Ngaahi Peesi Fakalotofonuá
Saliote Teketeke = Tauʻatāina Lahi Ange!
Ne aʻu pē ki he taimi ne teʻeki ke maʻu ai ʻa e saliote teketeke ʻa Kataliná, ne ʻikai ko ha taha ia ke ne nofonoa pē ʻi ʻapi . . .
Koeʻuhí ne lue ʻaki ʻe he tokotaha taʻu 18 ko Katalina Likilongí ʻa hono ongo nimá mo e tuí, ne mahino leva ʻe fuoloa peá ne toki aʻu ki he . . . feituʻu kotoa pē! Pea hangē ko ia ʻokú ke fakakaukauloto ki aí, ko e meʻa fakatupu helaʻia ʻa e feinga mei he feituʻu ki he feituʻu.
ʻOku ʻikai ke hangē ʻa Masulo ia ko e fanga kiʻi motu mōmoa ange ʻi he ʻOtu Motu Māsoló (fanga kiʻi motu fakakātoa ʻe 29), ʻoku lahi ʻaupito e ʻuha ʻoku tō ʻi Masuló - ko e senitimita ʻe 30–38 ʻi he māhina kotoa pē. Ko e taha ia ʻo e fanga kiʻi motu taupotu taha ʻi he tafaʻaki fakatongá pea ko e kiʻi konga fonua tokalelei ko ʻení ʻoku matātahi lauʻoneʻone takatakai, pea ʻoku mita pē ʻe 3 ʻa e māʻolunga mei he fukahi tahí ʻa hono potu māʻolunga tahá. ʻOku ʻikai lava e vaí ia ʻo ‘tafe atu,’ ko ia ai ʻoku fonufonu vai pē ʻa e tukui ʻapí ia mo e ngaahi feituʻu fakapisinisí pea ʻoku laulau ʻaho ia kae toki mātuʻu. ʻOku faʻa fefaʻuhi ʻa e kakai ʻo e motú ʻi he lahi ʻa e vaí mo e ʻoneʻone vivikú.
ʻOku lahi e taimi ʻoku ʻikai ke faʻa maha ai e fanga kiʻi vai pelepelá kimuʻa pea toe haʻaki hifo ha ʻuha lahi ʻo fakalalahi ai pē ʻa e palopalemá.
Ka ʻoku ʻafioʻi pē ʻe he ʻOtuá ʻa e ʻū matalaʻilili kotoa ʻi Heʻene teleʻá, pea ʻokú Ne ʻafioʻi Hono ʻofefine ko Katalina Likilongí. Ne fanauʻi ʻa Katalina mo ha faingataʻaʻia fakaesino; naʻe mamatea fakatouʻosi hono ongo vaʻé mei he foʻi tuí ki lalo.
ʻI he fakalau atu ʻa e taʻú ne fie maʻu ke fakahoko ha tafa kehekehe kia Katalina ke tokoni ki hono sinó ke ngāue lelei ange. Pea—neongo ne faingataʻa ʻa e moʻuí ki he finemui Māsolo mata-malimali, leʻo vaivai mo loto-angavaivai ko ʻení, ka naʻe kei fakahaaʻi pē ʻe Katalina ʻa e tāpuaki lahi ʻokú ne maʻu mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
ʻI he ʻaho 1 ʻo ʻAokosi 2019, ne maʻu ai ʻe Katalina ha sea teketeke foʻou mei he vaʻa tokoni ʻofa fakaetangata ʻa e Siasí.
Ko hono maʻu ko ia ha sea teketeké ko ha fuʻu meʻa mahuʻinga ia—kuo pau ke fakapapauʻi ʻe kinautolu ne nau fokotuʻu ʻa e ʻū seá ʻoku feʻunga lelei e seá mo e tokotaha taki taha. Hangē ko ʻení, naʻe fie maʻu ke hao lelei ʻa e ongo nimá ʻi he fakatou tafaʻaki ʻo e sea teketeké ʻo ʻikai ha toe ʻatā ke hao ai ha meʻa kehe—ʻoku tokoni ʻeni ke taʻofi ai ha felāngaaki ʻo e sinó; pea fie maʻu foki mo e māʻolunga ʻo e seá ke tonu, etc.
Ne aʻu pē ki he taimi ne teʻeki ke maʻu ai ʻa e saliote teketeke ʻa Kataliná, ne ʻikai ko ha taha ia ke ne nofonoa pē ʻi ʻapi mo hono mehikitangá, ʻa ia ʻokú na nofó. Ka neongo iá, ne pehē ʻe Katalina ʻokú ne houngaʻia ʻi he tauʻatāina ʻoku ʻomi ʻe he sea teketeké maʻaná, pea ko e taha ia ʻo e ngaahi tāpuaki maʻongoʻonga kuó ne maʻu talu ʻene kau mai ki he Siasí ʻi Siulai 2018. ʻOku kau ʻi hono ngaahi tāpuaki mahuʻinga tahá ʻa e:
-
ʻIloʻi ko e ʻofefine ia ʻo e ʻOtuá
-
ʻIloʻi ʻoku ʻofa haohaoa ʻEne Tamai Hēvaní ʻiate iá
-
Fanongoa mo tali ʻene ngaahi lotú, pea
-
Tokolahi ange hono ngaahi kaungāmeʻa he taimí ni—ʻa kinautolu ʻoku omi ki hono ʻapí ʻo ʻaʻahi mai kiate iá.
Ko e paionia ʻa Katalina ʻi hono fāmilí; ko e toko taha pē ia ʻi hono fāmilí ke kau ki he Siasí . . . ʻi he taimi ní.
ʻI he taʻu kuo ʻosí, ne ʻave ʻe ha meʻalele makehe ʻa Katalina ki he akó—ʻokú ne manako ke ako. Naʻá ne toe maʻu foki mo e faingamālie ke kau atu ki he ngaahi kalasi seminelí.
ʻI heʻeku fehuʻi kia Katalina pe ko e hā ʻa e meʻa ʻokú ne fie maʻu ke faí ʻi heʻene ʻosi mei he akoʻanga māʻolungá, naʻá ne pehē mai ʻokú ne fie “hoko ko ha faifekau sisitā pea vahevahe atu e ongoongolelei ʻo Sīsū Kalaisí.”