Pagtiyak ng Isang Makatwirang Hatol
Para matiyak ang isang makatwirang hatol, aalisin ng nagbabayad-salang sakripisyo ng Tagapagligtas ang mga sanga-sanga ng kamangmangan at masasakit na tinik ng pasakit na idinulot ng iba.
Itinuturo ng Aklat ni Mormon ang Doktrina ni Cristo
Noong nakaraang Oktubre, hinamon tayo ni Pangulong Russell M. Nelson na pag-isipan kung paano mababago ang ating buhay kung ang ating “kaalamang natamo mula sa Aklat ni Mormon ay biglang mawala?”1 Pinagnilayan ko na ang kanyang tanong, at sigurado ako na ginawa rin ito ng marami sa inyo. Isang ideya ang nagpabalik-balik sa aking isipan—kung wala ang Aklat ni Mormon at ang malinaw na mga turo nito tungkol sa doktrina ni Cristo at sa Kanyang nagbabayad-salang sakripisyo, saan ako babaling para sa kapayapaan?
Ang doktrina ni Cristo—na binubuo ng nakapagliligtas na mga alituntunin at ordenansa ng pananampalataya kay Cristo, pagsisisi, binyag, kaloob na Espiritu Santo, at pagtitiis hanggang wakas—ay itinuro nang maraming beses sa lahat ng banal na kasulatan ng Pagpapanumbalik ngunit may partikular na kapangyarihan sa Aklat ni Mormon.2 Ang doktrina ay nagsisimula sa pananampalataya kay Cristo, at bawat isa sa mga elemento nito ay nakasalalay sa pagtitiwala sa Kanyang nagbabayad-salang sakripisyo.
Tulad ng itinuro ni Pangulong Nelson, “Ang Aklat ni Mormon ay nagbibigay ng ganap at lubos na mapaniniwalaang kaalaman tungkol sa Pagbabayad-sala ni Jesucristo na matatagpuan sa buong aklat.”3 Kapag mas nauunawaan natin ang banal na kaloob ng Tagapagligtas, mas malalaman natin, sa ating puso’t isipan,4 ang realidad ng pagtiyak ni Pangulong Nelson na “ang mga katotohanan ng Aklat ni Mormon ay may kapangyarihan na pagalingin, panatagin, ipanumbalik, tulungan, palakasin, aluin, at pasayahin ang ating kaluluwa.”5
Tinutugunan ng Pagbabayad-sala ng Tagapagligtas ang Lahat ng Hinihingi ng Katarungan
Ang isang napakahalaga at nakapapayapang kontribusyon ng Aklat ni Mormon sa ating pagkaunawa tungkol sa Pagbabayad-sala ng Tagapagligtas ay ang turo nito na tinutugunan ng maawaing sakripisyo ni Cristo ang lahat ng hinihingi ng katarungan. Tulad ng ipinaliwanag ni Alma, “Ang Diyos na rin ang magbabayad-sala para sa mga kasalanan ng sanlibutan, upang maisakatuparan ang plano ng awa, upang tugunin ang hinihingi ng katarungan, at nang sa gayon, ang Diyos ay maging isang ganap, makatarungang Diyos, at isa ring maawaing Diyos.”6 Ang plano ng awa ng Ama7—na tinatawag din sa mga banal na kasulatan na plano ng kaligayahan8 o plano ng kaligtasan9—ay hindi maisasakatuparan maliban kung matugunan ang lahat ng hinihingi ng katarungan.
