ្ញាណ និង ផ្លូវចិត្ត ។ យើងអាចមានការលំបាកក្នុងការព្យាយាមរត់ប្រណាំង ឬ ប្រឡងឲ្យជាប់ ឬ ទប់ទល់នឹងការល្បួង ឬ ទទួលអារម្មណ៍ពីព្រះវិញ្ញាណ ។ ប៉ុន្តែការអធិស្ឋានអាចផ្តល់កម្លាំងដល់យើង ដែលចាំបាច់ដើម្បីយកជ័យជម្នះលើ អ្វីគ្រប់យ៉ាង ដែលកើតមាននៅក្នុងជីវិតរបស់យើង ។
ដូចនីហ្វៃបាននិយាយថា « ព្រះអម្ចាស់ទ្រង់មិនចេញបញ្ជាដល់កូនចៅមនុស្សណាឡើយ លើកលែងតែទ្រង់នឹងរៀបចំផ្លូវ ដើម្បីឲ្យគេអាចសម្រេចនូវអ្វីៗ ដែលទ្រង់បានបញ្ជាដល់ពួកគេទុកជាមុនសិន » ( នីហ្វៃទី១ ៣:៧ ) ។ ព្រះអម្ចាស់អាចប្រទានកម្លាំងដល់យើង ដើម្បីសម្រេចបាននូវកិច្ចការល្អៗ ដែលយើងព្យាយាមធ្វើប្រសិនបើកិច្ចការនោះជាព្រះឫទ័យរបស់ទ្រង់ ។
អធិស្ឋានសូមកម្លាំងឲ្យយកឈ្នះលើការល្បួង ។ អធិស្ឋានសូមកម្លាំងដើម្បីផ្តោតចិត្តទុកដាក់ ហើយ សិក្សាឲ្យមានប្រសិទ្ធភាពសម្រាប់ការប្រឡង ។ អធិស្ឋានសូមកម្លាំងដើម្បីរត់ទៅដោយឥតនឿយហត់ ។ អធិស្ឋានសូមកម្លាំង ហើយទ្រង់នឹងធ្វើឲ្យអ្នករឹងប៉ឹង ។
រចនារូបភាពដោយ ក្លេតុន ថមសុន
២ ការអភ័យទោស
ទោះបីវាជារឿងមួយល្អដែលយើងគិតថាយើងពុំល្អឥតខ្ចោះក្តី ។ យើងមានកំហុស ហើយវាគឺជាផ្នែកមួយនៃជីវិតយើង ។ ប៉ុន្តែព្រះអម្ចាស់ផ្តល់វិធីមួយ ដើម្បីកែតម្រូវកំហុសទាំងនោះ ៖ ព្រះចេស្ដានៃដង្វាយធួនរបស់ព្រះយេស៊ូវគ្រីស្ទ ។ ហើយមធ្យោបាយមួយដើម្បី អាចទទួលបានព្រះចេស្តាទ្រង់នោះគឺការអធិស្ឋាន ។
នៅពេលយើងទូលសូមការអភ័យទោសតាមរយៈការអធិស្ឋាន នោះយើងអាចត្រូវបានអត់ទោសឲ្យពីអំពើបាបរបស់យើង តាមរយៈដង្វាយធួនរបស់ព្រះអង្គសង្គ្រោះ ។ ទោះបីជាយ៉ាងណាអំពើបាបធ្ងន់ធ្ងរអាចត្រូវការជំនួយពីប៊ីស្សព ឬ ប្រធានសាខា ការអធិស្ឋានផ្ទាល់ខ្លួន និង ដោយស្មោះសរនឹងក្លាយជាជំហានទីមួយ ជានិច្ច ដើម្បីទទួលការអភ័យទោស—មិនថាយើងកំពុងទូលសូមការអភ័យទោសពីព្រះវរបិតាសម្រាប់ខ្លួនយើង ឬ ជួយយើងឲ្យអភ័យទោសដល់មនុស្សផ្សេងទៀតនោះទេ ។ ទ្រង់នឹងជួយយើងឲ្យរៀនពីរបៀបអភ័យទោសដល់ខ្លួនយើង ។
៣ ចំណេះដឹង និង ការណែនាំ
វិវរណៈផ្ទាល់ខ្លួនអាចជាពរជ័យដំបូងគេនៃការអធិស្ឋាន ដែលអ្នកត្រូវគិតដល់ ជាពិសេសជាមួយនឹងបាវចនាម៉្ញូតឆលថ្មីនេះដែលអ្នកគិតអំពីវា ។ យ៉ូសែប ស៊្មីធ ខ្វះចំណេះដឹងថាតើត្រូវចូលរួមជាមួយព្រះវិហារណាមួយ ដូច្នោះលោកបានលុតជង្គង់នៅក្នុងព្រៃពិសិដ្ឋ ហើយទូលសួរសំណួររបស់លោក ហើយលោកបានទទួលចម្លើយ—តាមរបៀបមួយដ៏អស្ចារ្យបំផុត ។
ប៉ុន្តែវិវរណៈពុំមែនមានសម្រាប់តែព្យាការីនោះទេ ហើយវាក៏មិនចាំទាល់តែជាបទពិសោធន៍ដ៏អស្ចារ្យបំផុតដែរ ។ ប្រសិនបើយើងខ្វះប្រាជ្ញាលើរឿងអ្វីមួយយើង អាច ហើយ គួរតែ ទូលសូមដល់ព្រះ ។ ទ្រង់នឹងឆ្លើយតប ទោះជួនកាលវាមិនតាមអ្វីដែលយើងរំពឹងចង់បានក្តី ។ ព្រះអម្ចាស់នឹងឆ្លើយតបសំណួររបស់យើង ហើយជួយដឹកនាំជីវិតរបស់យើង ប៉ុន្តែយើងត្រូវតែទូលសូមជាមុនសិន !
