រៀបចំដើម្បីស្តាប់ទ្រង់អំឡុងសន្និសីទទូទៅ

ដោយ អែលឌើរ ភីទ័រ ហ្វ្លិចឈើរ មើរស៍

First Counselor, Asia Area Presidency

« យើងគឺជាសាក្សីសម័យទំនើបនៃការបំពេញដ៏មានឥទ្ធិពលពីការរៀបចំដ៏ព្យាកររបស់ព្រះអំពីប្រជារាស្រ្តរបស់ទ្រង់ដោយអស់អ្នកទាំងឡាយដែលទ្រង់ត្រាស់ហៅថាជា ព្យាការី អ្នកមើលឆុត និងអ្នកបើកសម្ដែងវិរណៈ ។ »

នៅក្នុងសុន្ទរកថាបើកក្នុងសន្និសីទទូទៅខែមេសា ឆ្នាំ២០២០ ប្រធាន ណិលសុនបានមានប្រសាសន៍ថា ៖

« ការដាក់កំហិតសព្វថ្ងៃនេះ ទាក់ទងទៅនឹងវីរុសដ៏សាហាវមួយ ជាការសាកល្បងផ្ទាល់ខ្លួននៃជីវិតដែលមានហួសពីការរាតត្បាតនេះ ។ ការសាកល្បងនាពេលអនាគតអាចកើតចេញមកពីឧប្បទ្ទវហេតុ គ្រោះធម្មជាតិ ឬការឈឺចាប់ផ្ទាល់ខ្លួនដែលពុំរំពឹងទុក ។

តើយើងអាចស៊ូទ្រាំនឹងការសាកល្បងដូច្នេះយ៉ាងដូចម្ដេច ? ព្រះអម្ចាស់បានមានបន្ទូលដល់យើងថា « បើសិនជាអ្នករាល់គ្នា បានប្រុងប្រៀបទុកជាសេ្រច នោះអ្នករាល់គ្នានឹងមិនត្រូវខ្លាចឡើយ ។ »¹ ប្រាកដណាស់ ខាងសាច់ឈាម យើងអាចស្ដុកទុកអាហារ ទឹក និងការសន្សំសំចៃផ្ទាល់ខ្លួន ។ ប៉ុន្តែសំខាន់ដូចគ្នានេះផងដែរ គឺតម្រូវការរបស់យើងដើម្បីបំពេញឃ្លាំង ខាងវិញ្ញាណ ផ្ទាល់ខ្លួនដោយសេចក្តីជំនឿ សេចក្តីពិត និងទីបន្ទាល់ » ។²

សន្និសីទទូទៅខែតុលា ផ្តល់ដល់យើងម្នាក់ៗនូវឱកាសដើម្បី « ស្តាប់ទ្រង់ » តាមរយៈការបង្រៀនទាំងឡាយ និងទីបន្ទាល់នៃអ្នកបម្រើដ៏ជម្រើសរបស់ទ្រង់ ។ ព្យាការី អេម៉ុស បានបង្រៀនថា « ពិតប្រាកដជាព្រះយេហូវ៉ាទ្រង់នឹងមិនធ្វើអ្វីដូច្នោះឡើយ លើកទ្រង់សម្ដែង ឲ្យពួកហោរាជាអ្នកបម្រើទ្រង់ ឃើញគំនិតលាក់កំបាំងរបស់ទ្រង់ផង ។ »³

នៅពេលយើងពិចារណានូវការបង្រៀនរបស់ពួកព្យាការី និងសាវកអំឡុងឆ្នាំ ២០១៨ និង ឆ្នាំ២០១៩ យើងទទួលស្គាល់ថា ពួកលោកមិនបានដឹងអំពីប្រភេទនៃគ្រោះមហន្តរាយដែលនឹងកើតឡើងនោះឡើយ ។ ប៉ុន្តែ ពួកលោកត្រូវបានបំផុសគំនិតឲ្យបង្រៀន និងរៀបចំយើងយ៉ាងល្អឥតខ្ចោះសម្រាប់ឧបសគ្គ និងការសាកល្បងដ៏ពិបាកបំផុតដែលបានកើតមកជាមួយនឹងជំងឺរាតត្បាតកូវីដ-១៩ ។ យើងគឺជាសាក្សីសម័យទំនើបនៃការបំពេញដ៏មានឥទ្ធិពលពីការរៀបចំដ៏ព្យាកររបស់ព្រះអំពីប្រជារាស្រ្តរបស់ទ្រង់ដោយអស់អ្នកទាំងឡាយដែលទ្រង់ត្រាស់ហៅថាជា ព្យាការី អ្នកមើលឆុត និងអ្នកបើកសម្ដែង ។