Ngunit ano ba talaga ang “mga hinihingi ng katarungan”? Isipin ang sariling karanasan ni Alma. Tandaan na noong binata pa si Alma, humayo siya na naghahangad na “wasakin ang simbahan.”10 Sa katunayan, sinabi ni Alma sa kanyang anak na si Helaman na siya ay “pinarusahan ng mga pasakit ng impiyerno” dahil talagang “pinaslang [niya] ang marami sa … mga anak [ng Diyos]” sa pag-akay sa kanila “palayo tungo sa pagkawasak.”11
Ipinaliwanag ni Alma kay Helaman na dumating sa wakas ang kapayapaan sa kanya nang “maapuhap ng [kanyang] isipan” ang turo ng kanyang ama “hinggil sa pagparito [ni] Jesucristo … na magbabayad-sala para sa mga kasalanan ng sanlibutan.”12 Nagsumamo ang nagsisising si Alma para sa awa ni Cristo13 at pagkatapos ay nakadama ng kagalakan at ginhawa nang matanto niya na nagbayad-sala na si Cristo para sa kanyang mga kasalanan at natugunan ang lahat ng hiningi ng katarungan. Muli, ano ang hiningi ng katarungan kay Alma? Tulad ng itinuro mismo ni Alma kalaunan, “Walang maruming bagay ang maaaring magmana ng kaharian ng Diyos.”14 Kaya, maaaring ang bahaging nakaginhawa kay Alma ay na kung hindi dahil sa awa, mananaig sana ang katarungan at hindi na siya makakabalik upang mamuhay sa piling ng Ama sa Langit.15
Pinagagaling ng Tagapagligtas ang mga Sugat na Hindi Natin Kayang Pagalingin
Ngunit nakatuon lamang ba ang kagalakan ni Alma sa kanyang sarili—sa kanyang pag-iwas sa kaparusahan at sa kanyang pagiging karapat-dapat na bumalik sa Ama? Alam natin na nabalisa rin si Alma para sa mga taong inakay niya palayo sa katotohanan.16 Ngunit hindi kayang pagalingin at ibalik mismo ni Alma ang lahat ng naakay niya palayo. Hindi niya kayang tiyakin na mabibigyan sila ng patas na pagkakataon na matutuhan ang doktrina ni Cristo at mapagpala sa pamamagitan ng pamumuhay ng masasayang alituntunin nito. Hindi niya kayang ibalik yaong mga maaaring namatay na nalinlang pa rin ng kanyang mga maling turo.
Gaya ng minsang itinuro ni Pangulong Boyd K. Packer: “Ang ideya na nagligtas kay Alma … ay ito: Ang maibalik ang hindi ninyo kayang ibalik, mapagaling ang sugat na hindi ninyo kayang pagalingin, maayos yaong inyong sinira at hindi kayang ayusin ang mismong layunin ng pagbabayad-sala ni Cristo.”17 Ang nakagagalak na katotohanan na “[n]aapuhap” ng isipan ni Alma ay hindi lamang siya ang malilinis kundi mapapagaling at gagawing buo rin maging ang mga nasaktan niya.
Tinitiyak ng Sakripisyo ng Tagapagligtas ang Makatwirang Hatol
Ilang taon bago naligtas si Alma ng nagbibigay-katiyakang doktrinang ito, itinuro ni Haring Benjamin ang lawak ng pagpapagaling na handog ng nagbabayad-salang sakripisyo ng Tagapagligtas. Ipinahayag ni Haring Benjamin na “masayang balita ng dakilang kagalakan” ang ibinigay sa kanya “ng isang anghel mula sa Diyos.”18 Kabilang sa masayang balitang iyon ang katotohanan na si Cristo ay magdurusa at mamamatay para sa ating mga kasalanan at pagkakamali upang tiyakin na “ang makatwirang hatol ay sumapit sa mga anak ng tao.”19
Ano ba talaga ang hinihingi ng isang “makatwirang hatol”? Sa sumunod na talata, ipinaliwanag ni Haring Benjamin na para matiyak ang isang makatwirang hatol, nagbayad-sala ang dugo ng Tagapagligtas “para sa mga kasalanan ng mga yaong nahulog dahil sa pagkakasala ni Adan” at para sa mga “nangamatay na hindi nalalaman ang kalooban ng Diyos hinggil sa kanila, o kung sino ay walang malay na nagkasala.”20 Hinihingi rin ng isang makatwirang hatol, pagtuturo niya, na “ang dugo ni Cristo ay [m]agbayad-sala para sa” mga kasalanan ng maliliit na bata.21
Ang mga banal na kasulatang ito ay nagtuturo ng isang maluwalhating doktrina: pinagagaling ng nagbabayad-salang sakripisyo ng Tagapagligtas, na isang libreng kaloob, yaong mga nagkasala nang hindi nila alam—yaong mga tao, wika nga ni Jacob, na “walang batas na ibinigay.”22 Ang pananagutan sa kasalanan ay depende sa liwanag na ibinigay sa atin at nakasalalay sa ating kakayahang gamitin ang ating kalayaan.23 Nalaman lamang natin ang nagpapagaling at nagpapanatag na katotohanang ito dahil sa Aklat ni Mormon at sa iba pang mga banal na kasulatan tungkol sa Pagpapanumbalik.24
Mangyari pa, kung may batas na ibinigay, kung alam natin ang kalooban ng Diyos, mananagot tayo. Tulad ng binigyang-diin ni Haring Benjamin: “Sa aba niya na nakaaalam na siya ay naghihimagsik laban sa Diyos! Sapagkat ang kaligtasan ay di mapapasa kaninuman, maliban sa pamamagitan ng pagsisisi at pananampalataya sa Panginoong Jesucristo.”25
Isa rin itong masayang balita ng doktrina ni Cristo. Hindi lang pinagagaling at ipinanunumbalik ng Tagapagligtas ang mga nagkakasala dahil sa kawalan ng kaalaman, kundi gayon din, para sa mga nagkakasala laban sa liwanag, pagagalingin sila ng Tagapagligtas kung sila ay magsisisi at mananampalataya sa Kanya.26
Marahil talagang “[n]aapuhap” ni Alma ang dalawang katotohanang ito. Tunay nga kayang nadama ni Alma ang inilarawan niyang “[napakagandang] kagalakan”27 kung naisip niya na iniligtas siya ni Cristo ngunit iniwang may pinsala magpakailanman ang mga yaong inakay niya palayo sa katotohanan? Siguradong hindi. Para madama ni Alma ang lubos na kapayapaan, kailangan din ng mga taong napinsala niya ng pagkakataong mapagaling.
