Ngaahi Peesi Fakalotofonuá
Lea ʻa e Palesiteni Lahi ʻo e Palaimelí ʻi he UN ʻi Siniva
ʻOku kau atu ʻa Sisitā Jones ki ha polokalama naʻe fakapaʻanga ʻe he UNICEF.
Naʻe lea ʻa e palesiteni lahi ʻa e Palaimeli ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki ha kakai fakatuʻapuleʻanga ʻi he Ngaahi Puleʻanga Fakatahatahá ʻi Siniva, Suisalani.
“ʻOku ou matuʻaki fiefia ke ʻi heni ʻo fakafofongaʻi ʻa e Palaimelí, ko e taha ʻo e ngaahi houalotu tokolahi taha maʻá e fānaú ʻi he māmaní, peá u lea ʻo fakafofongaʻi atu ʻa e Kautaha Tokoni ʻOfa ʻa e Siasí,” ko e lea ia ʻa Sisitā Sōnasí, ʻa ia naʻe kau atu ki ha pēnolo ʻa e kau leá ʻi he ʻaho Tuʻapulelulu ko hono 5 ʻo Tīsemá, ʻi ha polokalama ne fakapaʻanga ʻe he UNICEF ʻi he Palais des Nations.
Ne kau ʻi he kau lea kehé ʻa Henilieta Foa, ko e talēkita pule ʻo e UNICEF; Manuela Foniteini, talēkita ʻo e ngaahi ngāue fakavavevave ʻa e UNICEF; Sikiliti Kaaka, ko e minisitā ki he fefakatauʻaki ki mulí mo e ngāue fakalakalaka ʻa Netalení; mo Musoni ʻAlamelehani, ko e ʻAmipasitoa Ngāue Tokoni ʻa e UNICEF.
ʻI he lolotonga ʻa e pēnoló, naʻá ne fakamatala ʻo pehē, “ʻI heʻemau tui fakalotú, ʻoku mau tui ko e kakai kotoa pē ko e fānau ia ʻa e ʻOtuá, pea ʻoku mau fai ʻa e tokoní ʻo tatau ai pē pe ko e hā ʻa e matakalí, tui fakalotú, pe tangataʻifonuá. ʻOku mau talitali lelei ʻa e fengāueʻaki fakataha mo e ngaahi hoa-ngāue ʻi māmani fulipē ke tauhi ʻa e fakalakalaka mo e tupulaki ʻa e fānau kotoa pē, kae tautautefito kiate kinautolu ʻoku liʻekiná.”
Ne fakafuofuaʻi ʻe he Kōsilio Kumi Hūfanga ʻa Noaueí, ʻoku feʻunga mo e fānau ʻe toko 63 miliona ʻi he ngaahi feituʻu faingataʻaʻiá ʻoku ʻikai ke nau lava ʻo ʻalu ki he akó.
Naʻe pehē ʻe he taki ʻo e tui fakalotu fakaemāmani lahí, ko e Kautaha Tokoni ʻOfa ʻa e Siasí, ʻa e nima tokoni ʻofa fakaetangata ʻa e Siasí, ʻoku hoa-ngāue ia mo e UNICEF “ke tokoniʻi e fānaú ke nau maʻu ʻa e taukei mo e ngaahi faingamālie ʻi he moʻuí ʻoku fie maʻu ke veteki ʻaki e nofo masivesivá, tukuhāusiá, faingataʻaʻiá mo e fakamamahí.”
ʻI he taʻu kuo ʻosí, ne toe fakalahi ai ʻe he Kautaha Tokoni ʻOfa ʻa e Siasí ʻa ʻene hoa-ngāue mo e UNICEF ke tokoni ki he fakalakalaka tokamuʻa mo e fiemaʻu fakaako ʻa e fānau ʻoku uesia ʻi he ngaahi faingataʻa ʻo e kumi hūfanga ʻi Sūtani Tongá, Lepapulika Fakatemokalati ʻo Kongokoú, Keniā mo ʻIukanitā.
Naʻe lipooti ʻe Sisitā Sōnasi, makatuʻunga ʻi he hoa-ngāue ko ʻení, kuo kau ai ha fānau ʻe toko 36,000 tupu ʻi he taimí ni ki he ngaahi ʻekitivitī fakalakalaka ʻa e fānau tokamuʻá. ʻIkai ngata aí, kuo lava ʻeni ʻe ha ngaahi mātuʻa ʻe 10,000 ʻo ʻomi ʻa e ngaahi founga lelei taha ki he fakalakalaka ʻa e fānaú mo e tauhi fānaú ki honau ngaahi ʻapí.
Naʻe huluʻi fakahangatonu ʻa e polokalamá ʻi he YouTube channel ʻa e UNICEF.