សូមពិចារណានូវសារលិខិតដ៏ព្យាករមួយចំនួនដែលយើងបានទទួលមកពីប្រធាន រ័សុល អិម ណិលសុន កាលពី ២ឆ្នាំមុន ៖

វិវរណៈ ៖ « ខ្ញុំមានភាពសុទិដ្ឋិនិយមចំពោះអនាគត ។ ប៉ុន្តែខ្ញុំក៏មិនបានដឹងជាមុនអំពីអនាគតដែរ ។ យើងរស់នៅក្នុងពិភពលោកមួយដែលស្មុគស្មាញ និងកាន់តែចម្រូងចម្រាស ។ បើយើងសង្ឃឹមចង់ស្វែងរកអ្វីមួយដែលមានតម្លៃតាមរយៈទស្សនជាច្រើន និងទស្សនវិជ្ជារបស់មនុស្សដែលវាយប្រហារដល់សេចក្ដីពិត នោះយើងត្រូវតែរៀនទទួលវិវរណៈ » ។⁴

ការងារបម្រើ ៖ « អស់ជាច្រើនខែមកហើយ ពួកយើងបានស្វែងរកវិធីដែលល្អប្រសើរដើម្បីផ្ដល់ការងារបម្រើចំពោះសេចក្ដីត្រូវការខាងវិញ្ញាណ និងខាងសាច់ឈាមរបស់ប្រជាជនយើងតាមរបៀបរបស់ព្រះអង្គសង្គ្រោះ ។ ការខិតខំផ្ដល់ការងារបម្រើប្រកបដោយប្រសិទ្ធភាពអាចធ្វើទៅបានដោយអំណោយទានពីកំណើតរបស់បងប្អូនស្រី និងអំណាចបព្វជិតភាពដែលគ្មានអ្វីប្រៀបផ្ទឹមបាន ។ ពួកយើងទាំងអស់គ្នាត្រូវការការការពារពីឧបាយកលដ៏ប៉ិនប្រសព្វរបស់មារសត្រូវ ។ »⁵

ការប្រែចិត្ត ៖ «ដូច្នេះ នៅពេលព្រះយេស៊ូវសុំបងប្អូននិងខ្ញុំឲ្យ « ប្រែចិត្ត »⁶ ទ្រង់កំពុងតែអញ្ជើញយើងឲ្យផ្លាស់ប្តូរគំនិត ចំណេះដឹង វិញ្ញាណ—ព្រមទាំងរបៀបដែលយើងដកដង្ហើម ។ ទ្រង់កំពុងសុំឲ្យយើងផ្លាស់របៀបដែលយើងស្រឡាញ់ គិត បម្រើ ចំណាយពេល ការប្រព្រឹត្តចំពោះភរិយា បង្រៀនកូនៗយើង ព្រមទាំងការថែទាំរាងកាយរបស់យើងផង ។ »⁷

គេហដ្ឋាន—មជ្ឈមណ្ឌលនៃការរៀនសូត្រដំណឹងល្អ ៖ « ខ្ញុំសន្យាថា នៅពេលបងប្អូនធ្វើការដោយឧស្សាហ៍ព្យាយាម ដើម្បីរៀបចំគេហដ្ឋានរបស់បងប្អូនឲ្យក្លាយទៅជាមជ្ឈមណ្ឌលនៃការរៀនសូត្រដំណឹងល្អ នោះយូរៗទៅ ថ្ងៃឈប់សម្រាករបស់បងប្អូននឹងបានជាទីរីករាយចិត្តយ៉ាងពិតប្រាកដ ។ កូនចៅរបស់បងប្អូននឹងមានចិត្តរំភើបក្នុងការរៀន និងរស់នៅតាមការបង្រៀនរបស់ព្រះអង្គសង្គ្រោះ ហើយឥទ្ធិពលរបស់មារសត្រូវនៅក្នុងជីវិតរបស់បងប្អូន និងគេហដ្ឋានរបស់បងប្អូន នឹងត្រូវសាបរលាប ។ គ្រួសាររបស់បងប្អូននឹងមានការផ្លាស់ប្ដូរយ៉ាងខ្លាំង និងរឹងមាំ ។ »⁸