Ngunit paano ba talaga sila—o yaong mga maaari nating mapinsala—mapapagaling? Bagama’t hindi natin lubos na nauunawaan ang mga sagradong paraan kung paano nagpapagaling at nagpapanumbalik ang nagbabayad-salang sakripisyo ng Tagapagligtas, alam natin na upang matiyak ang isang makatwirang hatol, lilinisin ng Tagapagligtas ang lahat ng sanga-sanga ng kamangmangan at ang masasakit na tinik ng pasakit na idinulot ng iba.28 Sa pamamagitan nito tinitiyak Niya na lahat ng anak ng Diyos ay bibigyan ng pagkakataon, nang may kalinawan, na piliing sundin Siya at tanggapin ang dakilang plano ng kaligayahan.29
Aayusin ng Tagapagligtas ang Lahat ng Nasira Natin
Ang mga katotohanang ito ang naghatid marahil ng kapayapaan kay Alma. At ang mga katotohanan ding ito ang dapat maghatid sa atin ng malaking kapayapaan. Dahil tayo ay likas na mga lalaki at babae, tayong lahat ay nagkakabungguan, o kung minsa’y nagkakabanggaan, sa isa’t isa at nagdudulot ng pinsala. Tulad ng mapapatotohanan ng sinumang magulang, ang kirot na nauugnay sa ating mga pagkakamali ay hindi lamang dahil sa takot na maparusahan tayo mismo kundi sa takot na maaaring nalimitahan natin ang kagalakan ng ating mga anak o sa anumang paraan ay nahadlangan natin silang makita at maunawaan ang katotohanan. Ang maluwalhating pangako ng nagbabayad-salang sakripisyo ng Tagapagligtas ay na pagdating sa ating mga pagkakamali bilang mga magulang, hindi Niya pananagutin ang ating mga anak at ipinapangako Niya na pagagalingin Niya sila.30 At kahit nagkasala sila laban sa liwanag—tulad nating lahat—nakaunat ang Kanyang bisig ng awa31 at tutubusin Niya sila kung aasa lamang sila sa Kanya at susunod sa Kanya.32
Bagama’t may kapangyarihan ang Tagapagligtas na ayusin ang hindi natin kayang ayusin, iniuutos Niya sa atin na gawin ang lahat ng makakaya natin para itama ang maling ginawa natin bilang bahagi ng ating pagsisisi.33 Hindi lamang ang ugnayan natin sa Diyos ang naaapektuhan dahil sa ating mga kasalanan at pagkakamali kundi maging ang ugnayan natin sa iba. Kung minsan ang ating mga pagsisikap na magpagaling at magpanumbalik ay maaaring kasingsimple ng paghingi ng tawad, ngunit sa ibang mga pagkakataon ang pagtatama ng mali ay maaaring mangailangan ng maraming taon ng mapagkumbabang pagsisikap.34 Subalit, sa marami nating mga kasalanan at pagkakamali, talagang hindi natin kayang lubusang mapagaling ang mga nasaktan natin. Ang napakaganda at nakapapayapang pangako ng Aklat ni Mormon at ng ipinanumbalik na ebanghelyo ay na aayusin ng Tagapagligtas ang lahat ng nasira natin.35 At pagagalingin din Niya tayo kung babaling tayo sa Kanya nang may pananampalataya at magsisisi sa naidulot nating pinsala.36 Ibibigay Niya ang mga kaloob na ito dahil sakdal ang Kanyang pag-ibig sa ating lahat37 at dahil tapat Siyang nangako ng pagtiyak ng isang makatwirang hatol na kumikilala kapwa sa katarungan at awa. Pinatototohanan ko na ito ay totoo sa pangalan ni Jesucristo, amen.