៤ បំណងប្រាថ្នាដើម្បីធ្វើតាមព្រះឫទ័យរបស់ព្រះអម្ចាស់
វាអាចមានការលំបាក ក្នុងការមើលឃើញចំណុចនេះថាជាពរជ័យ—និយាយដោយត្រង់ជួនកាលយើងចង់បានអ្វីៗគ្រប់យ៉ាងសម្រាប់ខ្លួនយើង ដែលព្រះអម្ចាស់ពុំសព្វព្រះឫទ័យឲ្យយើងឡើយ ។ ប៉ុន្តែនៅពេលយើងអធិស្ឋានដើម្បីប្រែចិត្តជឿពិតប្រាកដ ហើយមានបំណងប្រាថ្នាធ្វើតាមព្រះឫទ័យរបស់ព្រះអម្ចាស់ នោះយើងនឹងកត់សម្គាល់អ្វីមួយដែលអស្ចារ្យ ៖ គឺអ្វីដែលយើងចង់បាន ចាប់ផ្តើមកាន់តែដូចអ្វីដែលទ្រង់សព្វព្រះទ័យ ។
ទោះជាយ៉ាងណាការផ្លាស់ប្ដូរនៅក្នុងដួងចិត្តនេះនឹងមិនកើតឡើងភ្លាមៗឡើយ ។ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ដូចនេះ ៖ « សម្រាប់យើងភាគច្រើនការប្រែចិត្តជឿជាដំណើរការដែលបន្តជានិច្ច មិនមែនជាហេតុការណ៍តែម្ដង ដែលកើតឡើងពីបទពិសោធន៍ដ៏មានឥទ្ធិពល ឬ អស្ចារ្យតែម្តងនោះទេ ។ មួយបន្ទាត់ម្ដងៗ មួយសិក្ខាបទម្ដងៗ បន្ដិចម្ដងៗ និង ស្ទើរតែមិនដឹង ការជំរុញ គំនិត ពាក្យសម្ដី និង ទង្វើ របស់យើងប្រែជាស្របនឹងព្រះទ័យព្រះ » ( « Converted unto the Lord » Liahona ខែ វិច្ឆិកា ឆ្នាំ ២០១២ ទំព័រ ១០៧–៨ ) ។
៥ ភាពសុខសាន្ដ
ពរជ័យមួយដែលបានសន្យាដល់យើងប្រសិនបើយើងអធិស្ឋាននោះគឺភាពសុខសាន្ត និង ការលួងលោមចិត្តតាមរយៈព្រះវិញ្ញាណបរិសុទ្ធ ។ លើសពីនោះទៀត គេហៅទ្រង់ថាព្រះដ៏ជាជំនួយ ។ សូមប្រាកដថាភាពសុខសាន្តនឹងកើតឡើងទោះជាក្នុងគ្រាលំបាកក្ដី ។ សូមចាំពីការសន្យារបស់ព្រះអម្ចាស់នៅក្នុង យ៉ូហាន ១៤:២៧ ៖ « ខ្ញុំទុកសេចក្ដីសុខនៅនឹងអ្នករាល់គ្នា គឺខ្ញុំឲ្យសេចក្ដីសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យ នោះមិនមែនដូចជាលោកិយឲ្យទេ ។ កុំឲ្យអ្នករាល់គ្នាថប់បារម្ភ ឬភ័យឡើយ » ។ ភាពសុខសាន្តនឹងកើតមានឡើងប្រសិនបើយើងទូលសូម ។
ការអធិស្ឋានគឺជាមធ្យោបាយមួយ ទាក់ទងជាមួយព្រះវរបិតាសួគ៌ដែលពេញដោយក្ដីស្រឡាញ់របស់យើង ។ សូមប្រើមធ្យោបាយនេះ ហើយឲ្យទ្រង់ប្រទានពរដល់អ្នក ។ ប៉ុន្តែបន្ទាប់ពីការទទួលពរជ័យទាំងនេះតាមរយៈការអធិស្ឋានដោយស្មោះសរហើយនោះ សូមចាំថាត្រូវបង្ហាញអំណរគុណដ៏ស្មោះអស់ពីចិត្តរបស់អ្នក—ដូចដែលអ្នកបានគិតនោះហើយ—គឺការអធិស្ឋាន ។