ការប្រមូលផ្តុំសាសន៍អ៊ីស្រាអែល ៖ « សារលិខិតរបស់យើងទៅកាន់ពិភពលោក គឺសាមញ្ញ ហើយដោយស្មោះ ៖ ពួកយើងសូមអញ្ជើញបុត្រាបុត្រីរបស់ព្រះទាំងអស់ទាំងនៅសងខាងនៃវាំងននឲ្យមករកព្រះអង្គសង្គ្រោះ ទទួលយកពរជ័យនៃព្រះវិហារបរិសុទ្ធដ៏បរិសុទ្ធ ទទួលបានអំណរយូរអង្វែង និងសក្ដិសមសម្រាប់ជីវិតអស់កល្បជានិច្ច ។ »⁹

អំណាចបុព្វជិតភាព ៖ « ស្ត្រី និងបុរសគ្រប់រូបដែលចុះសេចក្ដីសញ្ញាជាមួយព្រះ ហើយរក្សាសេចក្ដីសញ្ញាទាំងនោះ និងចូលរួមក្នុងពិធីបរិសុទ្ធបព្វជិតភាពដោយសក្ដិសម អាចមានព្រះចេស្ដានៃព្រះដោយផ្ទាល់ ។ អ្នកដែលបានទទួលអំណោយទានពិសិដ្ឋនៅក្នុងព្រះដំណាក់នៃព្រះអម្ចាស់បានទទួលអំណោយទានមួយនៃអំណាចបព្វជិតភាពរបស់ព្រះតាមរយៈគុណធម៌នៃសេចក្ដីសញ្ញារបស់ពួកគេ ព្រមទាំងអំណោយទាននៃចំណេះដឹងដើម្បីដឹងពីរបៀបដើម្បីទាញយកព្រះចេស្ដានោះ » ។¹⁰

យើងបង្ហាញទីបន្ទាល់របស់យើងអំពីសារៈសំខាន់នៃពួកព្យាការី និងពួកសាវកសម័យទំនើបរបស់ព្រះអង្គសង្គ្រោះ តាមរយៈការស្តាប់ការបង្រៀនរបស់ពួកលោក និងឆ្លើយតបទៅនឹងការអញ្ជើញរបស់ពួកលោក ។ ពេលដែលយើងស្តាប់ និងអានឡើងវិញនូវសារលិខិតរបស់ពួកលោក យើងទទួលការបំផុសគំនិតតាមរយៈព្រះវិញ្ញាណបរិសុទ្ធ ។ ការបំផុសគំនិតទាំងនេះអនុញ្ញាតឲ្យសារលិខិតដ៏ជាក់លាក់របស់ព្រះអង្គសង្គ្រោះ ដែលបានរៀបចំសម្រាប់យើងម្នាក់ៗដោយផ្អែកលើសេចក្តីត្រូវការបច្ចុប្បន្នរបស់យើងដោយផ្ទាល់ ចូលដល់ដួងចិត្តរបស់យើង និងនិយាយទៅកាន់ព្រលឹងរបស់យើង ។ នេះគឺជារបៀបមួយដ៏សំខាន់ដែលយើងរក្សាសេចក្តីសញ្ញាបុណ្យជ្រមុជទឹករបស់យើងដើម្បី « ចងចាំទ្រង់ជានិច្ច » ស្តាប់សេចក្តីអង្វរកឲ្យ « ចូរ មកឯខ្ញុំ » ហើយធ្វើតាមការណែនាំរបស់ព្រះវបិតាសួគ៌ ឲ្យ « ស្តាប់ទ្រង់ ! »

នៅចំកណ្តាលនៃជំពូកស្តីពីសង្គ្រាមរវាងសាសន៍ នីហ្វៃ-លេមិន នៅក្នុងព្រះគម្ពីរមរមន ពួកសាសន៍នីហ្វៃត្រូវបានបំផុសគំនិត និងដឹកនាំដោយមរ៉ូណៃឲ្យចងចាំនូវការយាងមកនៃព្រះអង្គម្ចាស់ព្រះយេស៊ូវគ្រីស្ទ និងដើម្បីគោរពតាមព្រះបញ្ញត្តិរបស់ទ្រង់ ។ ពួកសាសន៍នីហ្វៃ « ស្តាប់ទ្រង់ ! » តាមរយៈអ្នកបម្រើរបស់ទ្រង់ និងបន្ទាប់មកមានបទពិសោធន៍នៃរយៈពេលមួយនៃសេចក្តីរីកចម្រើន និងភាពសុខសាន្ត ។ មរមនបានសរសេរដោយផ្តល់យោបល់លើរយៈពេលនេះថា « …ហើយអស់អ្នកណាដែលស្មោះត្រង់ក្នុងការកាន់តាមព្រះបញ្ញត្តិទាំងឡាយនៃព្រះអម្ចាស់ ត្រូវបានដោះលែងគ្រប់ពេលវេលា… » និង « …ពុំដែលមានពេលណានៅក្នុងចំណោមប្រជាជននីហ្វៃដែលសប្បាយ… ជាងសម័យមរ៉ូណៃឡើយ ។ »¹¹

វាគឺជាការអធិស្ឋានរបស់យើងថា នៅក្នុងអំឡុងពេលនៃជំងឺ ការបាត់បង់ដ៏សោកនាដកម្ម ភាពចលាចល និងការផ្លាស់ប្តូរនេះ នោះយើងអាចរកបាននូវភាពសុខសាន្ត ការធានា និងអំណរដូចដែលពួកនីហ្វៃបានជួបនៅក្នុងថ្ងៃនៃភាពចលាចល និងការសាកល្បងរបស់ពួកគេដែរ ។ សូមឲ្យយើងម្នាក់ៗ ផ្ទាល់ និងជាក្រុមគ្រួសារ រៀបចំខាងព្រលឹងវិញ្ញាណដើម្បី « ស្តាប់ទ្រង់ ។ » ដូច្នេះសូមឲ្យយើងឧទ្ទិសពេលវេលារបស់យើងនៅក្នុងទីតាំងដែលមានគារវភាពមួយ ដើម្បីយើងអាចផ្តោតចិត្តស្តាប់ព្យាការី និងពួកសាវករបស់ព្រះអម្ចាស់នៅអំឡុងសន្និសីទទូទៅ ។ បន្ទាប់មក សូមឲ្យយើងសិក្សា និងពិចារណាពាក្យសម្ដីរបស់ពួកលោកដោយស្មោះត្រង់ និងដោយយកចិត្តទុកដាក់ ។

នៅក្នុងសន្និសីទទូទៅនៅខែតុលានេះ បងប្អូនទាំងឡាយដែលត្រូវបានចាត់តាំងនឹងមានប្រសាសន៍ដោយព្រះចេស្ដានៃព្រះវិញ្ញាណបរិសុទ្ធ ។ សារលិខិតរបស់ពួកលោកនឹងជួយបង្វែរដួងចិត្តរបស់យើងទៅរកព្រះអម្ចាស់ព្រះយេស៊ូវគ្រីស្ទ និងជួយយើងឲ្យ « ចូរមកឯទ្រង់ » ហើយ « ស្តាប់ទ្រង់ » ។

« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នា ឈប់សម្រាក » ។¹²

« ឯអស់អ្នកដែលមកស្តាប់ពាក្យខ្ញុំទាំងនេះ ហើយប្រព្រឹត្តតាម នោះខ្ញុំនឹងបង្ហាញឲ្យអ្នករាល់គ្នាដឹងថា អ្នកនោះធៀបដូចជាអ្វី ៖ គឺធៀបដូចជាមនុស្សម្នាក់ដែលសង់ផ្ទះ គាត់បានជីកយ៉ាងជ្រៅ ដាក់ជើងសសរនៅលើថ្ម កាលមានទឹកជន់ឡើង ហូរគំហុកមកប៉ះនឹងផ្ទះនោះ នោះធ្វើឲ្យរញ្ជួយមិនបានឡើយ ពីព្រោះបានសង់នៅលើថ្ម » ។¹³